Koe Tohi a Baula koe Abosetolo ki he Kakai Kaletia

¶ 1 KO AU BAULA, koe abosetolo, (ikai mei he kau tagata, be i ha tagata, kae mei a Jisu Kalaisi, moe Otua koe Tamai, aia naa ne fokotuu hake ia mei he bekia;)

2 Bea moe gaahi kaiga kotoabe oku iate au, ki he gaahi jiaji i Kaletia:

3 Ke iate kimoutolu ae ofa moe melino mei he Otua koe Tamai, bea mo ho tau Eiki ko Jisu Kalaisi,

4 Aia naa ne foaki ia koeuhi koe tau gaahi agahala, koeuhi ke ne fakamoui akitautolu mei he mama kovi ni, o fakatatau ki he finagalo oe Otua koe tau Tamai:

5 Ke iate ia be ae fakafetai ke taegata bea taegata. Emeni.

6 Oku ou ofo i hoo mou hiki vave behe meiate ia naa ne uiui‘i akimoutolu i he ofa a Kalaisi, ki he ogoogolelei e taha:

7 Aia oku ikai koe taha kehe mooni; ka oku ai ae niihi oku fakamamahi akimoutolu, bea ko ho nau loto ke fakakehe ae ogoogolelei a Kalaisi.

8 Kabau e malaga aki ekimautolu, be ha agelo mei he lagi, ha ogoogolelei kehe kiate kimoutolu, ka oku ikai koia naa mau malaga aki kiate kimoutolu, ke malaia be ia.

9 O hage koia naa mau tomua lea aki, beau toe lea aki eni, Kabau e malaga aki e ha taha ha ogoogolelei kehe kiate kimoutolu, kae ikai koia kuo mou ma‘u, ke malaia be ia.

10 He oku ou fai ni koe fakafiemalie‘i ki he tagata, be koe Otua? be ko eku fai ni ke lelei be ki he tagata? he kabau oku ou kei fai ke lelei ki he tagata, oku ikai koe tamaioeiki au a Kalaisi.

11 Bea oku ou fakababau atu kiate kimoutolu, e kaiga, koe ogoogolelei naaku malaga aki, oku ikai mei he tagata ia.

12 He nae ikai teu ma’u ia mei ha tagata, bea nae ikai ako ia kiate au, ka i hono fakaha mai e Jisu Kalaisi.

13 He kuo mou fanogo ki he eku ulugaaga i mu‘a i he lotu faka‐Jiu, he naaku fakataga o lahi hake aubito ae jiaji oe Otua, o maumau‘i ia:

14 Mo eku fai lahi ki he lotu faka‐Jiu o lahi hake i he toko lahi naa mau toutagata i hoku fonua, he naaku fai feiga o lahi hake aubito ki he gaahi talatubua a eku gaahi tamai.

15 Ka i he finagalo lelei oe Otua, aia naa ne fakamavae au mei he manāva o eku fa‘e, o ne ui au i he ene agaofa,

16 Ke fakaha hono Alo iate au, koeuhi keu malaga aki ia i he gaahi Jenitaile; nae ikai leva teu fakakaukau moe kakano moe toto:

17 Bea nae ikai teu alu hake ki Jelusalema kiate kinautolu nae abosetolo i mu‘a iate au; ka naaku alu ki Alebea, beau toe liu mai ki Tamasikusi.

18 Bea hili ae ta’u e tolu, neu alu hake ki Jelusalema, ke feiloaki mo Bita, beau nofo mo ia i he aho e hogofulu ma nima.

19 Ka nae ikai teu mamata ki ha niihi oe kau abosetolo, ka ko Jemesi, koe tokoua oe Eiki.

20 Bea koeni, koe gaahi mea oku ou tohi kiate kimoutolu, vakai, i he ao oe Otua, oku ikai teu loi.

21 Hili ia, naaku ha‘u ki he gaahi botu o Silia mo Silisia;

22 Bea nae ikai iloa hoku mata e he gaahi jiaji o Jutea aia nae ia Kalaisi:

23 Kae gata be i he e nau fanogo, Ko ia ia naa ne fakataga‘i akitautolu i mu‘a, oku ne malaga aki ni ae tui aia naa ne tomua maumau‘i.

24 Bea naa nau fakaogoogolelei‘i ae Otua koeuhi ko au.