1 Pudno, kastoy ti kinuna ti Apo kadakayo a nangummong iti bagbagina a mangawat iti pagayatanna maipanggep kadakayo:

2 Adtoy, makaay-ayo daytoy iti Apoyo, ket ^aagrag-o dagiti anghel kadakayo; nakadanon iti lapayag ti Apo a ^bMannakabalin ti ^climos dagiti kararagyo, ket naisurat iti ^dlibro dagiti nagan dagiti napasanto, nga isu dagiti agindeg iti celestial a lubong.

3 Gapuna, patulodankayo ita iti sabali a ^aMangliwliwa, kadakayo a gagayyemko, tapno mapagtalinaed iti puspuso, nga isu ti ^bNasantuan nga Espiritu ti kari; nga isu met laeng ti Mangliwliwa nga inkarik kadagiti disipulok, a kas naisurat iti pammaneknek ni Juan.

4 Daytoy a Mangliwliwa ti kari nga ^aagnanayon a biag nga itedko kadakayo, nga isu ti ^bgloria ti celestial a pagarian;

5 A gloria nga adda iti simbaan ti ^aInauna, nga isu ti Dios, ti kasantuan iti amin, babaen ni Jesucristo nga Anakna—

6 ^aIsu a nagpangato, a kas iti ^bpanagpababana kadagiti amin a banag, iti dayta ^cnaawatanna amin a banag, a mabalin nga adda iti amin ken babaen dagiti amin a banag, ti ^dsilaw ti kinapudno;

7 Ti kinapudno nga agrimat. Daytoy ti ^asilaw ni Cristo. A kas iti kaaddana met iti init, ken ti lawag ti init, ken ti bileg a ^bnakaaramidan daytoy.

8 A kas met iti kaaddana iti bulan, ken ti lawag ti bulan, ken ti bileg a nakaaramidan daytoy;

9 A kas met iti lawag dagiti bituen, ken ti bileg a nakaaramidanda;

10 Ken kasta met ti daga, ken ti bileg dita, uray pay ti daga a ^apagtaktakderanyo.

11 Ken ti silaw nga agrimat, a mangted kadakayo iti lawag, ket babaen kenkuana a mangmangted-lawag kadagiti matayo, nga isu met la ti lawag a namagalibtak iti ^apanagawatyo;

12 A ^alawag a tumpuar iti imatang ti Dios a ^bmangpunno iti law-ang—

13 Ti silaw nga adda iti ^aamin a banag, a mangted ^bbiag iti amin a banag, nga isu ti ^cpaglintegan a pakaiwanwanan ti amin a banag, nga isu ti bileg ti Dios a nagtugaw iti tronona, nga adda iti saklulo ti kinaagnanayon, nga adda iti sidong ti amin a banag.

14 Ita, pudno kunak kadakayo, a babaen ti ^apannakasubbot a naaramid kadakayo maaramidto ti panagungar dagiti natay.

15 Ket ti ^aespiritu ken ti ^bbagi ti ^ckararua ti tao.

16 Ket ti ^apanagungar manipud iti ipapatay ti pannakasubbot ti kararua.

17 Ket ti pannakasubbot ti kararua babaen kenkuana a mamagungar iti amin a banag, iti saklulo a nakaipaulogan a tawidento dagiti ^anakurapay ken ^bnaemma iti ^cdaga.

18 Ngarud, nasken unay a mapasanto manipud iti amin a kinikillo nga aramid, tapno maisagana para iti ^acelestial a gloria;

19 Ta kalpasan ti pannakatungpal ti panggep ti nakaparsuaanna, makoronaanto iti ^agloria, uray pay iti imatang ti Dios Ama;

20 Tapno ^amagun-od dagiti bagi nga adda iti celestial a pagarian iti agnanayon nga awan inggana; ta, iti daytoy a ^bgagem ti nakaaramidan ken nakaparsuaanna, ken daytoy a gagem ti ^cnakapasantuanda.

21 Ket isuda a saan a napasanto babaen ti paglintegan a naitedkon kadakayo, nga isu ti paglintegan ni Cristo, nasken nga agtawid iti sabali a pagarian, nga isu dayta terestrial a pagarian, wenno dayta telestial a pagarian.

