1 Jesus Christ ne nyikyerɛ a ɔdze maa Joseph Smith, Kakraba, nye elderfo beesia no, wɔ ber a wɔdze akoma kor ^amaa hɔn ndze do wɔ sor no.

2 Nyew, Ewuradze n’asɛm a ɔfa n’asɔr a ɔakyekyer wɔ nda a odzi ekyir yi mu dze aama no nkorɔfo no hɔn ^ansanananmu no, dɛ mbrɛ no ^bnkɔnhyɛfo no dze hɔn ano kãe, na dɛ ɔbɔboaboa ^cn’ahotseweefo ano wɔ ^dBepɔw Zion do, bea a ɔbɛyɛ ^eJerusalem Fofor no kuropɔn no.

3 Dɛm kuropɔn a wɔbɛkyekyer no wɔbɛhyɛ ase efi bea a ^atemple no wɔ no, dza Ewuradze dze ne nsatseaba kyerɛe wɔ Missouri ɔman n’anee ahe do, ma Joseph Smith, Kakraba, dze ne nsa hyiraa do nye binom so a wɔsɔ Ewuradze n’enyi.

4 Nokwar, iyi yɛ Ewuradze n’asɛm, dɛ ^aJerusalem kuropɔn Fofor no, ahotseweefo na wɔbɔboaboa hɔn ano dze hɔn akyekyer, na wɔbɛhyɛ ase efi dɛm bea yi do, ^btemple n’ananmu mpo, dɛm temple no a dɛm ebusuasantsen yi besi.

5 Na nokwar, ebusuasantsen yi nyina runntwa mu nnkɔ kesi dɛ wobesi dan dze ama Ewuradze ana, na fua bɛhyɛ do, dɛm fua no bɛyɛ Ewuradze ^an’enyimnyam mpo, na ɔbɛhyɛ dan no mã.

6 Na Moses ne mbabanyin no, dɛ mbrɛ ne nsa kãa Asɔfodzi Krɔnkrɔn no, ber a n’asew ^aJethro dze ne ^bnsa guu no do no;

7 Na Jethro nyae fii Caleb ne nsamu;

8 Na Caleb nyae fii Elihu ne nsamu;

9 Na Elihu nyae fii Jeremy ne nsamu;

10 Na Jeremy nyae fii Gad ne nsamu;

11 Na Gad nyae fii Esaias ne nsamu;

12 Na Esaias nyae fii Nyankopɔn nsamu.

13 Esaias tsenaa ase wɔ Abraham ne nda mu, na wohyiraa no—

14 Na ^aAbraham nyaa asɔfodzi no fii ^bMelchizedek ne nsamu, ɔno so nyae fii n’egyanom hɔn ebusuasantsen hɔ, dze kesi ^cNoah do mpo;

15 Na ofi Noah do dze kesi ^aEnoch do, fi hɔn egyanom ebusuasantsen mu;

16 Na afei, fi Enoch do dze kesi ^aAbel no a no nua faa no ho ^bapam bɔn kum no no nyia ɔnam Nyankopɔn dze mbrasɛm do ^cgyee asɔfodzi no, na n’egya ^dAdam, a ɔno nye nyimpa a odzii kan no, dze ne nsa guu no do dze maa no—

17 Dɛm ^aasɔfodzi no da ho wɔ Nyame n’asɔr mu wɔ ebusuasantsen nyina mu, na onnyi ahyɛse na onnyi ewiei so.

18 Na Ewuradze sii ^aasɔfodzi no pi dze maa ^bAaron na n’asefo wɔ hɔn ebusuasantsen nyinara mu, dɛm asɔfodzi yi ara so na ɔkɔdo na ^cɔwɔ hɔ afebɔɔ a ɔyɛ Nyankopɔn ne nhyehyɛɛ krɔnkrɔn ne saso do.

19 Na asɔfodzi a ɔkrɔn yi na wɔdze dzi asɛmpa no ho dwuma na wɔdze kura ^aahenman n’esumasɛm saafee no, dza ɔyɛ Nyankopɔn no ho ^bnyimdzee saafee no.

