Koroboki Aika Tabu
Reirei ao Berita aika Tabu 124


Mwakoro 124

Kaotioti ae kaotaki nakon Iotebwa Timiti te Burabeti, i Nauvoo, Illinois, n Tianuare 19, 1841. Ibukin rikiraken te bwainikirinaki ao kawai aika aki eti n te tua ni kaitaraia mai irouia taan mwakuri n te tautaeka, Aomata aika Itiaki a tia ni imanonoaki bwa a na kiitana Missouri. Te kaetieti n tiritiri mai iroun Lilburn W. Boggs, te kowana i Missouri, ae bonginaki n Okitobwa 27, 1838, e katikuia n akea aia aanga. N 1841, ngke e kaotaki te kaotioti aei, te kaawa ae Nauvoo, are e kateaki n ana tabo te kaawa ngkoa ae Commerce, Illinois, e a tia ni kateaki irouia Aomata aika Itiaki, ao ikai are e a tia ni kateaki iai kautuun te Ekaretia.

1–14, E tuangaki Iotebwa Timiti bwa e na karaoa te katanoata ae nene i aon te euangkerio nakon te beretitenti n te United States, taian kowana, ao taan kairiiri n aaba ni kabane; 15–21, Hyrum Smith, David W. Patten, Joseph Smith te Ikawai, ao tabeman i buakoia ake a maiu ao ake a mate a kakabwaiaaki ibukin aia etieti ao tamaroaia; 22–28, A tuangaki Aomata aika Itiaki bwa a na katea te auti ibukin tararuakiia irua ao te tembora i Nauvoo; 29–36, Bwabetito ibukiia maate a riai ni karaoaki n te tembora; 37–44, Ana aomata te Uea a aki toki ni katei tembora ibukin karaoan otenanti aika tabu; 45–55, Aomata aika Itiaki a kainaomataaki man katean te tembora n te Aono ae Jackson ibukin bwainikirinakiia irouia aia kairiribai; 56–83, A kaotaki kawai ibukin katean te Auti ae Nauvoo; 84–96, E weteaki Hyrum Smith bwa te tamanuea, ni karekei kiing, ao n tei n onea mwiin Oliver Cowdery; 97–122, William Law ao tabeman a reireinaki aia mwakuri; 123–145, Taan mwakuri ni kabuta ao n te tabo a atongaki araia, ni ikotaki ma tabeia ao koram n te nakoanibonga are a na kaainna.

1 E koaua, ae taku te Uea nakoim, au tia mwakuri ae Iotebwa Timiti, I rang kukurei n am anga karea ao am kakoaua, are ko a tia ni karaoia; bwa I a tia ni kaikawairakeko ibukin aei, bwa I aonga ni kaota wanawanau rinanoia aomata n te aonaba aika a amamaara.

2 Am tataro a butimwaeaki imatau; ao ni kaeka nako iai I tuangko, bwa ko a weteaki ngkai n te tai ae tawe ni karaoa te katanoata ae e nene n au euangkerio, ao ni kaineti nakon te atiteiki aei are I a tia ni kateia bwa atibun te maninganinga i Tion, are e na karaneaneaaki ma te katamaroa are bon katotongan te bareti.

3 Te katanoata aei e na karaoaki nakoia ni kabane auea n te aonaba, nakon maninganingana aika aua, nakon te beretitenti ae rineaki ae e tuai taua nakoana, ao kowana aika karineaki n te aba are ko maeka iai, ao nakoia ni kabane botanaomata n te aonaba ake a maenako n taabo nako.

4 E riai ni koreaki n tamnein te animamannei ao man mwaakan te Tamnei ae Raoiroi, are e na mena iroum n tain koreana;

5 Bwa e na kaotaki nakoim iroun te Tamnei ae Raoiroi bwa ko na ataa au kantaninga ni kaineti nakoia uea ao tautaeka, bwa tera ae e na riki nakoia n taai aika a na roko.

6 Bwa, nooria, N nang butia bwa a na mutiakina ootan ao mimitongin Tion, bwa e a roko te tai ae baireaki bwa e na akoaaki.

7 Mangaia are, weteia, ma te katanoata ae nene, ao ma am koaua, n aki makuia, bwa kanga auteute ngaiia, ao ni kabane mimitongia ae kanga ai aron te ue are e nang bwaka, bwa a aonga n tiku n akea aia aanga—

8 Ao bwa I aonga ni kawariia n te bong are N na roko iai, ngkana N na kanakoa rabunan ubu, n rinea ana tabo te tia karawawata i buakoia bwaritaio, ike e mena iai te akangenge wii, ngkana a aki butimwaia au taan mwakuri ao au koaua are I a tia ni kaotia nakoia.

9 Ao teuana riki, N na kawariia ao ni kamaraua nanoia, aika a mwaiti i buakoia ibukin rakami, bwa ko aonga ni kunea te akoaki i mataia, bwa a aonga n roko nakon aootan te koaua, ao Tientaire nakon karietatan ke uotakirakean Tion.

10 Bwa e rang tawe te bong are N na roko iai, n te aaoa are kam taku inanomi bwa e aki; ao e ngaa te tabo ae a mano iai au aomata, ao te tabo ni katantan ibukiia naake a tiku mai buakoia?

11 Uti, O uean te aonaba! Nakomai, O, nakomai, ma ami koora ao ami tirewa, ni buokiia au aomata, nakon aia auti natin Tion aine.

