1 Nokwar, dɛm na Ewuradze se, ɔwo m’akowaa Joseph Smith, dɛ m’enyi agye w’afɔrbɔ nye dza agye ato mu no ho, na iyi ntsi na mama wo do, ama meedua ndzɛmba a ɔyɛ ^amberɛw wɔ asaase do ada me nyansaa edzi akyerɛ.

2 Wo mpaabɔ asɔ m’enyi; na no ho mbuae nye dɛ, mese wo dɛ, afei wɔafrɛ wo seeseiara dɛ bɔ m’asɛmpa no dawur awɔse mu, na ^astake yi a medze esi hɔ dɛ ɔnyɛ Zion no kutuwdo-bo no, wobotwuw ho ma ɔaayɛ hyɛnhyɛn tse dɛ ahemfie.

3 Ebɔbɔ dɛm dawur yi akyerɛ ^aahemfo a wɔwɔ wiadze ne mfɛndzanan nyina, akyerɛ president onyimdzefo a woeeyi no, nye ɔman a etse mu no mu ambradofo enyimdzefo, nye aman nyina a wɔapetse wiadze no.

4 Ma wɔnkyerɛw no wɔ ^aɔdwe sunsum na Sunsum Krɔnkrɔn no tum a ɔbɔwɔ wo mu no do, wɔ ber a erekyerɛw iyi.

5 Na Sunsum Krɔnkrɔn no bɛma ehu me pɛ wɔ dza ɔfa dɛm ahemfo nye edzibewdzifo yi wɔ dza ɔbɛba hɔn do wɔ mber bi a ɔbɛba mu.

6 Na, hwɛ, nkyɛ merebɛfrɛ hɔn ma wɔaahyɛ Zion ne kan na n’enyimnyam no nsew, na mber a wɔahyɛ dɛ wohu no mbɔrbɔr no no aso.

7 Dɛm ntsi, frɛ hɔn, na fa ndze kɛse bɔ wo dasegye no dawur, mma nnsuro hɔn, osiandɛ wɔtse dɛ ^ankyɛkyɛr, na hɔn enyimnyam nyina tse dɛ nhyiren a ɔwɔ hɔ a, ɔnnkyɛr na ɔapa, amma hɔn so ennya biribi annkã ammfa anngye hɔnho—

8 Na ama sɛ wɔpow mo nkowaa nye me dasegye a maada edzi akyerɛ hɔn no a, mabɛsera hɔn wɔ nsera da no mu, ber a mibeyi ntwamutam a ɔkata m’enyim no, na menye atseetseefo no bogu bea a enyidosomkyerɛfo gu no, ɔyɛ bea a ^aasetwɛr wɔ no.

9 Na bio, mebɛba abɛsera hɔn na magow hɔn mu dodowara hɔn akoma dze ama hom yieyɛ ama hom eenya adom wɔ hɔn enyi do, ama wɔaaba ^anokwar ne kan no ho, na Amanamamfo so eenya nkwagye ntowdo anaadɛ wɔaama Zion do.

10 Osiandɛ me nsera da no reba ntsɛm wɔ ^adɔn a hom nnsusu mu; na henfa na mo nkorɔfo hɔn bambɔ wɔ, na hɔn a wobegya hɔn no so hɔn sumabew wɔ hen?

11 Hom nsoɛr, O asaase do ahemfo a hom wɔ! Hom mbra, O, hom mfa hom sika na dwetɛ nkã homho mbra, mfa mbɔboa mo nkorɔfo, hom mfa mbra Zion mbabaa fie.

12 Na bio, nokwar, mese wo dɛ, ma m’akowaa Robert B. Thompson mboa wo ma kyerɛw dɛm dawurbɔ yi, osiandɛ m’enyi agye no ho kɛse, na dɛ ɔnkã wo ho;

13 Dɛm ntsi, ma ontsie w’afotu, na medze nhyira mbɔho behyira no; ma ɔnyɛ nokwafo na ondzi nokwar wɔ ndzɛmba nyina mu ofi ndɛ kɔ, na ɔbɛyɛ kɛse wɔ m’enyi do.

14 Mbom ma ɔnkaa dɛ n’edwuma ho ^ankontaabu no mebebisa efi ne nsamu.

15 Na bio, mese wo dɛ, nhyira akã m’akowaa ^aHyrum Smith; na Emi, Ewuradze, modɔ no osian n’akoma ^bn’emudzi ntsi, na osiandɛ ɔdɔ dza ɔtsen wɔ m’enyi do, Ewuradze na ɔse.

16 Bio, ma m’akowaa John C. Benett mboa wo wɔ wo dwuma a iridzi, edze m’asɛm rekɛma ahemfo nye nkorɔfo a wɔwɔ asaase do no, na ongyina ɔwo, m’akowaa Joseph Smith mpo ne nkyɛn, wɔ amandzehu ber mu; na sɛ otsie ^aafotu a, n’akatua nnkɔbɔ no da.

17 Na osian no dɔ ntsi, sɛ ɔyɛ iyi a, ɔbɛyɛ kɛse, na ɔbɛyɛ medze, Ewuradze na ɔse. Mehu edwuma a ɔayɛ, na sɛ ɔkɔ do yɛ a, ɔbɛyɛ me enyisɔ, na medze nhyira na enyimnyam ahenkyɛw kɛse bɛhyɛ no.

18 Na bio, mese wo dɛ, ɔyɛ me pɛ dɛ m’akowaa Lyman Wight bɔkɔ do aka nyamesɛm no ama Zion, ɔmfa ɔdwe sunsum ngye mo ho dase nkyerɛ wiadze; na mebɛma no do tse dɛ mbrɛ ɔtse ^aɔkɔr ntsaban do; na obenya enyimnyam na abɔdzin ama noara noho na me dzin.

