¶ 1 KOIA ke liaki ae fai kovi kotoabe, moe kākā kotoabe, moe malualoi, moe meheka, bea moe feleakoviaki kotoabe,

2 Bea mou holi lahi, o hage koe fānau toki faele‘i, ki he hua huhu taekākā oe folofola, koeuhi ke mou tubu ai:

3 He kuo mou kamata oku aloofa ae Eiki.

4 Aia oku mou ha‘u ki ai, koe maka moui, kuo jiaki mooni e he kakai, ka kuo fili e he Otua, bea oku mahuiga,

5 Ko kimoutolu foki, oku hage koe gaahi maka moui kuo laga hake, koe fale fakalaumalie, koe kau taulaeiki maonioni, ke o hake ae gaahi feilaulau fakalaumalie, oku aoga ki he Otua ia Jisu Kalaisi.

6 Koia oku tuu ai foki ia i he tohi, Vakai, oku ou ai i Saione ae fugani maka tuliki, kuo fili, bea mahuiga: bea ko ia e tui kiate ia, e ikai ma ia.

7 Koia, oku mahuiga ia kiate kimoutolu oku tui: ka kiate kinautolu oku taetui, koe maka nae liaki e he kau tufuga, koia ia kuo gaohi koe fugani  maka oe tuliki,

8 Bea koe maka tūkiaaga moe maka fakaita kiate kinautolu oku taetui ki he folofola, bea tukia: aia foki nae tuutuuni akinautolu ki ai.

9 Ka koe kakai kuo fili akimoutolu, koe kau taulaeiki fakaeieiki, koe kakai maonioni, koe kakai kuo fakatau; koeuhi ke mou fakaha ae ulugaaga lelei o ia naa ne ui mai akimoutolu mei he bouli ki he ene māma lahi:

10 Akimoutolu nae ikai ko ha kakai i mu‘a, ka ko eni koe kakai ae Otua: nae ikai ke ilo ae aloofa, ka ko eni kuo ilo ae aloofa.

11 Oku ou kole atu, e kaiga ofeina, ke mou hage koe kau muli moe aunofo, ke taofi akimoutolu mei he gaahi holi fakakakano, aia oku tau‘i ae laumalie;

12 Bea fai ke lelei hoo mou moui i he ao oe kakai Jenitaile: koeuhi, i ha mea oku nau lauikovi ai akimoutolu o hage koe kau fai kovi, ke nau mamata ki hoo mou gaahi gaue lelei, bea fakamalo ai ki he Otua i he aho oe aahi.

13 Fakavaivai akimoutolu ki he tuutuuni kotoabe ae tagata koeuhi koe Eiki: be ki he tu‘i, aia oku lahi taha be;

14 Be ki he kau bule, akinautolu kuo ne fakanofo koeuhi ke tautea ae kau fai kovi, ka ke fakamalo kiate kinautolu oku fai lelei.

15 He oku behe ae finagalo oe Otua, ke mou fakanoa‘i aki ae fai lelei ae faa launoa ae kakai vale:

16 O tāu moe tauataina, kae oua naa ma‘u ae tauataina ke hage koe ufiufi oe agahala, ka mou hage koe kau tamaioeiki ae Otua.

17 Fakaabaaba ki he kakai kotoabe. Ofa ki he kaiga lotu. Manavahe ki he Otua. Fakaabaaba ki he tu‘i.

18 Ae kau tamaioeiki, mou fakavaivai ki hoo mou gaahi eiki i he manavahe kotoabe; ikai ki he agalelei moe agavaivai be, ka ki he agamalohi foki.

19 He koe mea aoga eni, o kabau e kataki e ha taha ae mamahi moe tautea taetotonu, ko ene loto  lelei ki he Otua.

20 He koeha hono lelei, oka tautea akimoutolu i hoo mou fai kovi, bea oku mou faa kataki ia? ka oka mou ka mamahiia i hoo mou fai lelei, bea faa kataki, oku lelei ia ki he Otua.

21 He koe mea ia kuo uiui‘i akimoutolu ki ai: he nae mamahi a Kalaisi maa moutolu, bea kuo ne tuku mai ha faifaitakiaga kiate kimoutolu, ke mou tobuva‘e taha mo ia:

22 Aia nae ikai ke ne fai ha agahala, bea nae ikai ilo ha kākā i hono fofoga.

23 Aia nae ikai ke toe manuki i hono manukia ia; i he ene mamahi, nae ikai te ne fakamana; ka naa ne tuku ia kiate ia oku fakamāu maonioni:

24 Aia naa ne fua toko taha be i hono jino oona e tau gaahi hia ki he akau, koeuhi i he e tau tauataina mei he agahala, ke tau moui ki he maonioni: bea koe mea i hono gaahi ta kuo mou moui.

25 He naa mou tatau moe faga sibi alu hehe be; ka kuo mou foki mai eni ki he Tauhi moe Leohi o ho mou laumalie.