12 Ao teuana riki, e koaua ae I tuangko, e riai au tia mwakuri ae Robert B. Thompson ni buokiko ni korea te katanoata aei, bwa I rang kukurei irouna, ao bwa e na mena irarikim;

13 Mangaia are, e riai ngaia n ongo n am reirei, ao N na kakabwaia n taian kakabwaia aika mwaiti; e riai ni kakaonimaki ao ni kokoaua ni bwaai ni kabane man te tai aei, ao e na korakora imatau;

14 Ma e riai ngaia n uringnga bwa N na kainnanoa ana kaeka ni bukinana ni amwiokoana n tararua.

15 Ao teuana riki, e koaua ae I tuangko, e a kakabwaiaaki au tia mwakuri ae aHyrum Smith; bwa Ngai, te Uea, I tangiria ibukin braoiroin nanona, ao ibukina bwa e tangira te bwai ae e eti imatau, e taku te Uea.

16 Teuana riki, e riai au tia mwakuri ae John C. Bennett ni buokiko n am mwakuri ni kanakoan au taeka nakoia uea ao aomata n te aonaba, ao n tei irarikim, ngkoe ae au tia mwakuri Iotebwa Timiti, n tain te karawawataaki; ao kanuangana e na aki bua ngkana e butimaea te areirei.

17 Ao ibukin ana tangira e na korakora, bwa ngaia bon au bwai ngkana e karaoa aei, e taku te Uea. I a tia n noora te mwakuri are e a tia ni karaoia, are I butimwaia ngkana e reitinako, ao N na baunna ni kakabwaia ao te mimitong ae korakora.

18 Ao teuana riki, I tuangko bwa bon au kantaninga bwa au tia mwakuri ae Lyman Wight e na reitinako ni kabwarabwara ibukin Tion, n tamnein te nimamannei, ni kakoauaai imatan te aonaba; ao N na uotia n ai aron ae e toka i aon bain te aikare; ao e na karekea te mimitong ao te karineaki nakoina ao nakon arau.

19 Bwa ngkana e na katiaa ana mwakuri I aonga ni butimwaia nakoiu, n aron are I karaoia nakon au tia mwakuri ae aDavid Patten, are raou n te tai aei, ao au tia mwakuri naba ae bEdward Partridge, ao au tia mwakuri naba ae e a kara ae cJoseph Smith te Ikawai, are e tekateka dma Aberaam n angataina, ao e kakabwaiaaki ao n tabu ngaia, bwa bon ngaia au bwai.

20 Ao teuana riki, e koaua ae I tuangko, au tia mwakuri ae George Miller ae akea te auarao irouna; e kona n onimakinaki ibukin raoiroin nanona; ao ibukin te tangira are iai irouna ibukin au kakoaua Ngai, te Uea, I tangiria.

21 Mangaia are I tuangko, I kabaea i aon atuuna nakoan te abitiobiriki, n aekan au tia mwakuri ae Edward Partridge, bwa e aonga ni karekea katabuan au auti, bwa e aonga n anga kakabwaia i aon atuuia au aomata ake a kainnano, e taku te Uea. E riai n akea te aomata n ribaa au tia mwakuri ae George, bwa e na karineai.

22 E riai au tia mwakuri ae George, ao au tia mwakuri ae Lyman, ao au tia mwakuri ae John Snider, ao tabeman riki, ni katea te aauti nakon arau, ae te auti ae au tia mwakuri ae Iotebwa e na kaotia nakoia, i aon te tabo are e na kaotia nakoia naba.

23 Ao e na riki bwa te auti n amwarake ao ni maeka, te auti bwa a aonga irua n roko mai kiraroa ni maeka iai; mangaia are e riai n riki bwa te auti ae raoiroi, n tau ni butimwaia ni kabane, bwa ataan mwamwananga ake a kua a aonga ni kunea te marurung ao te mwengaraoi i nanon aia tai n iangoa ana taeka te Uea; ao batibun te maninganinga are I a tia n rineia ibukin Tion.

24 Te auti aei e na riki bwa te tabo ni maeka ae kamarurung ngkana e kateaki nakon arau, ao ngkana te kowana are e na rineaki nako iai e na aki kariaia te bareka nako n roko nako aona. E na tabu, ke te Uea ae Atuami e na aki maeka iai.

25 Ao e koaua ae I manga tuangko, a riai ni kabane au aomata aika itiaki n roko mai ike raroa.

26 Ao kanakoia taan uarongorongo aika a waekoa, eng, taan uarongorongo ake a rineaki, ao ni kangai nakoia: Nakomai, ma ami koora ni kabane, ao ami tirewa, ao ami atibu aika kakawaki, ao ma ni kabane ami bwai aika bwain rimoa; ao ma ni kabane ake iai aia atatai i aon bwain rimoa, ake a na roko, a kona n roko, ao ni uota te aroka ae te teatura, ao te aroka ae te mwaiango, ao te aroka ae te bureen, ni ikotaki ma aroka aika kakawaki n te aonaba;

27 Ao ma te biti, ma te kaobwa, ao ma te buraati, ao ma te tingke, ao ma ni kabane ami bwai ae bwain te aonaba aika kakawaki; ao ni katea te aauti nakon arau, bwa e na bmaeka iai Are Moan te Rietata.

28 Bwa akea te tabo ae kuneaki i aon te aonaba are e kona n roko nako iai ao ni manga akaoki bwaai ake a bua mai iroumi, ke are e a tia n anaia, are bwaninin te nakoanibonga.

