1 O te atua, ko mena iaa? Ao e ngaa te umwa ae rabuna te tabo ae ko ^akarabako iai?

2 E na ^amaanra baim n tiku, ao matam, eng matam ae itiaki, n nooria mai karawa ae akea tokina aia bure am aomata ao am taan mwakuri, ao taningam e na ongo tangiia?

3 Eng, O te Uea, a na ^amaanra ngaiia n rinanon bwainikirinaki aikai aika a bure man aki eti n te tua, i mwaain ae e na kamarauaki nanom nakoia, ao n ringaki nanom ma te nanoanga ibukiia?

4 O te Uea ae te Atua ae ^aMoan te Mwaaka, te tia karika karawa, aonaba, ao taari, ao bwaai ni kabane ake i nanona, ao ngaia are e bairea ao n tautaekana te riaboro, ao mwaakan Tora ae roo man rotongtong—arora baim; ke taraia matam; ke kanakoaki umwam; ke tai manga rabunaki am ^btabo ni karaba; ke ongo taningam; ke marau nanom, ao n ringaki nanom ma te nanoanga nakoira.

5 E riai n kauraaki unim nakoia ara kairiribai; ao, n unin nanom ae korakora, ma am kabaang ^akabooa mwiina kairua aika karaoaki nakoira.

6 Uringiia am aomata aika itiaki n rawawataia, O Atuara; ao am taan mwakuri a na kimwareirei n aram n aki toki.

7 Natiu, e na mena te rau n tamneim; am ^akangaanga ao karawawatakim a na riki ma tii n te tai ae uarereke;

8 Ao ngkanne, ngkana ko ^ateimatoa n rinanona n te aro ae raoiroi, te Atua e na karietako i eta; ko na tokanikai i aoia ni kabane am kairiribai.

9 ^aRaom ake a boutokaiko, ao a na manga butimwaiko ma te tangira ao te iraorao.

10 Ko tuai n riki n aron ^aIobi; raom a aki kauntaeka ma ngkoe, ke ni bukiniko n riaoan te tua, n aron ae a karaoia raon Iobi.

11 Ao naake a bukiniko n riaoan te tua, aia kantaninga a na uruakaki, ao baike a kantaningai a na ran n aron te ^aaoi ae aiti e na ran n kabuebuen otan otin taai;

12 Ao bwa te Atua naba e a tia ni baireia ao ni kanikinaai ni bitii ^ataai ma bongia, ao ni kamatakiia aia iango, bwa a aonga n aki oota n ana mwakuri aika korakora; bwa e aonga ni kataia naba ao ni kuneia n aia mwakuri ni kamwamwane;

13 Bukina naba bwa nanoia a buakaka, ao bwaai ake a kukurei ni kaaki i aoia tabeman, ao n tangiria bwa tabeman a na rawawata, a aonga n roko ^ai aoia ni korakora;

14 Bwa a aonga ni bwara nanoia naba, ao aia kantaninga a aonga ni mauna;

15 Ao e aki mwaiti te ririki man te tai aei, bwa ngaia ao aia kariki a na kamaunaaki mai i aan karawa, e taku te Atua, bwa akea temanna mai i buakoia ae e na tiku n tei i rarikin te oo.

16 A kamaraiaaki ni kabane naake a na tabeki bukin waeia ni kaitaraia ake I ^akabiria, e taku te Uea, ni katanoata bwa a tia ni ^bbure ngke a aki bure i matau, e taku te Uea, ma n tia ni karaoa anne are e riai i matau, ao are I tuangia.

17 Ma naake a katanoata riaoan te tua a karaoia ibukina bwa ngaiia taan tautoronaki n te bure, ao bon ^anati n aki ongeaba ngaiia.

18 Ao naake a kewe n tuea ni kaitaraia au taan mwakuri, bwa a aonga n uotiia nakon te tautoronaki ao te mate—

19 Te reke ni kai nakoia; ibukina bwa a tia ni ^abure nakoia au aomata aika uarereke a na kamaenakoaki man ana ^botenanti au auti.

20 Aia ^abwaene e na aki onrake, aia auti ao aia auti ni kawakinibwai e na uruakaki, ao ngaiia a na ribaki irouia naake a mwamwanaiia.

21 A na akea nakoia te kariaia nakon te ^anakoanibonga, ke kanoaia imwiia man te roro teuana nakon te roro teuana.

22 E na bon ^araoiroi riki ibukiia bwa te atibu n ii buraua e na katineaki i roroaia, ao ni bwabwa i kabin marawa.

23 Te rekenikai nakoia ni kabane naake a aki karauiia au aomata, ao ni kanakoia, ao n tiritiri, ao ni kakoaua ni kaitaraia, e taku aia Uea Taanga ni Buaka; te ^aroro n naeta a na aki kona ni birinako man ana kabuakaka moone.

