Vahe 2
1 Oku ne ako he nau feofoofani, bea loto agavaivai, o hage koia oku ha mai i he agavaivai moe hakeaki‘i a Kalaisi: 12 ke nau gaue mo tokaga lahe ki he fakamoui, ka nau hoko koe gaahi māma ki he mama halaia ni, 16 bea te nau fakafiemalie ai kiate ia koe nau abosetolo, kuo tali teu ke feilaulau aki ki he Otua. 19 Oku ne amanaki ke fekau atu a Timote kiate kinautolu, bea ne fakaogolelei lahi aubito ia, 25 bea mo Ebafalotito foki, aia oku ne fekau atu kiate kinautolu.
¶ 1 KOIA kabau oku ia Kalaisi ha fiemalie, kabau oku ai ha fiemalie i he ofa, kabau oku ai ha feohi oe Laumalie, kabau oku ai ha ofa ogogofua mo ha loto ofa,
2 Mou fakakakato eku fiefia, ke mou felototatau be, o ma‘u ae ofa be taha, ke mou ulugaaga taha be, mo uouaga taha be.
3 Oua naa fai ha mea e taha i he fakakikihi, be i he manako ki he fakamalo launoa; ka i he loto agavaivai ke fetoutou femahalo lelei aki hake taki taha ki hono kaiga iate ia.
4 Ke oua naa taki taha tokaga ki he ene gaahi mea aana be, kae taki taha tokaga foki ki he gaahi mea ae niihi.
5 Ke iate kimoutolu ae loto ni, aia foki nae ia Kalaisi Jisu:
6 Koia, i he ene i he tatau moe Otua, nae ikai behe eia ko ha faaoa ke na taha moe Otua:
7 Ka naa ne fakamajivejivai eia ia o ne too kiate ia ae tatau moe tamai oeiki, bea fanau‘i ia i he tatau oe tagata:
8 Bea kuo ilo ia i he tatau oe tagata, naa ne fakamoulaloa‘i ia, bea talagofua ki he mate, io, ae mate i he akau.
9 Bea koia kuo hakeaki‘i ai ia e he Otua o lahi aubito, o ne foaki kiate ia ae huafa oku maoluga taha be i he higoa kotoabe:
10 Koeuhi ke tuulutui ki he huafa o Jisu ae tui oia kotoabe oku i he iagi mo mamani, moe lalo mamani;
11 Bea ke fakaha e he elelo kotoabe koe Eiki a Jisu Kalaisi, ke ogoogo lelei ai ae Otua koe Tamai.
12 Koia, e hoku kaiga ofeina, o hage ko hoo mou talagofua mau ai be, o ikai i hoku ao be, kae lahi aubito eni i he eku mamao, mou gaue ke lava‘i hoo mou moui a moutolu i he manavahe moe tetetete.
13 He koe Otua ia oku ne gaue iate kimoutolu i hono finagalo lelei ke mou loto mo fai ki ai.
14 Fai ae gaahi mea kotoabe o tae-lāuga moe taefakakikihi:
15 Koeuhi ke mou taehalaia mo taekovi, koe fānau taevalokiia ae Otua, i he lotolotoga oe kakai aga bikobiko mo fefeka, akinautolu oku mou ulo atu ki ai, o hage koe gaahi māma o mamani;
16 O takiloa atu ae lea oe moui; koeuhi keu fiefia i he aho o Kalaisi, i he ikai teu lele noabe, be gaue taeaoga.
17 Io, bea kabau e feligiaki au moe feilaulau moe gaue a hoo mou tui, oku ou fiefia, mo nekeneka fakataha mo kimoutolu kotoabe.
18 Bea i he mea be koia foki ke mou fiefia, mo nekeneka fakataha mo au.
19 Ka oku ou falala ki he Eiki ko Jisu, ke toe jii, beau fekau atu a Timote kiate kimoutolu, koeuhi keu fiemalie lelei, o kau ka ilo be oku mou fefe.
20 He oku ikai iate au ha taha oku na loto tatau mo ia, ke tokaga mooni kiate kimoutolu.
21 He oku kumi kotoabe ae gaahi mea anautolu, kae ikai koe gaahi mea a Kalaisi Jisu.
22 Ka oku mou ilo ae fakamooni oona, koeuhi, o hage koe foha moe tamai, kuo behe ene gaue mo au i he ogoogolelei.
23 Koia oku ou amanaki ke fekau atu leva ia, o kau ka ilo be koeha e fai kiate au.
24 Ka oku ou falala ki he Eiki e vave foki eku alu atu aaku.
25 Ka naaku mahalo, e lelei eku fekau atu kiate kimoutolu a Ebafalotaito, ko hoku tokoua, moe kauga gaue, moe kauga tau, ka ko hoo mou faifekau, bea ko ia naa ne tauhi ki he eku gaahi majiva.
26 He nae manatu lahi ia kiate kimoutolu kotoabe, bea nae matuaki mamahi, koe mea i hoo mou fanogo nae mahaki ia.
27 He koe mooni nae mahaki ia o mei mate: ka nae aloofa ae Otua kiate ia; ka nae ikai kiate ia be, ka kiate au foki, telia naaku ma‘u ae mamahi ki he mamahi.
28 Koia neu fekau tootoo ai ia, koeuhi, ka mou ka toe mamata kiate ia, ke mou fiefia, bea ke jii hifo ai eku mamahi.
29 Koia ke ma‘u ia i he Eiki i he fiefia kotoabe; bea mou fakaabaaba ki he kakai behe:
30 He koeuhi koe mea i he gaue a Kalaisi, nae ofi ai ia ki he mate, o ikai mamae ia ki he ene moui, ka ne togia akimoutolu i he tauhi kiate au.