29 Bwa akea te atabo ni bwabetito i aon te aonaba, are ngaia, au aomata aika itiaki, a kona ni bbwabetitoaki iai ibukia naake a mate—

30 Bwa te otenanti aei e karaoaki ti n au auti, ao e aki kona ni butimwaeaki irou, ti n ami bong ni kainnano, ike kam aki kona iai ni katea te auti nakoiu.

31 Ma I tuangkami, ni kabane ngkami au aomata aika itiaki, kam na akatea te auti nakoiu; ao I anganingkami te tai ae tau ni katea te auti nakoiu; ao i nanon te tai aei ami bwabetito a na butimwaeaki irou.

32 Ma nooria, n tokin te tai aei ami bwabetito ibukiia maate a na aki butimwaeaki irou; ao ngkana kam aki karaoi bwaai aikai n tokin te tai kam na aki butimwaeaki bwa te ekaretia, ma ami mate, e taku te Uea ae Atuami.

33 Bwa e koaua ae I tuangkami, bwa i mwin ami tai ae tau ni katea au auti nakoiu, are te otenanti ni bwabetito ibukiia maate e karaoaki iai, ao ibukin te otenanti naba anne are e a kaman kateaki i mwaain katean te aonaba, ami bwabetito ibukiia ami mate a aki kona ni butimwaeaki irou;

34 Bwa i nanona a katabuaki akiingin te nakoanibonga ae tabu, bwa kam aonga ni karekea te karinerine ao te mimitong.

35 Ao i mwin te tai aei, ami bwabetito ibukiia maate, irouia naake a maenako n aaba nako, a aki butimwaeaki irou, e taku te Uea.

36 Bwa e baireaki bwa i Tion, ao n ana titeiki, ao i Ierutarem, taabo akanne ake I a tia n rineia ibukin te akatantan, a na riki bwa taabo ibukin ami bwabetito ibukiia ami mate.

37 Ao e koaua ae I manga tuangkami, e na kanga ami akaitiaki ni butimwaeaki irou, ngkana kam aki karaoia i nanon te auti are kam a tia ni kateia nakon arau?

38 Bwa, ibukin aei I tuanga Mote bwa e na katea te aumwa, bwa a na amoamoia ma ngaia n te rereua, ao ni katea te bauti n te aba ni berita, bwa otenanti akanne a aonga ni kaotaki ake a tia ni karabaaki mai i mwaain rikin te aonaba.

39 Mangaia are, e koaua ae I tuangkami, bwa ami akabiribiri, ao ami kaitiaki, ao ami bbwabetito ibukiia maate, ao ami cbotaki n taromauri, ao ami kauring ibukin ami danga karea irouia natin Rewi aika mwaane, ao ibukin ami kaotioti n ami etabo aika rang tabu ike kam na karekea iai te maroro, ao ami tua ao ami motikitaeka, ibukin moanakin kaotioti ao katean Tion, ao ibukin te mimitong, te karinerine, ao te entaumente ibukia ni kabane ana botanaomata, a katabuaki man otenantin au auti ae tabu, are au aomata a aki toki n tuangaki bwa a na kateia nakon arau ae tabu.

40 Ao e koaua ae I tuangkami, e riai te auti aei ni kateaki nakon arau, bwa I aonga ni kaota au otenanti iai nakoia au aomata;

41 Bwa I taraia bwa e riai ni akaotia nakon au ekaretia bwai ake a tia ni bkarabaki mai i mwaain katean te aonaba, bwai ake a irekereke ma cte mwioko n tararua ni kororaoin bongina.

42 Ao aN na kaotii nakon au tia mwakuri ae Iotebwa bwaai ni kabane ake a irekereke nakon au auti, ao te nakoanibonga iai, ao te tabo ike e na kateaki i aona.

43 Ao kam na kateia i aon te tabo are kam a tia n iangoia bwa e na kateaki iai, bwa anne te tabo are I a tia n rineia ibukimi ni kateia i aona.

44 Ngkana kam mwakuri ma korakorami ni kabane, N na katabua te tabo anne bwa e na atabu.

45 Ao ngkana au aomata a na ongo ni bwanau, ao nakon bwanaia au atia mwakuri ake I a tia n rineia bwa a na kairia au aomata, noria, e koaua ae I tuangkami, a na aki kamwaingaki man aia tabo.

46 Ma ngkana a aki ongo nakon bwanaau, ke nakon bwanaia aomata aikai ake I a tia n rineia, a na aki kakabwaiaki, bukina bwa a kabareka au tabo ae tabu, ao au otenanti aika tabu, ao au tua, ao au taeka aika tabu are I anga nakoia.

47 Ao e na koro bukina bwa ngkana kam katea te auti nakon arau, ao n aki karaoi bwaai ake I taku, N na aki karaoa te atuea are I karaoia nakoimi, ke ni kakoroi bukin berita are kam kantaningaia mai baiu, e taku te Uea.

48 Bwa n aonean mwiin kakabwaia, man oin ami mwakuri, kam uota te maraia, te un, te un ae korakora, ao te motikitaeka i aon atuumi, man babami, ao man ami mwakuri aika bati n ribaki ni kabane, are kam karaoia imatau, e taku te Uea.

49 E koaua, e koaua, I tuangkami, bwa ngkana I anga te tua nakoia natiia aomata nako bwa a na karaoa te mwakuri nakon arau, ao natiia aomata akanne a na nako ma korakoraia ni kabane ao ma ni kabane are iai irouia ni karaoa te mwakuri anne, ao n aki toki n ananomatoa, ao aia kairiribai a roko i aoia ao n tuukiia man karaoan te mwakuri anne, nooria, bon au kantaninga n btangira te mwakuri anne n aki manga mena i baia natiia aomata akanne, ma ni butimwaea aia anga karea.