19 Ama aber a obowie n’edwuma yɛ no, maagye no aba me nkyɛn, dɛ mbrɛ medze yɛɛ m’akowaa ^aDavid Patten no mpo a ɔwɔ me nkyɛn seeseiara yi, nye m’akowaa ^bEdward Partridge so, nye m’akowaa akɔdaa ^cJoseph Smith, Panyin so, nyia ^dɔnye Abraham tse n’abanyimfa, nyia ɔyɛ nhyiranyi nye krɔnkrɔnnyi, osiandɛ ɔyɛ medze.

20 Bio, nokwar, mese wo dɛ, ^andaadaa su biara nnyi m’akowaa George Miller mu; osian n’akoma n’emudzi ntsi, ɔwɔ dɛ wɔgye no dzi; na dɔ a ɔwɔ no wɔ me dasegye ho no ntsi, Emi, Ewuradze, modɔ no.

21 Dɛm ntsi, mekã kyerɛ wo dɛ, medze ^abishop dzibew no ayɛ nsɔwano esi ne tsir do, tse dɛ m’akowaa Edward Partridge, aama ne nsa aakã me fi mu dza wɔdze bɔ afɔr, ama oeetum ehue nhyira egu mo nkorɔfo ehiafo etsir do, Ewuradze na ɔse. Mma obiara mmbu m’akowaa George enyimtsia osiandɛ obedzi me nyi.

22 Hom mma m’akowaa George nye m’akowaa Lyman, nye m’akowaa John Snider, nye binom so nsi ^afi mfa mma me dzin, na m’akowaa Joseph bɛkyerɛ hɔn kwan a wɔmfa do nsi, na ɔakyerɛ hɔn bea so a wonsi no.

23 Ɔbɛyɛ fie a wɔtsena mu, fie a ahɔho befi ekyirekyir mbea do abɔsoɛ mu; dɛm ntsi, wɔmma ɔnyɛ fi pa, bea a odzi mu a ɔbɛma ^akwantunyi a ɔaberɛ enya apɔwmudzen nye bambɔ wɔ ber a ɔrodwendwen Ewuradze n’asɛm ho; na ɔayɛ ^bkutuwdo-bo a meyi ama Zion.

24 Dɛm fi yi sɛ wosi dze ma me dzin a, na sɛ fi hwɛdofo a wobeyi no dɛ ɔnhwɛ do no amma kwan ma wɔammfa fĩ biara annkã a ɔbɛyɛ apɔwmudzen tsenabew. Ɔbɛyɛ krɔnkrɔn, annyɛ dɛm a Ewuradze hom Nyankopɔn no nnkɛtsena mu.

25 Na bio, nokwar, mese wo dɛ, ma m’ahotseweefo nyina mfi ekyirekyir mbra.

26 Na soma asomafo ahoɔharfo, nyew asomafo a wɔasan mu eyi hɔn, na se hɔn dɛ: Hom mfa hom sika, nye hom dwetɛ, nye hom abo a ɔsom bo, nye hom tsetseberdo ndzɛmba nyina mbra; na hɔn a wɔwɔ nyimdzee wɔ tsetse ndzɛmba ho nyina a wɔpɛ dɛ wɔba no, botum aba, na hom mfa box dua, na fir dua, nye pine dua, nye asaase do ndua a ɔsom bo nyina mbɔmu mbra;

27 Na dadze nye kɔɔber, nye ayewa, nye zinc, nye hom asaase do ndzɛmba nyinara a ɔsom bo; na hom nsi ^afi mfa mma me dzin, mfa mma nyia ɔyɛ Ɔsorsornyi no ma ^bɔmbɛtsena mu.

28 Na wonnhun beebiara wɔ asaase do a obotum aba do na dza ɔyɛ homdze a ɔyewee no ɔdze ^aasan aba bio, anaa dza oeyi efi hɔ no, asɔfodzi ne mãhyɛ no mpo.

29 Na ^aenuma bura no dze, bi nnyi asaase do a m’ahotseweefo begyina mu ^benuma dze ama hɔn a woewu no—

30 Osiandɛ ayɛdze yi wɔyɛ no me fi nko mu, na mennkɛgye ato mu, gyedɛ hom hia nda mu nko, ber a hom nnkotum esi ofi ama me no.

31 Mbom mehyɛ m’ahotseweefo nyina dɛ wonsi fi mma me; na mema hom mber a ɔwar ma ^awoeesi fi ama me; na mber yi mu dze mebɛgye hom enuma no ato mu.

32 Mbom hwɛ, dɛm mber yi a medze ama hom yi sɛ ɔsõ a mennkɛgye hom ewufo enuma no ato mu bio; na sɛ hom annyɛ dɛm ndzɛmba yinom ma mber a medze ama hom no sõ a, wɔbɔpow hom dɛ hom yɛ asɔr, nye hom ewufo, Ewuradze hom Nyankopɔn na ɔse.

33 Na nokwar, mese hom dɛ, sɛ me ma hom mber a ɔwar ara yie dɛ hom mfa nsi fi mma me, fi a wɔyɛ ewufo enuma ayɛdze wɔ mu, ayɛdze a wɔhyehyɛɛ too hɔ ansaana wɔrotow wiadze ne fapem, na sɛ mber no pa ho a, munnkotum agye hom ewufo enuma no ato mu.

34 Na no mu na wɔdze asɔfodzi krɔnkrɔn ne ^ansaafee no ma, ama hom nsa aakã abɔdzin na enyimnyam.

35 Na mber yi ekyir no, hɔn a wɔabɔ hɔn apetse mbeambea do no hɔn ewufo enuma no mennkɛgye ato mu, Ewuradze na ɔse.

36 Na wɔahyehyɛ ato hɔ dɛ Zion, na ne stake, nye Jerusalem, dɛm mbea yinom a meyi esisi hɔ dze ayɛ ^aguandɔbea yi, na ɔbɛyɛ mbea a hɔ na hom nyɛ hom ewufo enuma no.

37 Na bio, nokwar, mese hom dɛ, osi dɛn na hom ho ^aahohor bɔsɔ m’enyi, gyedɛ hom yɛ no wɔ fi a hom esi dze ama me dzin mu?

