Tshooj 21
Kev tshwm sim uas tus Yaj Saub Joseph Smith tau txais, nyob hauv Fayette, New York, lub Plaub Hlis Ntuj hnub tim 6, xyoo 1830. Txoj kev tshwm sim no muab los thaum lawv tab tom txhim tsa lub Koom Txoos, rau hnub uas tau hais lawm, nyob hauv Peter Whitmer tus Laus, lub tsev. Muaj rau tus txiv neej, cov uas tau ua kev cai raus ua ntej ntawd, tuaj koom ua ke. Los ntawm kev tsa tes pom zoo tag nrho, cov neeg no tau tawm suab ntawm lawv txoj kev xav tau thiab txiav txim siab los mus tsim lub Koom Txoos, raws li Vajtswv lo lus txib (saib tshooj 20). Lawv kuj tau tsa tes pom zoo txais thiab txhawb nqa Joseph Smith tus Hluas thiab Oliver Cowdery ua ob tug thawj tswj hwm ntawm lub Koom Txoos. Nrog txoj kev tso tes rau saum taub hau, Joseph thiaj tau tsa Oliver ua ib tug txwj laug rau lub Koom Txoos, thiab Oliver kuj tau tsa Joseph zoo tib yam nkaus. Tom qab ua txoj kab ke ntawm lub cim nco txog, Joseph thiab Oliver nkawd tau tso tes rau saum txhua tus neeg uas tuaj koom lub taub hau thiab muab tus Vaj Ntsuj Plig Dawb Huv rau lawv thiab pom zoo rau lawv txhua tus los ua mej zeej ntawm lub Koom Txoos.
1–3, Tus Tswv hu Joseph Smith los ua ib tug pom tau, ib tug txhais lus, ib tug yaj saub, ib tug thwj tim, thiab ib tug txwj laug; 4–8, Nws txoj lus yuav coj lub hom phiaj ntawm Xi-oos; 9–12, Haiv Neeg Ntseeg yuav ntseeg nws cov lus thaum nws hais lus los ntawm tus Nplij Siab.
1 Saib seb, yuav ceev ib qho ceev xwm txheej cia nyob hauv nej; thiab nyob rau hauv yuav hu koj ua ib tug pom tau, ib tug txhais lus, ib tug yaj saub, ib tug thwj tim ntawm Yexus Khetos, ib tug txwj laug ntawm lub koom txoos los ntawm Vajtswv uas yog Leej Txiv lub siab nyiam, thiab txoj kev tshav ntuj ntawm nej tus Tswv Yexus Khetos,
2 Tus uas txais kev tshoov siab los ntawm tus Vaj Ntsuj Plig Dawb Huv los mus teeb lub hauv paus, thiab los mus txhim tsa nws rau txoj kev ntseeg uas dawb huv tshaj plaws.
3 Lub koom txoos uas muab tsim thiab muab tsa rau xyoo ib txhiab yim pua peb caug txij ntawm nej tus Tswv los, nyob rau lub hlis thib plaub, thiab hnub rau.
4 Yog li ntawd, hais rau cov ntseeg, nej yuav tsum mloog tag nrho Joseph Smith tej lus thiab tej lus txib uas nws yuav muab rau nej thaum nws txais tau tej ntawd, taug kev dawb huv tag nrho rau kuv pom;
5 Vim nej yuav tau txais nws txoj lus, zoo ib yam li los kiag ntawm kuv lub qhov ncauj los, nrog tag nrho txoj kev ua siab ntev thiab kev ntseeg.
6 Vim los ntawm kev ua tej yam no ces tej qhov rooj ntawm ntuj txiag teb tsaus yuav kov tsis yeej nej; muaj tseeb tiag, thiab tus Tswv uas yog Vajtswv yuav ua kom tej hwj chim ntawm txoj kev tsaus ntuj yaj ploj ntawm nej mus, thiab ua kom lub ntuj co nto kom zoo rau nej, thiab nws lub npe lub yeeb koob.
7 Vim tus Tswv uas yog Vajtswv tau hais li no: Joseph Smith yog tus uas kuv tau tshoov siab kom khiav lub hom phiaj ntawm Xi-oos los ntawm lub hwj chim loj rau txoj kev zoo, thiab nws txoj kev rau siab los kuv twb paub, thiab nws tej kev thov Vajtswv los kuv twb hnov.
8 Muaj tseeb tiag, nws txoj kev quaj rau Xi-oos los kuv twb pom, thiab kuv yuav ua kom nws tsis txhob quaj ntsuag txog Xi-oos ntxiv lawm; vim nws lub sij hawm xyiv fab twb los txog rau txoj kev zam txim rau nws tej kev txhaum, thiab los muab kuv tej koob hmoov ua tshwm sim rau tej yam nws ua.
9 Vim, saib seb, kuv yuav foom ib txoj koob hmoov loj kawg nkaus rau tag nrho cov uas ua hauj lwm hauv kuv lub vaj txiv hmab, thiab lawv yuav ntseeg nws tej lus, tej uas kuv muab rau nws los ntawm tus Nplij Siab, qhov uas qhia tias Yexus raug cov neeg muaj kev txhaum muab ntsia rau saum tus ntoo khaub lig rau neeg ntiaj teb tej kev txhaum, muaj tseeb tiag, rau txoj kev zam txim rau tej kev txhaum ntawm tus muaj lub siab xav ua zoo.
10 Yog li ntawd, Oliver Cowdery kuv tus thwj tim, yog kuv lub siab nyiam kom koj yuav tsa nws;
11 Qhov no yog ib txoj kab ke rau koj, kom koj thiaj yog ib tug txwj laug los ntawm nws txhais tes, nws yog tus thawj rau koj, xwv kom koj yuav ua tau ib tug txwj laug rau Khetos lub koom txoos no, uas ris kuv lub npe—
12 Thiab ua thawj tug tshaj tawm txoj moo zoo ntawm lub koom txoos no mus rau cov ntseeg, thiab mus rau neeg ntiaj teb, muaj tseeb tiag, mus rau Lwm Haiv Neeg; muaj tseeb tiag, thiab tus Tswv uas yog Vajtswv tau hais li no, ntsia saib, ntsia saib! mus rau cov Neeg Yudais thiab. Amees.