¶ 1 BEA nae mahaki a Lasalosi, koe tagata e toko taha i Betani, koe kolo a Mele mo hono tokoua ko Maata.

2 (Koe Mele  koia ia naa ne tākai ae Eiki aki ae lolo, o ne holoholo hono va‘e aki hono louulu, nae mahaki hono tuogaane ko Lasalosi.)

3 Koia nae fekau ai e hono ogo tuofefine kiate ia, o behe, Eiki, vakai, ko ia oku ke ofa ai oku mahaki.

4 Bea kuo fanogo a Jisu, bea ne behe, Oku ikai koe mahaki eni ke mate ai, ka ke ogoogo lelei ai ae Otua, bea ke ogoogo lelei ai ae Alo oe Otua.

5 Bea nae ofa a Jisu kia Maata, mo hono tehina, mo Lasalosi.

6 Bea kuo fanogo ia ki he ene mahaki, naa ne kei nofo i he botu koia o aho ua.

7 Hili ia, bea behe eia ki he kau akoga, Ke tau toe alu ki Jutea.

8 Bea tala e he kau akoga kiate ia, Labai, nae toki kumi e he kau Jiu ke tologaki koe aki ae maka; bea oku ke toe alu ki ai?

9 Bea beheage e Jisu, Ikai oku hogofulu ma ua ae feituulaa i he aho? Kabau oku eveeva na tagata i he aho, oku ikai tūkia ia, koeuhi oku mamata ia ki he māma oe mamani.

10 Bea kabau oku eveeva ha tagata i he bouli, oku tūkia ia, koeuhi oku ikai ha māma i ai.

11 Nae hili ene lea ni, bea toki behe eia kiate kinautolu, Ko ho tau kaiga ko Lasalosi oku mohe; ka oku ou alu, koeuhi keu fafagu ia mei he mohe.

12 Bea behe ai e he ene kau akoga, Eiki, kabau oku mohe, e lelei ai ia.

13 Nae lea a Jisu ki he ene mate: ka naa nau mahalo ko ene lea ki he mālōlō i he mohe.

14 Bea toki tala fakatotonu e Jisu kiate kinautolu, Kuo mate a Lasalosi.

15 Bea oku ou fiefia i he ikai teu i ai, koeuhi ko kimoutolu, koeuhi ke mou tui; ka tau o kiate ia.

16 Bea lea ai a Tomasi, oku ui ko Titimasi, ki he ene kauga akoga, Ke tau o foki, ka tau mate mo ia.

17 Bea kuo alu atu a Jisu, bea ne ilo kuo aho fa hono tuku ia ki he faitoka.

18 Bea nae ofi a Betani ki Jelusalema, koe maile e ua nai hono mamao.

19 Bea ha‘u ae kau Jiu toko lahi kia Maata mo Mele, ke fakafiemalie‘i akinaua koeuhi ke ho na tuogaane.

20 Bea i he fanogo e Maata oku ha‘u a Jisu, naa ne alu o fakafetaulaki kiate ia: ka nae nofo be a Mele i he fale.

21 Bea lea ai a Maata kia Jisu, Eiki, ka ne ke i heni, behe, ne ikai mate hoku tuogaane.

22 Ka oku ou ilo aeni, koia kotoabe te ke kolea ki he Otua, e foaki e he Otua kiate koe.

23 Bea talaage e Jisu kiate ia, E toe tuu ho tuogaane.

24 Bea tala e Maata kiate ia, Oku ou ilo e toe tuu ia i he toetuu i he aho fakamui.

25 Bea talaage e Jisu kiate ia, Ko au koe toetuu, moe moui: ko ia oku tui kiate au, ka ne mate ia, e moui be ia:

26 Bea ko ia oku moui mo tui kiate au, e ikai aubito mate ia. Oku ke tui ki ai?

27 Bea ne behe kiate ia, Io, Eiki: oku ou tui koe Kalaisi akoe, koe Alo oe Otua, aia nae totonu ke ha‘u ki mamani.

28 Bea hili ene lea koia, nae alu ia, o ne ui fakafufu hono tehina ko Mele, o ne behe, Kuo ha‘u ae Akonaki, bea oku fehui kiate koe.

29 Bea i he ene ogo‘i ia, naa ne tuu hake leva, o ha‘u kiate ia.

30 Bea kuo teeki hoko a Jisu ki he kolo, ka nae i he botu koia nae fakafetaulaki ai a Maata kiate ia.

31 Bea koe kau Jiu nae iate ia i he fale, o nau fakafiemalie‘i ia, i he e nau vakai oku tuu fakavave a Mele, o alu kitua, naa nau muimui ai, o nau behe, Oku alu ia ki he faitoka ke tagi ai.