22 Ta isu a di makatungpal iti ^apaglintegan ti celestial a pagarian saan a maawat iti celestial a gloria.

23 Ket isu a di makatungpal iti paglintegan ti terestrial a pagarian saan a maawat iti ^aterestrial a gloria.

24 Ket isu a di makatungpal iti paglintegan ti telestial a pagarian saan a maawat iti ^atelestial a gloria; ngarud saan a maikari iti pagarian nga addaan iti gloria. Ngarud maawat iti pagarian a saan a pagarian ti gloria.

25 Ket manen, pudno kunak kadakayo, agtungpal ti ^adaga iti paglintegan ti celestial a pagarian, ta natungpalna ti panggep ti nakaparsuaanna, ken saan a nagsalungasing iti paglintegan—

26 Gapuna, ^amapasantonto; wen, uray pay no ^bmatayto, agbiagto manen, ket agtungpalto iti bileg a nangbiag kenkuana, ket ^ctawidento dagiti ^dnalinteg.

27 Ta uray pay no matayda, ^aagungardanto manen, iti ^bnaespirituan a bagi.

28 Isuda a celestial nga espiritu umawatdanto iti isu met laeng a bagi nga isu ti gagangay a bagi; a kas iti panangawatyonto iti bagiyo, ket ti ^agloriayo ti glorianto a ^bmangbiag iti bagiyo.

29 Dakayo a biagen ti paset ti ^acelestial a ^bgloria umawatto iti kaarngina, uray pay ti pakabuklanna.

30 Ket isuda a biagen ti paset ti ^aterestrial a gloria umawatto iti kaarngina, uray pay ti pakabuklanna.

31 Ken kasta met nga isuda a biagen ti paset ti ^atelestial a gloria umawatto iti kaarngina, uray pay ti pakabuklanna.

32 Ket ^amabiagto met dagiti mabati; nupay kasta, agsublidanto manen iti lugarda, tapno agragsakda iti dayta ^bkayatda nga awaten, gapu ta dida kinayat ti agragsak iti dayta awatenda koma.

33 Ta ania koma ti magunggona ti tao no maikkan iti sagut, ngem saanna nga awaten ti sagut? Adtoy, saan nga agrag-o iti dayta naited kenkuana, wenno agrag-o iti nangted kenkuana iti sagut.

34 Ket manen, pudno kunak kadakayo, a mataginayon met ti iturayan ti paglintegan ket mapagbalin a naan-anay ken ^amapasanto iti isu met laeng.

35 Dayta ^aaglabsing iti paglintegan, ken saan nga agtungpal iti paglintegan, ngem kayatna ketdi ti agbalin a paglintegan, ket sitatallugod nga agtalinaed a sibabasol, ken talipupos a sibabasol, saan a mapasanto ti paglintegan, uray pay ti ^bkaasi, ^clinteg, wenno pangngeddeng. Ngarud, agtalinaedda latta a ^dnarugit.

36 Adda naited a paglintegan iti amin a pagarian;

37 Ket adu ti ^apagarian; ta awan ti lugar nga awanan iti pagarian; ket awan ti pagarian iti awanan lugar, dakdakkel man wenno basbassit a pagarian.

38 Ket naikkan iti ^apaglintegan ti tunggal pagarian; ket adda pay dagiti pagpatinggaan ken annuroten ti tunggal paglintegan.

39 Saan a maikkan iti ^akalintegan amin a tao a di agtungpal kadagita nga ^bannuroten.

40 Ta ti ^akinasaririt agsadag iti kinasaririt; ti ^bsirib umawat iti sirib; ti ^ckinapudno arakupenna ti kinapudno; ti ^dsaguday ayatenna ti saguday; ti ^elawag agsadag iti lawag; ti kaasi adda ^fpannakipagriknana iti kaasi ket tuntonenna ti kukuana; itultuloy ti linteg ti rebbengenna ket tuntonenna ti kukuana; adda ti pangngeddeng iti rupa ti nakatugaw iti trono ket iwanwan ken ipatungpalna amin a banag.

41 ^aMatukodna amin a banag, ket adda kenkuana ti amin a banag, ken adda iti aglawlawna amin a banag; ket isu ti kangatuan iti amin a banag, ken iti amin a banag, ken babaen iti amin a banag, ket pinalawlawan ti amin a banag; ket pinarsuana ti amin a banag, ken nagtaud kenkuana, isu a Dios, iti agnanayon nga awan inggana.