38 Na, osian iyi ntsi na mehyɛɛ Moses mbra dɛ onsi ^antamadan ama wɔaasoa akã hɔm ho wɔ sar no do, na woeesi ^bfi wɔ anohoba asaase no do, ama woeyi dɛm ayɛdze no a wɔdze esuma ansaana wɔrobɔ wiadze yi akyerɛ.

39 Dɛm ntsi, nokwar, mese hom dɛ, hom ^angosera, nye hom ho ahohor, nye hom ^bewufo enuma no, na hom ^cnhyiamu krɔnkrɔn, na hom nkaadze wɔ hom ^dafɔrbɔ a Levi ne mbabanyin bɔ no, nye hom ebisadze a hom yɛ wɔ ^embea krɔnkrɔn a hom nya Nyame anomunsɛm, nye hom mbra na atsɛmbu; ɔfa nyikyerɛ n’ahyɛse na Zion ne fapem, nye enyimnyam, abɔdzin, nye no mu mba hɔn endowment, wodua ayɛdze do si no pi wɔ me fi krɔnkrɔn mu, dza wɔhyɛ mo nkorɔfo aber nyina dɛ wonsi mma me dzin krɔnkrɔn no.

40 Na nokwar, mese hom dɛ, ma wonsi dɛm fi yi mma me dzin, ama meeyi m’ayɛdze akyerɛ mo nkorɔfo wɔ mu;

41 Osiandɛ mepɛ dɛ ^ameyi ndzɛmba a wɔdze ^besuma ansaana wɔrotow wiadze ne fapem no kyerɛ m’asɔr, ndzɛmba a ɔfa mberano ne ^cmãhyɛ no.

42 Na ^amebɛkyerɛ m’akowaa Joseph ndzɛmba nyina a ɔfa dɛm fi yi ho, nye asɔfodzi a ɔkã ho, nye bea a wonsi no.

43 Na hom nsi no bea a hom esusu dɛ hom besi no no, na hɔ nye bea a maasan mu eyi ama hom dɛ hom nsi no.

44 Sɛ hom dze hom ahoɔdzen nyina yɛ edwuma no a, mibehyira bea no do ma hɔ aayɛ ^akrɔnkrɔn.

45 Na sɛ mo nkorɔfo tsie me ndze, nye mo ^ankowaa a meyi hɔn dɛ wondzi mo nkorɔfo enyim no hɔn ndze a, hwɛ, nokwar, mese hom dɛ, wonnkotu hɔn efi hɔn bea no do.

46 Mbom sɛ woenntsie me ndze anaa nkorɔfo a meyi hɔn no hɔn ndze a, wonnkehyira hɔn osiandɛ woegu me bea krɔnkrɔn, nye m’ayɛdze krɔnkrɔn, nye dza wɔakyerɛw ato hɔ, nye me nsɛm krɔnkrɔn a medze ama hɔn no ho fĩ.

47 Na ɔbɛba dɛ sɛ hom si fi ma me dzin, na hom annyɛ dza mese hom a, minnkedzi ^ansew a menye hom akã no do, na anohoba a hom enyi da do fi me nsamu no nnkɛyɛ hɔ, Ewuradze na ɔse.

48 Na ^ankyɛ ɔwɔ dɛ hom nya nhyira no, hom nam homankasa hom ndwuma do, nye hom nkwaseadze, nye hom ekyiwadze a hom yɛ wɔ m’enyim, hom twe ndom, ebufuw, ebufuhyew, na atsɛmbu gu homankasa hom etsifi, Ewuradze na ɔse.

49 Nokwar, nokwar, mese hom dɛ, sɛ medze mbrasɛm ma adasamba mu biara dɛ wɔnyɛ edwuma bi mma me dzin, na dɛm adasamba no kɔ na wɔdze hɔn ahoɔdzen nyina nye dza wɔwɔ nyina yɛ dɛm edwuma no, na woennya ^aabagura, na hɔn atamfo siw hɔn kwan amma woenntum annyɛ dɛm edwuma no a, hwɛ, ^bminnkebisa dɛm edwuma no ho asɛm efi dɛm adasamba no nkyɛn bio, mbom mebɛgye hɔn afɔrbɔdze ato mu.

50 Na emumuyɛ na mbrato a wɔayɛ dze etsia me mbra krɔnkrɔn nye me mbrasɛm nyina no, medze ^abogu hɔn a wosiiw m’edwuma kwan no hɔn etsifi, ekesi ^bebusuasantsen ebiasa na anan do, wɔ mber tsentsen a ^cwonnkonu hɔnho, na wɔtan me no, Ewuradze Nyankopɔn na ɔse.

51 Dɛm ntsi na magye hɔn a mehyɛɛ hɔn dɛ wɔnkyekyer kuropɔn na wonsi ^aofi mfa mma me dzin wɔ ^bJackson mansin mu, wɔ Missouri no, a hɔn atamfo siiw hɔn kwan no hɔn afɔrbɔdze no ato mu, Ewuradze hom Nyankopɔn na ɔse.

52 Na mubobu hɔn ^aatsɛmbu, ebufuw, nye ebufuhyew, osu nye yaw, nye asetwɛr bogu hɔn etsifi dze ebua hɔn ekesi ebusuasantsen ebiasa na anan do, wɔ mber tsentsen a wonnkonu hɔnho na wɔbɛtan me no. Ewuradze hom Nyankopɔn na ɔse.

53 Na iyi na medze yɛ mfatoho ma hom, dze kyekye hom werɛ wɔ hɔn a wɔahyɛ hɔn dɛ wɔnyɛ edwuma na hɔn atamfo dze atseetsee esiw hɔn kwan no, Ewuradze hom Nyankopɔn na ɔse.

54 Na Emi nye hom Ewuradze Nyankopɔn, na mebɛgye hom nuanom nyina a hɔn ^aakoma mu tsew na ^bwoekuku hɔn wɔ Missouri asaase do no nkwa, Ewuradze na ɔse.