20 Dɛm ntsi, wɔ ^aayɛdze yi mu na nyamesu mu tum no da edzi.

21 Na sɛ wokwetsir dɛm ayɛdze nye ^aasɔfodzi tumdzi yi a, nyamesu mu tum rennda edzi mma adasa wɔ honam mu;

22 Na sɛ wokwetsir iyi a, ^aɔdasanyi biara nnkotum ahwɛ Nyame n’enyim, Egya no mpo, na ɔaatsena ase.

23 Na iyi na ^aMoses dze kyerɛkyerɛɛ Israelmba no pefee wɔ sar no do, na ɔbɔɔ mbɔdzen dɛ ^bɔbɛtsew no nkorɔfo ho ama woeetum ^cwoeehu Nyame n’enyim;

24 Mbom ^awopiriim hɔn akoma ntsi, woenntum enngyina n’enyim; dɛm ntsi, Ewuradze ^bn’ebufuhyew dzɛɛw hɔn do, na ɔkãa ntam dɛ mma ^cwɔnnhɛn n’ahomgye mu ber a wɔwɔ sar no do no, dɛm ahomgye no nye n’enyimnyam ne mãhyɛ no.

25 Dɛm ntsi, ɔfaa ^aMoses fii hɔn finimfim, nye ^bAsɔfodzi Krɔnkrɔn no so;

26 Na ^aasɔfodzi kuma no nko na ɔkae, dɛm asɔfodzi yi na okitsa ^babɔfo hɔn som nye asɛmpa ne nyienyim ho dwuma ^csaafee no;

27 Dɛm asɛmpa no nye ^annuho na ^benuma asɛmpa no, nye ^cbɔnfakyɛ; na ^dhonam mu ^embrasɛm no, dza Ewuradze nam n’ebufuhyew do maa ɔkaa Aaron fie wɔ Israelmba mu kesi ^fJohn no a Nyame maa no do, nyia Sunsum Krɔnkrɔn ^gahyɛ no mã fi ne nã ne yamu no aber do.

28 Na wonumaa no ne mbafobermu, na Nyame no bɔfoe na ɔhyɛɛ no tum ber a odzii ndaawɔtwe dɛ ombutuw Jewfo hɔn ahenman ahengua no, ^ana ɔntsentsen Ewuradze no kwan no wɔ no nkorɔfo enyim, na onsiesie hɔn mma Ewuradze ne mbae no, ɔno ne nsamu na wɔdze ^btum nyina ahyɛ.

29 Na bio, elder na bishop hɔn dzibew no yɛ adze a ohia a ɔkã na ^aɔfam asɔfodzi a ɔkrɔn no ho.

30 Na bio, kyerɛkyerɛnyi na deacon dzibew no yɛ adze a ohia a ɔkã na ɔfam asɔfodzi kuma no ho, dɛm asɔfodzi no na wosii no pi dze maa Aaron na ne mbabanyin no.

31 Dɛm ntsi, dɛ mbrɛ mekãe a ɔfa Moses ne mbabanyin ho no—na Moses ne mbabanyin na Aaron so ne mbabanyin no bɔbɔ ^aafɔr a ɔsɔ enyi wɔ Ewuradze ne fie, dɛm fie no na wobesi no wɔ ebusuasantsen yi mu, wɔ ^bbea a woehyira do no a emi makyerɛ no—

32 Na Ewuradze ^an’enyimnyam no bɛhyɛ Moses na Aaron hɔn mbabanyin no mã wɔ ^bBepɔw Zion do wɔ Ewuradze ne fie, na hɔn mbabanyin no nye hom; nye dodow so a mafrɛ hɔn na masoma hɔn dɛ wɔnkɔ nkɛkyekyer ^cm’asɔr no.

33 Na hɔn nyina so a wɔbɛgye ^aasɔfodzi ebien yinom a makã ho asɛm yi na wobedzi ^bnokwar wɔ ho, na wɔakrɔn hɔn frɛ no, Sunsum no ^cbɛtsew hɔn ho na wɔayɛ hɔn nyimpadua no fofor.

