LSS, Maʻake 9:3 (fakafehoanaki mo e Maʻake 9:4)
(Naʻe ʻi he Moʻunga ʻo e Liliú ʻa Sione ko e Papitaisó.)
3 Pea hā mai ai kiate kinautolu ʻa ʻIlaiase mo Mōsese, pe ʻi hono fakalea ʻe tahá, ko Sione ko e Papitaisó mo Mōsese; pea naʻá na fefolofolai mo Sīsū.
LSS, Maʻake 9:40–48 (fakafehoanaki mo e Maʻake 9:43–48)
(ʻOku fakatatau hono tuʻusi ʻo ha nima pe vaʻe ʻokú ne fakahalaʻi ha taha, ki hono taʻofi ha ngaahi feohi ʻa ia ʻe takiakiʻi atu ai ha taha ke hē.)
40 Ko ia, kapau ʻe fakahalaʻi koe ʻe ho nimá, tuʻusi ia; pe kapau ʻe fakahalaʻi koe ʻe ho tokouá pea ʻikai te ne vete ia pe liʻaki ia, ʻe motuhi atu ia. ʻOku lelei ange kiate koe hoʻo hū ki he moʻuí ʻoku ʻikai te ke kakató, ʻi haʻo maʻu ʻa e nima ʻe ua kae ʻalu ki helí.
41 He ʻoku lelei ange kiate koe hoʻo hū ki he moʻuí ʻoku ʻikai ke ʻi ai hao tokouá, ʻi hano kapusi hifo koe mo ho tokouá ki heli; ki he afi ʻoku ʻikai ʻaupito faʻa tāmateʻí, ʻa ia ʻoku ʻikai mate ai honau ʻuangá, pea ʻikai faʻa tāmateʻi ʻa e afí.
42 Pea ko e tahá, kapau ʻe fakahalaʻi koe ʻe ho vaʻé, tuʻusi ia; he ko ia ʻoku hoko ko ho faʻifaʻitakiʻangá, ʻa ia ʻoku faʻifaʻitaki ki ai hoʻo moʻuí, kapau te ne hoko ko ha tokotaha maumau-fono, kuo pau ke motuhi atu ia.
43 He ʻoku lelei ange kiate koe ke ke hū ki he moʻuí ʻokú ke ketu, ʻi hoʻo maʻu ʻa e vaʻe ʻe ua kae lī koe ki heli ki he afi ʻoku ʻikai faʻa tāmateʻí.
44 Ko ia, tuku ke tuʻu pe tō ʻa e tangata taki taha, ʻiate ia pē, kae ʻikai koeʻuhi ko ha taha kehe, pe ʻi he ʻikai te ne fakafalala ki ha taha kehe.
45 Fekumi ki heʻeku Tamaí, pea ʻe fai ʻi he taimi pē ko iá ʻa e meʻa te mou kolé, kapau te mou kole ʻi he tui, pea tui te mou maʻu ia.
46 Kapau ko ho matá ʻa ia ʻoku sio maʻaú, ʻa ia kuo fili ke ne tokangaʻi koe ke fakahā kiate koe ʻa e māmá, pea hoko ia ko e tokotaha maumau-fono ʻo fakahalaʻi koe, kapeʻi ia ki tuʻa.
47 ʻOku lelei ange kiate koe ke ke hū ki he puleʻanga ʻo e ʻOtuá mo e mata pē ʻe tahá, ʻi haʻo maʻu ʻa e mata ʻe ua kae lī koe ki he afi ʻo helí.
48 He ʻoku lelei hake hono fakamoʻui koé, ʻi hano lī koe ki heli mo ho tokouá, ʻa ia ʻoku ʻikai mate ai honau ʻuangá, pea ʻikai faʻa tāmateʻi ai ʻa e afí.