Tshooj 33
Kev tshwm sim uas tus Yaj Saub Joseph Smith tau txais kom qhia Ezra Thayre thiab Northrop Sweet, hauv Fayette, New York, lub Kaum Hli Ntuj xyoo 1830. Thaum qhia txog txoj kev tshwm sim no, Joseph Smith zaj keeb kwm ua tim khawv tias “tus Tswv … yeej ib txwm npaj txhij los qhia tus uas rau siab ntso nrhiav los ntawm txoj kev ntseeg.”
1–4, Tus Tswv hu cov neeg ua hauj lwm mus tshaj tawm txoj moo zoo thaum teev kaum ib; 5–6, Tus Tswv tsa lub Koom Txoos, thiab cov neeg uas tau xaiv tseg yuav sib sau los ua ke; 7–10, Hloov siab lees txim, vim twb yuav txog lub sij hawm rau lub nceeg vaj ceeb tsheej lawm; 11–15, Tus Tswv muab lub Koom Txoos txhim tsa rau saum lub pob zeb ntawm txoj moo zoo; 16–18, Npaj rau tus Nraug Vauv txoj kev los.
1 Saib seb, kuv hais rau neb, kuv ob tug tub qhe Ezra thiab Northrop, cia li qhib neb cov pob ntseg thiab mloog tus Tswv neb tus Vajtswv lub suab, nws txoj lus muaj sia zees nyob thiab muaj hwj chim, ntse dua li rab ntaj uas muaj ob sab hniav, yuav faib hlo tej pob qij txha thiab tej hlwb txha ua ob sab, tus ntsuj thiab tus plig; thiab yog tus paub tau txog tej kev xav thiab tej lub hom phiaj ntawm lub siab.
2 Vim kuv hais tseeb tseeb rau neb tias tus Tswb twb hu neb mus tsa neb ob lub suab kom zoo li lub suab raj hlau nrov, mus tshaj tawm kuv txoj moo zoo rau tiam neeg nkhaus thiab tsis yuav lus.
3 Vim saib seb, thaj teb twb daj rhuv zoo sau qoob loo lawm; thiab twb txog teev kaum ib lawm, thiab yog zaum kawg uas kuv yuav hu cov neeg ua hauj lwm mus rau hauv kuv lub vaj txiv hmab.
4 Thiab kuv lub vaj txiv hmab tau hloov los liam sij tag huv tib si; thiab tsis muaj leej twg ua zoo tsuas yog ob peb tug xwb; thiab lawv ua txhaum ntau zaus vim yog tej tswv yim xib hwb cuav, tag nrho muaj lub siab liam.
5 Thiab kuv hais tseeb tseeb rau neb tias, lub koom txoos no kuv tau tsa thiab hu tawm tom hav zoov los.
6 Thiab kuv yuav sau kuv cov neeg uas tau xaiv tseg lawm nyob tim plaub ceg kaum ntuj los zoo li ntawd, kom sau tag nrho cov uas yuav ntseeg kuv, thiab mloog kuv lub suab.
7 Muaj tseeb tiag, kuv hais tseeb tseeb rau neb tias, thaj teb twb daj thuv zoo sau qoob loo lawm; yog li ntawd, cev neb tej liag mus, thiab sau kom kawg neb lub dag lub zog thiab lub siab.
8 Qhib neb lub qhov ncauj thiab tej lus yuav los thiab neb yuav hloov los ua zoo ib yam li Nifais thaum ub, tus uas tau khiav hauv Yeluxalees mus tom roob moj sab qhua.
9 Muaj tseeb tiag, cia li qhib neb lub qhov ncauj thiab tsis txhob tseg, thiab neb yuav tau tej teg nplej puv nkaus rau nraum neb nraub qaum, vim xyuas seb, kuv nrog neb.
10 Muaj tseeb tiag, qhib neb lub qhov ncauj thiab tej lus yuav los, hais tias: Hloov siab lees txim, hloov siab lees txim, thiab nej cia li npaj tus Tswv txoj kev, thiab kho kom nws tej kev ncaj; vim twb yuav txog lub sij hawm rau lub nceeg vaj ceeb tsheej lawm;
11 Muaj tseeb tiag, nej txhua tus, cia li hloov siab lees txim thiab ua kev cai raus dej, rau txoj kev zam txim rau nej tej kev txhaum; muaj tseeb tiag, ua kev cai raus los ntawm dej, ces tom qab ntawd txoj kev cai raus ntawm hluav taws thiab ntawm tus Vaj Ntsuj Plig Dawb Huv yuav los.
12 Saib seb, kuv hais tseeb tseeb rau neb tias, qhov no yog kuv txoj moo zoo; thiab nco ntsoov tias lawv yuav tsum muaj kev ntseeg kuv, yog tsis li ntawd lawv yeej yuav tsis dim;
13 Thiab rau saum lub pob zeb no kuv yuav txhim tsa kuv lub koom txoos; muaj tseeb tiag, twb tau txhim tsa neb rau saum lub pob zeb no, thiab yog neb mus ntxiv, tej qhov rooj ntawm ntuj txiag teb tsaus yuav kov tsis yeej neb.
14 Thiab neb yuav tsum nco ntsoov ua raws li lub koom txoos tej nqe lus thiab tej kev khi lus.
15 Thiab neb yuav pom zoo rau cov uas muaj kev ntseeg los rau hauv kuv lub koom txoos, los ntawm kev tso tes rau saum taub hau, thiab kuv yuav muab lub txiaj ntsim Vaj Ntsuj Plig Dawb Huv rau lawv.
16 Thiab kuv muab Phau Ntawv Maumoos thiab tej vaj lug kub dawb huv ua kev qhia rau neb; thiab lub hwj chim ntawm kuv tus Ntsuj Plig txhawb txhua yam kom muaj sia.
17 Yog li ntawd, rau siab ntseeg, thov Vajtswv tas mus li, muab neb lub teeb yim thiab ua kom cig, thiab nqa roj nrog neb, xwv kom neb yuav npaj txhij thaum tus Nraug Vauv los—
18 Vim saib seb, kuv hais tseeb tseeb rau neb tias, kuv los sai sai no. Twb yog li ntawd. Amees.