55 Na bio, nokwar, mese hom dɛ, mehyɛ hom bio dɛ hom nsi ^afi mfa mma me dzin, wɔ dɛm bea yi mpo do, ama hom dze ^baakyerɛ me dɛ hom dzi nokwar wɔ ndzɛmba nyina a mehyɛ hom no mu, ama meehyira hom, na medze abɔdzin, bɛkyebo, nye nkwa a onnyiewiei ahenkyɛw aasoa hom.

56 Na afei mese hom dɛ, ɔfa me ^afi a wɔsoɛe mu no, dza mahyɛ hom dɛ hom nsi mma ahɔho nsoɛe no, wonsi mfa mma me dzin, na wɔmfa me dzin nto do, na wɔma m’akowaa Joseph nye ne fifo nnya kyɛfa wɔ mu, ofi ebusuasantsen kesi ebusuasantsen.

57 Na ngosera yi na medze egu ne tsir do, ama ne nhyira no aakã n’asefo a wobefi n’ekyir aba nyina tsir do so.

58 Na dɛ mbrɛ mekãa asaase do mbusuakuw ho asɛm kyerɛɛ ^aAbraham no, dɛmara so na mekã kyerɛ m’akowaa Joseph: Wo mu na ^bw’asefo mu na wobehyira mbusuakuw a wɔwɔ asaase do.

59 Dɛm ntsi, hom mma m’akowaa Joseph na n’asefo a wobesi n’ekyir aba no nnya kyɛfa wɔ dɛm dan no mu, ofi ebusuasantsen kesi ebusuasantsen, afebɔɔ kesi afebɔɔ, Ewuradze na ɔse.

60 Na ma wɔmfrɛ dɛm dan no Nauvoo Dan; na wɔmma hɔ nyɛ enyigye tsenabew mma nyimpa, na ɔnyɛ ahomgyebea mma kwantunyi fonafo, ama ɔaadwendwen Zion n’enyimnyam, nye no kutuwdo-bo no, n’enyimnyam.

61 Ama oeenya afotu so efi hɔn a medze hɔn esi hɔ dɛ ^andua a wɔagye dzin kɛse, na wɔtse dɛ ^baweɔmfo a wɔwɔ n’afasu do no.

62 Hwɛ, nokwar, mese wo dɛ, ma m’akowaa George Miller, nye m’akowaa Lyman Wight, nye m’akowaa John Snider, nye m’akowaa Peter Haws, wɔnhyehyɛ hɔn ho na wonyi hɔn mu kor ma ɔnyɛ president wɔ hɔn quorum no do ama woeesi dɛm dan no.

63 Na wɔnkyerɛw kuw n’amambu nhyehyɛɛ ama wɔdze agye dwetsir a wɔdze besi dan no.

64 Na ɔnnsɛ dɛ wɔgye sika a onndu dollar eduonum wɔ nyimpa kor biara hɔ dɛ ɔyɛ ne kyɛfa wɔ dwetsir wɔ dan no ho, na wɔbɛma kwan ma wɔagye dollar mpem-duenum efi nyimpa kor biara hɔ dɛ ne dwetsir wɔ dan no ho.

65 Mbom ɔnnsɛ dɛ wɔma hɔn kwan ma wɔgye ma ɔbor dwetsir dollar mpem-duenum fi nyimpa kor biara hɔ.

66 Na ɔnnsɛ dɛ wɔma hɔn kwan ma wɔgye sika a onndu dollars eduonum dɛ ɔyɛ ne kyɛfa wɔ dwetsir a ɔwɔ dan no ho fi nyimpa kor biara hɔ.

67 Na ɔnnsɛ dɛ wɔma hɔn kwan ma wɔgye obiara, ma obenya kyɛfa wɔ dwetsir a ɔwɔ dan no ho mu, gyedɛ onyia no etua no dwetsir dze ahyɛ hɔn nsa dɛm aber no ara a onya mu kyɛfa no.

68 Na sika a obotua dze ahyɛ hɔn nsa mu no ɔno do na hom bɔhwɛ ama no ne kyɛfa dodow wɔ dan no mu; mbom sɛ oenntua biribiara annhyɛ hɔn nsa a, mma wɔmma no kyɛfa biara wɔ dan no ho.

69 Na sɛ hom yɛ m’apɛdze a, obiara a obotua dwetsir biara ahyɛ hɔn nsa no, bɛyɛ dwetsir wɔ dɛm ofi no mu, dze ama nankasa noho, nye n’ebusuasantsen a wobedzi n’ekyir, ofi ebusuasantsen kesi ebusuasantsen, wɔ mber tsentsen biara a hɔn dzin da do no, anaadɛ wɔnnkɔtɔn anaa wɔnnkɛdan kyɛfa wɔ dwetsir no ama obi wɔ hɔnankasa hɔn pɛ anaa nyɛe do, Ewuradze hɔn Nyankopɔn na ɔse.

70 Na bio, nokwar, mese hom dɛ, sɛ m’akowaa George Miller, nye m’akowaa Lyman Wight, nye m’akowaa John Snider, nye m’akowaa Peter Haws, hɔn nsa kã dwetsir biara wɔ sika mu anaa egyapadze a ɔsom dwetsir no ano pɛpɛɛpɛr a, mma wonnyi no mu bi mmfa nnyɛ biribi fofor, na wɔmfa nyɛ dan no ho dwetsir nko.

71 Na sɛ woyi dwetsir no mu bi dze kɔ beebi fofor a nyia ɔhwɛ dwetsir no do no nnyim ho hwee, na wɔammbɔ ho mpɛn anan enntua enngu dan no dwetsir mu bio a, ndom bɛkã hɔn, na woeyi hɔn efi hɔn gyinabew do, Ewuradze Nyankopɔn na ɔse; na emi, Ewuradze, meyɛ Nyankopɔn a wonnsi me ^aatwetwe wɔ dɛm ndzɛmba yinom mu.

