Vaj Lug Kub
Lus Qhuab Qhia thiab Kev Khi Lus 6


Tshooj 6

Kev tshwm sim uas tus Yaj Saub Joseph Smith thiab Oliver Cowdery tau txais, nyob hauv Harmony, Pennsylvania, lub Plaub Hlis Ntuj xyoo 1829. Oliver Cowdery pib nws tej hauj lwm ua tus teev ntawv rau ntawm txoj kev txhais Phau Ntawv Maumoos, lub Plaub Hlis Ntuj hnub tim 7, xyoo 1829. Nws twb tau txais kev tshwm sim los saum ntuj los txog qhov tseeb ntawm tus Yaj Saub cov lus tim khawv ntsig txog cov phiaj uas sau Phau Ntawv Maumoos cov ceev xwm txheej rau. Tus Yaj Saub nug tus Tswv los ntawm lub Ulees thiab Thumees thiab tau txais cov lus teb no.

1–6, Cov tub ua hauj lwm hauv tus Tswv thaj teb tau kev cawm seej; 7–13, Tsis muaj ib lub txiaj ntsim zoo tshaj li lub txiaj ntsim txoj kev cawm seej; 14–27, Kev ua tim khawv txog qhov tseeb yog los ntawm tus Ntsuj Plig lub hwj chim los; 28–37, Ntsia ntsoov Khetos, thiab ua zoo tsis tu ncua.

1 Ib txoj hauj lwm tseem ceeb thiab zoo kawg nkaus tab tom yuav tawm los mus rau noob neej.

2 Saib seb, kuv yog Vajtswv; cia li mloog kuv txoj lus, uas muaj sia zees nyob thiab muaj hwj chim, ntse dua li rab ntaj uas muaj ob sab hniav, yuav faib hlo tej pob qij txha thiab tej hlwb txha ua ob sab; yog li ntawd cia li mloog kuv cov lus.

3 Saib seb, thaj teb twb daj rhuv zoo sau qoob loo lawm, yog li ntawd, yog leej twg xav mus sau, cia nws cev nws rab liag sib zog mus hlais, thiab sau los thaum tseem tshuav sij hawm, kom nws yuav khaws tau txoj kev cawm seej uas kav ib txhis nyob hauv Vajtswv lub nceeg vaj cia rau nws tus ntsuj plig.

4 Muaj tseeb tiag, tus uas yuav cev nws rab liag mus thiab sau los, ces Vajtswv hu tus ntawd.

5 Yog li ntawd, yog nej thov kuv ces nej yuav tau txais; yog nej khob ces yuav qhib rau nej.

6 Nim no, vim neb tau thov, saib seb, kuv hais rau neb tias, cia li ua raws li kuv tej lus txib, thiab nrhiav kev pab coj thiab tsa lub hom phiaj ntawm Xi-oos;

7 Tsis txhob nrhiav kev nplua nuj tiam sis nrhiav laj lim tswv yim, thiab saib seb, tus Tswv yuav muab tej txuj ci uas neeg tsis paub txog Vajtswv nthuav los rau neb, thiab tom qab ntawd tus Tswv yuav ua kom neb nplua nuj. Saib seb, tus uas tau txoj sia nyob mus ib txhis yog tus uas nplua nuj.

8 Kuv hais tseeb tseeb rau koj tias, qhov uas koj xav tau los ntawm kuv ces yuav muaj raws li ntawd rau koj; thiab yog koj xav tau, yuav ua ntau yam zoo nyob rau tiam neeg no los ntawm koj.

9 Tsis txhob hais dab tsi li tsuas yog kev hloov siab lees txim rau tiam neeg no xwb; ua raws li kuv tej lus txib, thiab pab ua kuv txoj hauj lwm, raws li kuv tej lus txib, ces koj yuav tau koob hmoov.

10 Saib seb koj twb muaj ib lub txiaj ntsim, thiab koj tau koob hmoov vim yog koj lub txiaj ntsim ntawd. Nco ntsoov tias koj lub txiaj ntsim dawb ceev thiab los saum ntuj los—

11 Thiab yog hais tias koj thov, ces koj yuav paub tej txuj ci uas neeg paub tsis txog uas tseem ceeb thiab zoo kawg nkaus; yog li ntawd koj yuav tau siv koj lub txiaj ntsim, kom koj yuav nrhiav pom tej txuj ci uas neeg paub tsis txog, kom koj yuav coj tau ntau leej los paub txoj kev tseeb, muaj tseeb tiag, yaum ntuas lawv txog tej yam uas lawv ua yuam kev.