50 Ao mwakuri aika bubuaka ao riaoan au tua aika tabu N na akatokaa i aon atuuia naake a totokoa au mwakuri, nakon te katenua ao te kaaua n broro, n te maan are a caki iai rairi nanoia, ao n ribaai, e taku te Uea ae te Atua.

51 Mangaia are, ibukin aio I a tia ni butimwaea aia anga karea naake I tuangiia bwa a na katea te kaawa ao te aauti nakon arau, n te bAono ae Jackson, Missouri, ao a totokoaki irouia aia kairiribai, e taku te Uea ae Atuami.

52 Ao N na kaekaia n te amotikitaeka, te un, ao te un ae korakora, te tatakarua, ao te korakai, ao te kangenge wii i aon atuuia, nakon te katenua ao te kaaua n roro, n te maan ae aki iai raira nanoia, ao n ribaai, e taku te Uea ae Atuami.

53 Ao aio I karaoa te katoto nakoimi, ibukin raumi ni kaineti nakoia ni kabane naake a tia n tuangaki bwa a na karaoa te mwakuri ao n tia n totokoaki ni baia aia kairiribai, ao man te bwainikirinaki, e taku te Uea ae Atuami.

54 Bwa Ngai ami Uea ae Atuami, ao N na kamaiuiia ni kabane naake tarimi ake a tia ni aitiaki nanoia, ao n tia n btiringaki n aban Missouri, e taku te Uea.

55 Ao e koaua ae I manga tuangkami, I a manga tuangkami riki bwa kam na katea te aauti nakon arau, n te tabo aei, bwa kam aonga ni bkaotingkami nakoiu bwa kam kakaonimaki ni bwaai ni kabane ake I tuangkami, bwa I aonga ni kakabwaiaingkami, ao ni bauningkami n te karineaki, te aki maamate, ao te maiu ae akea tokina.

56 Ao ngkai I tuangkami, n aron ae kaineti nakon au aauti n amwarake ao ni maeaka are I a tia n tuangkami ni kateia ibukin maekaia irua, e riai ni kateaki nakon arau, ao e riai arau n aranaki iai, ao e riai au tia mwakuri ae Iotebwa ao ana utu n iai nneia i nanona, man te roro teuana nakon te roro teuana.

57 Bwa te kabiraki aei are I kaaki i aon atuuna, bwa kakabwaiana a na kaakaki naba i aon atuia kanoana i mwina.

58 Ao n aron ae I taku nakon aAberaam ni kaineti nakon reeti n te aonaba, I taku naba nakon au tia mwakuri ae Iotebwa: Iroum ao irouia am bkariki a na kakabwaiaaki reeti n te aonaba.

59 Mangaia are, e riai au tia mwakuri ae Iotebwa ao ana kariki i mwina n iai aia tabo n te auti anne, man te roro teuana nakon te roro teuana, n aki tootoki, e taku te Uea.

60 Ao e riai aran te auti anne n aranaki bwa te Auti ae Nauvoo; ao e riai n riki bwa te tabo ni maeka ae kakukurei ibukiia aomata, ao te tabo ni motirawa ibukin te tia mwamwananga ae e kua, bwa e aonga n iangoa mimitongin Tion, ao mimitongin aio, atibun maninganingana;

61 Bwa e aonga naba ni karekea te reirei mai irouia naake I a tia n anganiia tabeia n riki bwa aaroka aika kakannato, ao bwa btaan tararua i aon ana oo.

62 Nooria, e koaua ae I tuangkami, e riai au tia mwakuri ae George Miller, ao au tia mwakuri ae Lyman Wight, ao au tia mwakuri ae John Snider, ao au tia mwakuri ae Peter Haws, ni barongaia i bon irouia, ao n rinea temanna irouia bwa te beretitenti i aon aia koram ibukin katean te auti anne.

63 Ao a na karaoa te oin tua, are a kona iai ni karekei mwaane man bukinibwai ibukin katean te auti anne.

64 Ao a na aki butimwaea ae kee i aan nimabwi te taara ibukin teuana te tibwa n te bukinibwai n te auti anne, ao a na kariaiakaki ni butimwaea tebwi ma nimaua te ngaa te taara mai iroun temanna te aomata ibukin te bukinibwai n te auti anne.

65 Ma a na aki kariaiakaki ni butimwaea ae raka i aon tebwi ma nimaua tenga te taara te bukinibwai mai iroun temanna te aomata.

66 Ao a na aki kariaiakaki ni butimwaea ae e kee i aan nimabwi te taara ibukin teuana te bukinibwai mai iroun temanna te aomata n te auti anne.

67 Ao a na aki kariaiakaki ni butimwaeia aomata nako, bwa taan bwaibwai n te bukinibwai n te auti anne, tii ngkana te aomata anne e na kabwaka boon ana bukinibwai nako nanon baia n te tai are e karekea te bukinibwai;

68 Ao e na karekea te bukinibwai n te auti anne ae titebo mwaitina ma mwaitin te bukinibwai are e kabwaka nako nanon baia; ma ngkana akea ae e kabwaka nako nanon baia e na aki karekea te bukinibwai n te auti anne.

