1 Chi yaal ninye eere, ex raab’ilex inb’aan, nink’e eena’leb’, ut jun taqlahom, chirix chixjunil li eechej li eechaninb’il xb’aan li k’anjelil li kintaqla xk’uub’ankil ut xxaqab’ankil, re taawanq choq’ ^ak’anjelil sa’ junajil, ut jun k’anjelil li junelik taakanaaq choq’ re lix chaab’ilal lin iglees, ut choq’ re lix kolb’aleb’ li winq toj reetal naq tink’ulunq—

2 Rik’in jun yeechi’ihom li ink’a’ naru chi numsimank chi moko chi jalmank, naq a’ yaal jo’ tiikeb’ chi paab’ank li ani keb’intaqla, te’osob’tesiiq rik’in xk’ihanik li osob’tesink;

3 A’b’anan a’ yaal jo’ ink’a’ tiikeb’ chi paab’ank, nach’ wan li majewaak rik’ineb’.

4 Jo’kan ut, a’ yaal jo’ wan xkomoneb’ lin moos li ink’a’ ke’paab’ank re li taqlahom, li ke’xq’et b’an li sumwank rik’in ^arahok-u, ut rik’in li aatin yal pak’b’il, laa’in kinmajewaheb’ rik’in jun li majewank q’axal nim ut ra.

5 Xb’aan naq laa’in, li Qaawa’, sa’ lin ch’ool kintaqla xyeeb’al, naq a’ yaal jo’ ani junaq chi winq li wan sa’ li k’anjelil tawb’ilaq jo’ aj q’etol aatin, malaj ut sa’ jalan chik aatin, tixq’et li sumwank li b’ak’b’ilex wi’, a’an majewanb’ilaq sa’ lix yu’am, ut taayeq’iiq xb’aan li ani nawaj;

6 Xb’aan naq laa’in, li Qaawa’, maak’a’aq ^ainb’atz’unlenkil sa’ li k’a’aq re ru a’in—

7 Ut chixjunil a’in re naq li ani maak’a’ xmaak sa’ eeyanq ink’a’ taajite’q rochb’een li moko tiik ta xch’ool; ut re naq li ani wan xmaak sa’ eeyanq ink’a’ tixkol rib’; xb’aan naq laa’in, li Qaawa’, kinyeechi’i eere jun ^akoroon re loq’alil sa’ lin nim uq’.

8 Jo’kan ut, a’ yaal jo’ tawb’ilex jo’ aj q’etol aatin, ink’a’ taaruuq teekol eerib’ chiru lin josq’il sa’ lee yu’am.

9 A’ yaal jo’ ^anekex’isiik chaq xb’aan q’etok aatin, ink’a’ naru nekekol eerib’ chiru lix ^bchiq’lehom laj ^cSatanas toj sa’ xkutankil li tojb’al-ix.

10 Ut nink’e anajwan eere wankilal chalen sa’ li hoonal ajwi’ a’in, naq wi ani junaq chi winq sa’ eeyanq, li wan sa’ li k’anjelil, natawman jo’ aj q’etol aatin ut moko naxjal ta xk’a’uxl chirix li maa’usilal, naq teeq’axtesi chiru lix chiq’lehom laj tza; ut maak’a’aq xwankil ^achixk’amb’al chaq li maa’usilal sa’ eeb’een.

11 A’an xchaab’ilal inna’leb’; jo’kan naq jun taqlahom nink’e eere, naq teek’uub’ eerib’ ut teexaqab’ re li junjunq chi winq lix ^amertoomil;

12 Re naq li junjunq chi winq tixye resil we li mertoomil li xaqab’anb’il choq’ re.

13 Xb’aan naq na’ajman ru naq laa’in, li Qaawa’, tink’e li junjunq chi winq chi ^ateneb’anb’il, jo’ jun ^bmertoom sa’ xb’een li ruchich’och’il osob’tesihom, li kinyiib’ ut kinkawresi choq’ reheb’ li yo’ob’tesinb’ileb’ inb’aan.

14 Laa’in, li Qaawa’, kinheleb’ank re li choxa, ut ^akinkab’la li ruchich’och’, tz’aqal ^bxyiib’ahom li wuq’; ut we laa’in chixjunil li k’a’aq re ru wan chi sa’.

