¶ 1 BEA kuo hokojia ae aho oe Benitekosi, kuo nau katoa o loto taha i he botu be taha.

2 Bea fakafokifa nae ai ae uulu mai mei he lagi, o hage ha tuoni matagi malohi aubito, bea fakabito aki ae fale kotoabe naa nau nofo ai.

3 Bea nae ha mai kiate kinautolu ae gaahi elelo magamaga o hage koe afi, bea nofo ia iate kinautolu taki taha.

4 Bea nae fakabito aki akinautolu kotoabe ae Laumalie Maonioni, bea naa nau kamata lea aki ae lea kehekehe, o fakatatau ki hono fakalea‘i akinautolu e he Laumalie.

5 Bea nae aunofo i Jelusalema ae kakai Jiu faa lotu, mei he buleaga kotoabe i lalo lagi.

6 Bea i he mafola ae ogoogo ni, nae fakakatoa ae kakai, bea nau bubutuu lahi, koeuhi nae fanogo ae tagata taki taha ki he e nau lea i he ene lea aana.

7 Bea nae ofo mo fakatumutumu akinautolu kotoabe, o nau febeheaki, Vakai, ikai koe kau Kaleli kotoabe akinautolu na oku lea?

8 Bea oku fefe nai oku tau taki taha fanogo ki he e tau lea, naa tau fanau‘i ai?

9 Koe kakai Batia, moe Metia, moe Elama, bea moe kau nofo i Mesobotemia, mo Jutea, mo Kabatosia, mo Bonito, mo Esia,

10 Mo Filijia, mo Bamifilia, mo Iji bite, bea moe gaahi botu o Libea o ofi ki Sailine, moe gaahi muli mei Loma, koe gaahi Jiu moe kakai ului.

11 Koe kakai, Keliti moe Alebea, oku tau fanogo oku nau lea i he e tau lea ki he gaahi gaue fakaofo ae Otua.

12 Bea naa nau ofo kotoabe, o taemāu ho nau loto, mo nau febeheaki, Koeha hono uhiga oe mea ni?

13 Kae manuki ae niihi, o behe, Oku fonu i he uaine foou ae kau tagata ni.

¶ 14 Ka nae tutuu hake a Bita, moe toko hogofulu ma toko taha, o lea aki ae le‘o lahi, o ne behe kiate kinautolu, Akimoutolu ae kau tagata o Jutea, mo kimoutolu kotoabe oku aunofo i Jelusalema, ke mou ilo eni, bea fakafanogo ki he eku lea:

15 He oku ikai kona akinautolu ni, o hage ko hoo mou mahalo, he ko hono tolu be eni oe feituulaa oe aho.

16 Ka ko eni ia nae lea ki ai ae balofita ko Joeli;

17 Oku behe e he Otua, E hoko i he gaahi aho amui, teu huai hifo hoku Laumalie ki he kakai kotoabe: bea e kikite e ho mou gaahi foha mo ho mou gaahi ofefine, bea e ha ae gaahi mea ki hoo mou kau talavou, bea e faa miji e hoo mou kau mātua:

18 Bea i he gaahi aho koia, teu huai hifo hoku Laumalie ki he eku kau tamaioeiki mo eku kau kaunaga; bea te nau kikite;

19 Bea teu fakaha ae gaahi mea fakaofo i oluga i he lagi, moe gaahi fakailoga ki lalo i mamani; koe toto, moe afi, moe ahu oe afi;

20 Bea e liliu ae laa o bouli, bea moe mahina o toto, i he teeki hoko ae aho lahi bea fakamanavahe, oe Eiki:

21 Bea e behe, ko ia e ui ki he huafa oe Eiki, e fakamoui ia.

22 Ae kau tagata Isileli, fanogo ki he gaahi lea ni; ko Jisu o Nasaleti, koe tagata mei he Otua, bea nae ogoogo iate kimoutolu i he gaahi mea mana, moe gaue fakaofo, moe fakailoga, aia nae fai e he Otua iate ia i ho mou ao, o hage koia oku mou ilo foki ki ai:

23 Aia nae tukuage e he Otua, i he ene fakakaukau boto mo ene muaki ilo, bea naa mou buke aki ia ae nima agahala, o tutuki ia ki he akau, o tamate‘i:

24 Aia kuo fokotuu e he Otua, i he veteage oe mamahi oe mate: koeuhi nae ikai aubito faa taofi aki ia.

25 He oku lea a Tevita kiate ia, Naaku mamata mau ki he Eiki i hoku ao, he oku i hoku nima toomatau ia, ke oua naa ue‘i au:

26 Koia nae fiefia ai hoku loto, bea fiefia mo hoku elelo; bea e mālōlō foki a hoku jino i he amanaki lelei:

27 Koeuhi e ikai te ke tuku hoku laumalie i hetesi, bea e ikai te ke tuku ho Toko Taha Maonioni ke ne ilo ae auauha.

28 Kuo ke fakaha kiate au ae gaahi hala oe moui; te ke fakafonu aki au ae fiefia i ho ao.

29 Ae kau tagata moe kaiga, tuku keu lea o fakamatala atu kiate kimoutolu ki he eiki i mua ko Tevita, he kuo bekia ia bea tanu, bea oku iate kitautolu hono fonualoto o a‘u ki he aho ni.

30 Bea koe balofita ia, bea naa ne ilo kuo fuakava e he Otua kiate ia, te ne fokotuu i hono hako, o fakatatau ki he kakano, ae Kalaisi, ke nofo i hono nofoa fakatu‘i;

31 Bea i he ene ilo ia i mu‘a, naa ne lea ki he toetuu o Kalaisi, nae ikai tuku mau hono laumalie i hetesi, bea nae ikai ilo e hono jino ae auauha.

32 Bea koe Jisu ni kuo fokotuu e he Otua, bea koe kau fakamooni ki ai akimautolu kotoabe.

33 Koia, i hono hakeaki‘i e he nima toomatau oe Otua, bea i he ene ma‘u mei he Tamai ae talaofa oe Laumalie Maonioni, kuo ne huai hifo eni, aia oku mou mamata mo fanogo ki ai ni.

34 He nae ikai alu hake a Tevita ki he lagi: ka nae behe mai eia, Nae behe e Jihova ki he eku Eiki, Nofo koe i hoku nima toomatau,

35 Kae oua keu gaohi ho gaahi fili ko ho tuugava‘e.

36 Koia ke ilo bau e he fale kotoabe o Isileli, kuo fakanofo e he Otua ae Jisu koia, aia naa mou tutuki ki he akau, koe Eiki moe Kalaisi.

¶ 37 Bea i he e nau fanogo eni, nae mahuhuhuhu ho nau loto, bea naa nau behe kia Bita mo hono toe oe kau abosetolo, Ae kau tagata moe kaiga, koeha te mau fai?

38 Bea toki behe e Bita kiate kinautolu, Fakatomala, bea mou taki taha babitaiso i he huafa o Jisu Kalaisi, ke fakamolemole ai ae agahala, bea te mou ma‘u moe foaki oe Laumalie Maonioni.

39 He koe talaofa eni kiate kimoutolu, mo hoo mou fānau, bea mo kinautolu kotoabe oku mamao, aia kotoabe e ui e he Eiki ko ho tau Otua.

40 Bea nae lahi ae lea kehekehe naa ne fakamooni mo akonaki aki, o ne behe, Mou fakamoui akimoutolu mei he toutagata baogataa ni.

¶ 41 Bea ko kinautolu nae ma‘u fiefia ene lea, naa nau babitaiso: bea i he aho be koia nae ului ae kakai e toko tolu afe nai.

42 Bea naa nau tuu mau i he akonaki ae kau abosetolo, moe feofoofani, moe tofi oe ma, moe fehufekina.

43 Bea nae to ki he kakai kotoabe ae manavahe: bea nae lahi ae mea fakaofo moe mea mana nae fai e he kau abosetolo.

44 Bea nae loto taha akinautolu kotoabe nae tui, bea nae mea taha be akinautolu;

45 Bea naa nau fakatau ho nau gaahi abi mo e nau mea, bea tufa ki he kakai taki taha, o fakatatau ki he ene majiva.

46 Bea naa nau alu loto taha ki he fale lotu lahi i he aho kotoabe, mo nau tofitofi ma i he gaahi fale, bea kai e nau mea kai i he fiefia moe loto taekākā,

47 O fakamalo ki he Otua, bea ofeina e he kakai kotoabe. Bea nae fakaului e he Eiki kiate kinautolu i he aho kotoabe akinautolu kuo fakamoui.