69 Ao ngkana ane e kabwaka boon te bukinibwai nako nanon baia e na riki bwa te bukinibwai n te auti anne, bon ibukina, ao ibukiia ana kariki ake i mwina, man te roro teuana nakon te roro teuana, n te maan ae ngaia ao naake a na bwaibwai i mwina a na taua te bukinibwai anne, ao n aki kabooa nako ke n anga nako te bukinibwai mai nanon baia n oin inaomataia ao aia mwakuri, ngkana kam karaoa au kantaninga, e taku te Uea ae Atuami.

70 Ao teuana riki, e koaua ae I tuangkami, ngkana au tia mwakuri ae George Miller, ao au tia mwakuri ae Lyman Wight, ao au tia mwakuri ae John Snider, ao au tia mwakuri ae Peter Haws, a karekea te bukinibwai nako nanon baia, n te mwane, ke n taian bwai are a karekea mai iai kanoan raoi te mwane, a riai n aki kamanena mwakoron nako te bukinibwai anne ibukin aanga riki tabeua, ma tii n te auti anne.

71 Ao ngkana a anaa mwakoron te mwane anne ni kamanena n tabo riki tabeua, ma tiaki n te auti anne, n akean ana kariaia te aomata are e taua te bukinibwai, ao n aki kabwaka boon mwiina aua te tai rakan mwaitina ibukin te bukinibwai are a anaia ni kamanena n tabo riki tabeua, ma tiaki n te auti anne, a na kamaraiaki, ao a na kamwaingaki man aia tabo, e taku te Uea ae te Atua; bwa Ngai, te Uea, te Atua, ao I aki kona ni abwai ni ngareakinaki ni bwaai nako aikai.

72 E koaua ae I tuangkami, e riai au tia mwakuri ae Iotebwa ni kabwaka boon bukinibwai nako nanon baia ibukin katean te auti anne, n aron nooran raoiroina irouna, ma au tia mwakuri ae Iotebwa e aki kona ni kabwaka ae raka i aon tebwi ma nimaua tenga te taara te bukinibwai n te auti anne, ke i aan nimabwi te taara; ke aki kona aomata nako, e taku te Uea.

73 Ao iai tabeman naba ake a tangiria n ataa au kantaninga ni kaineti nakoia, bwa a tia n bubuti ibukina mai irou.

74 Mangaia are, I tuangkami ni kaineti nakon au tia mwakuri ae Vinson Knight, ngkana e na karaoa au kantaninga e riai ni kabooi bukinibwai n te auti anne ibukina, ao ibukin rooro ake i mwina, man te roro teuana nakon te roro teuana.

75 Ao e riai n tabekarake bwanaana ae ananau ao n takarua, i buakoia aomata, ni abubuti ibukiia kainnano ao ake akea aia bwai; ao e riai n aki kabwaka, ao e riai n aki kabwara nanona; ao N na bbutimwaea ana anga karea, bwa a na aki riki nakoiu n aron ana anga karea Kain, bwa e na riki bwa au bwai, e taku te Uea.

76 E riai ana utu ni kimwareirei ao ni katannakoi nanoia man karawawata; bwa I a tia n rineia ao ni kabiria, ao e na karineaki i buakoia aomata n ana auti, bwa N na kabwarai ana bure ni kabane, e taku te Uea. Amen.

77 E koaua ae I tuangkami, e riai au tia mwakuri ae Hyrum ni kabooi bukinibwai n te auti anne n aron nooran raoiroina irouna, ibukina ao ana roro ake i mwina, man te roro teuana nakon te roro teuana.

78 E riai au tia mwakuri ae Isaac Galland ni kabooi bukinibwai n te auti anne; bwa Ngai, te Uea, I tangiria ibukin te mwakuri are e a tia ni karaoia, ao N na kabwarai ana bure ni kabane; mangaia are, e riai n uringaki bwa ngaia naba te tia bwaibwai n te auti anne man te roro teuana nakon te roro teuana.

79 E riai au tia mwakuri ae Isaac Galland n rineaki i buakomi, ao ni katabuaki iroun au tia mwakuri ae William Marks, ao ni kakabwaiaaki irouna, n nako ma au tia mwakuri ae Hyrum ni kakoroa bukin te mwakuri are au tia mwakuri Iotebwa e na kaotia nakoia, ao a na korakora kakabwaiaakiia.

80 E riai au tia mwakuri ae William Marks ni kabooi bukinibwai n te auti anne, n aron nooran raoiroina irouna, ibukina ao ana roro, man te roro teuana nakon te roro teuana.

81 E riai au tia mwakuri ae Henry G. Sherwood ni kabooi bukinibwai n te auti anne, n aron nooran raoiroina irouna, ibukina ao ana kariki ake i mwina, man te roro teuana nakon te roro teuana.

82 E riai au tia mwakuri ae William Law ni kabooi bukinibwai n te auti anne, ibukina ao ana kariki ake i mwina, man te roro teuana nakon te roro teuana.

83 Ngkana e na karaoa au kantaninga e riai n aki kaira ana utu nakon aaba ake i mainiku, ke nako Kirtland; e ngae n anne, Ngai, te Uea, N na katea Kirtland, ma Ngai, te Uea, I a tia ni katauraoa te kai ni kataere ibukiia kaaina.

84 Ao ma au tia mwakuri ae Almon Babbitt, a mwaiti bwaai ake I aki kukurei iai; nooria, e rang tangiria bwa e na katea ana reirei n onea mwiin te reirei are I a tia n anga, are ana reirei naba te Beretitentii n au Ekaretia; ao e katea te kao te teei ae akoora bwa a na taromauria au aomata.

