Wóltaʼii 62
Diyin Yá Yáłtiʼí Joseph Smith díí diyingo bił ííshją́ą́ ályaa, Missouri River Tó Nílínígíí bibąąhgi Chariton, Missouridi, Biniʼantʼą́ą́tsʼózí 13, 1831 yihahgo. Díí bijį́ Diyin Yá Yáłtiʼí dóó yił naaldeehígíí, éí Independence dóó ńléí Kirtlandjįʼ yikahgo, áádóó elders łaʼ yííghah chʼékai kéyah Ziongóó yinééłgo, áádóó, bił dahózhǫ́ǫgo kʼé dadííniidgo, díí diyingo bił ííshją́ą́ ályaa.
1–3, Tʼáá aaníí átʼée baa dahaneʼígíí yáʼąąshdi ndaháasdzoh; 4–9, Elders éí tádínééhgo Iiʼ Sizį́ Diyinii yikʼehgo ndaʼnitin dóó ndahaʼáa dooleeł.
1 Áko shooh, daʼíísínółtsʼą́ą́ʼ, O elders shisodizinjí atah danohłínígíí, Bóhólníihii nihiDiyin God kóní, azhą́ Jesus Christ ndi, nihá akʼíyáłtiʼí, éí nihokááʼ dineʼé nidabidiʼnitaahgo doo yichʼįʼ dabidziilígíí bíł bééhózin, dóó nidabiʼdiʼnitaahii haitʼáo yíká adoolwołgo bił bééhózin.
2 Áádóó tʼah doo kéyah Zion gódeʼ dikááhígíí tʼáá aaníí yishʼį́; ákohgo díí biniinaa ninaanish tʼah doo ałtso ádaahlééh da.
3 Ákótʼée ndi, nihikʼidahojisdliʼ, háálá tʼáá aaníí átʼé diníigo baa hainídzííʼ éí yáʼąąshdi Diyin yá ndaalʼaʼí hazhóʼí deiyídoołtah biniyé ndaasdzoh; dóó nihaa bił dahózhǫ́ǫ doo áádóó nihibąąhági ádaatʼéii bee nihaa nídaʼdidootʼááł.
4 Áádóó áko dahnáádidoohnééł. Kéyah Zion bikááʼ áłah óhnééh. Áádóó áłah doohłeeł dóó nihił dahózhǫ́ǫ doo, dóó Tsʼídá Áláahdi Ayóó Átʼéii óʼólʼįįł bee bichʼįʼ náádahidoołniih.
5 Áádóó índa nídookahgo baa nídahidoołnih, aooʼ, tʼáá ánółtso, éí doodago naaki dinołtʼéego, tʼáá háájíígíí shį́į́ nihił yáʼádaatʼéehgo, shí éí doo átʼéhégóó baa ntséskees; tʼáá akʼeh dahonoołʼį́įgo, áádóó haneʼ yáʼátʼéehii bee naʼnítin nahasdzáán yikááʼ kéédahatʼíinii, éí doodago doo yáʼádaashóonii ałah nídaadleehdi ndeidínóotįįł.
6 Áko shooh, Shí, Diyin Bóhólníihii, bee ádééhaasdziʼę́ę beʼdoolnííł biniyé ahaa nihiyíʼeezh, áko tʼáá háiida nihitahdóó haʼólnínígíí éí baa áháyą́ą doo dóó bił dahózhǫ́ǫ dooleeł ńléí kéyah Missouridi. Shí, Diyin Bóhólníihii, shadaʼólíhígíí badaʼdeeshłééł dóó doo shiyoochʼííd da.
7 Shí, Diyin Bóhólníihii, shił tʼáá áko, łaʼ nihitahdóó łį́į́ʼ bee, éí doodago jaanééz bee, éí doodago tsin naabąąs bikeeʼ naakiígíí shił yilwoł doo danohsingo, éí díí bee bikʼihojidoodliił, éí Diyin Bóhólníihii bilákʼeedóó neidiiláago tʼéiyá, éí tʼáá ałtsóní bijéí yee yaa ahééh nízingo.
8 Díí nihinahatʼáhígíí binahjįʼ dóó Iiʼ Sizį́ Diyinii yee nihił halneʼígíí bikʼehgo tʼáá nihił dahólǫ́ǫ dooleeł.
9 Áko shooh, Diyin God bił hazʼą́ danihí dooleeł. Áádóó áko shooh, dóó níníłʼį́, shadaʼólíhígíí tʼáá áłahjįʼ bił honishłǫ́. Tʼáá ákótʼée doo. Amen.