Tshooj 78
Kev tshwm sim uas tus Yaj Saub Joseph Smith tau txais, nyob hauv Kirtland, Ohio, lub Peb Hlis Ntuj hnub tim 1, xyoo 1832. Hnub ntawd, tus Yaj Saub thiab lwm tus thawj coj tau koom ua ke sib tham txog tej xwm ntawm lub Koom Txoos. Thaum xub thawj, txoj kev tshwm sim no hais kom tus Yaj Saub, Sidney Rigdon, thiab Newel K. Whitney mus rau Missouri thiab txhim tsa lub Koom Txoos tej kev ua lag luam thiab kev luam ntawv los ntawm kev tsim ib lub “koom haum ua lag luam” uas yuav saib xyuas tej yam no, pab khaws nyiaj rau txoj kev txhim tsa Xi-oos thiab pab cov pluag. Lawv txhim tsa lub koom haum ua lag luam no, uas lawv hu ua Koom Haum Ua Lag Luam Koom Siab, thaum lub Plaub Hlis Ntuj xyoo 1832 thiab muab rhuav thaum xyoo 1834 (saib tshooj 82). Tsis ntev tom qab muab lub koom haum no rhuav, los ntawm Joseph Smith kev qhia, tau muab sob lus “tej hauj lwm khiav lub tsev rau khoom pub rau cov neeg pluag” los hloov sob lus “tej lub koom haum ua lag luam thiab luam ntawv” nyob hauv txoj kev tshwm sim no, thiab tau muab lo lus “lub koom haum” los hloov lo lus “lub koom haum ua lag luam.”
1–4, Haiv Neeg Ntseeg yuav tsum tsim thiab tsa ib lub tsev rau khoom; 5–12, Kev muaj tswv yim siv lawv tej khoom yuav coj mus rau kev cawm seej; 13–14, Lub Koom Txoos yuav tsum txhob siv lub hwj chim ntawm lub ntiaj teb no; 15–16, Mikhayees (Adas) ua hauj lwm los ntawm tus Dawb Huv (Khetos) txoj kev qhia; 17–22, Cov uas rau siab ntseeg tau koob hmoov, vim lawv yuav tau txhua yam los ua lawv tug.
1 Tus Tswv hais lus rau Joseph Smith, tus Hluas, li no: Tus Tswv nej tus Vajtswv hais tias, Mloog kuv, cov uas tau tsa rau lub pov thawj hwj hlob ntawm kuv lub koom txoos, cov uas tau sib txoos nej tus kheej tuaj ua ke;
2 Thiab mloog tej lus ntuas ntawm tus uas tau tsa nej los saum ntuj los, tus uas yuav hais tej lus txawj ntse rau hauv nej pob ntseg, kom nej yuav tau kev cawm seej los ntawm yam uas nej tau muab los hais rau kuv, tus Tswv uas yog Vajtswv hais li.
3 Vim kuv hais tseeb rau nej tias, lub sij hawm twb los txog, thiab nim no twb yuav txog lawm; thiab saib seb, thiab xyuas seb, yeej yuav tsum muaj ib lub koom haum rau kuv cov neeg, kom tswj thiab tsim tej hauj lwm khiav lub tsev rau khoom pub rau kuv cov neeg pluag, nyob hauv qhov chaw no thiab nyob hauv thaj av Xi-oos tib si—
4 Ua kev tsim muaj thiab txheej txheem nyob mus li thiab kav ib txhis rau kuv lub koom txoos, los mus txhawb nqa txoj hauj lwm no, uas nej tau rau siab ua, rau txoj kev cawm neeg, thiab rau nej Leej Txiv tus uas nyob saum ntuj ceeb tsheej lub yeeb koob;
5 Kom nej yuav koom siab sib npaug rau tej uas nyob saum ntuj, muaj tseeb tiag, thiab rau tej uas nyob hauv ntiaj teb no thiab, kom thiaj tau txais tej uas nyob saum ntuj.
6 Vim yog hais tias nej tsis tau sib npaug rau tej yam nyob hauv ntiaj teb ces nej tsis muaj peev xwm tau sib npaug rau tej yam nyob saum ntuj;
7 Vim yog hais tias nej xav kom kuv muab ib qho chaw rau nej nyob saum lub ntuj xilethi-aus, nej yuav tsum npaj nej tus kheej los ntawm kev ua tej uas kuv tau txib nej lawm thiab hais kom nej yuav tsum ua.
