¶ 1 E KAIGA ofeina, oua naa tui ki he laumalie kotoabe, kae ahiahi‘i ae gaahi laumalie, be oku oe Otua akinautolu: koeuhi kuo toko lahi ae kau balofita loi kuo alu atu ki mamani.

2 Koe mea eni oku mou ilo ai ae laumalie oe Otua: Koe laumalie kotoabe oku fakaha kuo ha‘u a Jisu Kalaisi i he jino, oku oe Otua ia:

3 Bea koe laumalie kotoabe oku ikai fakaha kuo ha‘u a Jisu Kalaisi i he jino, oku ikai oe Otua ia: bea koeni ia ae Fili o Kalaisi, aia kuo mou fanogo ki ai e ha‘u; bea oku lolotoga ni ene i mamani.

4 E fānau ofeina, kuo ae Otua akimoutolu, bea kuo mou ikuna akinautolu: he koeuhi ko ia oku iate kimoutolu, oku lahi ia kiate ia oku i mamani.

5 Oku oe mamani akinautolu: koia oku nau lea ai ki mamani, bea fanogo a mamani kiate kinautolu.

6 Oku oe Otua akimautolu: ko ia oku ne ilo‘i ae Otua, e fanogo ia kiate kimautolu; bea ko ia oku ikai oe Otua, oku ikai fanogo ia kiate kimautolu. Koe mea eni oku tau ilo ai ae laumalie oe mooni, moe laumalie oe he.

7 E kaiga ofeina, ke tau feofaaki kiate kitautolu: he oku mei he Otua ae ofa; bea ko ia kotoabe oku ofa, kuo fanau‘i ia i he Otua, bea oku ne ilo‘i ae Otua.

8 Ko ia oku ikai ofa, oku ikai ilo‘i eia ae Otua; he koe Otua koe ofa.

9 Ko eni ia nae fakaha ai ae ofa ae Otua kiate kitautolu, koeuhi nae fekau e he Otua a hono Alo be taha nae faka-tubu ki he mamani, koeuhi ke tau moui iate ia.

10 Ko eni ae ofa, nae ikai koe tau ofa ki he Otua, ka ko ene ofa kiate kitautolu, o ne fekau hono Alo koe feilaulau totogi i he e tau agahala.

11 E kaiga ofeina, kabau nae behe ae ofa ae Otua kiate kitautolu, oku totonu foki e tau feofaaki.

12 Kuo ikai ha taha e mamata ki he Otua i ha kuoga. Kabau oku tau feofaaki, oku nofoia akitautolu e he Otua, bea kuo fakahaohaoa‘i ene ofa iate kitautolu.

13 Ko eni ae mea oku tau ilo ai oku tau nofo iate ia, bea mo ia iate kitautolu, koeuhi kuo ne foaki kiate kitautolu a hono Laumalie.

14 Bea kuo mau mamata, mo fakaha, kuo fekau e he Tamai ae Alo koe Fakamoui ki he mamani.

15 Ko ia ia te ne fakaha koe Alo oe Otua a Jisu, oku nofo ae Otua iate ia, bea mo ia i he Otua.

16 Bea kuo tau ilo‘i mo tui ki he ofa kuo i he Otua kiate kitautolu. Koe Otua koe ofa; bea ko ia oku nofo i he ofa, oku nofo ia i he Otua, moe Otua iate ia.

17 I he mea ni oku fakahaohaoa ae ofa iate kitautolu, koeuhi ke tau loto malohi i he aho oe fakamāu: koeuhi oku tau hage ko ia i he mamani.

18 Oku ikai ha manavahe i he ofa; ka oku teke‘i atu ae manavahe e he ofa haohaoa: he oku i he manavahe ae mamahi. Ko ia ia oku manavahe, oku teeki ke fakahaohaoa ia i he ofa.

19 Oku tau ofa kiate ia, koeuhi ko ene tomua ofa mai kiate kitautolu.

20 Kabau e behe e ha taha, Oku ou ofa ki he Otua, ka oku fehia ki hono tokoua, koe loi ia: he ko ia oku ikai ofa ki hono tokoua kuo ne mamata ki ai, e fefe ene ofa ki he Otua nae ikai te ne mamata ki ai?

21 Bea koe fekau ni oku tau ma‘u meiate ia, Ko ia ia oku ofa ki he Otua, ke ofa foki ia ki hono tokoua.