15 Ut a’an li wajom xk’eeb’al li taak’anjelaq reheb’ lin santil paab’anel, xb’aan naq we laa’in chixjunil li k’a’aq re ru.

16 A’b’anan tento naq taab’aanumanq jo’ chanru ^ainna’leb’ laa’in, ut k’ehomaq reetal, a’in li na’leb’ li kintaqla xyeeb’al laa’in, li Qaawa’, re xk’eeb’al li taak’anjelaq reheb’ lin santil paab’anel, re naq te’taqsiiq xloq’al li ^bneb’a’, rik’in naq kub’sinb’ileb’ li b’ihom.

17 Xb’aan naq nujenaq li ^aruchich’och’, ut wan tz’aqal ut xikenaq chik xb’een; relik chi yaal, xinkawresi chixjunil li k’a’aq re ru, ut xink’e reheb’ li ralal xk’ajoleb’ li winq naq te’wanq choq’ aj ^bb’aanunel xjuneseb’ rib’.

18 Jo’kan ut, wi ani junaq chi winq tixchap xkomon li ^anaab’alil li kinyiib’, ut moko tixk’e ta lix jachal, jo’ chanru li ^bchaq’rab’ re lin evangelio, reheb’ li ^cneb’a’ ut li maak’a’eb’ wan re, a’an, rochb’eenaqeb’ laj maak, tixtaqsi chaq sa’ ^dxb’alb’a li rilob’aal, chi wanq sa’ rahilal.

19 Ut anajwan, chi yaal ninye eere, chirix li eechej re li ^ak’anjelil—

20 Choq’ re lin moos aj Sidney Rigdon chixaqab’amanq li na’ajej li wan wi’ anajwan, ut lix ch’och’il li k’uub’leb’al tz’uum choq’ xmertoomil ilom, re xk’ulb’al li taak’anjelaq re naq yoo chi k’anjelak sa’ li wawimq, jo’ chanru ajwi’ nawaj, jo’q’e tink’e xtaqlankil.

21 Ut chib’aanumanq chixjunil li k’a’aq re ru jo’ chanru li na’leb’ k’eeb’il xb’aan li k’anjelil, ut li k’ulub’anb’ilaq sa’ komonil, malaj lix yaab’ xkux li k’anjelil, li neke’wan sa’ li ch’och’ Kirtland.

22 Ut li mertoomil ut osob’tesink a’in, laa’in, li Qaawa’, nink’ojob’ sa’ xb’een lin moos aj Sidney Rigdon choq’ osob’tesink sa’ xb’een a’an, ut eb’ li riyajil moqon chirix;

23 Ut tink’ihob’resi li osob’tesink sa’ xb’een a’an, a’ yaal jo’ taawanq chi tuulan xch’ool chiwu.

24 Ut jo’kan wi’chik, choq’ re lin moos aj Martin Harris chixaqab’amanq, choq’ xmertoomil ilom, li jun siir chi ch’och’ li kixk’ul lin moos aj John Johnson jo’ reeqaj li reechanihom chaq junxil, choq’ re a’an ut li riyajil moqon chirix;

25 Ut a’ yaal jo’ tiik chi paab’ank, tink’ihob’resi li osob’tesink sa’ xb’een a’an ut li riyajil moqon chirix.

26 Ut lin moos aj Martin Harris chixq’axtesihaq lix tumin re naq taach’olob’amanq li waatin, jo’ chanru naq lin moos aj Jose Smith, alalb’ej, tixb’eresi.

27 Ut jo’kan wi’chik, lin moos aj Frederick G. Williams chixk’ul li na’ajej li wan wi’ rochoch anajwan.

28 Ut lin moos aj Oliver Cowdery chixk’ul li jun siir li wan chixk’atq li ochoch, li tento taawanq choq’ k’anjeleb’aal re k’uub’ank hu, a’an li xb’een siir chi ch’och’, ut jo’kan ajwi’ li jun siir wan wi’ rochoch lix yuwa’.

29 Ut eb’ lin moos aj Frederick G. Williams ut laj Oliver Cowdery che’xk’ul li k’anjeleb’aal re k’uub’ank hu ut chixjunil li k’a’aq re ru wan rochb’een.

