ក.យ.ស., លោកុប្បត្តិ ៥០:២៤–៣៨ (ចូរប្រៀបធៀបនឹងគម្ពីរលោកុប្បត្តិ ៥០:២៤–២៦; សូមមើលផង ២ នីហ្វៃ ៣)
(ម៉ូសេ អើរ៉ុន និងយ៉ូសែប ស៊្មីធ ត្រូវបានប្រាប់ឈ្មោះទាំងអស់គ្នានៅក្នុងការព្យាករណ៍នេះដែលយ៉ូសែបមានកាលនៅស្រុកអេស៊ីព្ទ។ យ៉ូសែបក៏បានព្យាករថា ព្រះគម្ពីរមរមននឹងក្លាយទៅជាគូកននឹងបញ្ជីរបស់យូដា)។
២៤ហើយយ៉ូសែបបាននិយាយទៅបងប្អូនប្រុសរបស់លោកថា ខ្ញុំហៀបនឹងស្លាប់ហើយ ហើយនឹងទៅរកពួកអយ្យកោរបស់ខ្ញុំ ហើយខ្ញុំនឹងចុះទៅក្នុងផ្នូររបស់ខ្ញុំដោយសេចក្ដីអំណរ។ ព្រះនៃឪពុករបស់ខ្ញុំ គឺយ៉ាកុប នឹងគង់នៅជាមួយអ្នកដើម្បីដោះលែងអ្នកឲ្យរួចពីផុតពីសេចក្ដីទុក្ខវេទនា នៅថ្ងៃនៃសេវកភាពរបស់អ្នក ព្រោះព្រះអម្ចាស់ទ្រង់បានយាងមកជួបនឹងខ្ញុំ ហើយខ្ញុំបានទទួលសេចក្ដីសន្យាពីព្រះអម្ចាស់ថា ចេញពីផលនៃពោះរបស់ខ្ញុំ នោះព្រះអម្ចាស់ដ៏ជាព្រះទ្រង់នឹងបង្កើតមែកមួយដ៏សុចរិតចេញពីពោះរបស់ខ្ញុំ និងព្យាការីម្នាក់ចំពោះអ្នក ដែលឪពុករបស់ខ្ញុំ គឺយ៉ាកុប បានឲ្យឈ្មោះថា សាសន៍អ៊ីស្រាអែល (ពុំមែនព្រះមែស៊ី ដែលហៅថា ស៊ីឡូរនោះទេ) ហើយព្យាការីនេះនឹងដោះលែងប្រជាជនរបស់ខ្ញុំឲ្យរួចផុតពីស្រុកអេស៊ីព្ទ នៅថ្ងៃនៃសេវកភាពរបស់អ្នក។
២៥ហើយហេតុការណ៍នឹងកើតឡើងថា ពួកគេនឹងត្រូវខ្ចាត់ខ្ចាយម្ដងទៀត ហើយមែកមួយនឹងត្រូវកាត់ចេញ ហើយនឹងត្រូវបាននាំទៅស្រុកឆ្ងាយ ទោះជាយ៉ាងណាក៏ដោយ គង់តែពួកគេនឹងត្រូវបាននឹកចាំនៅក្នុងសេចក្ដីសញ្ញាទាំងឡាយនៃព្រះអម្ចាស់ដែរ កាលព្រះ មែស៊ី ទ្រង់នឹងយាងមក ត្បិតទ្រង់នឹងបានសម្ដែងព្រះអង្គទ្រង់ដល់ពួកគេនៅគ្រាចុងក្រោយ ដោយវិញ្ញាណនៃព្រះចេស្ដា ហើយនឹងនាំពួកគេចេញពីទីងងឹតទៅឯពន្លឺ ចេញពីទីកំបាំងងងឹត ហើយចេញពីការជាប់ឃុំឃាំងទៅឯសេរីភាព។
២៦ព្រះអម្ចាស់ដ៏ជាព្រះរបស់ខ្ញុំ ទ្រង់នឹងបង្កើតអ្នកមើលឆុតម្នាក់ឡើង ដែលនឹងទៅជាអ្នកមើលឆុតម្នាក់ដ៏ជម្រើសចំពោះផលនៃពោះរបស់ខ្ញុំ។
២៧ព្រះអម្ចាស់ដ៏ជាព្រះនៃពួកអយ្យកោរបស់ខ្ញុំ ទ្រង់មានព្រះបន្ទូលមកខ្ញុំដូច្នេះថា អ្នកមើលឆុតម្នាក់ដ៏ជម្រើសនឹងត្រូវបានបង្កើតឡើងចេញពីផលនៃពោះអ្នក ហើយអ្នកនោះនឹងត្រូវបានតម្កើងខ្ពស់នៅក្នុងចំណោមផលនៃពោះអ្នក ហើយយើងនឹងប្រទានបញ្ញត្តិដល់អ្នក នោះថា គាត់ត្រូវធ្វើកិច្ចការមួយ ដើម្បីផលនៃពោះអ្នក ជាបងប្អូនរបស់គាត់។