72 Nokwar, mese hom dɛ, hom mma m’akowaa Joseph ntua dwetsir nhyɛ hɔn nsamu wɔ dɛm dan no ne nsii ho, dɛ mbrɛ ɔhwɛ a oye ma no, mbom m’akowaa nnkotum etua dwetsir a ɔbor dollar mpemduenum wɔ dan no ho, nna ɔnnsɛ so dɛ otua dollar a onndu eduonum; na dɛmara na ɔsɛ dɛ obiara so yɛ, Ewuradze na ɔse.

73 Na binom so wɔ hɔ a wɔpɛ dɛ wohu dza mepɛ dɛ wɔyɛ, osiandɛ woebisa efi me nsamu.

74 Dɛm ntsi, dza mekã kyerɛ hom wɔ m’akowaa Vinson Knight ho nye dɛ, sɛ ɔpɛ dɛ ɔyɛ me pɛ a ɔmfa dwetsir nto dɛm dan no ase mma noho, nye n’ebusuasantsen a wobesi n’ekyir, ofi ebusuasantsen kesi ebusuasantsen.

75 Na hom mma ɔmma ne ndze do ntsẽa mu wɔ nkorɔfo no finimfin, ^antotɔ nserɛ mma ehiafo na abɔbɔfo; na mma onnya abagura anaadɛ no werɛ nnhow; na ^bmebɛgye n’afɔrbɔdze, na ɔnnkɛyɛ me dɛ Cain n’afɔrbɔdze no, na ɔbɛyɛ medze, Ewuradze na ɔse.

76 Hom mma n’ebusua ndzi dɛw na wɔntwe hɔnho mfi amandzehu ho; osiandɛ masan mu eyi no asera no ngo, na wobedzi no nyi wɔ ne fi mu, na medze no bɔn nyina bɛkyɛ no, Ewuradze na ɔse. Amen.

77 Nokwar, mese hom dɛ, hom mma m’akowaa Hyrum ntua dwetsir nto dan no ase dɛ mbrɛ ɔhwɛ a oye ma no, mfa mma nankasa noho nye n’ebusuasantsen a wobedzi n’ekyir, ofi ebusuasantsen kesi ebusuasantsen.

78 Hom mma m’akowaa Isaac Galland ntua dwetsir nto dɛm dan no ase; na Emi, Ewuradze, osian edwuma a ɔayɛ no ntsi modɔ no, na medze no bɔn nyina bɛkyɛ no; dɛm ntsi, hom nkaa ne kyɛfa a ɔwɔ no wɔ dɛm dan no mu no ho fi ebusuasantsen kesi ebusuasantsen.

79 Hom nyi m’akowaa Isaac Galland wɔ hom mu, na m’akowaa William Marks nhyɛ no sɔfo, na onhyira no, ma ɔnye m’akowaa Hyrum nkɔ nkɛyɛ edwuma a m’akowaa Joseph dze bɛma hɔn dɛ wɔnyɛ no, na wobehyira hɔn pii.

80 Hom mma m’akowaa William Marks ntua dwetsir nto dɛm dan no ase dɛ mbrɛ ɔhwɛ a oye ma no, mfa mma nankasa noho nye n’ebusuasantsen a wobedzi n’ekyir, ofi ebusuasantsen kesi ebusuasantsen.

81 Hom mma m’akowaa Henry G. Sherwood ntua dwetsir nto dɛm dan no ase, dɛ mbrɛ ɔhwɛ a oye ma no, mfa mma nankasa noho, nye n’ebusuasantsen a wobedzi n’ekyir, ofi ebusuasantsen kesi ebusuasantsen.

82 Hom mma m’akowaa William Law ntua dwetsir nto dɛm dan no ase, mfa mma nankasa noho, nye n’ebusuasantsen a wobedzi n’ekyir, ofi ebusuasantsen kesi ebusuasantsen.

83 Sɛ ɔbɛyɛ me pɛ a, mma ɔmmfa n’ebusua nnkɔ boka nsaase do, mma ɔnnkɔ Kirtland, naaso Emi, Ewuradze mebɛkyekyer Kirtland, mbom Emi, Ewuradze mowɔ ntsẽa a mesiesie ato hɔ ama hɔn a wɔtse hɔ no.

84 Na wɔ m’akowaa Almon Babbitt ho no, ndzɛmba pii wɔ hɔ a memmpɛ wɔ no ho; hwɛ, ɔpɛ dɛ ɔyɛ dza n’adwen kã kyerɛ no sen dza Emi makyerɛ, dza m’Asɔr mu President a Odzi Kan na n’Apamfo Kuw no bɛkã mpo, na ɔdze ^asika nantwi no honyi esi hɔ dɛ mo nkorɔfo nsom no.

85 Mma wɔmma nyimpa biara a ɔaba ha a ɔrobɔ mbɔdzen dɛ obedzi me mbrasɛm do no ^ammfi ha nnkɔ.

86 Sɛ wɔtse ha a hom mma wɔntsena mma me; na sɛ wowu so a hom mma wonwu mma me; na ^awɔbɔhom efi hɔn berɛ nyina mu wɔ ha, na wɔasɔw hɔn edwuma do.

87 Dɛm ntsi, hom mma m’akowaa William mfa no werɛ nhyɛ mo mu, na mma onnsuro mma n’ebusua, osian yarba a ɔwɔ asaase no do no ntsi. Sɛ ^aedɔ me a, dzi me mbrasɛm do; na yarba a ɔwɔ asaase no do no ^bbɛdan ayɛ enyimnyam ama hom.

88 Hom mma m’akowaa William mfa ndze kɛse, nye enyigye kɛse nkɔbɔ m’asɛmpa a ɔwɔ hɔ daapem no dawur, dɛ mbrɛ mo ^aSunsum no bɛkã no no, mfa nkyerɛ hɔn a wɔwɔ Warsaw, nye hɔn a wɔwɔ Carthage so, nye hɔn a wɔwɔ Burlington so, nye hɔn a wɔwɔ Madison so, na ɔntweɔn abotar mu nye enyiberdo nkesi dɛ obenya nkyerɛkyerɛ bi so bio wɔ me wiadze mfɛndzanan nhyiamu n’ase, Ewuradze na ɔse.

