Tshooj 59
Kev tshwm sim uas tus Yaj Saub Joseph Smith tau txais, nyob hauv Xi-oos, Ciaj Ciam Av Jackson, Missouri, lub Yim Hli Ntuj hnub tim 7, xyoo 1831. Ua ntej txoj kev tshwm sim no, tau muab thaj av fij tseg, raws li tus Tswv tau qhia, thiab tau muab qhov chaw yuav ua lub tuam tsev yav tom ntej fij tseg. Thaum hnub uas tau txais kev tshwm sim no, Polly Knight, tus poj niam ntawm Joseph Knight tus Laus, tau tuag, thawj tus mej zeej ntawm lub Koom Txoos uas tuag nyob hauv Xi-oos. Cov mej zeej uas nyob thaum ntawd tau hais tias kev tshwm sim no “qhia Tsoom Haiv Neeg Ntseeg kom lawv paub hwm hnub caiv thiab paub yoo mov thiab thov Vajtswv.”
1–4, Haiv Neeg Ntseeg hauv Xi-oos uas rau siab ntseeg yuav tau koob hmoov; 5–8, Lawv yuav tsum hlub thiab ua hauj lwm rau tus Tswv thiab ua raws li Nws tej lus txib; 9–19, Los ntawm kev hwm tus Tswv hnub kom dawb huv, Haiv Neeg Ntseeg tau koob hmoov ntawm sab cev nqaij daim tawv thiab ntawm sab ntsuj plig; 20–24, Tus Tswv tau cog lus tias cov ncaj ncees yuav tau kev kaj siab nyob hauv lub neej no thiab tau txoj sia nyob mus ib txhis rau lub neej uas yuav los.
1 Saib seb, tus Tswv hais tias, cov uas tau los mus rau ntawm thaj av no raws li kuv tej lus txib, nrog lub qhov muag ntsia ntsoov rau kuv lub yeeb koob, yog cov uas tau koob hmoov.
2 Vim cov uas muaj sia nyob yuav tau lub ntiaj teb ua lawv tug, thiab cov uas tuag lawm yuav tau so ntawm tag nrho lawv tej kev khwv, thiab tej yam lawv ua yeej nrog lawv mus; thiab lawv yuav tau txais ib lub meej mom nyob saum kuv Txiv tej chaw nyob, uas kuv tau npaj rau lawv.
3 Muaj tseeb tiag, cov uas lawv ko taw sawv rau hauv thaj av Xi-oos, cov uas tau coj raws li kuv txoj moo zoo tau koob hmoov; vim lawv yuav tau txais tej khoom zoo ntawm lub ntiaj teb los ua lawv nqi zog, thiab lub ntiaj teb yuav tawg paj txi txiv.
4 Thiab lawv kuj yuav tau tej koob hmoov saum ntuj ntoo, muaj tseeb tiag, thiab nrog rau tej lus txib uas tsis yog tsawg, thiab nrog rau tej kev tshwm sim thaum txog lawv lub sij hawm—lawv cov uas kuv pom tias lawv rau siab ntseeg thiab mob siab.
5 Yog li ntawd, kuv muab ib lo lus txib rau lawv, hais li no tias: Nej yuav tsum hlub tus Tswv nej tus Vajtswv kom kawg nej lub siab thiab nej lub dag lub zog; thiab nej yuav tsum ua hauj lwm rau nws los ntawm Yexus Khetos lub npe.
6 Nej yuav tsum hlub nej tus neeg zej zog ib yam li nej tus kheej. Nej tsis txhob ua tub sab, thiab tsis txhob deev luag poj luag txiv, los yog tua neeg, los yog ua ib yam dab tsi zoo li ntawd.
7 Nej yuav tsum ua tus Tswv nej tus Vajtswv tsaug rau txhua yam.
8 Nej yuav tsum coj ncaj ncees muab kev txi pub rau tus Tswv nej tus Vajtswv, uas twb yog ntawm lub siab mob thiab lub siab xav ua zoo.
9 Thiab xwv kom nej yuav ceev nej tus kheej txhij zog kom tej yam ntawm lub ntiaj teb txhob ua rau nej ceb, nej yuav tsum mus rau hauv lub tsev thov Vajtswv thiab fij nej tej cim nco txog thaum yog kuv hnub dawb huv.
