1 ʻI he kamataʻangá naʻe malanga ʻaki ʻa e ongoongoleleí ʻi he ʻAló. Pea ko e ongoongoleleí ʻa e folofolá, pea naʻe ʻi he ʻAló ʻa e folofolá, pea naʻe ʻi he ʻOtuá ʻa e ʻAló, pea naʻe mei he ʻOtuá ʻa e ʻAló.

2 Naʻe ʻi he kamataʻangá ia mo e ʻOtuá.

3 Naʻe ngaohi ʻe ia ʻa e ngaahi meʻa kotoa pē; pea naʻe ʻikai ha meʻa ʻe ngaohi kae ʻiate ia pē.

4 Naʻe ʻiate ia ʻa e ongoongoleleí, pea ko e ongoongoleleí ʻa e moʻuí, pea ko e moʻuí ʻa e maama ʻa e kakaí.

5 Pea naʻe ulo ʻa e māmá ʻi he māmaní, pea naʻe ʻikai ʻiloʻi ia ʻe he māmaní.

6 Naʻe ai ha tangata naʻe fekau mai mei he ʻOtuá, pea ko hono hingoá ko Sione.

7 Naʻe haʻu ia ki he māmaní ko ha fakamoʻoni, ke fakamoʻoni ki he māmá, ke fakamoʻoni ki he ongoongoleleí ʻi he ʻAló, ki he kakai kotoa pē, koeʻuhí ke tuʻunga ʻiate ia ha tui ʻa e kakaí.

8 Naʻe ʻikai ko e maama ko iá ia, ka naʻe haʻu iá ke fakamoʻoni ki he maama ko iá,

9 ʻA ia ko e maama moʻoní, ʻa ia ʻoku fakamāmaʻi ʻa e tangata kotoa pē ʻoku haʻu ki he māmaní;

10 ʻIo ko e ʻAlo ʻo e ʻOtuá. Ko ia ia naʻe ʻi he māmaní, pea naʻe ngaohi ʻe ia ʻa e māmaní, pea naʻe ʻikai ʻilo ia ʻe he māmaní.

11 Naʻe haʻu ia ki hono kakaí, ka naʻe ʻikai maʻu ia ʻe hono kakaí.

12 Ka ko kinautolu kotoa pē naʻa nau maʻu iá, naʻá ne foaki kiate kinautolu ʻa e mālohi ke nau hoko ko e ngaahi foha ʻo e ʻOtuá; kiate kinautolu pē naʻe tui ki hono huafá.

13 Naʻe ʻaloʻi ia, ʻikai ʻi he toto, pe ʻi he loto ʻo e kakano, pe ʻi he loto ʻo e tangata, ka ʻi he ʻOtuá.

14 Pea hoko ʻa e folofola ko iá ʻo kakano, pea nofo ia ʻiate kitautolu, pea naʻa tau mamata ki hono nāunaú, ko e nāunau ʻo e ʻAlo pē Taha naʻe Fakatupu ʻo e Tamaí, ʻoku fonu ʻi he ʻaloʻofa mo e moʻoni.

15 Naʻe fakamoʻoni ʻa Sione kiate ia, pea kalanga, ʻo pehē, Ko ʻeni ia naʻá ku lea ʻo kau ki aí; Ko ia ʻoku muimui mai ʻiate aú, ʻoku lahi ia ʻiate au, he naʻe muʻomuʻa ia ʻiate au.

16 He naʻe ʻi he kamataʻangá ʻa e Folofolá, ʻio ʻa e ʻAló, ʻa ia naʻe hoko ʻo kakano, pea naʻe fekau mai ia kiate kitautolu ʻi he finangalo ʻo e Tamaí. Pea ko kinautolu kotoa pē ʻe tui ki hono huafá, te nau maʻu mei hono fonú. Pea kuo tau maʻu kotoa pē mei hono fonu ko iá, ʻio ʻa e moʻui taʻe-faʻa-maté mo e moʻui taʻengatá, ʻi heʻene ʻaloʻofá.

17 He naʻe foaki mai ʻa e fonó ʻia Mōsese, ka ko e moʻuí mo e moʻoní naʻe haʻu ia ʻia Sīsū Kalaisi.

18 He naʻe fakatatau ʻa e fonó ki ha fekau fakakakano, ʻa ia ʻoku ʻomi ai ʻa e maté; ka naʻe fakatatau ʻa e ongoongoleleí ki he mālohi ʻo ha moʻui ʻoku ʻikai hano ngataʻanga, tuʻunga ʻia Sīsū Kalaisi, ko e ʻAlo pē Taha naʻe Fakatupú, ʻa ia ʻoku ʻi he fatafata ʻo e Tamaí.

19 Pea ʻoku ʻikai ha tangata kuo mamata ki he ʻOtuá ʻi ha kuonga, ka ko ia pē kuo fakamoʻoni ki he ʻAló, he ʻoku ʻikai faʻa fakamoʻui ha tangata kae ʻiate ia pē.

20 Pea ko e fakamoʻoni ʻeni ʻa Sioné, ʻi he fekau mai ʻe he kau Siú ʻa e kau taulaʻeiki mo e kau Līvai mei Selusalema, ke fehuʻi kiate ia; Ko hai koe?