34 Na wɔabɛyɛ Moses na Aaron hɔn mbabanyin na ^aAbraham ^basefo, na asɔr no nye ahenman no, na Nyankopɔn ^cn’apamfo.

35 Na hɔn nyinara a wɔgye asɔfodzi yi no wɔgye me, Ewuradze na ɔse;

36 Na nyia ɔgye m’asomfo no ^aɔgye me;

37 Na nyia ^aɔgye me no ɔgye m’Egya;

38 Na nyia ɔgye m’Egya no ɔgye m’Egya n’ahenman; dɛm ntsi, ^adza m’Egya wɔ nyinara no wɔdze bɛma no.

39 Na iyi nye ^ansewdzi nye ahyɛmudzi a ɔkã asɔfodzi no ho.

40 Dɛm ntsi, hɔn a wɔgye asɔfodzi no nyinara gye m’Egya ne nsewdzi nye ahyɛmudzi yi, a onnkobu do, nna wonnkotum eyi efi hɔ so.

41 Mbom obiara a obedzi ahyɛmu yi na ekyir yi ^aobobu do no, na ɔadan efi ho koraa no, ^borinnya bɔnfakyɛ wɔ wiadze yi mu anaa wiadze a ɔreba no mu.

42 Na hɔn a wɔremmba mmbɛgye dɛm asɔfodzi yi a hom nsa akã yi mu no wondue, dza menam mankasa me ndze a ofi sor dze rema hom a hom wɔ ha ndɛ yi; na mahyɛ ɔsor dɔm nye ^am’abɔfoe mbra mpo wɔ hom ho.

43 Na afei, mehyɛ hom dɛ hom nhwɛ homho yie, na hom ^andzi onnyiewiei nkwa nsɛm no do enyiberdo.

44 Na hom ^amfa asɛm biara a ofi Nyankopɔn n’anomu aba no do mbɔ bra.

45 Na ^aEwuradze n’asɛm yɛ nokwar, na adze biara a ɔyɛ ^bnokwar no yɛ kan, na adze biara a ɔyɛ kan no yɛ Sunsum, Jesus Christ no Sunsum no.

46 Na Sunsum no ma ^aɔdasanyi biara a ɔbɛba wiadze yi mu no ^bkan; na Sunsum no ma ɔdasanyi biara a ɔwɔ wiadze yi mu a otsie Sunsum ne ndze no nyimdzee.

47 Na ɔdasanyi biara a otsie Sunsum ne ndze no ba Nyankopɔn hɔ, Egya no mpo.

48 Na Egya no ^akyerɛkyerɛ no ^bahyɛmu no a wɔayɛ no fofor na woesi no pi dze ama hom no, dza ɔnam hom yieyɛ ntsi woesi no pi dze ama hom no, na nnyɛ hom nko hom yieyɛ ntsi, na mbom wiadze nyina yieyɛ so ntsi.

49 Na ^awiadze nyina tse bɔn mu, na osi nkrum wɔ ^bsum mu, na ɔhyɛ bɔn nkyehoma mu.

50 Na ɔnam iyi do hom bohu dɛ wɔhyɛ ^abɔn ^bnkyehoma mu; osiandɛ wommfi mu mmba me nkyɛn.

51 Osiandɛ obiara a ɔmmba me nkyɛn no hyɛ bɔn ne nkyehoma mu.

52 Na obiara a onntsie me ndze no nnyim ^ame ndze, na ɔnnyɛ medze.

53 Na ɔnam iyi do hom bohu soronko a ɔda atseneneefo nye emumuyɛfo mu, na seseiara mpo ^awiadze nyina ^brisi nkrum wɔ ^cbɔn nye sum mu.

54 Na mber bi a etwa mu kɔ no, nna osian ^aekyingye nye ndzɛmba a hom buu no tootooba ntsi hom adwen hyɛ sum mu.

55 Dɛm ^aegyangyandze na ekyingye yi dze asɔrtɔw nyina abɛhyɛ afɔbu ase.

56 Na dɛm afɔbu yi wɔ Zionmba do, hɔn nyina mpo.

57 Na wɔbɛhyɛ afɔbu yi ase ekesi ber a wobonu hɔnho na wɔakaa ^aahyɛmu fofor no, ^bMormon Nwoma no, nye ^cmbrasɛm dadaw no a medze ama hom no, nnyɛ dɛ wɔbɛkã nko, na mbom ^dwɔbɛyɛ dza makyerɛw no—

58 Ama ɔaasow eduaba a ɔfata hɔn Egya n’ahenman no; annyɛ dɛm a, dza ɔwɔ hɔ ma hɔn ara nye ɔhwe na atsɛmbu a wobohue egu Zionmba do.