10 Vim tseeb tiag hnub no yog ib hnub uas tau muab los rau nej so ntawm nej tej kev khwv, thiab muab nej tej kev hwm pub rau tus uas Siab Tshaj Plaws.
11 Txawm li ntawd los nej yuav tsum coj ncaj ncees ua nej tej kev cog lus txhua hnub thiab txhua lub sij hawm.
12 Tiam sis nco ntsoov hais tias nyob rau hnub no, tus Tswv hnub, nej yuav tau muab nej tej txiaj ntsim thiab nej tej cim nco txog pub rau tus Siab Tshaj Plaws, lees nej tej kev txhaum rau nej cov kwv cov tij, thiab rau tus Tswv.
13 Thiab nyob rau hnub no nej yuav tsum tsis txhob ua lwm yam dab tsi li, tsuas cia npaj nej tej zaub mov noj nrog rau tib lub hom phiaj ua kom nej tej kev yoo mov yuav zoo tag nrho, los yog hais tias, xwv kom nej txoj kev xyiv fab yuav puv npo.
14 Tseeb tiag, qhov no yog kev yoo mov thiab kev thov Vajtswv, los yog hais tias, yog kev xyiv fab thiab kev thov Vajtswv.
15 Thiab npaum li uas nej ua tej yam no nrog kev ua tsaug, nrog lub siab thiab lub ntsej muag luag ntxhi, tsis yog luag nrov nrov heev, vim qhov no yog kev txhaum, tiam sis nrog lub siab luag nyav thiab lub ntsej muag luag ntxhi—
16 Kuv hais tseeb tias, npaum li uas nej ua li no, tag nrho txhua yam nyob hauv lub ntiaj teb yog nej li, tej tsiaj nruab nrag thiab tej noog ya saum nruab ntug, thiab tej uas nce mus rau saum tej ntoo thiab tej uas mus kev hauv av.
17 Muaj tseeb tiag, thiab cov tshuaj ntsuab, thiab tej yam zoo uas muaj los ntawm cov av, txawm yog ua khoom noj los yog ua khaub ncaws hnav, los sis ua vaj ua tsev, los sis ua tej tsev rau tsiaj rau txhuv, los sis ua tej vaj txiv ntoo, los sis ua tej vaj paj vaj zaub, los sis ua tej vaj txiv hmab.
18 Muaj tseeb tiag, txhua yam uas muaj los ntawm cov av, thaum txog lub caij yog, puav leej yog tsim los pab neeg thiab rau neeg siv, ua kom lub qhov muag nyiam thiab kom zoo lub siab.
19 Muaj tseeb tiag, ua khoom noj thiab ua khaub ncaws hnav, los saj thiab los hnia, los ntxiv dag zog rau lub cev thiab los ua kom tus ntsuj plig muaj sia muaj zog.
20 Thiab ua rau Vajtswv zoo siab uas Vajtswv tau muab tag nrho tej yam no pub rau neeg; vim tau tsim tej no los siv rau lub hom phiaj no, nrog kev xyuam xim, txhob siv tshaj, thiab txhob quab yuam.
21 Thiab neeg yeej tsis ua txhaum Vajtswv ib yam dab tsi li, los yog nws txoj kev npau taws tsis tau chim rau ib tug twg, tsuas yog rau cov neeg uas tsis lees txhua yam uas nws txhais tes tau ua, thiab tsis ua raws li nws tej lus txib.
22 Saib seb, qhov no yog raws li txoj kev cai thiab cov yaj saub tej lus qhia; yog li ntawd, tsis txhob muab tej no los txob kuv ntxiv lawm.
23 Tiam sis kawm kom paub tias tus uas ua tej hauj lwm ncaj ncees yuav tau txais nws nqi zog, uas yog txoj kev kaj siab nyob hauv lub neej no, thiab txoj sia nyob mus ib txhis nyob hauv lub neej uas yuav los.
24 Kuv, tus uas yog tus Tswv, tau hais li ntawd, thiab tus Ntsuj Plig ua tim khawv. Amees.