21 Pea naʻe fakahā ʻe ia, pea ʻikai fakaʻikaiʻi ko ʻIlaiase ia; ka naʻá ne fakahā, ʻo pehē, ʻOku ʻikai ko e Kalaisí au.

22 Pea naʻa nau fehuʻi kiate ia, ʻo pehē, ʻOku fēfē leva hoʻo hoko ko e ʻIlaiasé? Pea pehē ange ʻe ia, ʻOku ʻikai ko e ʻIlaiase au te ne fakafoki mai ʻa e ngaahi meʻa kotoa pē. Pea nau fehuʻi ange kiate ia, ʻo pehē, Ko koe ʻa e palōfita ko iá? Pea tala ange ʻe ia, ʻIkai.

23 Naʻa nau toki pehē ange kiate ia, Ko hai koe? koeʻuhí ke mau tala kiate kinautolu naʻe fekauʻi ʻa kimautolú. Ko e hā haʻo lau ʻo kau kiate koe?

24 Pea pehē ange ʻe ia, Ko au ko e leʻo ʻo e tokotaha ʻoku kalanga ʻi he feituʻu maomaonganoá, Fakatonutonu ʻa e hāʻeleʻanga ʻo e ʻEikí, ʻo hangē ko e lea ʻa e palōfita ko ʻĪsaiá.

25 Pea ko kinautolu naʻe fekau maí naʻe ʻo e kau Fālesí.

26 Pea naʻa nau fehuʻi kiate ia, ʻo pehē ange kiate ia; Ko e hā ʻokú ke fai papitaiso aí kapau ʻoku ʻikai ko e Kalaisi ko iá koe, pe ko ʻIlaiase ʻa ia te ne fakafoki mai ʻa e ngaahi meʻa kotoa pē, pe ko e palōfita ko iá?

27 Pea tala ange ʻe Sione kiate kinautolu, ʻo pehē; ʻOku ou papitaiso ʻaki ʻa e vai, ka ʻoku tuʻu ʻiate kimoutolu ʻa e tokotaha, ʻa ia ʻoku ʻikai te mou ʻilo;

28 Ko ia ia ʻoku ou fakamoʻoni ki aí. Ko ia ʻa e palōfita ko iá, ʻio ko e ʻIlaiase, ʻa ia ʻe muimui mai ʻiate aú, ʻoku lahi ia ʻiate au, pea ko e nonoʻo ʻo hono topuvaʻé ʻoku ʻikai taau mo au ke u vete, pe ʻoku ʻikai taau mo au ke u fetongi ia; he te ne papitaiso, ʻaki ʻa e vai, mo e afi, pea mo e Laumālie Māʻoniʻoni foki.

29 ʻI he ʻaho naʻe hokó naʻe mamata ʻa Sione kia Sīsū ʻoku haʻu kiate ia, peá ne pehē; Vakai ki he Lami ʻa e ʻOtuá, ʻa ia ʻokú ne ʻave ʻa e angahala ʻa e māmaní!

30 Pea naʻe fakamoʻoniʻi ia ʻe Sione ki he kakaí, ʻo pehē, Ko ʻeni ia naʻá ku pehē; ʻOku muimui mai ha tangata ʻiate au ʻa ia ʻoku lahi ia ʻiate au; he naʻe muʻomuʻa ia ʻiate au, pea naʻá ku ʻiloʻi ia, pea kuo pau ke fakahā ia ki ʻIsileli, ko ia kuó u haʻu ai ʻo papitaiso ʻaki ʻa e vaí.

31 Pea naʻe fakamoʻoni ʻe Sione, ʻo pehē; ʻI hono papitaiso ia ʻiate aú, naʻá ku mamata ki he Laumālié ʻoku ʻalu hifo mei he langí ʻo hangē ko e lupe, ʻo nofo kiate ia.

32 Pea naʻá ku ʻilo ia; he ko ia naʻá ne fekau au ke papitaiso ʻaki ʻa e vaí, naʻe pehē ʻe ia kiate au; Ko ia te ke mamata ʻe ʻalu hifo ʻa e Laumālié ʻo nofo ki aí, ko ia ia ʻokú ne papitaiso ʻaki ʻa e Laumālie Māʻoniʻoní.

33 Pea naʻá ku mamata, mo fakamoʻoniʻi ko ʻeni ʻa e ʻAlo ʻo e ʻOtuá.

34 Naʻe fai ʻa e ngaahi meʻá ni ʻi Petapala, ʻi tuʻa Soatani, ʻa ia naʻe fai papitaiso ai ʻa Sioné.

42 Pea naʻá ne ʻomi ia kia Sīsū. Pea ʻi he mamata ʻa Sīsū kiate iá, naʻá ne pehē, Ko Saimone koe, ko e foha ʻo Sioná, ʻe ui koe ko Kīfasi, ʻa ia ko hono ʻuhingá, ko ha tangata kikite, pe ko ha maka. Ko ha ongo tangata toutai ʻa kinaua. Ko ia naʻá na liʻaki ʻa e meʻa kotoa pē, ʻo muimui kia Sīsū.