1 Nooria, I taku nakoim, bwa bukina e tangira te kakoaua au tia mwakuri ae ^aMartin Harris mai baiu, bwa ngkoe, au tia mwakuri ae Iotebwa Timiti te Ataei, ko a tia ni karekei taian ^bbwaatua are ko kaota koauana ao n taekina koauana bwa ko karekei mai irou;

2 Ao ngkai, nooria, aio te bwai ae ko na taekinna nakoina—Ane e tia n taetae nakoim, e taku nakoim: Ngai, te Uea, ae te Atua, ao I anganiko bwaai aikai, au tia mwakuri ae Iotebwa Timiti te Ataei, ao n tuangko bwa ko na tei bwa te ^atia kakoaua ibukin bwaai aikai;

3 Ao I kariniko i nanon te berita ae tabu ma ngai, bwa ko na aki kaotii nakoia ma tii nakoia ^anaake I tuangko; ao akea ^bmwaakam i aoia tii ngkana I anganiko.

4 Ao iai iroum te bwaintituaraoi n raira te bwaatua; ao aio te moan bwaintituaraoi ae I katoka i aom; ao I a tia n tuangko bwa ko na aki taku bwa iai iroum bwaintituaraoi riki tabeua ni karokoa e koro bukin au kantaninga iai; bwa N na aki anganiko riki bwaintituaroia tabeua ni karokoa e tia.

5 E koaua, ae I tuangko, e na roko te reke ni kai nakoia kaain te aonaba ngkana ^aaki ongo n au taeka;

6 Bwa i mwin aei ao ko na bon ^akatabuaki ao ni waaki nako ao n taekinii au ^btaeka nakoia natiia aomata.

7 Nooria, ngkana a aki ^akakoaua au taeka, a na bon aki kakoauako ngkoe, au tia mwakuri ae Iotebwa, ngke arona bwa ko kona ni kaotii nakoia bwaai ni kabane ake I a tia ni mwiokoiko iai.

8 O, te roro aei ae e ^aaki onimaki ao n ^bnanomatoa—e kauraki uniu nakoia.

9 Nooria, e koaua ae I tuangko, I a tia ni ^akawakinii bwaai akanne ake I a tia ni mwiokoiko iai ngkoe, au tia mwakuri Iotebwa, bwa iai bukina ae e riai irou, ao e na bon kaotaki nakoia rooro aika a na roko.

10 Ma e na bon karekea au taeka te roro aei mai iroum;

11 Ao n ikotaki ma am koaua, aia ^akoaua au taan mwakuri ake teniman, are N na weteia ao ni katabuia, nakoia are N na kaotii bwaai aikai, ao a na waaki nako ma au taeka are anganaki mai iroum.

12 Eng, a na bon ataia ma te koaua raoi bwa a koaua bwaai aikai, bwa N na bon taekini nakoia mai karawa.

13 N na bon anganiia te mwaaka bwa aonga n tarai ao n noori bwaai aikai n aron ae bon aroia;

14 Ao bon ^aakea riki ae N na anganna te mwaaka aei, ni karekei koaua naba aikai i buakoia te roro aei, n aio are e nang waerake man kaoti au ^bekaretia man te rereua—n itiaki n ai aron ^cnamakaina, ao n tamaroa n ai aron taai, ao ni kakamaaku n ai aroia taanga ni buaka ma aia buraeki.

15 Ao N na kanakoa aia koaua taan ^akakoaua aika teniman ibukin au taeka.

16 Ao nooria, ane e ^akakoauai au taeka, ao N na bon ^bkawaria n ana ^ckaotioti ^dTamneiu; ao a na manga ^ebungiaki mai irou, n te ran ao te Tamnei—

17 Ao ko na riai n tataninga teutana, bwa ko tuai ni ^akatabuaki—

18 Ao e na waaki nako naba aia koaua ni ^akareke kaiia te roro aei ngkana a kamatoai nanoia nakoia;

19 Bwa e na waaki nako tiribooakiia ma ^akamaunaakiia kaain te aonaba, ao e na reitinako ni bwaro man te tai teuana nakon te tai teuana, ngkana a aki ^braira nanoia, ni karokoa ^cakea kaain te aonaba, ao kaaina a bon kabuekaki ao man urubekebekeaki n ootan ^drokou.