30 Ut a’inaq lix mertoomil ilomeb’ li taaxaqab’amanq choq’ reheb’.

31 Ut a’ yaal jo’ tiikeb’ chi paab’ank, k’ehomaq reetal te’wosob’tesi, ut tink’ihob’resi li osob’tesink sa’ xb’eeneb’.

32 Ut a’in xtiklajik li mertoomil li kinxaqab’ choq’ reheb’ a’an, choq’ reheb’ ut li riyajileb’ moqon chirixeb’.

33 Ut, a’ yaal jo’ tiikeb’ chi paab’ank, tink’ihob’resi li osob’tesink sa’ xb’eeneb’ a’an ut li riyajileb’ moqon chirixeb’, a’anaq ajwi’ jun xk’ihanik li osob’tesink.

34 Ut jo’kan wi’chik, lin moos aj John Johnson chixk’ul li ochoch li wan wi’ anajwan, ut li eechanihomej, chixjunil, ka’ajwi’ li ch’och’ li eetalinb’il choq’ re ^axkab’lankileb’ li wochoch ink’a’, li natawman sa’ li eechanihomej a’an, ut eb’ li jar siir li yeeb’ileb’ resil choq’ re lin moos aj Oliver Cowdery.

35 Ut a’ yaal jo’ tiik chi paab’ank, laa’in tink’ihob’resi li osob’tesink sa’ xb’een.

36 Ut a’an rajom inch’ool naq a’an tixk’ayi li jar siir chi ch’och’ li jachjookeb’ ru choq’ re xwaklesinkil li tenamit reheb’ lin santil paab’anel, a’ yaal jo’ taak’ehe’q chi nawmank re xb’aan lix ^ayaab’ xkux li Musiq’ej, ut jo’ chanru li na’leb’ k’eeb’ilaq xb’aan li k’anjelil, ut lix yaab’ xkux li k’anjelil.

37 Ut a’inaq xtiklajik li mertoomil li kinxaqab’ choq’ re a’an, jo’ jun osob’tesink choq’ re a’an ut li riyajil moqon chirix.

38 Ut a’ yaal jo’ tiik chi paab’ank, tink’ihob’resi jun xk’ihanik li osob’tesink sa’ xb’een.

39 Ut jo’kan wi’chik, choq’ re lin moos aj ^aNewel K. Whitney chixaqab’amanq eb’ li ochoch ut li jun siir chi ch’och’ li wan wi’ anajwan, ut li jun siir ut li kab’l wan wi’ li k’ayib’aal anajwan, ut jo’kan ajwi’ li jun siir li wan sa’ li xxuk b’e junpak’al li k’ayib’aal sa’ xtz’e li saq’e, ut jo’kan ajwi’ li jun siir wan wi’ li yiib’leb’aal cha.

40 Ut chixjunil a’in kinxaqab’ choq’ re lin moos aj Newel K. Whitney choq’ xmertoomil ilom, choq’ osob’tesink sa’ xb’een a’an ut li riyajil moqon chirix, choq’ re lix chaab’ilal li k’ayib’aal re lin k’anjelil li kinxaqab’ choq’ re lin oqech sa’ li ch’och’ Kirtland.

41 Relik chi yaal, a’in chi yaal li mertoomil ilom li kinxaqab’ choq’ re lin moos aj N. K. Whitney, anchal ajwi’ li k’ayib’aal a’in, re a’an rochb’een lix ^ab’aanunel k’anjel, ut li riyajil moqon chirix.

42 Ut a’ yaal jo’ tiik chixpaab’ankil lin taqlahom, li kink’e re, tink’ihob’resi li osob’tesink sa’ xb’een a’an ut li riyajil moqon chirix, a’anaq ajwi’ jun xk’ihanik li osob’tesink.

