¶ 1 KA nae alu a Jisu ki he mouga oe Olive.

2 Bea toe ha‘u hegihegi ia ki he fale lotu lahi, bea ha‘u ae kakai kotoabe kiate ia; bea nofo ia, o ako kiate kinautolu.

3 Bea koe kau tagata tohi moe Falesi naa nau omi kiate ia ae fefine nae moua i he tono tagata; o nau tuku ia ki he haohaoga,

4 Bea nau behe kiate ia, Akonaki, nae moua ae fefine ni lolotoga ene tono tagata.

5 Bea ko eni, nae fekau e Mosese kiate kimautolu i he fono, ke tologaki ia aki ae maka: ka koeha hoo lea?

6 Naa nau lea behe, ko‘e nau ahiahi‘i ia, koeuhi ke nau talakovi‘i ai ia. Ka nae tulolo hifo a Jisu, bea tohi aki hono tuhu ki he kelekele.

7 Bea i he e nau kei fehui be kiate ia, nae tuu ki oluga ia, o ne behe kiate kinautolu, Ko ia ia iate kimoutolu oku taeagahala, ke li eia ae fuofua maka ki ai.

8 Bea toe tulolo ia, o tohi ki he kelekele.

9 Bea ko kinautolu nae fanogo ai, i he valokia akinautolu e ho nau atamai, naa nau taki taha alu kitua, o fuofua fai mei he ki mu‘a o a‘u ki he ki mui: bea toe toko taha a Jisu, kae tuu ae fefine i loto.

10 Bea kuo tuu hake a Jisu, o ikai mamata ki ha taha ka koe fefine be, bea behe eia ki ai, Fefine, koefe akinautolu naa nau fakailo‘i koe? oku ikai fakahalaia koe e ha taha?

11 Bea behe eia, Eiki, oku ikai ha taha. Bea talaage e Jisu kiate ia, Bea oku ikai teu fakahalaia koe: alu bea oua e toe fai agahala.

¶ 12 Bea toe lea ai a Jisu kiate kinautolu, o behe, Ko au koe māma o mamani: ko ia oku muimui iate au, e ikai alu ia i he bouli, ka e iate ia ae māma oe moui.

13 Koia nae behe ai ae kau Falesi kiate ia, Oku ke fakamooni kiate koe; oku ikai mooni hoo fakamooni.

14 Bea leaage a isu, o behe kiate kinautolu, Oku ou fakamooni kiate au, ka oku mooni eku fakamooni: he oku ou ilo aia oku ou ha‘u mei ai, mo ia oku ou alu ki ai; ka oku ikai te mou ilo aia oku ou ha‘u mei ai, be koia oku ou alu ki ai.

15 Oku mou fakamāu fakakakano be; oku ikai teu fakamāu ha toko taha.

16 Bea kabau teu fakamāu, oku mooni eku fakamāu: he oku ikai teu toko taha be, ka ko au moe Tamai naa ne fekau au.

17 Bea kuo tohi foki i hoo mou fono, koe fakamooni ae tagata e toko ua oku mooni.

18 Koe toko taha au oku ou fakamooni au, bea koe Tamai naa ne fekau au oku ne fakamooni kiate au.

19 Bea naa nau behe kiate ia, Koefe hoo Tamai? Bea talaage e Jisu, Oku ikai te mou ilo au, be ko eku Tamai: ka ne mou ilo au, behe, kuo mou ilo mo eku Tamai foki.

20 Nae lea aki e Jisu ae gaahi lea ni i he tukuga koloa, i he ene akonaki i he fale lotu lahi: bea nae ikai buke ia e ha taha; he nae teeki hokojia hono aho.

21 Bea toe tala e Jisu kiate kinautolu, Oku ou alu, bea te mou kumi kiate au, ka te mou mate i hoo mou agahala: koe botu oku ou alu ki ai, e ikai te mou hokojia.

22 Bea behe ai ae kakai Jiu, E ta-mate‘i eia ia? he oku ne behe, Koe botu oku ou alu ki ai, e ikai te mou hokojia.

23 Bea tala eia kiate kinautolu, Oku mei lalo akimoutolu; oku mei oluga au: oku o mamani akimoutolu; oku ikai o mamani au.

24 Koia naaku lea ai kiate kimoutolu, te mou mate i hoo mou agahala: he kabau oku ikai te mou tui ko au ia, te mou mate be i hoo mou agahala.

25 Bea naa nau lea ai kiate ia, Kohai koe? Bea beheage e Jisu kiate kinautolu, Aia be naaku tala i mu‘a kiate kimoutolu.

26 Oku lahi ae mea keu tala mo valoki‘i iate kimoutolu: ka ko ia naa ne fekau au oku mooni ia; bea oku ou fakaha ki mamani ae gaahi mea koia kuou fanogo iate ia.

27 Nae ikai te nau ilo ko ene lea kiate kinautolu ki he Tamai.

28 Bea behe ai e Jisu kiate kinautolu, Hili hoo mou hiki ki oluga ae Foha oe tagata, bea te mou toki ilo ko au ia, bea mo eku tae fai ha mea iate au be; kae hage hono ako‘i au e he eku Tamai,  oku behe eku lea ki he gaahi mea ni.

29 Bea ko ia naa ne fekau au oku iate au: oku ikai jiaki au ke toko taha be e he Tamai; he oku ou fai mau ai be ae gaahi mea oku lelei ai ia.

