Ebʼ li loqʼlaj hu
Tzol’leb’ ut Sumwank 43


Tasal 43

K’utb’esinb’il na’leb’ k’eeb’il rik’in xtz’uumal re laj Jose Smith li Profeet, sa’ Kirtland, Ohio, sa’ Febrero 1831. Sa’ li kutan a’in wankeb’ li komon sa’ li Iglees li ke’wan xk’a’uxl chirix junjunq li ke’yehok yal chi b’alaq’ naq aj k’utb’esineleb’. Li profeet kipatz’ok re li Qaawa’, ut kixk’ul li yeeb’il arin, k’eeb’il reheb’ li xb’eenil sa’ li Iglees. Li aatin sa’ xtiklajik na’aatinak chirix chanru taa’uxq li b’eresink sa’ li Iglees; sa’ li aatin sa’ roso’jik wan li tije’k tento te’xk’e li xb’eenil reheb’ li tenamit sa’ li ruchich’och’.

1–7, Li k’utb’esinb’il na’leb’ ut taqlahom ka’ajwi’ nachal rik’in xtz’uumal re li jun li xaqab’anb’il; 8–14, Eb’ laj santil paab’anel neke’santob’resiik rik’in k’anjelak rik’in anchal li santilal chiru li Qaawa’; 15–22, Eb’ li xb’eenil taqlanb’ileb’ re xyaab’asinkil li jalb’a-k’a’uxl ut re xkawresinkileb’ li winq choq’ re li xnimal ru xkutan li Qaawa’; 23–28, Li Qaawa’ naxb’oqeb’ li winq rik’in tz’aqal xyaab’ xkux, ut rik’in ajwi’ li wankilal wan sa’ li tzuul taq’a; 29–35, Taachalq li Jun Mil Chihab’ ut lix b’ak’b’al laj Satanas.

1 Chex’ab’inq, ex xb’eenil re lin iglees, ut k’ehomaq eexik rik’in li aatin li tinye eere.

2 Xb’aan naq k’ehomaq reetal, chi yaal, chi yaal, ninye eere, naq xek’ul jun taqlahom jo’ achaq’rab’ choq’ re lin iglees, rik’in xtz’uumal re li ani xinxaqab’ choq’ eere re xk’ulb’al li btaqlahom ut k’utb’esinb’il na’leb’ sa’ wuq’.

3 Ut a’in teenaw chi ch’olch’o ru—naq maajun chik xaqab’anb’il choq’ eere re xk’ulb’al li taqlahom ut k’utb’esinb’il na’leb’ toj reetal taaxoke’q a’an, wi anakana wik’in.

4 A’b’anan chi yaal, chi yaal, ninye eere, naq amaajun chik taaxaqab’amanq choq’ re li maatan a’in, ka’ajwi’ rik’in xtz’uumal re a’an, xb’aan naq wi taa’isiiq chaq chiru a’an, maak’a’aq xwankil, ka’ajwi’ re xxaqab’ankil jalan chik sa’ xna’aj.

5 Ut a’inaq jun chaq’rab’ choq’ eere, naq moko teek’ul ta lix k’utum yalaq ani li nachal cheru jo’ k’utb’esinb’il na’leb’ malaj taqlahom;

6 Ut a’in nink’e eere re naq ink’a’ atexb’alaq’iiq, re naq taaruuq teenaw naq moko we ta.

7 Xb’aan naq chi yaal ninye eere, naq ani ak’ojob’anb’il inb’aan taa’ok sa’ li bokeb’aal, ut taak’ojob’amanq jo’ kinye eere junxil, re xk’utb’al li k’utb’esihom li ak xek’ul ut toj teek’ul rik’in xtz’uumal re li ani kinxaqab’.

8 Anajwan ut, k’ehomaq reetal, nink’e eere jun taqlahom, naq jo’q’e ch’utch’uukex, ateetzol eerib’ ut teewaklesi eeraam cherib’il eerib’, re naq teenaw chan ru naq texk’anjelaq ut teeb’eresi lin iglees, chanru texk’anjelaq chirix li jar raqal re lin chaq’rab’ ut taqlahom, li kink’e.