89 Sɛ ɔbɛyɛ me pɛ a hom mma ofi ndɛ kɔ no ontsie m’akowaa Joseph n’afotu, na ɔmfa n’enyigye a ɔwɔ no ^amboa ehiafo, na ɔmfa m’asɛm krɔnkrɔn no a ^bwɔakyerɛ ase fofor no nto gua mfa mma hɔn a wɔwɔ asaase do no.

90 Na sɛ ɔyɛ iyi a medze ^anhyira mbɔho behyira no, amma woeennyi no tokyen, na woeennhu n’aba so dɛ ^bwɔreserɛserɛ adze.

91 Na bio, nokwar, mese hom dɛ, hom nyi m’akowaa William, na wɔnhyɛ no sɔfo, na wɔnsera no ngo ma ɔmbɛyɛ m’akowaa Joseph ne pamfo, nhyɛ m’akowaa Hyrum n’ananmu, ama m’akowaa Hyrum aakɛfa Asɔfodzi nye ^aPatriarch dzibew no a ɔyɛ ne kyɛfa no no a n’egya nam nhyira do dze maa no no.

92 Na ofi ndɛ kɔ no, obokura ^apatriarch dzibew nhyira nsaafee no dze nhyira egu mo nkorɔfo nyina tsir do.

93 Ama obiara a obehyira no no eenya nhyira, na obiara a ɔdze ^andom no bɛkã no eenya ndom; na biribiara a ^bɔbɛkyekyer wɔ asaase do no wɔbɛkyekyer wɔ sor; na biribiara a ɔbɛsan wɔ asaase do no wɔbɛsan wɔ sor.

94 Na ofi dɛm mber yi kɔ no meyi no dɛ ɔnyɛ nkɔnhyɛnyi, na ^aadzehunyi, na oyikyerɛfo mma m’asɔr, na m’akowaa Joseph so ara.

95 Ama ɔnye m’akowaa Joseph aabɔ mu edzi dwuma; na ama oeenya afotu efi m’akowaa Joseph hɔ, ɔno na ɔdze ^ansaafee no bɛkyerɛ no a ɔbɛnam do dze ebisa na oenya, na wɔdze dɛm nhyira kor no ara, na enyimnyam, na enyidzi, na asɔfodzi, na asɔfodzi akyɛdze no bɛyɛ ahenkyɛw asoa no, dza mber bi wɔdze hyɛɛ nyia nna ɔyɛ m’akowaa ^bOliver Cowdery no;

96 Ama m’akowaa Hyrum aagye dase wɔ ndzɛmba a medze rebɛkyerɛ no no ho, ama wɔaakaa ne dzin enyidzi mu ara fi ebusuasantsen kesi ebusuasantsen, afebɔɔ kesi afebɔɔ.

97 Hom mma m’akowaa William Law so ne nsa nkã nsaafee no a ɔbɛfa do dze ebisa ma ne nsa akã nhyira no, hom mma ɔnyɛ ^aahobrɛadze wɔ m’enyim, na mma ɔnnyɛ ^bndabrabanyi, ama oeenya mo Sunsum no a ɔyɛ ^cƆwerɛkyekyefo no mpo, ɔno na ɔbɛda nokwar a ɔwɔ ndzɛmba nyina mu edzi akyerɛ no; na ɔakyerɛ no dɔn noara mu dza ɔsɛ dɛ ɔkã.

98 Na ^ansɛnkyerɛdze yinom na obedzi n’ekyir—^bɔbɛsa yar, obotu mbɔnsam, na hɔn a wɔbɛma no owubɔr biara ma ɔanom no, ɔnnkɛyɛ no hwee;

99 Na ɔbɛnantsew akwan a ^ambowatsena a bɔr wɔ hɔn anomu mu na wonnkotum asɔw n’anantsir, na ɔdze ^bn’adwen mu nsusui botu dɛ mbrɛ ɔtse nkɔr ntsaban do.

100 Na sɛ mebɛma oenyan ewufo mpo a, mma ɔnnkam ne ndze do.

101 Dɛm ntsi, hom mma m’akowaa William ntsẽa mu kɛse na mma ɔnnkam do, ɔmfa dɛw na ehurusi ntow hosaana mma nyia ɔtse ahengua do afebɔɔ kesi afebɔɔ no, Ewuradze hom Nyankopɔn no na ɔse.

102 Hwɛ, mese hom dɛ, mowɔ dwuma bi wɔ hɔ ma m’akowaa William, nye m’akowaa Hyrum, ɔyɛ hɔn nkotoo, na hom mma m’akowaa Joseph ntsintsim wɔ fie, osiandɛ wohia no. Hɔn a wɔaka no mebɛkyerɛ hɔn dza wɔnyɛ ekyir yi. Ɔnyɛ hɔ dɛm. Amen.

103 Na bio, nokwar, mese hom dɛ, sɛ m’akowaa ^aSidney bɔsom me na ɔayɛ ɔpamfo ama m’akowaa Joseph a, hom mma ɔnsoɛr na ɔmbra na ombegyina dzibew a wɔfrɛɛ no mu no na ɔmbrɛ noho adze wɔ m’enyim.

104 Na sɛ ɔbɔbɔ me afɔr a ɔsɔ enyi, na ɔagye ato mu na ɔnye mo nkorɔfo atsena a, hwɛ, Emi, Ewuradze hom Nyankopɔn bɛsa no yar ma ɔaatse apɔw; na ɔbɛma ne ndze do bio wɔ mbepɔw no do, na ɔayɛ ^aɔkasamaafo wɔ m’enyim.

105 Hom mma ɔmbra na ɔnye n’ebusua mbɛtsena ɔbrɔn a m’akowaa Joseph tse mu no mu.

106 Na n’akwantu nyina mu no, hom mma ɔmma ne ndze do tse dɛ ɔdze totorobɛnto, na ɔmbɔ hɔn a wɔwɔ asaase do kɔkɔ dɛ wonguan mfi ebufuhyew a ɔreba no ho.