20 Nooria, I tuangko bwaai aikai, n ai aron are I ^atuangiia naba aomata ibukin uruakan Ierutarem; ao e na bon kakoauaaki au ^btaeka n te tai aei n aron are e a bon tia ni kakoauaaki mai i mwaaina.

21 Ao ngkai I tuangko, au tia mwakuri ae Iotebwa, n raira nanom ao n eti n nakonako i matau, ao n aki manga ira nanon aia kairoro aomata;

22 Ao I tuangko bwa ko na matoa ni ^akawakini tua ake I a tia n tuangko; ao ngkana ko karaoa aei, noria N na anganiko te maiu ae akea tokina, e ngae ngkana ko ^btiringaki.

23 Ao ngkai, I a manga taetae riki nakoim, au tia mwakuri ae Iotebwa, ni kaineti ma ^ateuare e bubuti te kakoaua—

24 Noria, I taku nakoina, e bon karietata ao e aki karinanoa n te aro ae e tau imatau; ma ngkana e bobaraki imatau, ao ni karinanoa n te tataro ae e korakora ao te onimaki, ma nanona ae e koaua, ao N na bon anganna bwa e na kona n ^anori bwai ake e tangiri ni kan nori.

25 Ao ngkanne e na bon taekini nakoia aomata n te roro aei: Noria, I a tia n nori bwai ake e a tia te Uea ni kaoti nakon Iotebwa Timiti te Ataei, ao I ^aataia ma te koaua bwa a bon koaua raoi, bwa I a tia noori, bwa a tia ni kaotaki nakoiu ni mwaakan te Atua ma tiaki te aomata.

26 Ao Ngai te Uea I tuanga au tia mwakuri ae Martin Harris, bwa akea riki ae e na taekinna nakoia ni kaineti ma bwai aikai, ma ti e na kangai: I a tia nori, ao a tia ni kaotaki nakoiu ni mwaakan te Atua; ao aikai taeka ae e na taekin.

27 Ma ngkana e kakewei ao e na urua te berita are e a tia ni berita iai ma ngai, ao nooria, e na bon kabuakakaaki.

28 Ao ngkai, ngkana e aki karinanoa ao ni kaoti nakoiu bwai ake e karaoi aika a kairua, ao ni berita ma Ngai bwa e na kawakini tua, ao ni kamwakura ana onimaki irou, noria, I taku nakoina, e na aki nori bwai aikanne, bwa N na aki anganna norakin bwai ake I a tia n taekini.

29 Ao ngkana aio arona, I tuangko, au tia mwakuri ae Iotebwa, bwa ko na kaangai nakoina, bwa e aki kona ni manga karaoi riki, ke ni katabetabeai ni kaineti ma aio.

30 Ao ngkana aio arona, nooria, I taku nakoim Iotebwa, ngkana ko a tia n rairii riki tabeua itera ni baa ko na toki moa, ni karokoa are I a manga tuangko; ao ngkanne ko a kona ni manga rairairi.

31 Ao ngkana ko aki karaoa aei, nooria, ana bon akea bwaintituaraoi nakoim, ao N na anai bwaai ake I a tia n onimakiniko iai.

32 Ao ngkai, ibukina bwa I a kaman nooriia n tataninga bwa a na kamaunako, eng, I a kaman noora au tia mwakuri ae Martin Harris bwa ngkana e aki nanorinano ao n aki karekea te kakoaua mai nanon baiu, ao e na bwaka n riaoan te tua;

33 Ao a mwaiti aika a tataninga bwa a na ^akamaunanakoko mai aon te aonaba; ao ibukin aio, bwa aonga ni kaananauaki am bong, I a tia n anganiko tua aikai.

34 Eng, ibukin aio ao I taku: Toki, ao tei ni karokoa I tuangko, ao N na ^aanganiko kawai ake ko na kona iai ni kakoroi bukin bwai ake I a tia n tuangko.

35 Ao ngkana ko ^akakaonimaki ni kawakin au tua, ko na bon ^buotaki rake n te kabanea ni bong. Amen.