Veivakamataliataki
Na veika e yaco vua e dua na tamata ka veisautaki vakalekaleka na kena irairai kei na kena ituvaki—oqori me laveti cake kina dua na ivakatagedegede cecere cake vakayalo—me rawa kina ni tu ena iserau kei na lagilagi ni veika bula vakalomalagi.
Vakamataliataki nei Karisito
Eratou a raica ko Pita, Jemesa, kei Joni na nona vakamataliataki e matadratou na Turaga. Sa yalataka oti na iVakabula ni na soli vei Pita na idola ni matanitu vakalomalagi (Maci. 16:13–19; 17:1–9; Mari. 9:2–10; Luke 9:28–36; 2 Pita 1:16–18). Ena gauna bibi oqo, eratou a mai solia kina na iVakabula, Mosese vata kei Ilaija (Iliesa) na idola ni matabete ka sa yalataki oti tu mai, vei Pita, Jemesa kei Joni. Ena idola ni matabete oqo, sa tu kina vei iratou na iApositolo na kaukauwa me ratou tosoya tikoga na cakacaka ni matanitu ni oti na nona sa Lako cake ko Jisu.
E vakavuvulitaka ko Josefa Simici ni ratou a vakamataliataki talega ko Pita, Jemesa kei Joni ena Ulunivanua ni Veivakamataliataki. Eratou a raica e dua na raivotu me baleta na irairai ni vuravura ena kena ituvaki vakalagilagi ena veigauna mai muri (V&V 63:20–21). Eratou a raici Mosese kei Ilaija, e rua na ka bula vakamataliataki, ka rogoca na domona na Tamana. E kaya na Tamana, “Oqo na noqu Gone au sa dau vinakata vakalevu; dou vakarogoci koya” (Maci. 17:5).