43 Ut jo’kan wi’chik, choq’ re lin moos aj Jose Smith, alalb’ej, chixaqab’amanq li jun siir chi ch’och’ li jachjo ru choq’ re xkab’lankil li wochoch, li ka’k’aal chi b’isleb’ che’ xnajtil li roq ut kab’laju xnimal li ru, ut jo’kan ajwi’ li eechanihomej wan wi’ lix yuwa’ anajwan;

44 Ut a’in xtiklajik li mertoomil li kinxaqab’ choq’ re, choq’ osob’tesink sa’ xb’een a’an, ut sa’ xb’een lix yuwa’.

45 Xb’aan naq k’ehomaq reetal, kink’uula jun eechanihomej choq’ re lix ^ayuwa’, choq’ re li taak’anjelaq re; jo’kan naq a’an taak’ehe’q sa’ ajl sa’ rochoch lin moos aj Jose Smith, alalb’ej.

46 Ut tink’ihob’resi li osob’tesink sa’ xb’een li rochoch lin moos aj Jose Smith, alalb’ej, a’ yaal jo’ tiik chi paab’ank, a’anaq ajwi’ jun xk’ihanik li osob’tesink.

47 Ut anajwan, jun taqlahom nink’e eere chirix Sion, naq ink’a’ chik texwanq chi b’ak’b’il jo’ k’anjelil sa’ junajil rik’ineb’ lee komon sa’ Sion, ka’ajwi’ chi jo’ka’in—

48 Chirix naq k’uub’anb’il eerib’, taayeemanq eere li K’anjelil sa’ Junajil re li ^aRoqechal Sion, li Tenamit Kirtland. Ut eb’ lee komon, chirix naq k’uub’anb’ileb’ rib’, taayeemanq reheb’ li K’anjelil sa’ Junajil re li Tenamit Sion.

49 Ut k’uub’anb’ilaqeb’ sa’ tz’aqal xk’ab’a’ li junjunq reheb’, ut sa’ tz’aqal lix k’ab’a’eb’; ut te’xb’aanu lix b’aanuhomeb’ sa’ tz’aqal lix k’ab’a’eb’, ut sa’ tz’aqal xk’ab’a’ li junjunq reheb’;

50 Ut laa’ex teeb’aanu lee b’aanuhom sa’ tz’aqal lee k’ab’a’, ut sa’ tz’aqal xk’ab’a’ li junjunq eere.

51 Ut a’in kintaqla chi b’aanumank choq’ re lee kolb’al, ut jo’kan ajwi’ choq’ re lix kolb’aleb’ a’an, sa’ xk’ab’a’ naq ^ake’alinasiik chaq, ut li k’a’ru toj taachalq.

52 Rik’in naq ak q’etb’ileb’ li ^asumwank xb’aan q’etok aatin, xb’aan li ^brahok-u ut li aatin yal pak’b’il—

53 Jo’kan naq raqb’ilex jo’ k’anjelil sa’ junajil rik’ineb’ lee komon, jo’kan naq moko b’ak’b’ilex ta chik, ka’ajwi’ toj sa’ li hoonal a’in rik’ineb’, ka’aj chik chi jo’ka’in, jo’ kinye, chi to’ninb’il, jo’ chanru k’uub’anb’ilaq sa’ komonil xb’aan li k’anjelil a’in, sa’ ch’utam, jo’ chanru taaruhanq sa’ li wankex wi’, ut jo’ b’eresinb’ilaq xb’aan xyaab’ xkux li ch’utam.

54 Ut jo’kan wi’chik, jun taqlahom nink’e eere chirix lee mertoomil ilom li kinxaqab’ choq’ eere.

55 K’ehomaq reetal, chixjunil li eechej a’in we laa’in, malaj ut maak’a’ xyaalal lee paab’aal, ut tawb’ilex jo’ aj ka’pak’al-u, ut q’etb’il li sumwank li kek’uub’ wik’in;

56 Ut wi weheb’ li eechej, rik’in a’an ^amertoomex; wi b’an ink’a’, maawa’ex mertoom.

57 A’b’anan, chi yaal ninye eere, kexinxaqab’ chi wank choq’ mertoom sa’ xb’een li wochoch, re naq mertoomaqex chi yaal.

58 Ut choq’ re li ajom a’in naq kexintaqla chixk’uub’ankil eerib’, re xk’uub’ankil choq’ hu ^ali waatin, lix tz’aqalileb’ lin loq’laj hu, li k’utb’esinb’il na’leb’ li kink’e eere, ut li moqon tink’e chi jo’q’ehaq eere—

59 Choq’ re xwaklesinkil lin iglees ut awa’b’ejihom sa’ li ruchich’och’, ut re xkawresinkileb’ lin tenamit choq’ re lix ^aq’ehil naq ^btinhilanq rik’ineb’, li ak haye’k chaq re.