85 E riai n akea te aomata n anako man te tabo aei are e a tia n roko ikai ni kataia ni kawakin au tua.

86 Ngkana a maeka ikai a riai ni maeka ibukiu; ao ngkana a mate a riai ni mate ibukiu; bwa a na amotirawa man aia mwakuri ni kabane ikai, ao a na reitinako n aia mwakuri.

87 Mangaia are, e riai au tia mwakuri ae William n onimakinai, ao n toki ni maaku ibukin ana utu, ibukin te aoraki n te aba. Ngkana kam atangirai, kawakini au tua; ao aorakin te aba e na bbitaki nakon mimitongimi.

88 E riai au tia mwakuri ae William n nako ao ni katanoata au euangkerio ae akea tokina ma te bwanaa ae takarua, ao ma te kukurei ae korakora, n aron ae rotaki iroun aTamneiu, nakoia kaain Warsaw, ao nakoia naba kaain Carthage, ao nakoia naba kaain Burlington, ao nakoia naba kaain Madison, ao tataninga ma te taotaonakinnano ao te botumwaka ibukin kaetieti tabeua n au maungatabu ni kabuta, e taku te Uea.

89 Ngkana e na karaoa au kantaninga e riai man te tai aei n ongo n ana reirei au tia mwakuri ae Iotebwa, ao ma ana tarena, mwane ao korakorana e na boutoka te awaki nakoia ake a kainnano, ao ni boretia brairan au taeka ae tabu ae boou nakoia kaain te aonaba.

90 Ao ngkana e karaoa aei N na akakabwaia n taian kakabwaia aika mwaiti, bwa e na aki mwanuokinaki, ke a na aki kuneaki kanoana ni bbubuti kanaia.

91 Ao teuana riki, e koaua ae I tuangkami, e riai au tia mwakuri ae William n rineaki, ni katabuaki, ao ni kabiraki, bwa te tia ibuobuoki nakon au tia mwakuri ae Iotebwa, n onean mwin au tia mwakuri ae Hyrum, bwa au tia mwakuri ae Hyrum e aonga n ana te nakoa n te Nakoanibonga ao te aTamanuea, are e rineaki nako iai mai iroun tamana, man te kakabwaia ao man te kariaia naba;

92 Bwa man te tai aei e na taua kiingin ana kakabwaia te atamanuea i aon atuia au aomata ni kabane,

93 Bwa ane e kakabwaia e na kakabwaiaaki, ao ane e akamaraia e na kamaraiakaki; bwa ane e na bkabaea i aon te aba e na kabaeaki i karawa; ao ane e na kabwara i aon te aba e na kabwaraaki i karawa.

94 Ao man te tai aei I rineia nakoina bwa e aonga n riki bwa te burabeti, ao te atia mamata, ao te tia kaotioti nakon au ekaretia, n aron naba au tia mwakuri ae Iotebwa;

95 Bwa e aonga ni kaai ni mwakuri naba ma au tia mwakuri ae Iotebwa ao bwa e na karekei reirei mai iroun au tia mwakuri ae Iotebwa, are e na kaoti nakoina ataian kiing bwa e aonga ni kona ni bubuti ao ni karekea, ao ni baunaki ma te kakabwaia naba anne, ao te mimitong, ao te karineaki, ao te nakoanibonga, ao ana bwai n tituaraoi te nakoanibonga, are e anganaki ngkoa au tia mwakuri ae bOliver Cowdery;

96 Bwa e aonga au tia mwakuri ae Hyrum ni kaota koauan bwaai ake N na kaotia nakoina, bwa e aonga arana n uringaki ma te karinerine man te roro teuana nakon te roro teuana, n aki tootoki.

97 E riai au tia mwakuri ae William Law ni karekei naba kiing ake e na kona iai ni bubuti ao ni karekei kakabwaia; e riai n ananorinano imatau, ao n akea te buarao, ao e na karekea Tamneiu, ae te cTia Karaunano, are e na kaotii nakoina koauan bwaai ni kabane, ao e na anganna, n te tai naba anne, te bwai are e na taekinna.

98 Ao akanikina aikai a na rimwina—e na bkatoki aoraki, e na kanakoi taian riaboro, ao e na kamaiuaki mai irouia naake a na anganna te bwai ae kamamate;

99 Ao e na kairaki ni kawai ike te anaeta ae e kamamate e na aki kona n tenaa bukini waena, ao e na uotakirake n btamnein ana iango n aron ae e toka i aon bain te ikare.

100 Ao tera ngkana I tangiria bwa e na kautiia maate, e riai n aki taua bwanaana.

101 Mangaia are, e riai au tia mwakuri ae William n takarua ao tai rawa n taetae, ma te kukurei ao te kimwareirei, ao ma te otanna nakon teuare e tekateka i aon te kaintokanuea n aki tootoki, e taku te Uea ae Atuami.

102 Nooria, I tuangkami, iai te mition ae tauraoi ibukin au tia mwakuri ae William, ao au tia mwakuri ae Hyrum, ao ibukiia n tii ngaiia; ao e riai au tia mwakuri ae Iotebwa n tiku ni mwengana, bwa e kainanoaki. Nikiraia N na kaotia nakoimi i mwina. Eng. Amen.

103 Ao teuana riki, e koaua ae I tuangkami, ngkana au tia mwakuri ae aSidney e beku irou ao n riki bwa te tia ibuobuoki nakon au tia mwakuri ae Iotebwa, e riai n teirake ao n tei n te nakoa ni weteana, ao n nanorinano imatau.