12 Tsis txhob ua koj lub txiaj ntsim rau leej twg paub li tsuas yog rau cov uas ntseeg li koj ntseeg xwb. Tsis txhob muab tej yam dawb ceev suav tsis muaj nqis.

13 Yog hais tias koj ua qhov zoo, muaj tseeb tiag, thiab rau siab ntseeg mus ntxiv kom txog thaum kawg, ces yuav cawm koj dim nyob hauv Vajtswv lub nceeg vaj, uas yog qhov zoo tshaj plaws ntawm tag nrho Vajtswv tej txiaj ntsim; vim tsis muaj ib lub txiaj ntsim uas yuav zoo tshaj li lub txiaj ntsim ntawm kev cawm seej.

14 Kuv hais tseeb tseeb rau koj tias, koj tau koob hmoov vim tej uas koj tau ua; vim koj tau nug kuv, thiab saib seb, pes tsawg zaus uas koj tau nug kuv koj twb tau txais kev qhia los ntawm kuv tus Ntsuj Plig npaum li ntawd. Yog hais tias tsis yog li ntawd, ces ntshe koj yuav tsis tuaj rau qhov chaw uas koj nyob lub sij hawm no.

15 Saib seb, koj yeej paub hais tias koj tau nug kuv thiab kuv tau ua rau koj lub cim xeeb to taub; thiab nim no kuv qhia tej yam no rau koj kom koj yuav paub hais tias tus Ntsuj Plig ntawm kev tseeb twb tau ua rau koj to taub.

16 Muaj tseeb tiag, kuv qhia rau koj, kom koj yuav paub hais tias yeej tsis muaj leej twg li tsuas yog Vajtswv tib leeg thiaj paub koj tej kev xav thiab tej lub hom phiaj ntawm koj lub siab.

17 Kuv qhia tej yam no rau koj xwv kom ua tim khawv rau koj tias—tej lus los sis cov ntawv uas koj tab tom sau yeej muaj tseeb.

18 Yog li ntawd cia li mob siab; rau siab txhawb nqa kuv tus tub qhe Joseph, rau txhua yam xwm txheej nyuaj uas yuav los raug nws vim yog txoj lus.

19 Qhuab ntuas nws rau tej uas nws ua tsis yog; thiab kuj txais kev qhuab ntuas los ntawm nws thiab. Ua siab ntev; ua tiag tiag; tswj koj tus kheej; muaj kev siab ntev, kev ntseeg, kev cia siab thiab kev siab hlub.

20 Saib seb, koj yog Oliver, thiab kuv tau hais lus rau koj vim yog tej uas koj xav tau; yog li ntawd khaws tej lus no cia rau hauv koj lub siab. Rau siab ntseeg thiab mob siab ua raws li Vajtswv tej lus txib, thiab kuv yuav muab ob txhais npab ntawm kuv txoj kev hlub puag khawm koj.

21 Saib seb, kuv yog Yexus Khetos, uas yog Vajtswv Leej Tub. Kuv yog tib tug uas tau los rau kuv cov neeg, thiab kuv cov neeg tsis txais yuav kuv. Kuv yog txoj kev kaj uas ci nyob hauv qhov tsaus, thiab qhov tsaus tsis to taub txoj kev kaj.

22 Kuv hais tseeb tseeb rau koj tias, yog koj xav tau kev ua tim khawv ntxiv, muab koj lub cim xeeb xav mus rau hmo uas koj thov kuv nyob hauv koj lub siab, kom koj yuav paub txog qhov tseeb ntawm tej yam no.

23 Kuv tsis tau hais lus ua rau koj lub siab kaj txog qhov no los? Koj yuav tau kev ua tim khawv dab tsi uas tseem ceeb tshaj li qhov uas los ntawm Vajtswv?