42 Ket manen, pudno kunak kadakayo, nangted iti paglintegan iti amin a banag, a babaen daytoy aggunayda iti ^akanitoda ken iti panawenda;

43 Ket naikeddengen ti turongda, a kas iti turong ti langit ken ti daga, a pakairamanan ti daga ken amin a planeta.

44 Ket mangtedda iti ^alawag iti tunggal maysa iti kanitoda ken iti panawenda, iti darikmatda, iti orasda, kadagiti aldawda, kadagiti lawasda, kadagiti bulanda, kadagiti tawenda—^bmaymaysa a tawen amin dagitoy iti Dios, ngem saan iti tao.

45 Agtulid ti daga babaen dagiti payakna, ket itden ti ^ainit ti lawagna iti aldaw, ket itden ti bulan ti lawagna iti rabii, ken itden met dagiti bituen ti lawagda, bayat ti panagtulidda babaen dagiti payakda iti gloriada, iti kangitingitan ti ^bbileg ti Dios.

46 Ania ti pangyarigakto kadagitoy a pagarian, tapno maawatanyo?

47 Adtoy, pagarian amin dagitoy, ket asino man a tao a nakakitan iti uray ania wenno iti kabassitan kadagitoy ^anakitada metten ti Dios nga aggunggunay a sitatan-ok ken sibibileg.

48 Kunak kadakayo, nakitanan; nupay kasta, saan a matukod ti immay iti ^abukbukodna.

49 Agrimat ti ^asilaw iti kasipngetan, ket saan a matukod ti kasipngetan; nupay kasta, umayto ti aldaw inton ^bmatukodyo ti Dios, gapu ta isu ti nangbiag kadakayo.

50 Kalpasanna maammuanyonto a nakitadakon, a siak, ket siak ti pudno a silaw nga adda kadakayo, ken addakayo kaniak; no saan saankayo nga agballigi.

51 Adtoy, yarigko dagitoy a pagarian iti tao nga addaan iti talon, ket imbaonna dagiti katulonganna a mangsukay iti talon.

52 Ket kinunana iti immuna: Mapanka ket agtrabahoka iti talon, ket umayakto kenka iti umuna nga oras, ket makitamto ti rag-o iti rupak.

53 Ket kinunana iti maikadua: Mapanka met iti talon, ket iti maikadua ng oras sarungkarankanto nga adda rag-o iti rupak.

54 Ken kasta met iti maikatlo, a kinunana: Sarungkarankanto;

55 Ken iti maikapat, ken agingga iti maika-sangapulo-ket-dua.

56 Ket napan ti apo ti talon iti immuna iti umuna nga oras, ket binantayanna iti las-ud dayta nga oras, ket naragsakan daytoy iti lawag ti rupa ti apona.

57 Ket kalpasanna pinanawanna ti immuna tapno masarungkaranna met ti maikadua, ken ti maikatlo, ken ti maikapat, ken agingga iti maika-sangapulo-ket-dua.

58 Ket kastoy ti panangawatda iti lawag ti rupa ti apoda, tunggal tao iti orasna, ken iti kanito, ken iti panawenna—

59 Nangrugi iti immuna, ken agingga iti ^anaudi, ken manipud iti naudi agingga iti immuna, ken manipud iti immuna agingga iti naudi;

60 Tunggal tao iti batangna, agingga a naggibus ti orasna, a maibatay iti imbilin kenkuana ti apona, tapno maitan-ok ti apona gapu kenkuana, ken isu iti apona, tapno maitan-okda amin.

61 Ngarud, iti daytoy a pangngarig yarigko amin dagitoy a pagarian, ken dagiti ^aagindeg kadagitoy—tunggal pagarian iti orasna, ken iti kanitona, ken iti panawenna, a maibatay iti impaulog ti Dios.

62 Ket manen, pudno kunak kadakayo, ^agagayyemko, ibatik kadakayo dagitoy a pagsasao tapno ^butobenyo a sipupuso, iti daytoy bilin nga itedko kadakayo, tapno ^cawagandakto no asidegak—

63 ^aUmasidegkayo kaniak ket umasidegakto kadakayo; ^bsapulendak a sireregta ket ^cmasapulandakto; agdawatkayo, ket umawatkayonto; agtuktokkayo, ket malukatankayto.