60 Ut teekawresi choq’ eere jun xna’aj li k’uuleb’aal tumin, ut teeq’axtesi choq’ re lin k’ab’a’.

61 Ut teexaqab’ junaq sa’ eeyanq chirilb’al li k’uuleb’aal tumin, ut a’an taak’ojob’amanq choq’ re li osob’tesink a’in.

62 Ut taawanq jun tz’apleb’ chiru li k’uuleb’aal tumin, ut chixjunil li k’a’aq re ru loq’ taaq’axtesimanq sa’ li k’uuleb’aal tumin; ut maajun winq sa’ eeyanq tixye naq aj eechal re, chi moko jun raqalaq, xb’aan naq eerehaq chejunilex sa’ junajil.

63 Ut tink’e eere chalen sa’ li hoonal a’in; ut chek’e reetal anajwan, naq texxik ut teeroksi li mertoomil li kinxaqab’ choq’ eere, ka’ajwi’ naq li k’a’aq re ru loq’ ink’a’, re taa’uxmanq xk’uub’ankil choq’ hu li k’a’aq re ru loq’ a’in jo’ kinye.

64 Ut lix ^atz’aq li k’a’aq re ru loq’, taak’uulamanq sa’ li k’uuleb’aal tumin, ut taak’ehe’q jun tz’apleb’ chiru, ut moko oksinb’ilaq ta chi moko isinb’ilaq chaq sa’ li k’uuleb’aal tumin xb’aan anihaq, chi moko taahitmanq li tz’apleb’ li taak’eemanq chiru, ka’ajwi’ xb’aan xyaab’ xkux li k’anjelil, malaj xb’aan taqlahom.

65 Ut chi jo’kan teek’uula lix tz’aq li k’a’aq re ru loq’ re li k’uuleb’aal tumin, choq’ re li ajom loq’ ut sant.

66 Ut a’inaq li loq’laj k’uuleb’aal tumin re li Qaawa’ taayeemanq re; ut k’eeb’ilaq jun tz’apleb’ chiru, re naq santaq ut q’axtesinb’ilaq choq’ re li Qaawa’.

67 Ut jo’kan wi’chik, taawanq jalan chik k’uuleb’aal tumin kawresinb’il, ut jun aj k’uulahom tumin xaqab’anb’il re xk’uulankil li k’uuleb’aal tumin, ut taak’eemanq jun tz’apleb’ chiru;

68 Ut chixjunil li tumin li nekek’ul sa’ lee mertoomil, rik’in xnimob’resinkil li eechej li kinxaqab’ choq’ eere, li ochoch, malaj li ch’och’, malaj li wakax, malaj chixjunil li k’a’aq re ru, ka’ajwi’ li tz’iib’ahom li sant ut loq’ ink’a’, li kink’uula choq’ we laa’in, choq’ re li ajom sant ut loq’, taak’eemanq sa’ li k’uuleb’aal tumin a’ yaal sa’ junpaat jo’ nekek’ul li tumin, chi cient, malaj chi lajetq roxk’aal, malaj chi junmay, malaj chi lajeeb’, malaj chi oob’.

69 Malaj sa’ jalan chik aatin, wi ani junaq winq sa’ eeyanq naxk’ul oob’ pees chixk’ehaq sa’ li k’uuleb’aal tumin, malaj wi naxk’ul lajeeb’, malaj junmay, malaj jun cient, chixb’aanuhaq ajwi’ chi jo’kan;

70 Ut maajun sa’ eeyanq chixye naq re a’an; xb’aan naq ink’a’ taayeemanq naq rehaq, chi moko jun raqalaq.

71 Ut maajun raqal taa’oksimanq, chi moko taa’isimanq chaq sa’ li k’uuleb’aal tumin, ka’ajwi’ xb’aan lix yaab’ xkux ut chi k’ulub’anb’il sa’ komonil xb’aan li k’anjelil.