8 Thiab nim no, tus Tswv hais tseeb li no tias, tsim nyog uas yuav ua txhua yam rau kuv lub yeeb koob, los ntawm nej cov uas tau koom ua ke nyob hauv tus txheej txheem no;
9 Los yog hais tias, cia kuv tus tub qhe Newel K. Whitney thiab kuv tus tub qhe Joseph Smith, tus Hluas, thiab kuv tus tub qhe Sidney Rigdon los zaum sab laj nrog haiv neeg ntseeg uas nyob hauv Xi-oos;
10 Tsis li ces Dab Ntxwg Nyoog tab tom nrhiav kev muab lawv lub siab tig ntawm txoj kev tseeb mus, kom lawv hloov ua neeg dig muag thiab tsis to taub tej uas tau npaj rau lawv.
11 Yog li ntawd, kuv muab ib lo lus txib rau nej, kom npaj thiab kho nej tus kheej los ntawm ib txoj kev cog lus los yog kev khi lus uas kav ib txhis uas yuav rhuav tsis tau.
12 Thiab tus uas muab kev khi lus no rhuav yuav poob nws lub luag hauj lwm thiab chaw nyob hauv lub koom txoos, thiab yuav raug muab tso rau txoj kev tsim txom ntawm Dab Ntxwg Nyoog kom txog hnub txhiv dim.
13 Saib seb, qhov no yog txoj kev npaj uas kuv muab los npaj nej, thiab lub hauv paus, thiab tus yam ntxwv uas kuv muab rau nej, kom nej thiaj yuav ua tau li tej lus txib uas muab rau nej;
14 Kom los ntawm kuv txoj kev saib xyuas, txawm yog txoj kev txom nyem yuav poob los rau nej, los kom lub koom txoos yuav sawv taus siab tshaj tag nrho lwm cov nyob hauv qab lub ntuj xilethi-aus txhob tos lwm tus pab.
15 Kom nej yuav nce los mus rau lub meej mom uas tau npaj rau nej, thiab tus Tswv yuav tsa nej ua cov kav ntau lub nceeg vaj, tus Tswv uas yog Vajtswv hais li, tus Dawb Huv ntawm Xi-oos, tus uas tau tsim lub hauv paus rau Adas-oodais-Omas;
16 Tus uas txib Mikhayees nej tus tub vaj ntxwv, thiab tsa nws rau nws qhov chaw, thiab muab nws tso rau chaw siab, thiab muab cov yawm sij ntawm txoj kev cawm seej rau nws los ntawm tej lus ntuas thiab kev coj ntawm tus tus Dawb Huv, tus uas tsis muaj hnub pib los yog txoj sia uas kawg.
17 Kuv hais tseeb tseeb rau nej tias, nej yog me nyuam yaus, thiab nej tseem tsis to taub hais tias Leej Txiv muaj cov koob hmoov tseem ceeb npaum li cas nyob hauv nws tus kheej txhais tes thiab tau npaj rau nej;
18 Thiab nej ris tsis taus txhua yam lub sij hawm no; txawm li ntawd los, cia li zoo siab, vim kuv yuav coj nej kev. Lub nceeg vaj yog nej li thiab tej koob hmoov uas nyob haud yog nej li, thiab tej kev nplua nuj nyob mus ib txhis yog nej li.
19 Thiab tus uas txais txhua yam nrog txoj kev ua tsaug los tus Tswv yuav ua kom tus ntawd muaj yeeb koob; thiab yuav muab tej uas nyob hauv lub ntiaj teb no ntxiv rau nws, ib puas npaug kiag, muaj tseeb tiag, tshaj qhov ntawd.
20 Yog li ntawd, cia li ua tej uas kuv tau txib nej, nej tus Txhiv Dim hais li, uas twb yog tus Tub Omas, tus uas npaj txhua yam ua ntej nws coj nej mus;
21 Vim nej yog lub koom txoos ntawm tus Tub Hlob, thiab nws yuav qaws nej mus saum tauv huab, thiab muab txhua tus nqi zog rau lawv.
22 Thiab tus uas yog ib tug saib xyuas uas rau siab ntseeg thiab muaj tswv yim yuav tau txhua yam ua nws tug. Amees.