64 Ania man ti ^adawatenyo iti Ama iti naganko maitedto kadakayo, dayta ^bnasken kadakayo;

65 Ket no agdawatkayo iti ania man a banag a saan a ^anasken kadakayo, agbanagto a ^bpakadusaanyo.

66 Adtoy, dayta mangngegyo kasla ^atimek ti maysa a mangyar-araraw iti langalang—iti langalang, gapu ta diyo makita—ti timekko, gapu ta ^bEspiritu ti timekko; kinapudno ti Espirituk; agtultuloy ti ^ckinapudno ket awan ti pagpatinggaanna; ket no adda kadakayo nabuslonto.

67 Ket no ^amaitalimudok ti imatangyo iti ^bgloriak, mapunnonto dagiti sibubukel a bagiyo iti lawag, ket awanto ti sipnget kadakayo; ket ^cmatukodto dayta bagi a napunno iti lawag dagiti amin a banag.

68 Ngarud, ^apasantuenyo ti bagbagiyo tapno maitalimudok ti ^bpanunotyo iti Dios, ket dumtengto dagiti aldaw a ^cpannakakitayo kenkuana; ta waknitannanto ti rupana kadakayo, ket itinto naituding a panawenna, ken iti bukodna a wagas, ken maibatay iti pagayatanna.

69 Laglagipenyo ti naindaklan ken maudi a kari nga inaramidko kadakayo; paksiatenyo dagiti ^amakaidagel a pampanunot ken nalabes a ^bpanagkatkatawayo.

70 Agbatikayo, agbatikayo iti daytoy a lugar, ket mangangaykayo iti sagrado a panagtitipon, kadagiti immuna a nagtrabaho iti daytoy maudi a pagarian.

71 Ket paawaganyo ti Apo kadagiti ^abinallaaganda bayat ti panagdaliasatda, ket pagpanunotanda a sipupuso ti ballaag nga inawatda, iti ababa a panawen.

72 Adtoy, ket imutektekanyo, taripatuekto dagiti arbanyo, pataudekto dagiti elder ket ibaonko kadakuada.

73 Adtoy, idarasko ti aramidko iti umno a panawenna.

74 Ket itedko kadakayo, nga immuna a ^anagtrabaho iti daytoy maudi a pagarian, ti bilin nga ummongenyo a sangsangkamaysa ti bagbagiyo, ket urnosenyo ti bagbagiyo, ken isaganayo ti bagbagiyo, ken ^bpasantuenyo ti bagbagiyo; wen, patarnawenyo ti puspusoyo, ket ^cdalusanyo dagiti imayo ken dagiti dapanyo iti sangok, tapno aramidenkayo a ^dnadalus;

75 Tapno ipaneknekko iti ^aAmayo, ken Diosyo, ken Diosko, a nadaluskayo manipud iti dara daytoy nadangkes a kaputotan; tapno matungpalko daytoy a kari, daytoy naindaklan ken maudi a kari, nga inaramidko kadakayo, no pagayatak.

76 Ken, itedko kadakayo ti bilin nga itultuloyyonto ti ^aagkararag ken ^bagayuno manipud ita.

77 Ken itedko kadakayo ti bilin nga ^aisuroyo iti tunggal maysa ti ^bdoktrina ti pagarian.

78 Mangisurokayo a sireregta ket tarabayennakayo ti ^aparaburko, tapno ad-adda a naan-anay ti ^bpannakaiwanwanyo iti kapanunotan, iti pagbatayan, iti doktrina, iti paglintegan ti ebanghelio, iti amin a banag a mainaig iti pagarian ti Dios, a nasken a maawatanyo;

79 Kadagiti banag iti ^alangit ken iti daga nga agpadpada, ken iti uneg ti daga; dagiti banag a napasamaken, dagiti banag iti agdama, dagiti banag a nasken a mapasamak iti saan a mabayag; dagiti banag nga adda iti pagtaengan, dagiti banag nga adda iti ganggannaet; dagiti ^bgubat ken dagiti pakaul-ulawan dagiti pagilian, ken dagiti panangukom nga adda iti daga; ken kasta met ti pannakaammo maipanggep kadagiti pagilian ken pagarian—

80 Tapno makapagsaganakayo kadagiti amin a banag no ibaonkayonto manen a mangipatungpal a nasayaat kadagiti akem nga intudingko kadakayo, ken ti mision nga intudingko kadakayo.