104 Ao ngkana e anga nakoiu te karea ae e riai, ao ni kakoauaa, ao n tiku ma au aomata, nooria, Ngai, te Uea ae Atuami, N na kamarurungnga bwa e na marurung; ao e na tabekarake bwanaana riki i aon maunga, ao n riki bwa te atia taetae imatau.

105 E riai n nakomai ao ni katukuiia ana utu n te tabo ae uakaan ma te tabo are e maeka iai au tia mwakuri ae Iotebwa.

106 Ao ni kabane mwamwanangana e riai n tabekarake bwanaana n aron tangin te buu, ao ni kauringiia kaain te aonaba bwa a na birinako man te un ae e nang roko.

107 E riai ni buoka au tia mwakuri ae Iotebwa, ao e riai naba au tia mwakuri ae William Law ni buoka au tia mwakuri ae Iotebwa, ni karaoan te akatanoata ae e nene nakoia uea n te aonaba, n aron are I a tia n taekinna mai i mwaaina nakoimi.

108 Ngkana au tia mwakuri ae Sidney e na karaoa au kantaninga, e riai n aki kamwaingiia ana utu nakon aaba ake i amainiku, ma e riai ni bita aia tabo, n aron ae I a tia n taekinna.

109 Nooria, bon tiaki au kantaninga bwa e na ukoukoura kakaean te mano ao te tabo ni katantan n raroa nako man te kaawa are I a tia n rineia nakoimi, ae te kaawa ae aNauvoo.

110 E koaua ae I tuangkami, ae ngkai, ngkana e ongo ni bwanaau, e na kakabwaiaaki. Eng. Amen.

111 Ao teuana riki, e koaua ae I tuangkami, e riai au tia mwakuri ae Amos Davies ni kabooi bukinibwai nako nanon baia naake I a tia n rineia ni katea te auti n amwarake ao ni maeka, are te Auti ae Nauvoo.

112 Aio e riai ngaia ni karaoia ngkana e tangiria ni karekea tibwana; ao e riai n ongo n ana reirei au tia mwakuri ae Iotebwa, ao ni mwakuri n oin baina bwa e aonga ni karekea te onimakinaki irouia aomata.

113 Ao ngkana e na kaotia bwa e kakaonimaki ni bwaai ni kabane ake a katukaki i aan ana tararua, eng, ae bwaai tabeua, e na riki bwa te amataniwi i aon bwaai aika a mwaiti;

114 Mangaia ae e riai ngaia ni akarinanoa bwa e aonga ni karietataaki. Eng. Amen.

115 Ao teuana riki, e koaua ae I tuangkami, ngkana au tia mwakuri ae Robert D. Foster e ongeaba nakon bwanaau, e riai ni katea te auti ibukin au tia mwakuri ae Iotebwa, ni kaineti nakon te boraraoi are e a tia ni karoia ma ngaia, n aron te mataroa ae e na uki nakoina man te tai teuana nakon te tai teuana.

116 Ao e riai n raira nanona man nanobabana ni kabane, ao ni kunnikainna n te atangira ae kororaoi; ao n toki ni karaoa ae buakaka, ao ni kaakeai ana taeka aika mamatoa ni kabane;

117 Ao ni kabwakaa boon bukinibwai naba nako nanon bain te koram n te Auti ae Nauvoo, ibukina ao ibukin ana kariki ake i mwina, man te roro teuana nakon te roro teuana;

118 Ao n ongo n ana reirei au tia mwakuri ae Iotebwa, ao Hyrum, ao William Law, ao nakoia naake iai kariaiakaki irouia are I a tia ni weteia ni kawenea aan Tion; ao e na kakabwaiaaki n aki tootoki. Eng. Amen.

119 Ao teuana riki, e koaua ae I tuangkami, e riai n akea te aomata ni kabwaka boon bukinibwai nakon te koram n te Auti ae Nauvoo ti ngkana te tia kakoauaa Ana Boki Moomon, ao kaotioti ake I a tia n anganingkami, e taku te Uea ae Atuami;

120 Bwa ane e araka ke e kee nakon aei e roko mai iroun are buakaka, ao e na raonaki n te kamaraia ao tiaki te kakabwaia, e taku te Uea ae Atuami, Eng. Amen.

121 Ao teuana riki, e koaua ae I tuangkami, e riai te koram n te Auti ae Nauvoo ni karekea booia ae tau ibukin ni kabane mwakuri are a karaoi ni katea te Auti ae Nauvoo; ao e riai booia ni booraraoakinaki irouia, ni kaineti nakon mwaitina.

122 Ao a riai aomata nako ake a kabooi bukinibwai ni kabwakaa teutana mwakoron booia, ngkana e riai, ibukin boutokaaia, e taku te Uea; ngkana a aki, aia mwakuri a na warekaki bwa aia bukinibwai n te auti anne. Eng. Amen.

123 E koaua ae I tuangkami, I anganingkami ngkai ataan taua te nakoa ake bwain au Nakoanibonga, bwa kam aonga n tauii bkiingiia, ae te Nakoanibonga are aron ana karinan cMerekitereka, are aron ana karinan Natiu ae te Rikitemanna.

124 Te moan, I anganingkami Hyrum Smith bwa e na riki bwa te atamanuea nakoimi, n taua taian kakabwaia ni bkabaebae n au ekaretia, ae te Tamnei ae Tabu n te cberita, are kam dkabaeaki iai nakon bongin te kaboaki, bwa kam aonga n aki bwaka e ngae ngke e roko i aomi eauan te kaririaki.