២៨ហើយគាត់នឹងនាំពួកគេឲ្យស្គាល់ពីសេចក្ដីសញ្ញាទាំងឡាយ ដែលយើងបានធ្វើជាមួយនឹងពួកអយ្យកោរបស់អ្នក ហើយគាត់នឹងធ្វើនូវកិច្ចការណាក៏ដោយដែលយើងបញ្ជាដល់គាត់។
២៩ហើយយើងនឹងធ្វើឲ្យអ្នកនោះទៅជាធំ នៅចំពោះភ្នែកយើង ត្បិតគាត់នឹងធ្វើការរបស់យើង ហើយគាត់នឹងបានជាធំដូចអ្នកនោះ ដែលយើងបានប្រាប់ថា យើងនឹងបង្កើតឡើងសម្រាប់អ្នក ឱវង្សអ៊ីស្រាអែលអើយ ដើម្បីដោះលែងរាស្ត្រយើងចេញពីស្រុកអេស៊ីព្ទ ត្បិត យើងនឹងបង្កើតអ្នកមើលឆុតម្នាក់ឡើង ដើម្បីដោះលែងរាស្ត្រយើងចេញពីស្រុកអេស៊ីព្ទ ហើយអ្នកនោះនឹងត្រូវបានហៅថា ម៉ូសេ។ ហើយដោយនូវឈ្មោះនេះ ទើបគាត់នឹងដឹងថា គាត់ចេញមកពីវង្សរបស់អ្នក ត្បិតគាត់នឹងត្រូវបានចិញ្ចឹមដោយបុត្រីរបស់ស្ដេច ហើយនឹងត្រូវបានហៅថាជាបុត្ររបស់ព្រះនាង។
៣០ហើយមួយទៀត យើងនឹងបង្កើតអ្នកមើលឆុតម្នាក់ចេញពីផលនៃពោះអ្នក ហើយយើងនឹងឲ្យអ្នកនោះមានអំណាចនឹងនាំពាក្យរបស់យើងដល់ពូជនៃពោះអ្នក ហើយព្រះអម្ចាស់ទ្រង់មានព្រះបន្ទូលថា ប៉ុន្តែមិនគ្រាន់តែនាំពាក្យយើងប៉ុណ្ណោះទេ គឺព្រមទាំងបញ្ជាក់ពាក្យទាំងនោះដល់គេផង ដែលនឹងត្រូវបានផ្សាយជាមុនក្នុងចំណោមពួកគេនៅគ្រាចុងក្រោយបង្អស់
៣១ហេតុដូច្នោះហើយ ផលនៃពោះអ្នកនឹងសរសេរទុក ហើយផលនៃពោះយូដានឹងសរសេរទុក ហើយអ្វីដែលផលនៃពោះអ្នកនឹងសរសេរ ព្រមទាំងអ្វីដែលផលនៃពោះយូដានឹងសរសេរ នោះនឹងបានប្រមូលទៅជាមួយគ្នា ដើម្បីបំភាន់នូវគោលលទ្ធិក្លែងក្លាយទាំងឡាយ ហើយបង្ក្រាបការទាស់ទែងគ្នាទាំងប៉ុន្មាន ហើយបង្កើតឲ្យមានសេចក្ដីសុខសាន្តនៅក្នុងចំណោមផលនៃពោះអ្នក ហើយនាំពួកគេឲ្យស្គាល់ពួកអយ្យកោរបស់គេនៅគ្រាចុងក្រោយ ហើយព្រមទាំងឲ្យស្គាល់សេចក្ដីសញ្ញាទាំងឡាយរបស់យើង ព្រះអម្ចាស់ ទ្រង់មានព្រះបន្ទូលថាដូច្នោះ។
៣២ហើយចេញពីភាពទន់ខ្សោយ អ្នកនោះនឹងត្រូវបានធ្វើឲ្យមាំមួន នៅក្នុងថ្ងៃដែលកិច្ចការរបស់យើងនឹងចេញទៅក្នុងចំណោមរាស្ត្ររបស់យើងទាំងអស់ ដើម្បីសាងពួកគេឡើងវិញ ដែលជាវង្សអ៊ីស្រាអែលនៅគ្រាចុងក្រោយបង្អស់។