81 Adtoy, imbaonkayo a ^amamaneknek ken mamallaag kadagiti tao, ken umno a ^bballaagan ti tunggal tao a naballaaganen ti padana a tao.

82 Ngarud, didanto mapakawan, ket maipatawto iti uloda dagiti basolda.

83 Isu a ^amangsapul kaniak a ^bnasapsapa masarakannakto, ket saanto a mabaybay-an.

84 Ngarud, agbatikayo, ket agtrabahokayo a sireregta, tapno agbalinkayo a naan-anay iti panagserbiyo iti papanyo kadagiti ^aGentil iti maudi a gundaway, kas iti kaadu ti inagananto ti Apo, a ^bmangipatalged iti paglintegan ken mangsaluad iti pammaneknek, ken mangisagana kadagiti santo iti umay nga oras ti panangukom;

85 Tapno maliklikan ti kararuada ti pungtot ti Dios, ti ^apannakadadael iti makarimon nga aramid nga agur-uray kadagiti nadangkes, agpadpada iti daytoy a lubong ken iti lubong nga umay. Pudno, kunak kadakayo, paituloyyo kadagiti saan nga immuna nga elder iti bangkag agingga nga ^bawaganto ida ti Apo, ta saan pay a dimteng ti batangda; saan a ^cnadalus ti pagan-anayda iti dara daytoy a kaputotan.

86 Agtalinaedkayo iti ^awayawaya a ^bnakawayawayaanyo; saanyo nga ^cikursong ti bagbagiyo iti ^dbasol, ngem pagtalinaedenyo a ^enadalus dagiti imayo, agingga a dumteng ti Apo.

87 Ta saan a mabayag manipud ita ket ^aagarigenggento ti ^bdaga ken agpallayog a kasla nabartek a tao; ket ilemmengto ti ^cinit ti rupana, ket ipaidamnanto ti lawagna; ket madigosto ti bulan iti ^ddara; ket makapungtotto iti kasta unay dagiti ^ebituen, ket isiwetdanto nga agpababa a kas iti bunga ti igos a matnag iti puonna.

88 Ket kalpasan ti pammaneknekyo umay ti pungtot ken gura kadagiti tao.

89 Ta kalpasan ti pammaneknekyo umay ti pammaneknek dagiti ^aginggined, a mangpataudto iti as-asugna, ket matuangto dagiti tao iti daga ket saandanto a makatakder.

90 Ken kasta met nga umayto ti pammaneknek iti ^adalagudog ti gurruod, ken ti manabsiit a kimat, ken ti bumanesbes a bagyo, ken ti daranurdor dagiti dalluyon ti baybay nga aglablabes iti pagburakanda.

91 ^aAgarimbangawto amin a banag; ket awan duadua, aglulokto ti puspuso dagiti tao; ta sumallukobto ti buteng iti amin a tao.

92 Ket agtayabto dagiti ^aanghel iti let-ang ti langit, a mangyararaw iti napigsa a timek, a mangpuypuyot iti trumpeta ti Dios, a kunkunada: Agsaganakayo, agsaganakayo, O agindeg iti daga; ta dumtengen ti panangukom ti Dios. Adtoy, ket imutektekan, umayen ti ^bNobio; rummuarkayo a mangsabat kenkuana.

93 Ket dagusto nga adda agparang a ^anaindaklan a tanda iti langit, ket makitanto amin dagiti tao a sangsangkamaysa.

94 Ket sabalinto pay nga anghel ti mangpuyot iti trumpetana, a kunkunana: Dayta ^adakkel a ^bsimbaan, ti ^cina dagiti makarimon nga aramid, a nangpainum kadagiti amin a pagilian iti arak ti pungtot ti ^dpanagdederrepna, a nangidadanes kadagiti santo ti Dios, a namagsayasay iti darada—isu a nagtugaw iti adu a dandanum, ken kadagiti puro iti baybay—adtoy, isu dagiti ^eruot ti daga; nareppereppet; nalagda dagiti reppetda, awan ti tao a makawarwar kadakuada; ngarud, nakasaganan a ^fmapuoran. Ket puyotennanto ti trumpetana nga agpadpada a nabayag ken napigsa, ket mangngegto dagiti amin a pagilian.

