Tshooj 41
Kev tshwm sim uas tus Yaj Saub Joseph Smith tau txais kom qhia lub Koom Txoos, hauv Kirtland, Ohio, lub Ob Hlis Ntuj hnub tim 4, xyoo 1831. Txoj kev tshwm sim no qhia tus Yaj Saub thiab cov txwj laug ntawm lub Koom Txoos kom lawv thov Vajtswv kom txais tau Vajtswv “txoj kev cai” (saib tshooj 42). Joseph Smith nyuam qhuav tuaj New York tuaj txog Kirtland, thiab Leman Copley, uas yog ib tug mej zeej ntawm lub Koom Txoos nyob ze Thompson, Ohio, “thov Tij Laug Joseph thiab Sidney [Rigdon] … nyob nrog nws thiab nws yuav nrhiav chaw rau nkawd pw thiab pub rau nkawd noj.” Txoj kev tshwm sim no piav hais tias Joseph thiab Sidney yuav tsum nyob qhov twg thiab hu Edward Partridge los ua thawj tug npisov ntawm lub Koom Txoos.
1–3, Cov txwj laug yuav tswj lub Koom Txoos los ntawm lub txiaj ntsim txais tau kev tshwm sim; 4–6, Cov thwj tim tseeb yuav txais thiab ua raws li tus Tswv txoj kev cai; 7–12, Tus Tswv tsa Edward Partridge ua ib tug npisov rau lub Koom Txoos.
1 Cia li mloog thiab hnov, auj nej uas yog kuv cov neeg es, tus Tswv thiab nej tus Vajtswv hais li, nej cov uas kuv zoo siab foom tej koob hmoov tseem ceeb tshaj plaws ntawm tag nrho tej koob hmoov rau, nej cov uas mloog kuv; thiab kuv yuav foom tsis zoo rau nej cov uas tsis mloog kuv, cov uas ua txuj tuav kuv lub npe, foom tej uas hnyav tshaj plaws ntawm tej kev foom tsis zoo.
2 Cia li mloog, auj nej uas yog txwj laug ntawm kuv lub koom txoos uas kuv tau hu, saib seb kuv muab ib lo lus txib rau nej tias, nej yuav tsum sib txoos nej tus kheej ua ke los sib pom zoo rau kuv txoj lus;
3 Thiab los ntawm nej txoj kev thov Vajtswv nrog kev ntseeg nej yuav tau txais kuv txoj kev cai, kom nej yuav paub tswj kuv lub koom txoos thiab ua txhua yam kom yog rau kuv pom.
4 Thiab kuv yuav ua nej tus tswv kav thaum kuv los; thiab saib seb, kuv los sai sai no, thiab nej yuav xyuas kom cov ntseeg ua raws li kuv txoj kev cai.
5 Tus uas txais thiab ua raws li kuv txoj kev cai, tus ntawd yog kuv tus thwj tim; thiab tus uas hais tias nws txais tiam sis tsis ua raws li kuv txoj kev cai, tus ntawd tsis yog kuv tus thwj tim, thiab yuav raug muab ntiab tawm hauv nej mus;
6 Vim tsis tsim nyog yuav muab tej yam uas yog cov me nyuam ntawm lub nceeg vaj teej tug coj mus rau cov neeg tsis tsim nyog, los sis pov rau dev, los sis tej hlaws muab pov rau ntawm npua hauv ntej.
7 Thiab ntxiv, tsim nyog uas yuav ua ib lub tsev rau kuv tus tub qhe Joseph Smith, tus Hluas, kom tau nyob thiab txhais lus.
8 Thiab ntxiv, tsim nyog uas kuv tus tub qhe Sidney Rigdon yuav nyob qhov chaw nws pom tias zoo, yog hais tias nws ua raws li kuv tej lus txib.
9 Thiab ntxiv, kuv tau hu kuv tus tub qhe Edward Partridge; thiab kuv muab ib lo lus txib, hais tias yuav tsum muab nws tsa los ntawm cov ntseeg lub suab, thiab tsa ua ib tug npisov rau lub koom txoos, kom tso nws txoj kev ua luam muag khoom tseg thiab muab tag nrho nws lub sij hawm mus ua tej hauj lwm ntawm lub koom txoos;
10 Mus saib xyuas txhua yam uas yuav muab tsa rau nws saib xyuas los ntawm kuv tej kev cai nyob rau hnub uas kuv yuav muab tej yam ntawd.
11 Thiab li no los vim yog kuv pom tias nws muaj lub siab dawb, vim nws twb zoo li Nathana-ees thaum ub, tus uas tsis muaj kev dag ntxias li.
12 Cov lus no yog muab rau nej, thiab kuv pom tias tej lus no yeej dawb huv; yog li ntawd, cia li ceev faj nej xav li cas txog cov lus no, vim nej tus ntsuj plig yuav ris tej lus no thaum hnub txiav txim. Twb yog li ntawd. Amees.