30 Bea i he ene lea aki ae gaahi lea ni, nae tui ae toko lahi kiate ia.

¶ 31 Bea behe ai e Jisu ki he kau Jiu nae tui kiate ia, Kabau te mou nofo mau i he eku lea, bea ko eku kau akoga mooni akimoutolu;

32 Bea te mou ilo ae mooni, bea e fakatauataina‘i akimoutolu e he mooni.

¶ 33 Bea behe e he niihi kiate ia, Koe hako o Ebalahame akimautolu, bea nae ikai te mau bobula ki ha taha: bea oku fefe‘i a hoo lau, E fakatau-ataina‘i akimoutolu?

34 Bea talaage e Jisu kiate kinautolu, Koe mooni, koe mooni, oku ou tala atu kiate kimoutolu, Ko ia oku fai agahala, koe bobula ia ki he agahala.

35 Bea oku ikai nofo mau ai be i he fale ae bobula:  ka oku nofo mau ai be ae Alo.

36 Koia kabau e fakatauataina‘i akimoutolu e he Alo, te mou tauataina mooni.

37 Oku ou ilo koe hako o Ebalahame akimoutolu; ka oku mou kumi ke tamate‘i au, koeuhi oku ikai i ho mou loto a eku akonaki.

38 Oku ou lea aki aia kuou ilo‘i i he eku Tamai: bea oku mou fai aia kuo mou ilo‘i i hoo mou tamai.

39 Naa nau leaage, o behe kiate ia, Ko‘e mau tamai a Ebalahame. Bea talaage e Jisu kiate kinautolu, Ka ne koe fānau a Ebalahame akimoutolu, behe, te mou fai ae gaahi gaue a Ebalahame.

40 Ka ko eni oku mou kumi ke ta-mate‘i au, koe tagata kuo tala ae mooni kiate kimoutolu, aia kuou fanogo i he Otua: nae ikai fai behe e Ebalahame.

41 Oku mou fai ae gaue a hoo mou tamai. Bea naa nau behe ai kiate ia, Oku ikai te mau tubu i he feauaki; oku taha be e mau Tamai, koe Otua.

42 Bea talaage e Jisu kiate kinautolu, Ka ne ko hoo mou Tamai ae Otua, te mou ofa kiate au: he naaku tubu ai o ha‘u mei he Otua; bea nae ikai teu ha‘u iate au be, ka naa ne fekau au.

43 Koeha oku ikai ai te mou ilo oku lea? ka koeuhi oku ikai te mou fie fai ki he eku akonaki.

44 Oku mou i  hoo mou tamai koe tevolo, bea koe holi a hoo mou tamai te mou fai. Koe fakabo ia talu mei he kamataaga, bea nae ikai nofo mau i he mooni koeuhi oku ikai ha mooni iate ia. Oka lea aki eia ae loi, oku ne lea aki ene mea aana: he koe loi ia, moe tamai o ia.

45 Bea koe mea i he eku tala ae mooni  kiate kimoutolu, oku ikai ai te mou tui kiate au.

46 Kohai iate kimoutolu oku ne fakailo haaku agahala? Bea kabau oku ou lea aki ae mooni, koeha oku ikai ai te mou tui kiate au?

47 Ko ia oku i he Otua, oku fanogo ia ki he gaahi folofola ae Otua: bea behe, oku ikai te mou fanogo, koeuhi oku ikai i he Otua akimoutolu.

48 Bea leaage ae kakai Jiu, o  nau behe kiate ia, Ikai oku mooni e mau behe, Koe Samelia koe, bea oku iate koe ha tevolo?

49 Bea talaage e Jisu, Oku ikai ha tevolo iate au; ka oku ou fakaabaaba ki he eku Tamai, bea oku mou faka-lielia‘i au.

50 Bea oku ikai teu kumi ae ogoogo lelei ooku: oku ai ha toko taha oku ne kumi‘i mo fakamāu‘i.

51 Koe mooni, koe mooni, oku ou tala kiate kimoutolu, Kabau e fai e ha tagata ki he eku lea, e ikai aubito mamata ia ki he mate.

52 Bea lea ai ae kakai Jiu kiate ia, Ta oku mau ilo eni oku iate koe ha tevolo. Kuo mate a Ebalahame, moe kau balofita; ka oku ke behe, Kabau e fai e ha tagata ki he eku lea, e ikai aubito te ne kamata ae mate.

53 Oku ke lahi koe ki he e mau tamai ko Ebalahame, aia kuo mate? bea mate moe kau balofita: oku ke behe kohai koe?

54 Bea talaage e Jisu, Kabau teu faka-ogolelei au, koe mea noabe eku faka-ogo: ko eku Tamai koia ia oku ne fakaogolelei‘i au; aia oku mou behe ai, ko ho mou Otua ia:

55 Ka kuo ikai te mou ilo ia, ka oku ou ilo ia: bea kabau teu behe, Oku ikai teu iloa ia, teu loi au o hage ko kimoutolu: ka oku ou ilo ia, beau tuitala ki he ene folofola

56 Nae matuaki fiefia a hoo mou tamai ko Ebalahame ke mamata ki hoku aho: bea nae mamata ia, bea fiefia.

57 Bea lea ai ae kakai Jiu kiate ia, Oku teeki ai nimagofulu ta‘u ho motua, bea kuo ke mamata kia Ebalahame?

58 Bea talaage e Jisu kiate kinautolu, Koe mooni, koe mooni, oku ou tala kiate kimoutolu, Ki mu‘a ia Ebalahame, oku ou i ai au.

59 Bea naa nau too hake ae gaahi maka, ke nau lijigi aki ia; ka nae fufu e Jisu ia, bea alu ia i ho nau lotolotoga mei he fale lotu lahi, bea hao ai.