72 A’inaq ut lix yaab’ xkux ut li k’ulub’anb’ilaq sa’ komonil xb’aan li k’anjelil—naq yalaq ani chi winq sa’ eeyanq tixye re laj k’uulanel tumin: Nawaj ru a’in re intenq’ankil sa’ inmertoomil—

73 Wi oob’ pees, malaj wi lajeeb’ pees, malaj junmay, malaj lajeeb’ roxk’aal, malaj jun cient, laj k’uulanel tumin tixk’e re li jo’ nimal naraj ru re xtenq’ankil sa’ lix mertoomil—

74 Toj reetal naq taatawmanq naq aj q’etol aatin, ut k’utb’esinb’ilaq chiru li ch’utam re li k’anjelil chi ch’olch’o naq a’an jun mertoom moko tiik ta ut ^amaak’a’ xna’leb’.

75 A’b’an chiru jo’ najtil wan tz’aqal sa’ li komonil, ut tiik chi paab’ank ut chaab’il xna’leb’ sa’ xmertoomil, a’inaq li reetalil chiru laj k’uulanel tumin, naq laj k’uulanel tumin ink’a’ tixram xk’eeb’al.

76 A’b’an wi taa’uxq li q’etok aatin, laj k’uulanel tumin taawanq rub’el xwankil li ch’utam ut lix yaab’ xkux li k’anjelil.

77 Ut wi taa’uxq naq taatawmanq naq laj k’uulanel tumin a’an jun mertoom moko tiik ta ut maak’a’ xna’leb’, taawanq rub’el xwankil li ch’utam ut lix yaab’ xkux li k’anjelil, ut taa’isimanq chaq sa’ xna’aj, ut ^ajalan chik taaxaqab’amanq sa’ xna’aj.

78 Ut anajwan, chi yaal ninye eere, chirix lee k’as—k’ehomaq reetal, a’an rajom inch’ool naq ^ateetoj chixjunil lee ^bk’as.

79 Ut a’an rajom inch’ool naq ^ateetuulanob’resi eerib’ chiwu, ut teetaw li osob’tesink a’in rik’in li ^byalok q’e ut li tuulanil ut li tijok chi wank li paab’aal.

80 Ut a’ yaal jo’ chanru naq yalb’il eeq’e ut tuulan eech’ool, ut nekek’anjela li ^atijok chi wank eepaab’aal, k’ehomaq reetal, laa’in tinq’unob’resi li raameb’ li ani wan wi’ eek’as, toj reetal naq tintaqla eere k’a’ru teekol wi’ eerib’.

81 Jo’kan ut, chetz’iib’a li hu chi seeb’ re xtaqlankil Nueva York, ut chetz’iib’a jo’ chanru li yeeb’ilaq xb’aan lin ^aMusiq’, ut laa’in tinq’unob’resi xch’ooleb’ li ani wan wi’ eek’as, ut isinb’ilaq chaq sa’ xk’a’uxleb’ xk’amb’al chaq li ch’a’ajkilal sa’ eeb’een.

82 Ut a’ yaal jo’ tuulan eech’ool ut ^atiikex chi paab’ank ut nekepatz’ ink’ab’a’, k’ehomaq reetal, tink’e eere li ^bq’axok-u.

83 Nink’e eere jun yeechi’ihom, naq texkole’q li jun sut a’in chiru lee moosil.

84 A’ yaal jo’ nak’eeman eere xk’ulb’al chi to’ li tumin chi cient, malaj chi mil, toj reetal ajwi’ naq teetaw chi to’ninb’il tz’aqal re teekol eerib’ chiru moosil, a’an k’eeb’il eere.

85 Ut yeechi’ihomaq li eechej li kink’e sa’ eeruq’, li jun sut a’in, rik’in xk’eeb’al eek’ab’a’ chi k’ulub’anb’il sa’ komonil malaj chi jalan chik chan ru, jo’ chanru teek’oxla naq us.

86 Nink’e eere xb’aanunkil a’in li jun sut a’in; ut k’ehomaq reetal, wi nekex’ok chixb’aanunkil li k’a’aq re ru li kink’ojob’ cheru, jo’ chanru lin taqlahom, chixjunil li k’a’aq re ru a’in we laa’in, ut laa’ex inmertoom, ut laj eechal kab’l ink’a’ tixkanab’ chi weqe’k li rochoch. Chi jo’kan. Amen.