59 Ana ɔsɛ dɛ ahenman mu mba gu m’asaase krɔnkrɔn no fĩ? Nokwar, mese hom dɛ, Oho.

60 Nokwar, nokwar, mese hom a seseiara hom tse me ^ansɛm, a ɔyɛ me ndze yi, na susuampaara dɛ hom gye ndzɛmba yinom no, nhyira akã hom;

61 Sɛ hom si hom adwen pi, wɔ ^abotooyɛ na wɔ mpaabɔ sunsum mu, gye dase wɔ ndzɛmba yinom a makã ho asɛm akyerɛ hom yi, na hom gye ho dase kyerɛ wiadze nyina a, osian dɛm mbrasɛm yi ntsi—medze hom bɔn ^bbɛkyɛ hom.

62 Dɛm ntsi, hom ^ankɔ wiadze nyina; na beebiara a hom runntum nnkɔ no, hom nsoma, ama dasegye no efi hom hɔ akɔ abɔdze biara hɔ wɔ wiadze nyina mu.

63 Na dɛ mbrɛ mekãa kyerɛɛ ^am’asomafo no, dɛmara so na mekã kyerɛ hom, osiandɛ hom yɛ m’asomafo, Nyame n’asɔfompanyin mpo; hom nye hɔn a m’Egya dze hom ^bama me; hom yɛ ^cm’anyɛnkofo;

64 Dɛm ntsi, dɛ mbrɛ mekãa kyerɛɛ m’asomafo no, mekã no bio kyerɛ hom, dɛ ^aɔkra biara a ^bɔbɛgye hom nsɛm edzi na wobonuma no wɔ nsu mu dze ama ^cbɔnfakyɛ no, benya ^dSunsum Krɔnkrɔn no.

65 Na ^ansɛnkyerɛdze yinom bedzi hɔn a wɔgye dzi no ekyir—

66 Wɔbɛyɛ tum ^andwuma pii wɔ me dzin mu;

67 Wobotu mbɔnsam wɔ me ^adzin mu;

68 ^aWɔbɛsa yar wɔ me dzin mu;

69 Wobobue efurafo enyi na woebue hɔn etsitsifo aso wɔ me dzin mu;

70 Na mmum ne tɛkyerɛma akasa;

71 Na sɛ wɔma hɔn ^abɔr ma wɔnom a ɔrennyɛ hɔn hwee;

72 Na abowatsena no bɔr rinnya tum nnhaw hɔn.

73 Mbom mehyɛ hɔn dɛ, mma wɔmmfa ndzɛmba yinom ^anntuw hɔnho, nna mma wɔnnkã wɔ wiadzemba enyim; osian hom mfaso na nkwagye ntsi na wɔdze iyinom ama.

74 Nokwar, nokwar, mese hom dɛ, hɔn a wɔnngye hom nsɛm nndzi, na ^awoennuma hɔn wɔ nsu mu wɔ me dzin mu ammfa hɔn bɔn annkyɛ hɔn, ama woenya Sunsum Krɔnkrɔn no, ^bwobobu hɔn fɔ, na wɔremmba m’Egya n’ahenman no mu, bea a Egya na emi yɛwɔ no.

75 Na nyikyerɛ yi na mbrasɛm yi wɔdze ma hom nye wiadze nyina fi dɔn yi ara mu dze kɔ, na asɛmpa no wɔ hɔ ma hɔn a wɔnntsee nyina.

76 Mbom, nokwar, mese hom nyina a wɔdze ahenman no ama hom no—fi hom hɔ na ɔwɔ dɛ hom kã asɛmpa no kyerɛ hɔn, aama woeenu hɔnho wɔ hɔn ndwuma bɔn dadaw no ho; na wɔbɛkã hɔn enyim wɔ hɔn ekyingye akoma bɔn ho, nye hom enuanom a wɔwɔ Zion no so osiandɛ ber a mosomaa hom no, wɔtseew etua wɔ hom do.