24 Nooria, matau e ^anoora ao n atai aia mwakuri ni kabane, ao I a tia ni kawakina te ^bmotikitaeka ae katawe n taina, ibukiia ni kabane;

25 Bwa iai te ^atai ae rineaki ibukiia aomata nako, ni kaineti nakon ana ^bmwakuri.

26 Te Atua e na anganiko te ^aatatai man ^bTamneina ae Tabu, eng, man ana ^cbwaintituaraoi te Tamnei ae Raoiroi ae aki kona ni kabwarabwaraki, ae e tuai man kaotaki man te tai ae e moan waki te aonaba ni karokoa ngkai;

27 Are ara bakatibu a tia n tataningaia ma te kakantaninga ae korakora bwa e na kaotaki n taai aika kaitira, are aia iango e kairaki nako iai irouia anera, n aron are e tauaki ni kawakinaki ibukin bwaninin mimitongiia;

28 Te tai are e na roko are ^aakea iai te bwai ae e na tauaki, bwa temanna te Atua ke a mwaiti ^batua, a na kaotaki.

29 Ni kabane kaintokanuea ao tautaeka, taabo aika tautaekanaki iroun te nati n uea te mwaane ao mwaaka, a na ^akaotaki ao ni kaakaki i aoia ni kabane ake a teimatoa ma te ninikoria ibukin ana euangkerio Iesu Kristo.

30 Ao, ngkana iai naba taian ^atiaia ni baireaki nako karawa ke nako taari, ke nakon te aba ae mwau, ke nakon taai, namwakaina, ke itoi—

31 Ni kabane aia tai ni katomimi, ni kabane boong ake a rineaki, namwakaina, ao ririki, ao ni kabane bongin aia bong, namwakaina, ao ririki, ao ni kabane mimitongiia, tuaia, ao taai ake a baireaki, a na kaotaki n te ^amwioko n tararua ni kororaoin bongina—

32 Ni kaineti nakon anne are e katabuaki i buakon ana ^aKauntira te ^bAtua ae Akea Tokina are e tautaekaniia ni kabane atua ake tabeman i mwaain rikin te aonaba aei, bwa e na kawakinaki nakon tiana ma tokina, n te tai are aomata nako a na rin nako ^cmatan ae akea tokina ao nakon ana ^dmotirawa ae e aki mamate.

33 Manra raan aika mwainging n tiku ni bareka? Tera te mwaaka ae e na katoka karawa? N ai aron te aomata ae arora baina ae uarereke ni katoka te Karaanga are Missouri ni kawaina ae e baireaki, ke ni bita kawaina, ai aron naba kangaangan katokan are Moan te Mwaaka man nurakinan ^aatatai mai karawa nako aon atuuia Aomata aika Itiaki ni Boong aika Kaitira.

34 Nooria, a mwaiti aika ^aweteaki, ma a karako aika ^brineaki. Ao ibukin tera a aki rineaki?

35 Bukina bwa a rangi ni bane nanoia i aon bwain te ^aaonaba aei, ao a ukoukora aia ^bkarinerine aomata, n te aro are aki reiakina te reirei ae teuana aei—

36 Bwa ^akariaia n te nakoanibonga a bon reitaki matoa ma ^bmwaakan karawa, ao bwa mwaakan karawa e aki kona ni baireaki ke ni kamwakuraki tii i aon tuan te ^craoiroi.

37 E bon koaua, bwa a kona ni kaakaki i aora; ma ngkana ti kataia ni ^akarabai ara ^bbure, ke ni kakoroa bukin ara ^ckamoamoa, ao nanora ni kan kinaaki, ke ni karaoa te babaire ke te tautaeka ke te taumatoa nakon tamneia natiia aomata, n aekan nako te aki raoiroi, nooria, a na ^dbubai karawa; Tamnein te Uea e nanokawaki; ao ngkana e kararoa, Amen nakon te nakoanibonga ke te kariaia are iroun te aomata anne.

38 Nooria, i mwaain ae e ataia, e katukaki i bon irouna, bwa e na ^atabani taian kateketeke, ni ^bbwainikirinia aomata aika itiaki, ao ni buakana te Atua.

39 Ti a tia n reiakinna man bwaai aika a tia n riki aika a kananokawaki bwa bon ^aaroia ao anuaia angiia aomata, bwa n te tai naba are a karekea te mwaaka teutana, are aongkoa iai irouia, a na waekoa ni moana karaoan te tautaeka ae aki raoiroi.

40 Mangaia are a mwaiti aika weteaki, ma tii tabeman aika rineaki.

41 Akea te mwaaka ke te kakairi ae kona ke n riai ni kateimatoaaki rinanon te nakoanibonga, ma tii aman te ^anai nano, man te ^btaotaonaki n nano, man te atataiaomata ao te nimamannei, ao man te tangira ae aki kewe;

42 Man te akoi, ao te atatai ae kororaoi, are e na kakorakora rikiraken te tamnei n akea te ^abwaritaio, ao n akea te ^buarao—

43 Ni ^aboaia n taina ae riai ma te matoa, ngkana a kairaki iroun te Tamnei ae Raoiroi; ao ngkanne ni kaota i mwina te ^btangira ae rikirake nakon teuare ko boaia, mwiina e araniko bwa ngkoe ana kairiribai;

44 Bwa e aonga n ataia bwa am kakaonimaki e korakora riki nakon ana kabaebae te mate.

45 E riai nanom naba n onrake n te tangira ae kororaoi nakoia aomata ni kabane, ao nakon te mwenga ae onimaki, ao e riai te ^araoiroi ni katamaroa am ^biango n aki toki; ngkanne matoan nanom e na korakora imatan te Atua; ao reirein te nakoanibonga e na timtim i aon tamneim n aron te ^caoi mai karawa.

46 Te ^aTamnei ae Raoiroi e na riki bwa raom n taai nako, ao am kainuea te kainuea ae aki bibitaki n te raoiroi ao te koaua; ao am ^btautaeka e na riki bwa te tautaeka ae akea tokina, ao n akean aanga ni kairoro e na raanga nakoim n aki tootoki.