95 Ket addanto ^aulimek iti langit iti las-ud ti kagudua ti oras; ket madagdagus kalpasanna malukatanto ti kurtina ti langit, a kas iti pannakaukrad ti ^bpergamino kalpasan ti pannakalukotna, ket mawaknitanto ti ^crupa ti Apo;

96 Ket dagiti santo nga adda iti daga, a sibibiag, mapagungardanto ken ^amaitayabdanto a mangsabat kenkuana.

97 Ket umayto dagiti naturog iti tanemda, ta aglukatto dagiti tanemda; ket ^amaitayabdanto met a mangsabat kenkuana iti let-ang ti adigi ti langit—

98 Pasurot ida ni Cristo, isuda dagiti ^aimmuna a bunga, isuda dagiti kaduana nga umunanto a bumaba, ket isuda nga adda iti daga ken iti tanemda, nga immuna a naitayab a mangsabat kenkuana; ken amin dagitoy babaen ti aweng ti trumpeta a puyoten ti anghel ti Dios.

99 Ket kalpasan daytoy sabali pay nga anghel ti mangpuyotto, nga isu ti maikadua a trumpeta; ket kalpasanna umayton ti pannakasubbot dagiti pasurot ni Cristo iti yaayna; nga immawat iti binglayda iti dayta a ^apagbaludan a naisagana kadakuada, tapno maawatda ti ebanghelio, ken ^bmaukom a maibatay kadagiti tao iti lasag.

100 Ket manen, sabali pay a trumpeta ti mapuyotto, nga isu ti maikatlo a trumpeta; ket kalpasanna umay dagiti ^aespiritu dagiti tao a maukom, ken mapaneknekan a ^bnagbasol;

101 Ket dagitoy dagiti dadduma pay a ^anatay; ket saandan nga agbiag pay agingga nga aggibus ti ^bsangaribu a tawen, wenno manen, agingga iti kanibusanan ti daga.

102 Ket sabalinto pay a trumpeta ti mapuyot, nga isu ti maikapat a trumpeta, nga agkuna: Adda nasarakan kadagiti agbati agingga iti dayta naindaklan ken maudi nga aldaw, nga isu ti kanibusanan, nga agtalinaedto a ^anarugit.

103 Ket sabalinto pay a trumpeta ti mapuyot, nga isu ti maikalima a trumpeta, nga isu ti maikalima nga anghel a mangitalek iti ^aagnanayon nga ebanghelio—nga agtaytayab iti let-ang ti langit, kadagiti amin a pagilian, kakabsat, pagsasao, ken tattao;

104 Ket daytoyto ti aweng ti trumpetana, nga agkuna kadagiti amin a tao, nga agpadpada iti langit ken iti daga, ken iti adda iti uneg ti daga—ta mangngegto ti ^atunggal lapayag, ket ^bagparintumengto amin a tumeng, ken agpudnonto ti tunggal dila, bayat ti pannakangngegda iti aweng ti trumpeta, nga agkuna: ^cAgbutengkayo iti Dios, ket itan-okyo ti nakatugaw iti trono, iti agnanayon nga awan inggana; ta umay ti oras ti panangukomna.

105 Ket manen, sabali pay nga anghel ti mangpuyotto iti trumpetana, nga isu ti maikanem nga anghel, nga agkuna: ^aNatnagen ti nangpainum kadagiti amin a pagilian iti arak ti pungtot ti panagdederrepna; natnagen, natnagen!

106 Ket manen, sabali pay nga anghel ti mangpuyotto iti trumpetana, nga isu ti maikapito, nga agkuna: Nalpasen; nalpasen! ^aPinarmeken ti ^bKordero ti Dios ken ^cnailudeknan nga agmaymaysa ti pagpespesan iti arak, nga isu ti pagpespesan iti arak iti nakabutbuteng a pungtot ti Mannakabalin a Dios.

107 Ket kalpasanna makoronaanto dagiti anghel iti dayag ti bilegna, ket mapunnonto dagiti ^asanto iti ^bdayagna, ket awatendanto ti ^ctawidda ken ^dmaipatasdanto kenkuana.

108 Ket kalpasanna puyotento manen ti immuna nga anghel ti trumpetana kadagiti lapayag dagiti sibibiag, ket ^aipalgakna dagiti nalimed a tignay dagiti tao, ken dagiti nabileg nga aramid ti Dios kadagiti ^bumuna a sangaribu a tawen.