77 Na bio, mese hom, m’anyɛnkofo dɛ, ofi ndɛ kɔ, mebɛfrɛ hom anyɛnkofo, ohia dɛ medze dɛm mbrasɛm yi ma hom, ama hom aabɛyɛ dɛ m’anyɛnkofo no a ber a nna menye hɔn wɔ hɔ no murututu kwan akɛkã asɛmpa no wɔ mo tum mu no;

78 Na mehyɛɛ hɔn dɛ mma wɔmmfa ^asika kotoku anaa bɔtɔ, anaa ntar ebien.

79 Hwɛ, mosoma hom ma hom akɔ wiadze akɔsɔ hɔn ahwɛ, na odwumayɛnyi biara ^an’apaadze sɛ no.

80 Na obiara a ɔbɔkɔ ^aakɛkã dɛm ^basɛmpa yi a ɔfa ahenman no ho no, na ɔnnkɛpa abaw na ɔbɔkɔ do edzi nokwar wɔ ndzɛmba nyina mu no, ɔnnkɔtɔ bahaw wɔ adwen mu, nna no mu nnkɛyɛ kunsaa, nna wɔ honandua mu, n’anankɔkɔmu anaa n’akwaado; na ne ^ctsinhwi kor mpo nnyi hɔ a ɔbɔtɔ famu a wonnkohu. Na kɔm renndze hɔn, nna nsukɔm so renndze hɔn.

81 Dɛm ntsi, mma hom ^anndwendwen adzekyee ho, dɛ ebɛnadze na hom bedzi anaa hom bɔnom, anaa hom bofura.

82 Na hom nhwɛ haban mu nsukookoo mbrɛ wosi nyin, wɔnnyɛ edwuma, eso wɔnntow asaaba, na wiadze mu ahenman nyina hɔn enyimnyam wɔnhyehyɛ hɔnho dɛ iyinom mu kor mpo.

83 Na hom ^aEgya a ɔwɔ sor ^bnyim dɛ hom hia dɛm ndzɛmba yinom nyina.

84 Dɛm ntsi, hom mma adzekyee ^andwendwen nankasa no ho.

85 Eso mma hom nndzi kan nndwendwen ^adza hom bɛkã ho; na mbom hom ^bnkora nkwa nsɛm wɔ hom adwen mu aber nyina, na ^cdɔn no nya sõ a, wɔdze obiara nedze bɛma no.

86 Na dɛm mbrasɛm yi wɔdze ma ^aagyedzifo nyina a Nyame afrɛ hɔn wɔ n’asɔr mu dɛ wɔnyɛ ɔsomdwuma no; dɛm ntsi, ofi dɔn yi mu kɔ no, mma hɔn a wɔkɔbɔ ahenman no ho asɛmpa dawur no mmfa sika kotoku anaa bɔtɔ nnkɔ.

87 Hwɛ, ^amosoma hom ma hom ekeyi wiadzemba atsɛn wɔ hɔn ndwuma bɔn ho, na hom akyerɛkyerɛ hɔn atsɛmbu a ɔreba no ho adze.

88 Na obiara a ^aɔbɛgye hom no, hɔ na mo so mebɛba, osiandɛ mibedzi hom enyim. Mibedzi hom nyimfa na hom bankum, na mo sunsum bɛhɛn hom akoma mu, na ^bm’abɔfoe etwa hom ho ehyia, na wɔasoa hom.

89 Na obiara a ɔgye hom no, ɔgye emi; na ɔnoara na ɔbɛma hom edziban, na ɔbɛma hom efuradze, na ɔama hom sika.

90 Na nyia ɔma hom edziban, anaa efuradze anaa sika no, ^arennyew n’akatua dabiarada.

91 Na nyia ɔnnyɛ ndzɛmba yinom no nnyɛ mo suanyi; na dɛm kwan yi do na hom bohu ^am’esuafo.

92 Nyia ɔanngye hom no, hom mfi ne nkyɛn nkɔ, na hom mfa nsu, nsu krɔngyekrɔngye ^anhohor hom ananadze, dɛ ɔyɛ ɔhyewber anaa awɔwber no, na hom mfa ngye ho dase mma hom Egya a ɔwɔ sor, na mma hom nnsan hom ekyir nnkɔ dɛm nyimpa no hɔ bio.