107 Hom mma ɔmboa m’akowaa Joseph, na hom mma m’akowaa William Law so mboa m’akowaa Joseph ma ɔmbɔ ^adawur awɔse mu nkyerɛ asaase do ahemfo, dɛ mbrɛ makã akyerɛ hom dada no mpo.

108 Sɛ m’akowaa Sidney bɛyɛ me pɛ a, mma hom mma no kwan mma onnyi n’ebusua mmfa hɔn nnkɔ ^aboka nsaase do no, mbom hom mma ɔnsesã hɔn tsenabew no, dɛ mbrɛ makã no dada no.

109 Hwɛ, ɔnnyɛ me pɛ dɛ, ɔbɛper ahwehwɛ bambɔ na sumabew efi kurow a medze ama hom no no, ^aNauvoo kuropɔn no mpo.

110 Nokwar, mese hom dɛ, seseiara mpo, sɛ obetsie me ndze a, obowie yie ama nankasa. Ɔnyɛ hɔ dɛm so. Amen.

111 Na bio, nokwar, mese hom dɛ, hom mma m’akowaa Amos Davies ntua dwetsir nhyɛ hɔn a meyi hɔn dɛ wonsi dan a wɔsoeɛ mu no nsa, Nauvoo Dan no mpo.

112 Hom mma ɔnyɛ iyi sɛ obenya kyɛfa wɔ mu a, na ontsie m’akowaa Joseph n’afotu, na ɔmfa nankasa ne nsa nyɛ edwuma ama nkorɔfo eenya awerɛhyɛmu wɔ no mu.

113 Na sɛ ɔkyerɛ dɛ odzi nokwar wɔ ndzɛmba nyina a wɔdze bɛhyɛ ne nsa no mu a, nyew, wɔ ndzɛmba kumaabi mu mpo a, wɔbɛyɛ no ^aɔhwɛfo wɔ pii do;

114 Hom mma ^aɔmbrɛ noho adze ama wɔaama no do, Ɔnyɛ hɔ dɛm, Amen.

115 Na bio, nokwar, mese hom dɛ, sɛ m’akowaa Robert D. Foster betsie me ndze a, hom mma onsi dan mma m’akowaa Joseph, dɛ mbrɛ nhyehyɛɛ a ɔnye no ayɛ no tse, na wobobue abow no ama no fi ber to ber.

116 Na hom mma onnu noho wɔ n’egyangyandze nyina ho, na ɔmfa ^aayamuyie mfura; na ongyaa dɛ ɔbɛyɛ dza omuo, na ɔmfa ne kasa dzen no nto nkyɛn.

117 Na ontua dwetsir so ngu Nauvoo Dan no quorum no nsamu mfa mma nankasa noho nye n’ebusuasantsen a wobedzi n’ekyir no, fi ebusuasantsen kesi ebusuasantsen;

118 Na ontsie mo nkowaa Joseph, nye Hyrum, nye William Law hɔn afotu, nye hɔn a wɔama hɔn tum na mafrɛ hɔn dɛ wɔmbɔtow Zion ne fapem no; na ɔbɛyɛ yie dze ama nankasa afebɔɔ kesi afebɔɔ. Ɔnyɛ hɔ dɛm. Amen.

119 Na bio, nokwar, mese hom dɛ, mma hom mma obiara kwan mma onntua dwetsir mma quorum a ɔhwɛ Nauvoo Dan ne nsii do no gyedɛ onyia no enya gyedzi wɔ Mormon Nwoma no mu, nye nyikyerɛ a medze ama no mu, Ewuradze hom Nyankopɔn no na ɔse.

120 Na biribiara a ^aɔbor do anaa osuar sen iyi no fi abɔnsam, na ndom na obedzi ekyir na nnyɛ nhyira bi, Ewuradze hom Nyankopɔn no na ɔse. Ɔnyɛ hɔ dɛm. Amen.

121 Na bio, nokwar, mese hom dɛ hom mma kuw a ɔhwɛ Nauvoo Dan ne nsii do no nsa nkã akatua a ɔsɛ wɔ hɔn edwumayɛ ho wɔ Nauvoo Dan a worisi no ho; akatua a ɔnye bo no sɛ a homankasa hom gye to mu no, hom ntua mma hɔn.

122 Na sɛ obehia a, hom mma obiara a otua dwetsir no ntua hɔn akatua no mu kyɛfa ama hɔn so wɔdze aahwɛ hɔnho, Ewuradze na ɔse; ɔnntse dɛm so a, hom mfa hɔn edwumayɛ no nyɛ hɔn so hɔn dwetsir wɔ dan no ho. Ɔnyɛ hɔ dɛm. Amen.

123 Nokwar, mese hom dɛ, afei medze ^adzibewdzifo a ɔwɔ m’Asɔfodzi ho no ma hom, ama hom eekura dɛm ^bnsaafee no, dɛm Asɔfodzi no a ɔwɔ ^cMelchizedek ne nhyehyɛɛ do no, dza ɔyɛ me Ba a Wɔwoo no Kortonoo ne nhyehyɛɛ do no.

124 Odzi kan, medze Hyrum Smith ma hom dɛ ɔnyɛ ^apatriarch mma hom a okura, m’asɔr mu ^bnhyira nsɔwano no, dza ɔyɛ ^canohoba Sunsum Krɔnkrɔn a wɔfa do ^dsɔw hom ano dze kesi ɔpon da mu no, amma hom aannhwe famu wɔ nsɔhwɛ ^edɔn no a ɔbɛba hom do no mpo mu.

125 Medze m’akowaa Joseph ma hom dɛ ɔnyɛ elder banodzinyi a ɔda m’asɔr nyina ano, dɛ ɔnyɛ obi a ɔkyerɛ ndzɛmba ase, oyikyerɛfo, ^aadzehunyi, na nkɔnhyɛnyi.

126 Medze m’akowaa Sidney Rigdon nye m’akowaa William Law ama no dɛ wɔnyɛ n’apamfo, na hɔn nyina mbɔ mu nyɛ quorum na President a Odzi Kan na n’Apamfo na wobohu dza ^andaama obesi asɔrtɔw no nyina do.

