Koroboki Aika Tabu
Motiaea 9


Ana Rongorongo Tinebi—Rongorongoia ana botanaomata, man te tai are a kitana iai aban Taraemera ni karokoa te tai are a kamaiuaki mai nanon baia Reimwanaite.

Kanoana mwakoro 9 ni karokoa 22.

Mwakoro 9

E kairiia te koraki teuana Tinebi mai aon Taraemera bwa a na maeka n aban Riaai-Nibwaai—E kariaia aia uea Reimwanaite bwa a na tekateka n te aba arei—Iai te buaka imarenaia Reimwanaite ma ana botanaomata Tinebi. Uakaan ma 200–187 I.K.

1 Ngai, Tinebi, are I a tia n reireinaki aron nako aia taetae Nibwaite, ao iai naba au atatai n aron rabakaun aaban Nibwaai, ao man aban rikiia naba ara bakatibu, ao I a tia naba ni kanakoaki bwa N na tutuo i buakoia Reimwanaite bwa I aonga n tuoi aia taanga ni buaka, bwa aonga ara taanga n roko ao n tiringiia—ma ngke I noora te raoiroi are e mena irouia ao I aki tangiria bwa a na tiringaki.

2 Mangaia ae I kairoroia tariu i nanon te rereua bwa I tangira ara tia tautaeka bwa e na karekea te rau ma ngaiia; ma ngkai te aomata ae matoatoa ma ni kan tiriaomata ngaia ao e tua bwa N na tiringaki; ma I mauri n tiringakiia aika a mwaiti riki; bwa e un te karo ma te karo, ao te tari ma te tari, ni karokoa ae a mate angiia kaain ara taanga i nanon te rereua; ao ti a oki, ngaira ake ti aki mate, nakon aban Taraemera, ao ti a kaongora taekaia nakoia buuia ma natiia.

3 Ao ibukin nanou n ingarake ni kani bwaina abaia ara bakatibu, ao I a botiia ni kabane ake a kani mwananga ni bwaina te aba, ao ti a manga waaki riki nako nanon te rereua iaon kawaira nakon te aba; ma ti taonaki n te rongo ma kaangaanga aika a rawata; bwa ti waeremwe n uringa te Uea are Atuara.

4 Ma e ngae n anne ao i mwin boong aika a mwaiti ni mwananga i nanon te rereua ao ti a katei umwara n te tabo are a mate iai tarira, are e kaan ma abaia ara bakatibu.

5 Ao e koro bukina bwa I manga mwananga naba ma mwaane aika aman nakon te kaawa, ni kawara te uea, bwa I aonga n ataa nanon te uea, bwa I aonga ni maeka ma au botanaomata iaon te aba anne i nanon te rau.

6 Ao I mwananga nakon te uea, ao e karaoa te berita ae tabu nakoiu bwa I kona ni maeka i aban Riaai-Nibwaai, ao i aban naba Tiirom.

7 Ao e tua naba bwa a na kitana te aba ana botanaomata, ao ngai ma au botanaomata ti na nako ni maekanna.

8 Ao ti a moana ara kateitei, ni karaoi oon te kaawa, eng, aika oon te kaawa ae Riaai-Nibwaai, ao te kaawa ae Tiirom.

9 Ao ti moana unikakin tanona, eng, n aeka ni koraa nako, aika koraan te koon, te wiita, te bwaare, ma taian niati, ma taian tiiam, ma koraan aeka n aroka aika a kariki uaa n aroia nako; ao a mwaiti ara kariki ma n rikirake arora iaon te aba.

10 Ma bon iai te nano ni kamwamwane ma n aonikai are e karaoia te uea are Reimwan, are e akariaia iai tikuia au botanaomata n riki n tautoronaki, ngke kariaia bwa ti na kabongana te aba.

11 Mangaia are koro bukina bwa i mwin maekara iaon te aba arei i nanon te maan ae tebwi ma uoua te ririki ao e moanna ni kakumekume te uea are Reimwan, n tabeaianga n rikiraken korakoraia au botanaomata iaon te aba, are anaaki kona iai ni konaia ma ni kabaeiia i aan te tautoronaki.

12 Bon te botanaomata ngaiia aika moan te taningaroti ma n atataromauria anti; mangaia are a tangiria ni kan tautoronira, bwa aonga ni maiu raoi ni mwin ara mwakuri; eng, bwa aonga ni kabuabekaia n taian tiibu ake i nanon ara tawaana.

13 Mangaia ae koro bukina bwa e moana ana mwakuri te uea ae Reimwan ni kamangaoi nanoia ana botanaomata bwa aonga n itabaraara ma au botanaomata; mangaia ae a moanaki taian buaka ma itabaraara iaon te aba.

14 Bwa n te katebwi ma teniua n ririki n au tai n tautaeka iaon aban Nibwaai, ao i maiaki i aban Tiirom, ngke a tabe au botanaomata ni kamoia ma ni kamwarakeia aia tiibu, ao n uniki abaia, ao a mwaiti Reimwanaite ake a ekinakoia ma n tiringiia, ao a uoti nako aia tiibu, ma manin aia tawaana.

15 Eng, ao e koro bukina bwa a birinako, ao ngaia ni kabane ake a aki reke, ake a roko n ana kaawa Nibwaai, a bubutiai bwa N na kamanoia.

16 Ao e koro bukina bwa I anganiia reken baia aika taian katebe, ma kanoan katebe, ma kabaang, ma biiti, ma taian ambo, ma taian bana, ma bwaai ni buaka n aekaia nako ake ti kona ni karaoi, ao I a mwananga ma au botanaomata ni kaaitaraia Reimwanaite n te buaka.

17 Eng, ti mwananga nakon te buaka ni kaaitaraia Reimwanaite ni korakoran te Uea; bwa I a tia ni ikotaki ma au botanaomata n tang nakon te Uea bwa e na kamaiuira mai nanon baia ara kairiribai, bwa ti uringa raoi aron kamaiuaia ara bakatibu.

18 Ao e aongo tangira te Atua ao e kaekai ara tataro; ao ti mwananga i nanon korakorana ni kaaitaraia Reimwanaite, ao i nanon te tairiki ao te ngaina ae ti teuana ao ti tiringiia aia mwaiti ae teniua te ngaa abwi ma teniua; ao ti rimwia n tiringiia e ngae ngke ti a tia ni kakioia nako mai aon abara.

19 Ao ngai, ae rabwatau aio, I ibuobuoki ma oin baiu, n tauniia aia mate. Ao n taraia, ma te nanokawaki ao te bwaebwaeti, uabubua itingaun ma ruaman mai buakoia tarira ake a tiringaki.