93 Na ekuraase anaa kurow biara a hom bɛhɛn mu no, hom nyɛ dɛmara.

94 Na hom nsi nketse nhwehwɛ mu, na mma hom nngyaa; na dɛm fie no ndue, anaa ekuraase, anaa kurow a ɔpow hom; anaa hom nsɛm, anaa hom dasegye a ɔfa mo ho no.

95 Wondue, misi do bio dze ma dɛm fie, anaa ekuraase, anaa kurow a ɔpow hom, anaa hom nsɛm, anaa hom dasegye wɔ mo ho no;

96 Na emi, ^aOtumfo no, medze me nsa ato aman do, dɛ ^bmerebɛtsẽa hɔn wɔ hɔn ^cemumuyɛdze ho.

97 Na ɔyardɔm bɛtsen akɔ, na worinnyi mmfi asaase do kesi dɛ mubowie m’edwuma yɛ, dza wobotwa no ^atsia tseneneeyɛ mu no—

98 Kɛpem dɛ obiara bohu me, hɔn a wɔakã no, ofi kumabaa do kesi ɔkɛse do mpo, na wɔdze Ewuradze ho nyimdzee bɛhyɛ hɔn mã, na wobohu ^aenyiwa tua enyiwa na wɔbɛma hɔn ndze do na wɔdze ndze abɔ mu ^batow dɛm ndwom fofor yi, akã dɛ:

99 Ewuradze dze Zion aba bio;Ewuradze ^aapon no nkorɔfo, ^bIsraelfo,Dɛ mbrɛ ^cadom ^dnsanmunyi no tse,Dza wɔnam gyedzi do dze bae no,Nye hɔn ^eegyanom ahyɛmu no.

100 Ewuradze apon no nkorɔfo;Na ^aɔakyekyer Satan na mber nnyi hɔ bio.Ewuradze aboaboa ndzɛmba nyina ano ayɛ no ^bkor.Ewuradze dze ^cZion fi sor aba famu.Ewuradze dze Zion fi ^dase akɔ sor.

101 ^aAsaase aper na ɔawo n’ahoɔdzen aaba;Na wɔada nokwar no edzi wɔ n’ayamudze mu;Na ɔsor akyerɛ n’ayamuyie wɔ no do;Na wɔdze ne Nyankopɔn ^bn’enyimnyam efura no;Na ogyina no nkorɔfo finimfin.

102 Wɔmfa enyimnyam, na abɔdzin, na tum na ahoɔdzen,Mma hɛn Nyankopɔn; osiandɛ ^aehumbɔbɔr ahyɛ no mã,Pɛrpɛrdzi, adom na nokwar, na ^basomdwee,Afebɔɔ kesi afebɔɔ. Amen.

103 Na bio, nokwar, nokwar, mese hom dɛ, ohia dɛ obiara a ɔbɔkɔ akɔbɔ mo asɛmpa a ɔwɔ hɔ daapem dawur no, susuampaara dɛ wɔwɔ ebusua-ebusua, na wɔkyɛ hɔn sika no, ɔsɛ dɛ wɔdze kɛma hɔn anaadɛ wɔdze yɛ biribi a no ho bɛba mfaso ama hɔn dɛ mbrɛ Ewuradze bɛkyerɛ hɔn, osiandɛ dɛm na oye ma me.

104 Na wɔmma hɔn a wonnyi ebusuafo na wonya ^asika no, mfa mma bishop a ɔwɔ Zion no, anaa bishop a ɔwɔ Ohio no, aama oeehyira do dze ada nyikyerɛ no edzi nye ne ntsintsimii, na wɔdze akyekyer Zion.