127 Medze m’akowaa ^aBrigham Young ma hom dɛ ɔnyɛ president wɔ akwantufo Duebien abaguafo no do;

128 Dɛm ^aDuebienfo yi na wokura nsaafee a wɔdze bue m’ahenman ne tumdzi no ma asaase ne mfɛndzanan, na ɔno n’ekyir wɔdze ^bm’asɛm no kɛma abɔdze biara.

129 Hɔn nye Herber C. Kimball, Parley P. Pratt, Orsan Pratt, Orson Hyde, William Smith, John Taylor, John E. Page, Wilford Woodruff, Willard Richards, Geroge A. Smith.

130 ^aMafa ^bDavid Patten ama mankasa moho; hwɛ, obiara nnkotum agye n’asɔfodzi no efi ne nsamu; mbom, nokwar, mese hom dɛ wobotum afrɛ binom so ama hɔn dɛm dzibew kor no ara bi.

131 Na bio, mese hom dɛ, mema hom ^aabaguafo etsitsir ma wɔaayɛ kutuwdo-bo ama Zion.

132 Hɔn edzin nye, Samuel Bent, Henry G. Sherwood, George W. Harris, Charles C. Rich, Thomas Grover, Newel Knight, David Dort, Dunbar Wilson—Seymour Brunson dze maafa no ama mankasa moho; obiara nnkotum agye n’asɔfodzi no efi ne nsamu, mbom wobotum eyi obi ama no dɛm asɔfodzi kor noara bi dze ahyɛ n’ananmu; na nokwar, mese hom dɛ, hom nhyɛ m’akowaa Aaron Johnson ɔsɔfo mfa nhyɛ n’ananmu—David Fullmer, Alpheus Cutler, William Huntington.

133 Na bio, medze Don C. Smith ma hom dɛ ɔmbɛyɛ president wɔ asɔfompanyin quorum no do;

134 Dɛm ayɛdze yi na wɔahyehyɛ ato hɔ a no mu mba no na wɔsɛ dɛ woyi hɔn si hɔ ma wɔyɛ president anaa ^astake horow a wɔapetse mbea nyina do no asomfo.

135 Na sɛ wɔpɛ a, wobotum etu kwan so, mbom ɔwɔ dɛ wɔhyɛ hɔn asɔfo yɛ hɔn president si hɔ, iyi nye dzibew a wɔfrɛɛ hɔn mu no, Ewuradze hom Nyankopɔn no na ɔse.

136 Mayɛ Amasa Lyman na Noah Packard apamfo, aama wɔaahwɛ asɔfompanyin quorum a ɔwɔ m’asɔr mu no do, Ewuradze na ɔse.

137 Na bio, mese hom dɛ, medze John A. Hicks, Samuel Williams, nye Jesse Baker ama hom, woyinom hɔn asɔfodzi nye dɛ wɔbɔhwɛ ^aelderfo hɔn quorum no do, dɛm quorum yi wɔahyehyɛ ato hɔ ama asɔfo a wosi hɔ; eso wobotum etu kwan na mbom, wɔahyɛ hɔn asɔfo dze hɔn esi hɔ dɛ wɔmbɛyɛ m’asɔr mu asomfo, Ewuradze na ɔse.

138 Na bio, medze Joseph Young, Josiah Butterfield, Daniel Miles, Henry Herriman, Zera Pulsipher, Levi Hancock, James Foster ama hom dɛ wɔnhwɛ ^aeduosuonfo quorum no do;

139 Dɛm quorum yi na wɔahyehyɛ ato hɔ ama elderfo a wotu kwan dɛ wɔnkɛgye me dzin ho dase wɔ wiadze nyina mu, wɔ beebiara a abaguafo etsitsir a wotu kwan, m’asomafo bɔsoma hɔn dɛ wonkesiesie kwan nto m’enyim no.

140 Soronko a ɔda dɛm quorum yi nye elderfo quorum mu no nye dɛ kor wɔ dɛ otu kwan aber nyina, na kor no so wɔ dɛ ofi ber to ber ɔhwɛ nsɔr no do, kor asɛdze nye dɛ ofi ber to ber ɔbɛyɛ banodzifo, na kor no dze ɔnnyɛ asɛdze dɛ ɔbɛyɛ banodzifo, Ewuradze hom Nyankopɔn na ɔse.

141 Na bio, mese hom dɛ, medze Vinson Knight na Samuel H. Smith ma hom, nye Shadrach Roundy, sɛ ɔbɛpɛ a, dɛ wɔnhwɛ ^abishop na n’apamfo no do, dɛm bishop na n’apamfo yi wɔakã ho asɛm wɔ ^bNkyerɛkyerɛ na Ahyɛmudzi nwoma no mu.

142 Na bio, mese hom dɛ, Samuel Rolfe na n’apamfo a wɔhwɛ asɔfo do, nye akyerɛkyerɛfo hɔn president nye n’apamfo, nye deaconfo hɔn president na n’apamfo, nye stake president na n’apamfo.

143 Medze dɛm dzibew yinom a wɔabobɔ edzin wɔ etsifi ha yi nye ne nsaafee ma hom, ma wɔdze aboa, na wɔdze aahwɛ do, wɔ ɔsomdwuma no ntsi na wɔ m’ahotseweefo ^aemudziyɛ ntsi.

144 Na, mbrasɛm a medze ma hom nye dɛ, hom mfa nkorɔfo nsisi dzibew yinom mu na hom ^angye dɛm edzin a maabobɔ no nto mu, anaaso wɔ me wiadze mfɛndzanan ehyiadzi no mu no, hom botum dɛ hom nnkɛgye ato mu.

145 Na hom nsiesie dɛm adankora yinom mma dɛm dzibew yinom wɔ ber a hom risi fi ama me dzin no, Ewuradze hom Nyankopɔn na ɔse. Ɔnyɛ hɔ dɛm. Amen.