1 Mamatikami nga impasdek ti Dios dagiti ^agobierno para iti pagimbagan ti tao; ken kinednganna dagiti tao nga ^bagsungbat kadagiti aramidda a mainaig kadakuada, agpadpada iti panagaramidda kadagiti paglintegan ken iti panangipatungpalda kadagitoy, para iti pagimbagan ken pannakasalaknib ti gimong.

2 Mamatikami nga awan ti gobierno a makapagtalinaed iti kappia, malaksid no maituyang dagita a paglintegan ken maikeddeng a di mabarusngi a mangikalakag iti tunggal tao ti ^anawaya a panangaramat iti ^bkonsensia, ti kalintegan ken panangtengngel iti sanikua, ken ti ^cpannakasalaknib iti biag.

3 Mamatikami a nasken ti pannakasapul ti amin a gobierno kadagiti ^adadaulo a sibil ken mahistrado a mangipatungpal kadagiti paglintegan iti daytoy met laeng; ken isuda ti mangannong iti paglintegan iti panagpapada ken nasken a madawat ti linteg ken itandudo ti timek dagiti tao iti republika, wenno ti pagayatan ti turay.

4 Mamatikami nga impasdek ti Dios ti relihion; ken siaanamong kenkuana dagiti tao, ken isu laeng, ti pakaaramatanna, malaksid no ti kapanunotanda iti relihion ipariknada kadakuada a mangsalungasing kadagiti kalintegan ken wayawaya dagiti dadduma; ngem saankami a mamati nga adda kalintegan ti paglintegan ti tao a makibiang iti pannakaipaulog dagiti annuroten iti ^apanagdaydayaw a mamagrereppeng iti konsensia dagiti tao, wenno mangipapilit iti wagas ti panagkararag iti publiko wenno pribado; tapno matengngel ti mahistrado iti gimong ti krimen, ngem saanna a matengngel ti konsiensia iti kaano man; nasken a madusa ti agbiddut, ngem di magemgeman ti wayawaya ti kararua iti kaano man.

5 Mamatikami a naikudi a kanunongan dagiti amin a tao ken itandudoda ti gobierno iti pagnaedanda, bayat ti pannakasalaknib ti nakaisigudanda ken di mayakar a kalintegan babaen dagiti paglintegan dayta a gobierno; ket mainumo iti tunggal makipagili a masalakniban ti kalinteganna iti aramid a panagsulsol ken ^ayaalsa, ket nasken a madusa daytoy kas maiparbeng; ket adda kalintegan amin a gobierno a mangipakat kadagiti a paglintegan no ti pangngeddengda ket manamnama nga agpaay iti pagimbagan ti kagimongan; kagiddanna, nupay kasta, ti pannakabigbig a sagrado ti wayawaya ti konsensia.

6 Mamatikami a nasken a maraem ti tunggal tao iti pagrebbenganna, kasta met dagiti agturay ken mahistrado, a naipan a para iti pannakasalaknib dagiti inosente ken ti pannakadusa dagiti agbasol; ken tapno utang ti tunggal tao ti panangbigbig ken panagtungpalna kadagiti ^apaglintegan, ta no awanda masukatan ti kappia ken panagtutunos iti panangilupitlupit ken buteng; ta naipasdek dagiti paglintegan ti tao para iti pannakatimon ti pagsayaatantayo a kas tao ken pagilian, iti nagbaetan ti tao ken tao; ken dagiti nailangitan a paglintegan nga inted ti langit, a mangisuro kadagiti annuroten iti pakaseknan a naespirituan, ta ti pammati ken panagdaydayaw, agpadpada a sungbatan ti tao iti Namarsuana.