105 Na sɛ obi ma hom atar a, hom nyi dadaw no na hom mfa mma ^aehiafo, na hom mfa ehurusi nkɔ hom kwan.

106 Na sɛ obi wɔ hom mu a ɔyɛ dzen wɔ Sunsum mu a, hom mma ^aɔmfa nyia ɔyɛ mberɛw nkã no ho ama oenya ntowdo wɔ ^bɔdwe nyina mu, ama no so ɔaayɛ dzen.

107 Dɛm ntsi, hom mfa hɔn a wɔahyɛ hɔn ^aasɔfodzi kuma no nkã homho, na hom nsoma hɔn ma wondzi hom enyim kan nkesiesie kwan no, na wondzi dwuma a homankasa enntum enndzi no.

108 Hwɛ, iyi nye kwan a tsetseberdo m’asomafo no faa do kyekyeer m’asɔr dze maa me no.

109 Dɛm ntsi, hom mma obiara ngyina nankasa ne dzibew mu, na ɔnyɛ edwuma wɔ nankasa ne frɛ ho dwuma; na mma tsir nnse nan dɛ no ho nnhia; osiandɛ sɛ nan nnyi hɔ a honandua besi dɛn egyina?

110 Na honandua ne ^amfafakuwa nyina ho hia no, ama hɔn nyina aabɔ mu ayɛ edwuma ma honandua no eetum edzi mu.

111 Na hwɛ, ɔsɛ dɛ ^aasɔfompanyin no tu kwan, na elderfo so dɛmara, nye ^basɔfo nkakraba no so; na mbom ^cdeaconfo no nye ^dakyerɛkyerɛfo no dze ɔsɛ dɛ woyi hɔn si hɔ ma ^ewɔnweɔn asɔr no do na wogyina dzi dwuma som asɔr no.

112 Na bishop, Newel K. Whitney so ɔsɛ dɛ otu kwan kɔ aprɔw wɔ nsɔr nyinara mu kɔhwehwɛ ehiafo no na ^aɔma hɔn, hɔn ehiadze ber a ^bɔbrɛ esikafo nye ahantanfo no adze.

113 Na ɔsɛ dɛ ɔfa ^aananmusinyi na ɔkyerɛkyerɛ no n’edwuma no ma ɔyɛ ma no.

114 Na wɔmma bishop no nkɔ New York kurow mu nye Albany kuropɔn so, nye Boston kuropɔn so mu na ɔmfa ndze kɛse mbɔ asɛmpa no ho kɔkɔ nkyerɛ nkorɔfo a wɔwɔ nkuropɔn yi mu dɛ, sɛ wɔpow ndzɛmba yinom a, ^aamamfoyɛ na ɔsɛɛ kɛse bi bɛba hɔn do.

115 Na sɛ wɔpow ndzɛmba yinom a, nna hɔn atsɛmbu ber no abɛn na hɔn efi bɛyɛ ^aafõ ama hɔn.

116 Ma ^aɔngye me ndzi na ^bn’enyim runngu ase; na ne ^ctsinhwi kor mpo ronntɔ famu a worunnhu.

117 Na nokwar, mese hom, mo nkowaa a hom aka dɛ, hom nkɔ nkedzi dwuma a mafrɛ hom wɔ ho no wɔ nkuropɔn nye nkuraase a wɔagye dzin mu, hom nyi wiadzemba atsɛn wɔ tseneneeyɛ mu wɔ hɔn ndzeyɛbɔn nye ndwuma bɔn ho na hom mma ɔnda edzi pefee na wɔntse ase dɛ, amamfoyɛ ekyiwadze a ɔwɔ nda a odzi ekyir no mu.

118 Na Ewuradze Tumfo no na ɔse, mebɛma hom ^aatsetsew hɔn ahenman mu; meremma asaase nko ^bnnwosow, mbom sor nworaba so behihim.

119 Na emi, Ewuradze matsen me nsa dze ekenyan sor etumfo; hom runntum nnhu no sesei, na mbom ɔnnkɛkyɛr na hom ehu, na hom nhu dɛ Emi nye mara, na ^amebɛba menye mo nkorɔfo ^bebedzi hen.

120 Meyɛ ^aAlpha na Omega, ahyɛse na ewiei no. Amen.