Tshooj 34
Kev tshwm sim uas tus Yaj Saub Joseph Smith tau txais kom qhia Orson Pratt, hauv Fayette, New York, lub Kaum Ib Hlis Ntuj hnub tim 4, xyoo 1830. Tij laug Pratt muaj kaum cuaj xyoos lub sij hawm ntawd. Nws tau hloov siab los ntseeg thiab tau ua kev cai raus dej thaum nws xub hnov nws tus tij laug Parley P. Pratt tshaj tawm txoj moo zoo uas txum tim rov qab los, rau lub lim tiam ua ntej ntawd. Joseph Smith tau txais txoj kev tshwm sim no nyob hauv Peter Whitmer tus Laus lub tsev.
1–4, Cov uas rau siab ntseeg los ua Vajtswv cov tub los ntawm txoj Kev Theej Txhoj; 5–9, Txoj kev tshaj tawm txoj moo zoo npaj txoj kev rau txoj Kev Los Zaum Ob; 10–12, Kev qhia tej yuav muaj los yav tom ntej yog los ntawm tus Vaj Ntsuj Plig Dawb Huv lub hwj chim los.
1 Kuv tus tub Orson, cia li mloog thiab hnov thiab saib tej uas kuv, tus Tswv uas yog Vajtswv, uas twb yog Yexus Khetos koj tus Txhiv Dim, yuav hais rau koj;
2 Txoj kev kaj thiab txoj sia ntawm neeg ntiaj teb, ib lub teeb uas ci nyob hauv qhov tsaus ntuj thiab qhov tsaus ntuj tsis to taub txoj kev kaj;
3 Tus uas hlub neeg ntiaj teb heev nws thiaj tau muab nws txoj sia theej lawv, kom tag nrho cov uas yuav ntseeg yuav los ua Vajtswv cov tub. Yog li ntawd koj yog kuv tus tub;
4 Thiab koj tau koob hmoov vim yog koj ntseeg;
5 Thiab koj tau koob hmoov ntau dua vim yog kuv hu koj mus tshaj tawm kuv txoj moo zoo—
6 Mus tsa koj lub suab kom zoo li lub suab raj hlau nrov, kom ntev thiab nrov, thiab tshaj kev hloov siab lees txim mus rau tiam neeg nkhaus thiab tsis yuav lus, npaj tus Tswv txoj kev rau nws txoj kev los zaum ob.
7 Vim saib seb, kuv hais tseeb tseeb rau koj tias, twb txog lub sij hawm lawm uas kuv yuav nrog huab nrog cua los muaj hwj chim thiab yeeb koob loj.
8 Thiab lub sij hawm kuv los yuav yog ib hnub tseem ceeb, vim txhua haiv neeg yuav tshee hnyo.
9 Tiam sis ua ntej hnub tseem ceeb ntawd yuav los, lub hnub yuav tsaus nti, thiab lub hli yuav hloov mus ua ntshav; thiab tej hnub qub yuav tsis kam ci lawm, thiab ib txhia yuav poob, thiab tej kev puas tsuaj loj tos ntsoov cov phem.
10 Yog li ntawd, tsa koj lub suab thiab tsis txhob tseg, vim tus Tswv uas yog Vajtswv tau hais li; yog li ntawd cia li qhia tej yuav muaj los yav tom ntej, thiab tus Vaj Ntsuj Plig Dawb Huv lub hwj chim yuav qhia txog tej ntawd.
11 Thiab yog koj rau siab ntseeg, saib seb, kuv yuav nrog koj kom txog thaum kuv los—
12 Thiab kuv hais tseeb tseeb rau koj tias, kuv los sai sai no. Kuv yog koj tus Tswv thiab koj tus Txhiv Dim. Twb yog li ntawd. Amees.