¶ 1 BEA koeni, ko au koe bobula ae Eiki, oku ou kole kiate kimoutolu, ke mou aeva a tāu moe ui aia kuo uiui‘i aki akimoutolu,

2 I he agavaivai kotoabe moe aga-malu, moe kataki fuoloa, o fekatakiaki i he ofa;

3 O ahiahi lahi ke tauhi ae feofoofani oe Laumalie i he noo oe melino.

4 Oku taha be ae jino bea taha ae Laumalie, io, o hage kuo ui akimoutolu ki he amanaki lelei be taha o ho mou uiui‘ui;

5 Koe Eiki be taha, koe tui be taha, koe babitaiso be taha,

6 Koe Otua be taha moe Tamai a tautolu kotoabe, aia oku maoluga he mea kotoabe, bea i he mea kotoabe, bea oku nofoia akimoutolu kotoabe.

7 Ka kuo foaki kiate kitautolu taki taha kotoabe ae ofa, o fakatatau ki hono Iahi oe foaki a Kalaisi.

8 Koia oku ne behe ai, I he ene alu hake ki oluga, naa ne taki bobula ae fakabobula, o ne atu ae gaahi foaki ki he kakai.

9 (Bea ko ene alu hake, koeha ia ka koeuhi nae tomua alu hifo ia ki he gaahi botu i mama ki lalo ni?

10 Ko ia naa ne alu hifo, ko ia ia foki naa ne alu hake o maoluga lahi aubito i he gaahi lagi kotoabe, koeuhi ke ne fakafonu ae gaahi mea kotoabe.)

11 Bea naa ne foaki ae niihi, koe kau abosetolo; moe niihi, koe kau balofita; moe niihi, koe kau evagelio; moe niihi, koe kau faifekau moe kau akonaki;

12 Ko hono fakahaohaoa oe kakai maonioni, moe gaue fakafaifekau, ke laga hake ae jino o Kalaisi:

13 Kae oua ke tau hoko kotoabe ki he fakataha i he tui, bea moe ilo‘i oe Alo oe Otua, ki he tagata haohaoa, ki he fuofua o hono lahi oe fonu o Kalaisi:

14 Koeuhi ke oua naa tau kei fakatamaiki, o feliliaki, mo feaveaki fano e he matagi oe akonaki kotoabe, i he boto kākā oe tagata, moe boto i he fiemua, aia oku nau toka tatao ai ke kākā‘i;

15 Kae lea aki ae mooni i he ofa, bea tubu hake iate ia, aia ko Kalaisi koe ulu, i he mea kotoabe:

16 Aia oku fakahokohoko ai ae jino kotoa, bea fakataha i he mea oku tokoni aki e he kubu kotoabe, o fakatatau ki hono faa fai i he fua oe botu kotoabe, oku tubulaki ai ae jino, bea laga hake ia i he ofa.

17 Bea koe mea ni, oku ou tala mo fakababau i he Eiki, ke oua te mou kei aeva o hage koe aeva ae Jenitaile kehe, i he vale o ho nau loto,

18 Kuo fakabouli ho nau loto, kuo fakamavahe‘i mei he moui faka‐Otua, i he vale oku iate kinautolu, koe mea i he fefeka o ho nau loto:

19 Akinautolu oku taemagoi, kuo nau tukuage akinautolu ki he aga fakalielia, ke fai ae gaahi mea uli kotoabe i he fiefie fai.

20 Ka kuo ikai behe hono akonekina akimoutolu mei a Kalaisi;

21 He kuo fanogo akimoutolu kiate ia, bea kuo akonekina akimoutolu meiate ia, o fakatatau ki he mooni oku ia Jisu:

22 Bea koe mea i he ulugaaga motua, ke mou jiaki ae tagata motua, aia oku fakalielia, bea tatau moe gaahi holi kovi fakakākā;

23 Bea ke fakafoou akimoutolu i he tefito o ho mou loto;

24 Bea ke ai ekimoutolu ae tagata foou, aia oku fakatubu ke tatau moe Otua i he agatonu moe maonioni mooni.

25 Koia ke liaki ae loi, kae taki taha lea aki ae mooni ki hono kaugaabi: he oku tau fekubuaki akitautolu.

26 Ke mou ita, kae oua naa fai agahala ai: oua naa tuku ke alu hifo ae laa mo hoo mou ita:

27 Bea oua naa fakaataatā ki he tevolo.

28 Ko ia ia nae kaihaa, ke oua e toe kaihaa: ka ne gaue mu‘a, o fai aki hono nima ae mea oku lelei, koeuhi ke ne ma‘u ke foaki kiate ia oku majiva.

29 Ke oua naa ha‘u ha talanoa uli mei ho mou gutu, ka koia oku lelei o aoga ke laga aki hake, koeuhi ke tubu ai ae tokoni ki he kau fanogo.

30 Bea oua naa fakamamahi ki he Laumalie Maonioni oe Otua, aia kuo fakailoga aki akimoutolu ki he aho oe huhui.

31 Tuku ke mamao iate kimoutolu ae loto kovi kotoabe, moe ita, moe lili, moe feiohoaki, moe lea fakakovi, moe fakafajifaji kotoabe:

32 Kae feagaleleiaki akimoutolu kiate kimoutolu, o manavaofa, o fefakamolemoleaki akimoutolu, o hage koe fakamolemolea akimoutolu e he Otua koeuhi ko Kalaisi.