7 Mamatikami nga adda kalintegan dagiti agturay, estado, ken gobierno, ken naikudida a mangipakan kadagiti paglintegan para iti pannakasalaknib dagiti amin a makipagili iti nawaya a panangaramatda iti pammatida iti relihion; ngem saankami a mamati nga adda kalinteganda iti linteg a mangipaidam kadagiti makipagili iti daytoy a gundaway, wenno mangipawil kadakuada iti kapanunotanda, no la ketdi ti panagraem ken panagtamed maipakitada kadagiti paglintegan ken ti kasta a kapanunotan iti relihion saan a mangikalintegan iti panangsulsol wenno kinnunsabo.

8 Mamatikami a ti pannakaaramid iti krimen nasken a ^amadusa a maibatay iti kita ti basol; a ti panagpapatay, panangliput, panaguli, panagtakaw, ken ti panangsalungasing iti sapasap a kappia, iti amin a wagas, nasken a madusa a maibatay iti kinamammapatayda ken ti panagirayda nga agaramid iti dakes kadagiti tao, babaen dagiti paglintegan dayta a gobierno a nakaaramidan ti basol; ken para iti kappia iti publiko ken ti kinatalna nasken nga umaddang dagiti tao ket aramatenda ti kabaelanda a mangidatag kadagiti nagsalungasing kadagiti nasayaat a paglintegan tapno madusa.

9 Saanmi a patien a maiparbeng nga ilaok ti bileg ti relihion iti gobierno ti kagimongan, a pakabitibitan ti maysa a ragup ti relihion ket mapawilan ti sabali kadagiti kalinteganna a naespirituan, ken maipaidam dagiti kalintegan ti tunggal kameng, kas makipagili.

10 Mamatikami nga adda kalintegan ti amin a gimong ti relihion a makibiang kadagiti kamengda gapu iti nakiro a galad, a maibatay kadagiti annuroten ken alagaden dayta a gimong ti relihion; no la ketdi dayta a pannakibiang ket para iti panangiturong ken iti nasayaat a sasaaden; ngem saankami a mamati nga adda turay ti ania man a gimong ti relihion a mangusig kadagiti tao iti kalintegan ti panagtagikua wenno biag, a mangala kadakuada iti daytoy a kukua ti lubong, wenno mangiturong kadakuada iti pakaisagmakan ti biag man wenno takiag ken saka, wenno mangipaay kadakuada iti pannusa iti bagi. Mabalinda laeng ida nga ^aikkaten iti gimongda, ken laksiden kadakuada ti panangiwanwanda.

11 Mamatikami a nasken nga agapela dagiti tao iti paglintegan a sibil para iti pannakadalus dagiti amin a biddut ken pakadagsenan, a nakaipaayan iti pannakairurumen ti kinatao wenno ti kalintegan iti kukua wenno pannakadadael ti katatao, a yan dagiti paglintegan a mangsalaknib kenkuana; ngem mamatikami a nainkalintegan kadagiti tao ti panangsalaknibda iti bagbagida, dagiti gayyemda, ken sanikua, ken ti gobierno, manipud iti di nainkalintegan a panangrabngis ken pannakibiang kadagiti amin a tao iti panawen ti panagkasapulan, a saan a pakaaramatan kadagiti paglintegan ti madagdagus a panagapela, ket maited ti tulong.

12 Mamatikami a nainkalintegan ti ^amangikasaba iti ebanghelio kadagiti pagilian iti lubong, ket maballaagan dagiti nalinteg a mangisalakan iti bagbagida iti pannakadadael ti lubong; ngem saankami a mamati a nainkalintegan ti makibiang iti katulongan a di matangdanan, a mangikasaba man iti ebanghelio, wenno mangbuniag kadakuada a maisuppiat iti pagayatan ken kayat dagiti amoda, wenno makibabaet wenno mangallukoy kadakuada a mangpanunot a saanda a mapnek iti sasaadenda iti daytoy a biag, a pakaisarsarakan ti biag dagiti tao; patienmi a saan a nainkalintegan ken mainugot dayta a pannakibiang, ket napeggad iti kappia iti tunggal gobierno a mangipalubos iti pannakaadipen ti tunggal tao.