៣៣ហើយយើងនឹងប្រទានពរដល់អ្នកមើលឆុតនោះ ហើយអ្នកណាដែលស្វែងរកបំផ្លាញអ្នក នោះនឹងត្រូវបានខ្មាស ព្រោះសេចក្ដីសញ្ញានេះយើងបានប្រទានដល់អ្នក ព្រោះយើងនឹងនឹកចាំដល់អ្នកពីតំណមួយទៅតំណមួយ ហើយឈ្មោះលោកនឹងត្រូវបានហៅថា យ៉ូសែប ហើយនឹងត្រូវបានដាក់តាមឈ្មោះរបស់ឪពុកលោក ហើយលោកនឹងបានដូចជាអ្នក ត្បិតការណ៍ដែលព្រះអម្ចាស់ទ្រង់នឹងធ្វើឡើងដោយស្នាដៃលោក នោះនឹងនាំប្រជាជនខ្ញុំទៅកាន់សេចក្ដីសង្គ្រោះ។
៣៤ហើយព្រះអម្ចាស់ទ្រង់បានស្បថនឹងយ៉ូសែបថា ទ្រង់នឹងថែរក្សាពូជគាត់រហូត ដោយមានព្រះបន្ទូលថា យើងនឹងបង្កើតម៉ូសេឡើង ហើយរំពាត់នឹងនៅក្នុងដៃរបស់អ្នកនោះ ហើយអ្នកនោះនឹងប្រមូលរាស្ត្ររបស់យើង ហើយគាត់នឹងនាំពួកគេដូចជាហ្វូងចៀមមួយ ហើយគាត់នឹងវាយទឹកនៃសមុទ្រក្រហមដោយរំពាត់របស់គាត់។
៣៥ហើយគាត់នឹងមានសេចក្ដីជំនុំជំរះ ហើយនឹងសរសេរព្រះបន្ទូលនៃព្រះ។ ហើយគាត់នឹងមិនចេះនិយាយពាក្យច្រើនទេ ត្បិតយើងនឹងសរសេរក្រិតវិន័យរបស់យើងដល់គាត់ ដោយម្រាមដៃយើងផ្ទាល់។ ហើយយើងនឹងបង្កើតអ្នកនិយាយជំនួសម្នាក់ដល់គាត់ ហើយឈ្មោះអ្នកនោះនឹងត្រូវបានហៅថា អើរ៉ុន។
៣៦ហើយការណ៍នោះក៏នឹងត្រូវបានសម្រេចដល់អ្នកនៅគ្រាចុងក្រោយបង្អស់ដែរ ដូចដែលយើងបានស្បថមកហើយ។ ហេតុដូច្នេះហើយ យ៉ូសែបបាននិយាយទៅបងប្អូនលោកថា ព្រះទ្រង់ប្រាកដជានឹងយាងមកជួបអ្នក ហើយនាំអ្នកចេញពីដែនដីនេះទៅកាន់ដែនដីដែលទ្រង់បានស្បថថានឹងឲ្យដល់អ័ប្រាហាំ និងដល់អ៊ីសាក និងដល់យ៉ាកុប។
៣៧ហើយយ៉ូសែបបានបញ្ជាក់ការណ៍ជាច្រើនដល់បងប្អូនលោក ហើយក៏ឲ្យពួកកូនចៅអ៊ីស្រាអែលស្បថដោយនិយាយទៅពួកគេថា ព្រះទ្រង់ប្រាកដជានឹងយាងមកជួបអ្នក ហើយអ្នករាល់គ្នាត្រូវយកឆ្អឹងខ្ញុំចេញពីនេះឡើងទៅជាមួយផង។
៣៨ម្ល៉ោះហើយ យ៉ូសែបក៏ស្លាប់ទៅ កាលគាត់មានអាយុ១១០ឆ្នាំ ហើយពួកគេបានដាក់បារទសពគាត់ រួចពួកគេបានដាក់សពគាត់ចុះក្នុងមឈូសនៅស្រុកអេស៊ីព្ទ ហើយសពគាត់ត្រូវបានរក្សាទុកពីការបញ្ចុះដោយពួកកូនចៅអ៊ីស្រាអែល ប្រយោជន៍ឲ្យសពគាត់អាចបានសែងឡើងទៅ ហើយបញ្ចុះនៅក្នុងផ្នូរជាមួយឪពុកគាត់។ ហើយពួកគេបាននឹកចាំដល់សម្បថដែលពួកគេបានស្បថដល់គាត់យ៉ាងដូច្នោះហើយ។