9 Ut chi jo’kan textzole’q chirix lix chaq’rab’ lin iglees, ut atexsantob’resiiq xb’aan li k’a’ru ak xek’ul, ut teeteneb’ eerib’ chi k’anjelak rik’in anchal li santilal chiwu—

10 Re naq a’ yaal jo’ nekeb’aanu a’in, ataatiqmanq loq’alil re li awa’b’ejihom li xek’ul. A’ yaal ut jo’ naq moko nekeb’aanu ta, btaa’isimanq chaq, a’ ajwi’ li k’a’ru ak xek’ul.

11 Puch’umaq chaq li amaa’usilal li wan sa’ eeyanq; santob’resihomaq eerib’ chiwu;

12 Ut wi nekeraj lix loq’alil li awa’b’ejihom, xaqab’omaq lin moos aj Jose Smith, alalb’ej, ut achexaqab’ xwankil chiwu rik’in li tijok chi wank li paab’aal.

13 Ut jo’kan wi’chik, ninye eere, naq wi nekeraj li amuqmuukil na’leb’ re li awa’b’ejihom, k’ehomaq li tzakemq ut li aq’ej choq’ re, ut yalaq k’a’ru taaraj ru re xb’aanunkil li k’anjel li kintaqla wi’;

14 Ut wi moko nekeb’aanu ta, a’an taakanaaq rik’ineb’ li ani xe’k’uluk re, re naq taaruuq tink’ul choq’ we jun tenamit asaq ru chiwu.

15 Jun sut chik ninye, chex’ab’inq ex xb’eenil re lin iglees, li kexinxaqab’: Moko taqlanb’ilex ta re tzole’k; re b’an ateetzoleb’ li ralal xk’ajoleb’ li winq rik’in li k’a’aq re ru kink’e sa’ eeruq’ rik’in lix wankil lin bMusiq’;

16 Ut tento atextzole’q chalen chaq taqe’q. bSantob’resihomaq eerib’ ut ctextiqib’amanq rik’in wankilal, re naq taaruuq texk’ehoq jo’ chanru ajwi’ kinye.

17 Chex’ab’inq laa’ex, xb’aan naq k’ehomaq reetal, ak haye’k chaq re li axnimal ru bxkutan li Qaawa’.

18 Xb’aan naq chalk re li kutan naq li Qaawa’ tixk’e chi aatinak lix ayaab’ xkux chalen chaq sa’ choxa; btaachiq’manq li choxa ut ctaachenchotq li ruchich’och’, ut taayaab’asiiq lix dtrompeet li Dios, chi najtaq xyaab’ ut kawaq, ut tixye reheb’ li tenamit warenaq: Ex santil paab’anel ewaklinqex ut chiwanq eeyu’am; ex aj maak fkanaaqex ut gwarinqex toj reetal naq tinb’oqoq wi’chik.

19 Jo’kan ut, b’ak’omaq lee yiitoq re naq ink’a’ textawe’q sa’ xyanqeb’ laj maak.

20 Taqsihomaq xyaab’ eekux, ut mikotz eemetz’ew. B’oqomaqeb’ li tenamit re te’xjal xk’a’uxl, jo’ tiix jo’ saaj, jo’ moos jo’ ach’ab’anb’il, ut cheye: Kawresihomaq eerib’ choq’ re li xnimal ru xkutan li Qaawa’;

21 Xb’aan naq wi laa’in, li winqin, nintaqsi xyaab’ inkux ut nekexinb’oq re teejal eek’a’uxl, ut xik’ nikineeril, k’a’ru teeye naq taachalq li kutan naq eb’ li akaaq te’xk’e chi aatinak lix yaab’eb’ xkux chalen chaq sa’ xmaril li ruchich’och’, ut te’aatinaq sa’ xxikeb’ chixjunil li ani yo’yookeb’, ut te’xye—Chejal eek’a’uxl, ut chekawresi eerib’ choq’ re li xnimal ru xkutan li Qaawa’?