24 Thiab nim no, saib seb, koj twb tau txais kev ua tim khawv; vim yog hais tias kuv tau qhia tej yam uas tsis muaj neeg paub txog rau koj, ces tsis yog koj twb tau txais kev ua tim khawv los?

25 Thiab, saib seb, kuv muab ib lub txiaj ntsim rau koj, yog koj xav tau ntawm kuv, los txhais lus, twb zoo ib yam li kuv tus tub qhe Joseph.

26 Kuv hais tseeb tseeb rau koj tias, muaj ib co ceev xwm txheej uas muaj kuv txoj moo zoo ntau nyob hauv, uas tus Tswv muab ceev cia vim yog txoj kev phem ntawm cov neeg;

27 Thiab nim no kuv txib koj tias, yog koj muaj tej kev xav tau uas zoo—muaj lub siab xav muab tej yam uas muaj nqis khaws cia rau koj tus kheej nyob saum ntuj ceeb tsheej—ces koj yuav tsum siv koj lub txiaj ntsim los pab ua kom neeg paub txog tej feem ntawm kuv cov vaj lug kub ntawd uas tau muab zais cia vim yog tej kev ua phem.

28 Thiab nim no, saib seb, kuv muab tej yawm sij ntawm lub txiaj ntsim no rau koj thiab rau kuv tus tub qhe Joseph, qhov uas yuav coj txoj hauj lwm qhuab qhia no los rau neeg paub; thiab los ntawm ob los yog peb tug tim khawv lub qhov ncauj ces yuav muab txhua lo lus tsa.

29 Kuv hais tseeb tseeb rau neb tias, yog lawv xyeej kuv tej lus, thiab xyeej feem no ntawm kuv txoj moo zoo thiab txoj hauj lwm qhuab qhia, neb yeej tau koob hmoov, vim lawv yuav ua tsis tau ntau tshaj rau neb li uas tau ua rau kuv.

30 Thiab txawm hais tias lawv ua rau neb ib yam li lawv twb tau ua rau kuv lawm los, neb yeej tau koob hmoov, vim neb yuav tau nyob nrog kuv muaj yeeb koob.

31 Tiam sis yog lawv tsis xyeej kuv tej lus, uas yuav muab qhia tawm los ntawm zaj lus tim khawv uas tus Tswv cov tub qhe hais, ces lawv tau koob hmoov, thiab tom qab ntawd neb yuav muaj kev xyiv fab rau tej txiv ntoo uas txi los ntawm neb tej kev khwv.

32 Kuv hais tseeb tseeb rau neb tias, ib yam li kuv tau hais rau kuv cov thwj tim tias, qhov twg muaj ob los yog peb tug sib sau ua ke uas tuav kuv lub npe, ntsig txog ib yam twg, ces saib seb, qhov ntawd los kuv yuav nyob nrog nraim lawv—zoo tib yam li ntawd kuv twb nyob nrog nraim neb.

33 Tsis txhob ntshai ua qhov zoo, kuv ob tug tub, vim tias tej yam uas neb yuav tseb, tej ntawd kuj yog tej uas neb yuav tau sau; yog li ntawd, yog hais tias neb tseb tej uas zoo ces neb yuav tau sau tej uas zoo los ua neb nqi zog.

34 Yog li ntawd, tsis txhob ntshai, pab me nyuam yaj; cia li ua tej uas zoo; cia lub ntiaj teb thiab ntuj txiag teb tsaus los koom ua ke tawm tsam neb, vim yog neb cog rau saum kuv lub pob zeb, ces lawv yuav kov tsis yeej.

35 Saib seb, kuv tsis rau txim rau neb; neb mus neb thiab tsis txhob ua txhaum ntxiv; ua tiag tiag ua txoj hauj lwm uas kuv tau txib neb.

36 Ntsia ntsoov kuv nrog txhua txoj kev xav; tsis txhob ua xyem xyav, tsis txhob ntshai.

37 Saib tej qhov txhab uas raug nkaug to ntawm kuv sab tav, thiab tej caws pliav los ntawm ntsia hlau uas nyob ntawm kuv ob txhais tes thiab ob txhais ko taw; cia li rau siab ntseeg, ua raws li kuv tej lus txib, thiab neb yuav tau txais lub nceeg vaj ceeb tsheej ua neb tug. Amees.