JS—Ukok, Matu 7:1–2. Keidi Matu 7:1–2
Jab ekajet ilo bōd.
1 Kiiō erkein rej naan ko me Jisōs eaar katakin ro rikaļooran bwe ren ba n̄an armej ro.
2 Jab ekajet ilo bōd, bwe ren jab ekajet kom̧; a ekajet ekajet ko rejim̧we.
JS—Ukok, Matu 7:4–8. Keidi Matu 7:3–5
Jisōs ej katakin ro Rikalooran n̄an jelmae skraib ro, Parisi ro, pris ro, im riLivai ro kōnke moņ ko aer.
4 Im bar juon alen, kom̧ naaj ba n̄an er, Etke ej āein bwe kom̧in peranļo̧k kōn pelo̧k eo ilo mejān eo jeimi im jatimi, ak jab watōke pelo̧k eo ilo mejami make?
5 Ak ewi wāween am̧ ba jeim im jatim, In kanektok pelo̧k ne ilo mejam̧; im kwōj jab maron̄ lo meno̧kno̧k eo ilo mejam̧ make?
6 Im Jisōs ar ba n̄an ro rikalooran, Kom̧ij lale ke skraib raņ, im Parisi raņ, im pris raņ, im riLivai raņ? Rej katakin ilo im̧ōn kwelo̧k ko aer, a rej jab kōjparok kien eo, ak kakien eo; im aolep rekar etal jān ial eo, im rej pād iumin jero̧wiwi.
7 Kom̧in ilo̧k im ba n̄an er, Etke kom̧ij katakin armej raņ kakien eo im kien ko, n̄e kom̧ make kom̧ij ro nejin ijurwewe?
8 Ba n̄an er, Kom ri moņ, mokta joļo̧k meno̧kno̧k eo ilo mejāmi make; innām kom̧ maron̄ lo ilo allikar n̄an joļo̧k pelo̧k eo jān mejān eo jeiūm im jatūm.
JS—Ukok, Matu 7:9–11. Keidi Matu 7:6
Jisōs ej katakin ro rikaļooran n̄an kwaļo̧k naan kōn ukweļo̧k im jab n̄an kwaļo̧k naan kōn men ko reittino an aelōn̄ eo ippān laļ.
9 Kom̧in ilo̧k ilo aolepān laļ, im ba n̄an aolep, Ukeļo̧k, bwe aelōn̄ in lan̄ ej itok epaake kom̧.
10 Im mennin ittino ko an aelōn̄ eo kom̧ naaj dāpiji wōt ilo kom̧ make; bwe ej jab em̧m̧an n̄an leļo̧k men eo me ekwōjarjar n̄an kidu ko; im jab joļo̧k bōōr ko ami n̄an piik, n̄e raab jujuri ium̧win neer.
11 Bwe laļ ejjab maron̄ bōk men eo me kom̧, kom̧ make, kom̧ij jab maron̄ ineeke; kōn menin kom̧in jab naaj leļo̧k bōōr ko ami n̄an er, n̄e raab bar oktaktok im kekōl kom̧.
JS—Ukok, Matu 7:12–17. Keidi Matu 7:7–8
Jisōs ej katakin ro Rikalooran bwe Jemān ej leļo̧k revelesōn n̄an aolep ro rej kajjitōk.
12 Ba n̄an er, Kajjitōk jān Anij; kajjitōk, im naaj lewōj n̄an kom; kappukōt, im kom̧ naaj lo; kōllaļlaļ, enaaj peļļo̧k n̄an kom̧.
13 Bwe aolep ro rej kajjitōk, rej bōk; im eo ej kappukōt, ej loe; im n̄an eo ej kōllaļlaļ, enaaj peļļo̧k.
14 Innām ro rikalooran rar ba n̄an E, Renaaj ba n̄an kōm̧, Kōm make kōmij ro rewānōk, im jab aikuij bwe jabdewōt armej en katakin kōm̧. Anij, ko̧m̧ jeļā, Eaar ron̄jake Moses im jet ian rikanaan ro; a kōm̧ E ban ron̄jake.
15 Im renaaj ba, Ewōr ippām kakien eo n̄an lo̧mo̧o̧r eo am, im men in ebwe n̄an kōm̧.
16 Innām Jisōs ar uwaak, im ba n̄an ro rikalooran, Āindein kom̧ naaj ba n̄an er,
17 Armej ōt ilubwilijimi, ewōr juōn nejin em̧m̧aan, im e naaj jutak inabwōj, im e enaaj ba, Jema, kōpeļļo̧k mwiin im̧ōm̧ bwe in maron̄ delon̄ waj im mōn̄ā ippam̧, e ban ba, Delon̄tok, nejū m̧aan, bwe men eo aō ej am̧, im eo am̧ ej aō?