32 Bea kuo aluage a Mele ki he botu oku i ai a Jisu, o ne mamata ki ai, bea tomabee ia ki hono va‘e, o ne behe kiate ia, Eiki, ka ne ke i heni, behe, ne ikai mate hoku tuogaane.

33 Bea i he mamata a Jisu kiate ia oku tagi, bea tagi foki moe kakai Jiu nae ha‘u mo ia, bea to‘e ia i he laumalie, bea mamahi ia,

34 One behe, Kuo mou tuku ife ia? Bea nau tala kiate ia, Eiki, ha‘u o mamata.

35 Bea tagi a Jisu.

36 Bea lea ai ae kau Jiu, Vakai ki hono lahi o ene ofa kiate ia.

37 Bea lea a ho nau niihi, Ikai e mafai e he tagata ni, oku ne fakaa ae mata oe kui, ke taofi ke oua naa mate ae tagata ni?

38 Bea koia nae to‘eto‘e a Jisu i hono loto, bea alu atu ki he tanuaga. Koe ana ia bea nae tabuni aki ia ae maka.

39 Bea tala e Jisu, Mou too ae maka. Bea lea kiate ia a Maata, koe tuofefine o ia kuo mate, Eiki, kuo namu hāhā: he ko hono aho fa eni.

40 Bea lea a Jisu kiate ia, Ikai naaku tala kiate koe, kabau te ke tui, te ke mamata ki he mafimafi oe Otua?

41 Bea naa nau too ae maka mei he botu nae tuku ai ae mate. Bea haga hake ae fofoga o Jisu, o ne behe, E Tamai, oku ou fakafetai kiate koe, koeuhi kuo ke ogo‘i au.

42 Bea oku ou ilo oku ke ogo‘i mau ai be au: ka koe mea i he kakai oku tutuu ni,  koia kuou lea  ai, koeuhi ke nau tui naa ke fekau au.

43 Bea hili ene lea behe, bea lea le‘o lahi ia, Lasalosi, tuu mai.

44 Bea nae tuu mai aia nae mate, kuo ha‘iha‘i hono nima moe va‘e aki ae kofu tanu: bea kuo nonoo aki hono mata ae holoholo. Bea talaage e Jisu kiate kinautolu, Vevete, o tukuage ia.

45 Bea koe toko lahi oe kau Jiu nae ha‘u kia Mele, hili e nau mamata ki he gaue nae fai e Jisu, naa nau tui kiate ia.

46 Ka nae alu ho nau niihi ki he kau Falesi, o tala kiate kinautolu ae gaahi mea kuo fai e Jisu.

¶ 47 Bea fakataha e he kau taulaeiki lahi moe kau Falesi ae kau fakamāu, o nau behe, Koeha oku tau fai? he oku fai e he tagata ni ae gaahi mana lahi.

48 Kabau te tau tuku noa ai be ia, e tui kotoabe kiate ia: bea e ha‘u ae kakai Loma, o fakaauha ho tau botu mo ho tau buleaga.

49 Bea ko ho nau toko taha, ko Kaiafasi, koe taulaeiki lahi ia i he ta‘u koia, nae behe eia kiate kinautolu, Oku ikai te mou ilo ha mea,

50 Bea tokaga e lelei kiate kitautolu, ke mate ha tagata e toko taha ma ae kakai, kae oua naa auha ae buleaga kotoa.

51 Bea nae ikai meiate ia ene lea koia: ka koe taulaeiki lahi ia i he ta‘u koia, bea ne kikite e mate a Jisu ki he buleaga koia;

52 Bea oku ikai ki he buleaga be koia, ka koeuhi ke ne tanaki o fakataha ae fānau ae Otua kuo fakahe‘i mamao.

53 Bea talu mei he aho koia naa nau alea fakataha ke tamate‘i ia.

54 Koia nae ikai toe alu fakaha a Jisu i he kakai Jiu; ka nae mahui ia mei ai ki he fonua ofi ki he toafa, ki he kolo nae ui ko Efalemi, bea nofo ai mo ene kau akoga.

55 Bea kuo ofi ae  katoaga oe Lakaatu ae kakai Jiu: nae alu hake ae toko lahi mei he tukuuta ki Jelusalema, i he heeki hoko ae katoaga ke fakamaa akinautolu.

56 Bea naa nau kumi a Jisu, o nau fealeleaaki, i he e nau tutuu i he fale lotu lahi, Koeha hoo mou mahalo? e ikai te ne ha‘u ki he katoaga?

57 He kuo fekau e he kau taulaeiki lahi, moe Falesi, kabau kuo ilo e ha tagata be oku ife ia, ke ne fakaha, ka nau buke ia.