1 M’akowaa Orson Hyde no, wɔfrɛɛ no Nyame tseasefo no ^aSunsum do hyɛɛ no sɔfo dɛ ɔmbɔ asɛmpa a ɔwɔ hɔ daapem no ho dawur mfi nyimpa kor do nkɔ nyimpa kor do, mfi asaase kor do nkɔ asaase kor do, wɔ mboanofo emumuyɛfo mu, wɔ hɔn asɔrfi mu; nye hɔn nyi atsɛn na onsiansian kyerɛwsɛm nyinara mu nkyerɛ hɔn.

2 Na, hwɛ, na hu dɛ iyi yɛ mfatoho dze ma hɔn a wɔama hɔn asɔfodzi no, hɔn a wɔasoma hɔn dɛ wɔnkɔ kan no.

3 Na iyi yɛ mfatoho dze ma hɔn dɛ ^awɔbɛkã dza Sunsum Krɔnkrɔn no kenyan hɔn dɛ wɔnkã no.

4 Na biribiara a ^aSunsum Krɔnkrɔn no bekenyan hɔn dɛ wɔnkã no bɛyɛ kyerɛwsɛm, ɔbɛyɛ Ewuradze ne pɛ, ɔbɛyɛ Ewuradze n’adwen, ɔbɛyɛ Ewuradze n’asɛm, ɔbɛyɛ Ewuradze ne ndze, nye Nyame no ^btum a ɔdze kɔ nkwagye mu.

5 Hwɛ, iyi nye Nyame n’anohoba a ɔdze bɔ hom, O hom a hom yɛ mo nkowaa.

6 Dɛm ntsi, hom enyi ngye, na mma hom ^annsuro, na emi, Ewuradze, menye hom wɔ hɔ, na mibegyina hom afã; na hom bɛgye mo ho dase mpo dɛ, Jesus Christ meyɛ Nyame tseasefo ne Ba, na dɛ, nna mowɔ hɔ, na mowɔ hɔ na mebɛba.

7 Iyi nye Ewuradze m’asɛm a medze ma ɔwo, m’akowaa ^aOrson Hyde nye ɔwo so m’akowaa Luke Johnson, nye ɔwo m’akowaa Lyman Johnson, nye ɔwo m’akowaa William E. McLellin, nye m’asɔr mu elderfo anokwafo nyinara—

8 Hom ^ankɔ wiadze nyina mu, ^bnkɛkã asɛmpa no nkyerɛ ^cabɔdze nyinara, hom ndzi dwuma wɔ ^dtumdzi a medze ama hom no mu, hom ^ennuma wɔ Egya no, nye Ɔba no, nye Sunsum Krɔnkrɔn no ne dzin mu.

9 Na ^anyia ɔbɛgye edzi na woenuma no no, ^bwɔbɛgye no nkwa, na nyia ɔnnkɛgye edzi no, ^cwobobu no fɔ.

10 Na nyia ɔbɛgye edzi no, wɔdze ^ansɛnkyerɛdze a odzi do yi behyira no, dɛ mbrɛ wɔakyerɛw no.

11 Na hom na wɔama hom ho kwan dɛ wonhu ^amber mu nsɛnkyerɛdze; nye Nyimpa Ba ne mbae no ho nsɛnkyerɛdze;

12 Na dodowara a Egya no bɛgye hɔn ho dase no, ɔbɛma hom tum ma ^awɔasɔw hɔn ano dze ama onnyiewiei nkwa. Amen.

13 Na afei, ɔfa ndzɛmba no a ɔkã ahyɛmudzi nye mbrasɛm no ho nye iyinom—

14 Dza ɔaka ekyir nye dɛ, wɔ Ewuradze ne mber pa mu no, hom nyi ^abishopfo binom nsi hɔ mma asɔr no, ma wɔnyɛ ɔsomdwuma no dɛ mbrɛ hom yɛɛ no ahyɛse no mpo;

15 Dɛm ntsi, wɔbɛyɛ ^aasɔfompanyimfo a wodzi mu, na Melchizedek Asɔfodzi ^bPresident a Odzi Kan no na n’Apamfo na wobeyi hɔn, gyedɛ wɔyɛ ^cAaron n’asefo ankasa.

16 Na sɛ wɔyɛ ^aAaron n’asefo ankasa a, nna mbrasɛm no ma hɔn ho kwan dɛ wɔkɛhɛn bishop na n’apamfo fɛkuw no mu, sɛ wɔyɛ Aaron ne mbabanyin hɔn abakamba a;

17 Osiandɛ abakamba no na ɔwɔ president na n’apamfo hɔ kwan wɔ asɔfodzi yi ho na okitsa ho ^ansaafee anaa no tumdzi no.

18 Obiara nnyi mbrasɛm ho kwan wɔ dzibew yi ho, dɛ obekitsa asɔfodzi yi ho nsaafee, gyedɛ ɔyɛ ^aAaron n’asenyi abakamba ankasa.