109 Ket kalpasanna puyotento ti maikadua nga anghel ti trumpetana, ket ipalgakna dagiti nalimed a tignay dagiti tao, ken dagiti pampanunot ken gagem ti puspusoda, ken dagiti nabileg nga aramid ti Dios iti maikadua a ribu a tawen—

110 Kasta a kasta, agingga iti maikapito nga anghel a mangpuyotto iti trumpetana; ket agtakderto iti daga ken iti baybay, ket agsapata iti nagan ti nakatugaw iti trono, ta awanton ti ^apanawen; ket maigalutto ni ^bSatanas, dayta lakay nga uleg, a managanan iti sairo, ket saanto a makaruk-at iti uneg ti ^csangaribu a tawen.

111 Ket kalpasanna ^amaruk-atanto iti apagbiit a panawen, tapno maummongna a sangsangkamaysa dagiti buyotna.

112 Ket ni ^aMiguel, ti maikapito nga anghel, nga isu ti arkanghel, ummongennanto a sangsangkamaysa ti buyotna, nga isu dagiti pangen ti langit.

113 Ket ummongento ti sairo a sangsangkamaysa dagiti buyotna; nga isu dagiti pangen ti impierno, ket umayto a makidangadang ken ni Miguel ken dagiti buyotna.

114 Ket kalpasanna umay ti ^adangadang ti naindaklan a Dios; ket ti sairo ken dagiti buyotna maigarangugongdanto iti lugarda, tapno awanto ti bilegdan a mangrimbaw kadagiti santo.

115 Ta makirangetto ni Miguel kadagiti dangadangda, ket parmekennanto ti ^aagpanggep iti trono ti nakatugaw iti trono, nga isu ti Kordero.

116 Daytoy ti gloria ti Dios, ken ti ^anapasanto; ket saandanton a makita pay ni ^bpatay.

117 Ngarud, pudno kunak kadakayo, ^agagayyemko, tinongenyo ti sagrado a panaguummongyo, a kas imbilinko kadakayo.

118 Gapu ta saan nga amin ket adda pammatina, agsukisokkayo a sireregta ken ^aisuroyo iti tunggal maysa kadagiti ^bnainsiriban a balikas; wen, sukisokenyo dagiti kasayaatan a ^clibro ti nainsiriban a balikas; agadalkayo, uray pay ti panagadal ken kasta met ti pammati.

119 Urnosenyo ti bagbagiyo; isaganayo amin a kasapulanyo; ken mangbangonkayo iti ^abalay, nga isu ti balay a pagkararagan, balay a pagayunuan, balay ti pammati, balay a pagadalan, balay ti gloria, balay ti urnos, balay ti Dios;

120 Tapno ti iseserrekyo agpannuray iti nagan ti Apo; tapno ti iruruaryo agpannuray iti nagan ti Apo; tapno amin a panagdaydayawyo agpannuray iti nagan ti Apo, a naitag-ay dagiti imayo iti Kangatuan.

121 Ngarud, ^aisardengyo dagiti awan kaes-eskanna a panagsasaoyo, manipud iti amin a ^bpanagkatkatawayo, manipud iti amin a ^cnainlasagan a tarigagayyo, manipud iti amin a ^dkinapalangguadyo ken diyo panangikankano, ken manipud iti amin a nadangkes nga aramidyo.

122 Mangtudingkayo iti maestro manipud kadakayo, ken saankayo koma nga aggigiddan nga agsao; ngem agsisinnublatkayo koma nga agsao ket dumngeg koma amin iti sasawenna, tapno kalpasan a makapagsao ti amin tapno maisagut ti amin, ken tapno maikkan ti tunggal tao iti agpapada a gundaway.

123 Kitaenyo nga ^aayatenyo ti tunggal maysa; isardengyo ti ^bkinaagumyo; adalenyo ti agpipinnarabur a kas iti dawdawaten ti ebanghelio.

124 Isardengyo ti agbalin a ^anasadut; isardengyo ti agbalin a narugit; isardengyo ti agsapul iti ^bbiddut ti tunggal maysa; isardengyo ti maturog iti at-atiddog ngem iti kasapulan; maturogkayo a masapa, tapno saankayo a mabannog, bumangonkayo a masapa, tapno masalibukagan dagiti bagi ken panunotyo.

125 Ken kangrunaan iti amin a banag, kawesanyo ti bagbagiyo iti begkes ti ^apanangngaasi, a kas iti kapa, nga isu ti mamagkayammet iti kinaan-anay ken ^bkappia.

