LSS, Maʻake 14:20–25 (fakafehoanaki mo e Maʻake 14:22–25; LSS, Mātiu 26:22, 24–25)
(Ko hono fakahoko ʻe Sīsū ʻa e sākalamēnití.)
20 Pea ʻi heʻenau kaí, naʻe toʻo ʻe Sīsū ʻa e mā ʻo ne tāpuakiʻi ia, mo pakipaki ia, pea ʻoatu kiate kinautolu, ʻo ne folofola, Toʻo ia, ʻo kai.
21 Vakai, ke mou fai ʻeni ʻi he fakamanatu ki hoku sinó; he ko hoʻomou fai ia maʻu peé te mou manatu ai ki he houa ko ʻeni naʻá ku ʻiate kimoutolu aí.
22 Pea naʻá ne toʻo ʻa e ipú, pea ʻi he hili ʻene ʻoatu ʻa e fakafetaʻí, naʻa ne ʻoatu ia kiate kinautolu; pea naʻa nau inu ai kotoa pē.
23 Pea naʻá ne folofola kiate kinautolu, Fai ʻeni ko e fakamanatu ki hoku toto ʻa ia naʻe lilingi koeʻuhi ko e tokolahi, pea mo e fuakava foʻou ʻa ia ʻoku ou tuku kiate kimoutolu; pea te mou fakamoʻoni kiate au ki he māmaní kotoa.
24 Pea ʻi hoʻomou fai maʻu pē ʻa e ouau ní, te mou manatu ai ki he houa ko ʻeni naʻá ku ʻiate kimoutolu ai pea inu mo kimoutolu ʻi he ipu ní, ʻio ko hono fai fakaʻosi ʻi heʻeku ngāué.
25 Ko e moʻoni ʻoku ou pehē kiate kimoutolu, Te mou fakamoʻoni ki he meʻá ni; ʻe ʻikai te u toe inu ʻi he fua ʻo e vainé mo kimoutolu, kae ʻoua ke hokosia ʻa e ʻaho ko ia te u inu foʻou ai ia ʻi he puleʻanga ʻo e ʻOtuá.
LSS, Maʻake 14:36–38 (fakafehoanaki mo e Maʻake 14:32–34)
(Naʻe aʻu ki heʻenau ʻi Ketisemaní, naʻe kei ʻi ai pē ha niʻihi ʻo e Toko Hongofulu-Mā Uá naʻe teʻeki mahino kakato kiate kinautolu ʻa e fatongia ʻo Sīsū ʻi heʻene hoko ko e Mīsaiá.)
36 Pea naʻa nau hoko ki he potu naʻe ui ko Ketisemaní, ʻa ia ko ha ngoue; pea naʻe kamata ke mamahi ʻaupito ʻa e kau ākongá, pea mafasia lahi, pea nau lāunga ʻi honau lotó, mo fifili pe ko e Mīsaiá koā ʻeni.
37 Pea ʻi he ʻafioʻi ʻe Sīsū ʻa honau lotó, naʻá ne folofola ki heʻene kau ākongá, Mou nonofo ʻi heni, kae ʻoua ke u ʻalu ʻo lotu.
38 Peá ne ʻave mo ia, ʻa Pita, mo Sēmisi, mo Sione, ʻo ne valokiʻi ʻa kinautolu, mo folofola ange kiate kinautolu, ʻOku mamahi lahi ʻaupito hoku laumālié, ʻio ʻoku ofi ke mate; mou tatali ʻi heni ʻo leʻo.