19 Mbom ɔnam dɛ Melchizedek ^asɔfopanyin no wɔ tumdzi dɛ odzi dwuma wɔ dzibew nkakraba nyina mu ntsi obotum edzi dwuma wɔ ^bbishop dzibew mu, sɛ woennya Aaron n’asenyi ankasa a, Melchizedek President a Odzi Kan na n’Apamfo no botum ato nsa afrɛ no na wɔdze nsa egu no do dze dɛm tum yi dwumadzi no ama no.

20 Aaron n’asenyi ankasa no mpo, ɔwɔ dɛ President na n’Apamfo yi hwehwɛ no mu hu dɛ odzi mu, na ^awɔsera no ngo na President na n’Apamfo yi dze nsa gu no do dze dɛm ^basɔfodzi no ahyɛ no, ɔnntse dɛm a, wonnyi mbrasɛm ho kwan dɛ wɔdze hɔn asɔfodzi no mu no dzi dwuma.

21 Mbom, ɔnam ɔmom a wɔahyehyɛ ato hɔ a ɔyɛ hɔn kyɛfa a wɔwɔ no wɔ asɔfodzi ho dɛ ofi egya do sian ba babanyin do no ntsi, sɛ wotum kyerɛ ma wohu dɛ wofi dɛm ebusua no mu a, wotum kã ma wɔfɔw hɔn ngo, anaadɛ sɛ Ewuradze da no edzi kyerɛ hɔn wɔ nyikyerɛ mu a, President na n’Apamfo a wɔabɔ hɔn edzin yi tum dze hɔn nsa gu hɔn do.

22 Na, bio, sɛ bishop anaa sɔfopanyin a wobeyi no esi hɔ dɛ ɔnyɛ ɔsomdwuma yi fom a, onnyi dɛ obiara dze no kɔ asɛndzii anaadɛ obu no fɔ, gyedɛ asɔr no ne ^aPresident a Odzi Kan na n’Apamfo no nko enyim;

23 Na susuampaara dɛ odzi fɔ wɔ President yi na n’Apamfo no enyim no, ɔnam dasegye a ekyingye biara nnyi ho no, wobobu no fɔ;

24 Na sɛ onu noho a, wɔdze ^abɛkyɛ no, dɛ mbrɛ asɔr n’ahyɛmudzi na mbrasɛm no se.

25 Na, bio, susuampaara dɛ ^aawofo wɔ mba wɔ Zion, anaa ne ^bstake a wɔakyekyer no mu bi no, na ^cwɔannkyerɛkyerɛ hɔn ma wɔanntse nkyerɛkyerɛ a ɔfa nnuho ho, nye gyedzi wɔ Jesus Christ, Nyame tseasefo ne Ba no mu, nye enuma, nye Sunsum Krɔnkrɔn n’akyɛdze no a wɔdze nsa gu do ma wonya no, sɛ wodzi ^dmfe awɔtwe a, ^ebɔn no bogu awofo no hɔn etsifi.

26 Na iyi bɛyɛ mbra ama nkorɔfo a wɔwɔ ^aZion anaa wɔ ne stake a wɔakyekyer no nyina mu.

27 Na sɛ hɔn mba dzi ^amfe awɔtwe a, ^bwobonuma hɔn ama ^cwoeenya bɔnfakyɛ na wɔdze nsa egu hɔn do.

28 Na wɔbɛkyerɛkyerɛ hɔn mba so mbrɛ wonsi mbɔ ^ampaa, na wɔnantsew nokwar mu wɔ Ewuradze enyim.

29 Na hɔn a wɔwɔ Zion no so bɛkaa ^aAhomgyeda no na woesie no krɔnkrɔn.

30 Na hɔn a wɔwɔ Zion so bɛkaa hɔn ndwuma, mber dodowara a wɔahyɛ hɔn dɛ wɔnyɛ edwuma wɔ nokwardzi mu no; na wɔbɛkaa onyihafo no wɔ Ewuradze enyim.

31 Afei, Emi, Ewuradze, m’enyi nngye hɔn a wɔwɔ Zion no ho, osiandɛ ^aenyihafo wɔ hɔn mu; na hɔn mba so rinyin wɔ ^bemumuyɛdze mu; na hɔn so wɔmmper ^cnnhwehwɛ mbersantsen ahonyadze, mbom enyiber ahyɛ hɔn enyiwa mu mã.

32 Ndzɛmba yinom nnyi dɛ ɔba no dɛm, na ɔwɔ dɛ woyi fi hɔn mu; dɛm ntsi wɔmma m’akowaa Oliver Cowdery mfa nsɛm yinom nkɛma hɔn a wɔwɔ Zion asaase no.

33 Na mbrasɛm a medze ma hɔn nye yi—dɛ nyia onndzi ne ^ampaabɔ do wɔ Ewuradze enyim wɔ ne mber mu no, ^bwɔnkaa no wɔ mo nkorɔfo no hɔn ɔtsɛmbuafo no enyim.

34 ^aNsɛm yinom yɛ ampa nye nokwar; dɛm ntsi, mma hom nntõ, nna mma hom ^bnnyi bi mmfi mu so.

35 Hwɛ, Emi nye ^aAlpha na Omega, na ^bmereba ntsɛm. Amen.