126 ^aAgkararagkayo a kanayon, tapno saankayo a kumapsut, agingga nga ^bumayak. Adtoy, ket imutektekan, umayakto a dagus, ket siak a mismo ti mangawat kadakayo. Amen.

127 Ket manen, ti urnos iti balay nga insagana ti panguluen iti ^apagadalan dagiti propeta, a nabangon para iti panangiwanwanda iti amin a banag a nasken kadakuada, a para kadagiti amin a ^bdadaulo ti simbaan, wenno iti sabali a pannao, dagiti natudingan iti panagserbi iti simbaan, manipud kadagiti nangato a saserdote, nga agpababa kadagiti diakono—

128 Ket daytoyto ti urnos iti balay ti panguluen ti pagadalan: Isu a matudingan a presidente, wenno maestro, makitanto nga agtakder iti lugarna, iti balay a maisagananto a para kenkuana.

129 Ngarud, isunto ti umuna iti balay ti Dios, iti lugar ti tallaong iti balay a pakangngeganto iti balikasna a siaannad ken silalawag, iti saan a napigsa a timek.

130 Ket iti yaayna iti balay ti Dios, ta nasken nga isu ti umuna iti balay—adtoy, napintas daytoy, tapno agbalin a pagwadan—

131 Bay-anyo nga isu ti ^amangidaton iti kararag nga agparintumeng iti sango ti Dios, a pagilasinan wenno pakalaglagipan iti agnanayon a katulagan.

132 Ket asinonto man a sumrek a sumaruno kenkuana, tumakder ti maestro, ket, babaen ti naitayag nga imana iti langit, wen, a sililinteg, saluduanna ti kabsatna wenno dagiti kabsatna babaen dagitoy a balikas:

133 Sika kadi ti kabsat wenno dakayo ti kabsat? Saluduankayo iti nagan ti Apo a ni Jesucristo, a pagilasinan wenno pakalaglagipan iti agnanayon a katulagan, iti katulagan a pangawatak kadakayo a ^akasinninged, iti pangngeddeng a saanen a mabaliwan, saan a maisin, ken saan a masukatan, nga agbalin a gayyem ken ^bkabsatyo babaen ti parabur ti Dios iti pammatalged ti ayat, nga agtungpal kadagiti amin a bilin ti Dios nga awan ti pakababalawanna, a siyayaman, iti agnanayon nga awan inggana. Amen.

134 Ket isu a makita a saan a maikari iti daytoy a panagdayaw awanto ti lugarna iti yanyo; ta diyonto ipalubos a ^arugitanna ti balayko.

135 Ket isu nga umay ken napudno kaniak, ken kabsat, wenno kabsatda, saluduandanto ti presidente wenno maestro babaen dagiti maitayag nga ima iti langit, babaen daytoy met laeng a kararag ken katulagan, wenno babaen ti panagkuna iti Amen, a pagilasinan iti daytoy.

136 Adtoy, pudno, kunak kadakayo, daytoy ti pagariganyo iti panagdayaw iti tunggal maysa iti balay ti Dios, iti pagadalan dagiti propeta.

137 Ket matudingankayo a mangaramid iti daytoy babaen ti kararag ken panagyaman, babaen ti panangibaga ti Espiritu iti aramidenyo iti balay ti Apo, iti pagadalan dagiti propeta, tapno agbalin a santuario, tabernakulo ti Nasantuan nga Espiritu a ^apakapalag-ananyo.

138 Ket saankayonto nga umawat iti asino man kadakayo iti daytoy a pagadalan malaksid no nadalus iti ^adara daytoy a kaputotan;

139 Ket maawatto babaen ti ordinansa ti ^apanangbuggo kadagiti dapan, ta agingga iti daytoy a kamaudianan isu ti rugi ti ordinansa ti panangbuggo kadagiti dapan.

140 Ket manen, ti presidente, wenno ti mangimaton nga elder ti simbaan, ti mangannong iti ordinansa ti panangbuggo kadagiti dapan.

141 Marugian babaen ti kararag; ket kalpasan ti ^apannakiranud iti tinapay ken danum, isaganana ti bagina a maibatay iti ^bpagbasaran a naited iti maikasangapulo-ket-tallo a kapitulo ti pammaneknek ni Juan maipanggep kaniak. Amen.