125 I anganingkami au tia mwakuri ae Iotebwa bwa ko na riki bwa te unimwaane ae te tia tararua i aon au ekaretia ni kabane, bwa te tia rairairi, te tia kaotioti, te atia mamata, ao te burabeti.

126 I anganna bwa ana taan ibuobuoki au tia mwakuri ae Sidney Rigdon ao au tia mwakuri ae William Law, bwa aonga naakai ni katea te koram ao te Moan Beretitentii, ni karekei akaotioti ibukin te ekaretia ae bwanin.

127 I anganingkami au tia mwakuri ae aBrigham Young bwa te beretitenti i aon te kauntira ae Tengaun ma Uoman ake a mwamwananga;

128 Ake aTengaun ma Uoman ake a taui kiing ni kauka te kariaiakaki n abanueau i aon maninganingan te aonaba ake aua, ao i mwin anne a na bkanakoa au taeka nakoia aomata ni kabane.

129 Ngaiia aika Heber C. Kimball, Parley P. Pratt, Orson Pratt, Orson Hyde, William Smith, John Taylor, John E. Page, Wilford Woodruff, Willard Richards, George A. Smith;

130 aDavid Patten I a tia n banaia nakoiu; nooria, te nakoanibonga are irouna akea te aomata ae kona n anaia mai irouna; ma, e koaua ae I tuangkami, e kona n rineaki temanna nakon te wewete naba anne.

131 Ao teuana riki, I tuangkami, I anganingkami te akauntira ae rietata, ibukin atibun maninganingan Tion—

132 Ae araia, Samuel Bent, Henry G. Sherwood, George W. Harris, Charles C. Rich, Thomas Grover, Newel Knight, David Dort, Dunbar Wilson—Seymour Brunson I a tia n anaia nakoiu; akea te aomata ae kona n anaa te nakoanibonga mai irouna, ma temanna e kona n rineaki nakon te nakoanibonga naba anne n onean mwiina; ao e koaua ae I tuangkami, e riai au tia mwakuri ae Aaron Johnson ni katabuaki nakon te wewete aei n onean mwiina—David Fullmer, Alpheus Cutler, William Huntington.

133 Ao teuana riki, I anganingkami Don C. Smith bwa te beretitenti i aon te koram n ibonga aika rietata;

134 Te otenanti are kateaki ibukin te kantaninga are a na tau naake a rineaki bwa beretitenti n te tabo anne ke taan mwakuri i aon atiteiki aika a kakaokoro ake a maenako n taabo nako;

135 Ao a kona naba ni mwamwananga ngkana a rineia, ma a bon katabuaki bwa beretitenti n te tabo anne; aio nakoan weteaia, e taku te Uea ae Atuami.

136 I anganna Amasa Lyman ao Noah Packard bwa taan ibuobuoki, bwa a aonga n tararua i aon te koram n ibonga aika rietata n au ekaretia, e taku te Uea.

137 Ao teuana riki, I tuangkami, I anganingkami John A. Hicks, Samuel Williams, ao Jesse Baker, are iai te nakoanibonga irouia n tararua i aon te koram n aunimwaane, te koram are e kateaki ibukiia minita n te tabo anne; e ngae n anne a kona ni mwamwananga, ma a katabuaki bwa minita n te tabo anne nakon au ekaretia, e taku te Uea.

138 Ao teuana riki, I anganingkami Joseph Young, Josiah Butterfield, Daniel Miles, Henry Herriman, Zera Pulsipher, Levi Hancock, James Foster, n tararua i aon te koram ni aitingaun;

139 Are te koram e kateaki ibukiia unimwaane ake a mwamwananga ni kaota koauan arau n te aonaba ni kabane, n taabo nako are te kauntira ae rietata ae a mwamwananga, au abotoro, a na kanakoia ni katauraoa te kawai imwaiu.

140 Te kaokoro i marenan te koram aei ao te koram n unimwaane bwa are teuana a mwamwananga n tai nako, ao are teuana a tararua i aoia mwanga n te ekaretia man te tai teuana nakon te tai teuana; are teuana tabena e na tararua man te tai teuana nakon te tai teuana, ao are teuana akea tabena n tararua, e taku te Uea ae Atuami.

141 Ao teuana riki, I tuangkami, I anganingkami Vinson Knight, Samuel H. Smith, ao Shadrach Roundy, ngkana e butimwaia, e na tararua i aon te abitiobiriki; te atatai ibukin te bitiobiriki are e atongaki e kaotaki n te boki ae bReirei ao Berita aika Tabu.

142 Ao I a manga tuangkami, Samuel Rolfe ao ana taan ibuobuoki bwa ibonga, ao te beretitenti irouia taan reirei ao ana taan ibuobuoki, ao te beretitenti naba irouia rikan ao ana taan ibuobuoki, ao te beretitenti naba n te titeiki ao ana taan ibuobuoki.

143 Tenaan nakoa akana i eta I a tia n anganingkami, ao kiingiia, ibukin te ibuobuoki ao ibukin te tautaeka, ibukin te mwakuri ni ibuobuoki ao akakororaoaia au aomata aika itiaki.

144 Ao te tua ae I anganingkami, bwa kam na kanoai taian nakoa aikai ao ni akariaia aara akanne ake I a tia n atong, ke ngkana tiaki tai kariaia n au maungatabu ni kabuta;

145 Ao bwa kam na katauraoi taian ruu ibukin nakoa aikai ni kabane n au auti ngkana kam kateia nakon arau, e taku te Uea ae Atuami, Eng. Amen.