22 Relik chi yaal, ut jo’kan wi’chik, naq te’lemb’aq li raq’ kaaq chalen chaq sa’ releb’aal saq’e toj sa’ rokeb’aal, ut te’xk’e chi aatinak lix yaab’eb’ xkux chiru chixjunileb’ li yo’yookeb’, ut te’xk’e chi tz’ananak lix xikeb’ chixjunileb’ li neke’ab’ink, ut te’xye li aatin a’in—Jalomaq eek’a’uxl, xb’aan naq ak xchal li xnimal ru xkutan li Qaawa’?

23 Ut jo’kan wi’chik, li Qaawa’ tixk’e chi aatinak lix yaab’ xkux chalen chaq sa’ choxa, ut tixye: Chex’ab’inq, ex tenamit re li ruchich’och’, ut ab’ihomaq li raatin li Dios a’an li kiyiib’ank eere.

24 Aay, ex tenamit re li ruchich’och’, k’a’jo’ naq kok’ aj xsa’ kexinch’utub’ raj jo’ jun axan kaxlan naxch’utub’eb’ lix kok’ kaxlan rub’el lix xik’, a’b’an bink’a’ keraj!

25 K’a’jo’ naq kok’ aj xsa’ axexinb’oq rik’in xtz’uumaleb’ re lin bmoos, ut rik’in cxk’anjeleb’ li anjel, ut rik’in tz’aqal xyaab’ inkux, ut rik’in xyaab’ xkux li kaaq, ut rik’in xyaab’ xkux li raq’ kaaq, ut rik’in xyaab’ xkux li kaq-sut-iq’, ut rik’in xyaab’ xkux li hiik, ut li ninqi saqb’ach ut rik’in xyaab’ xkux li dwe’ej ut li yajel li jar paay wan, ut rik’in xnimal xyaab’ li trompeet, ut rik’in xyaab’ xkux li raqb’a-aatin, ut rik’in xyaab’ xkux li euxtaan chiru chixjunil li kutan, ut rik’in xyaab’ xkux li loq’alil ut xnimankil eeru ut lix b’ihomal li junelik yu’am, ut kexinkol raj rik’in jun li fkole’k li junelik raj taakanaaq, a’b’an ink’a’ keraj!

26 K’ehomaq reetal, xchal xkutankil, naq li sek’ re xnimal xjosq’il li xik’ eek’anb’il inb’aan ak nujenaq.

27 K’ehomaq reetal, chi yaal ninye eere, naq a’in li raatin li Qaawa’ lee Dios.

28 Jo’kan ut, chexk’anjelaq, achexk’anjelaq sa’ lin awimq li jun sutaq chik—li jun sutaq chik b’oqomaqeb’ li ani wankeb’ sa’ li ruchich’och’.

29 Xb’aan naq sa’ li kutan k’oxlanb’il inb’aan atink’ulunq sa’ xb’een li ruchich’och’ sa’ raqb’a-aatin, ut eb’ lin tenamit te’toje’q rix ut te’awa’b’ejinq wochb’een sa’ li ruchich’och’.

30 Xb’aan naq li nimla aJun Mil Chihab’, li kin’aatinak wi’ rik’in xtz’uumaleb’ re lin moos, taachalq.

31 Xb’aan naq ataab’ak’e’q laj bSatanas, ut naq taahite’q wi’chik ka’ajwi’ chiru cjarub’aq kutan taa’awa’b’ejinq, toja’ ut naq taachalq droso’jik li ruchich’och’.

32 Ut li ani nawan sa’ atiikilal btaajale’q ru sa’ jun mutz’uk-u, ut li ruchich’och’ taa’oso’q chanchan rik’in xam.

33 Ut eb’ laj maak te’xik sa’ li axam ink’a’ naru xchupb’al, ut li roso’jikeb’ a’an maajun winq nanawok re sa’ ruchich’och’, chi moko tixnaw jun sutaq, toj reetal te’chalq chiwu sa’ li braqleb’ aatin.

34 Chex’ab’inq chiru li aatin a’in. K’ehomaq reetal, laa’in li Jesukristo, laj aKolol re li ruchich’och’. bK’uulahomaq li k’a’aq re ru a’in sa’ lee ch’ool, ut li ctiikil k’a’uxlej re li junelik q’e kutan dchihilanq sa’ lee ek’a’uxl.

35 aTiikaq eek’a’uxl. Chepaab’ chixjunil intaqlahom. Chi jo’kan. Amen.