1 Cia li mloog lub suab ntawm Yexus Khetos, nej tus Tswv, nej tus Vajtswv, thiab nej tus Txhiv Dim, tus uas nws tej lus muaj sia zees nyob thiab muaj hwj chim.

2 Vim, saib seb, kuv hais rau nej tias, txawm nej yuav noj thiab nej yuav haus dab tsi thaum txais lub cim nco txog los yeej tsis ua li cas, yog hais tias nej ua ntsia ntsoov rau kuv lub yeeb koob—nco ntsoov rau Leej Txiv txog kuv lub cev uas tau muab theej txhoj rau nej, thiab kuv cov ntshav uas tau nrog rau txoj kev zam txim rau nej tej kev txhaum.

3 Yog li ntawd, kuv muab ib lo lus txib rau nej tias, nej yuav tsum tsis txhob mus yuav tej cawv txiv hmab los yog tej dej cawv ntawm nej cov yeeb ncuab;

4 Yog li ntawd, nej yuav tsum tsis txhob haus ib yam twg uas tsis yog nej tus kheej nyuam qhuav ua; muaj tseeb tiag, nyob hauv kuv Txiv lub nceeg vaj no uas yuav muab txhim tsa nyob hauv lub ntiaj teb.

5 Saib seb, qhov no yog kuv lub tswv yim; yog li ntawd, tsis txhob xav tsis thoob, vim twb txog lub sij hawm kuv yuav haus cov kua txiv hmab nrog nej nyob hauv lub ntiaj teb, thiab nrog Maulaunais, tus uas kuv tau xa los rau nej los muab Phau Ntawv Maumoos ua kom tshwm sim, uas muaj kuv txoj moo zoo txhij txhua kav ib txhis, nws yog tus uas kuv tau muab tej yawm sij ntawm cov ceev xwm txheej ntawm Efala-is tus pas rau;

6 Thiab nrog rau Eli-as, tus uas kuv tau muab tej yawm sij tso rau, kom muab txhua yam uas tag nrho cov yaj saub dawb huv lub qhov ncauj tau hais txij thaum lub ntiaj teb chiv keeb los txum tim rov qab los, hais ntsig txog hnub nyoog kawg;

7 Thiab Yauhas uas yog Xakhaliyas tus tub thiab, tus Xakhaliyas uas nws (Eli-as) tau los xyuas thiab tau muab lus cog tseg tias nws yuav tau ib tug tub, thiab yuav tsum muab nws lub npe hu ua Yauhas, thiab nws yuav tau Eli-as lub siab puv npo;

8 Tus Yauhas uas kuv tau xa los cuag neb, kuv ob tug tub qhe, Joseph Smith, tus Hluas, thiab Oliver Cowdery, los tsa neb rau thawj lub pov thawj hwj uas neb tau txais lawm, kom yuav hu thiab tsa neb zoo ib yam li Aloos;

9 Thiab Eliyas thiab, tus uas kuv tau muab cov yawm sij tso rau, uas muaj lub hwj chim muab cov yawg koob lub siab tig mus rau cov me nyuam, thiab cov me nyuam lub siab tig mus rau cov yawg koob, xwv kom tag nrho ntiaj teb thiaj tsis raug nplawm nrog ib txoj kev foom tsis zoo;

10 Thiab kuj nrog Yauxej thiab Yakhauj, thiab Ixaj, thiab Anplaham, nej cov yawg koob, vim lawv thiaj tseem muaj tej koob hmoov;

11 Thiab kuj nrog Mikhayees, los yog Adas, tag nrho sawv daws txiv, tag nrho sawv daws tus coj, tus laus hnub laus nyoog;

12 Thiab kuj nrog Petus, thiab Yakaunpaus, thiab Yauhas, cov uas kuv tau xa los cuag neb, cov uas kuv tau kom los tsa neb thiab pom zoo rau neb ua thwj tim, thiab cov tim khawv tshwj xeeb ntawm kuv lub npe, thiab uas tuav cov yawm sij ntawm neb txoj hauj lwm qhuab qhia thiab rau tib co uas kuv tau ua tshwm sim rau lawv;

13 Ob tug uas kuv tau muab cov yawm sij ntawm kuv lub nceeg vaj rau, thiab ib lub caij nyoog tso txoj cai rau txoj moo zoo rau lub caij nyoog kawg; thiab rau lub caij nyoog uas muaj txhij txhua, uas kuv yuav sau txhua yam los ua ib ke, tag nrho tej uas nyob saum ntuj, thiab tej uas nyob hauv ntiaj teb;

14 Thiab kuj nrog rau tag nrho cov uas kuv Txiv tau muab tawm hauv cov neeg ntiaj teb los rau kuv.

15 Yog li ntawd, nej cia li zoo siab thiab xyiv fab, thiab muab nej tej siv sia, thiab muab tag nrho kuv tej cuab yeej ua rog coj los hnav thiab tuav, xwv kom nej yuav tiv taus hnub phem, tom qab nej ua tiav txhua yam, xwv kom nej yuav nyob khov kho.

16 Yog li ntawd, cia li sawv, muab tej kev tseeb los ua siv nej sia, muab kev ncaj ncees los ua daim thaiv hauv siab, thiab muab txoj kev npaj mus tshaj tawm txoj moo zoo ntawm kev kaj siab lug los ua khau nej rau, uas yog txoj moo zoo uas kuv tau xa kuv cov tim tswv los muab tso rau nej;

17 Tuav rawv daim hlau ntawm txoj kev ntseeg kom nej thiaj yuav muaj peev xwm tua tau tag nrho cov neeg phem tej xib xub hluav taws tuag;

18 Thiab ntoo lub kaus mom ntawm txoj kev cawm seej, thiab nqa rab ntaj ntawm kuv tus Ntsuj Plig, tus uas kuv yuav muab pub nplua mias los rau nej, thiab kuv txoj lus uas kuv tau ua tshwm sim los rau nej, thiab sib pom zoo txog txhua tsav txhua yam uas nej thov ntawm kuv, thiab rau siab ntseeg kom txog thaum kuv los, ces tus Tswv yeej yuav coj nej mus saum ntuj, kom kuv nyob qhov twg nej yuav nyob qhov ntawd thiab. Amees.