Tusitusiga Paia
Mosaea 9


O le Talafaamaumau a Senifa—O se tala i lona nuu, mai le taimi na latou tuua ai le laueleele o Sara’emila seia oo mai i le taimi na laveaiina ai i latou mai lima o sa Lamanā.

E aofia ai le mataupu 9 e oo atu i le 22.

Mataupu 9

Ua taitai atu e Senifa se vaega o tagata mai Sara’emila e nonofo i le laueleele o Liae-Nifae—Ua faataga i latou e le tupu o sa Lamanā e fai mo o latou tofi le laueleele—Ua faia se taua i le va o sa Lamanā ma le nuu o Senifa. E tusa o le 200–187 T.L.M.

1 O A’U, o Senifa, ona sa aoaoina a’u i le gagana uma a sa Nifaē, ma ona sa ia te a’u se malamalama e uiga i le alaueleele o Nifae, po o le laueleele o le ulua’i tofi o o matou tamā, ma ona sa auina atu a’u o se tagata faalilolilo i totonu o sa Lamanā ina ia mafai ona ou iloa faalilolilo a latou autau, ina ia mafai ona o mai a matou autau i o latou luga ma faaumatia i latou—peitai ina ua ou vaai i mea lelei sa i ai i totonu o i latou, sa ou manao ai ia lē faaumatiaina i latou.

2 O lea, na ou finau ai ma o’u uso i le vao, ona sa ou manao ia faia e lo matou pule se feagaiga ma i latou; ae ona o ia o se tagata sauā ma fia faamasaatoto o lea na faatonu ai e ia ia fasiotia a’u; peitai sa laveaiina a’u e ala i le tele o toto na faamasaaina; ona sa tau le tamā faasaga i le tamā, ma le uso faasaga i le uso, seia oo ina faaumatia ai le vaega tele o la matou autau i le vao; ma sa matou toe foi mai, i matou ia o e na faasaoina, i le laueleele o Sara’emila, e ta’u atu lena tala ia latou avā ma a latou fanau.

3 Ma e ui i lea, ona o lo’u soona naunau tele i le fia fai mo o’u tofi le laueleele o o matou tamā, o lea na ou faapotopoto ai le toatele o i latou o e na mananao e o a’e e nonofo i le laueleele, ma toe amata la matou malaga i le vao matou te o a’e ai i le laueleele; peitai sa taia i matou i le oge ma puapuaga tigā; ona sa gese ona matou manatua o le Alii lo matou Atua.

4 Ae ui i lea, ina ua mavae aso e tele o le fesēa’i i le vao sa matou faatutū o matou faleie i le nofoaga lea sa fasiotia ai o matou uso, lea sa latalata i le laueleele o o matou tamā.

5 Ma sa oo ina ou toe alu atu i le aai faatasi ma le to’afā o o’u tagata, i le tupu, ina ia mafai ona ou iloa uiga o le tupu, ma ina ia mafai ona ou iloa pe mafai ona ou alu atu i totonu faatasi ma o’u tagata ma fai mo matou le laueleele i le filemu.

6 Ma sa ou alu atu i totonu i le tupu, ma sa osifeagaiga o ia ma a’u e mafai ona fai mo a’u le laueleele o Liae-Nifae, ma le laueleele o Seloma.

7 Ma sa poloai atu foi o ia ia o ese tagata o lona nuu mai le laueleele, ma sa matou o atu loa, o a’u ma o’u tagata i le laueleele, ina ia mafai ona fai mo i matou lava.

8 Ma sa amata ona matou fausia o fale, ma toe faalelei pa o le aai, ioe, o pa lava ia o le aai o Liae-Nifae, ma le aai o Seloma.

9 Ma sa amata ona matou galueaiina le eleele, ioe, i ituaiga uma o fatu, o fatu o sana, ma saito, ma karite, ma nea, ma seuma, ma fatu o laau ’aina o ituaiga eseese uma; ma sa amata ona matou fanafanau ma manuia i le laueleele.

10 O lenei o le poto ma le faitogafiti o le tupu o Lamana, ia aaumai ai lo’u nuu i le pologa, na tuu mai ai e ia le laueleele ina ia mafai ona fai mo i matou lava.

11 O lea sa oo ina ua mavae ona matou nonofo i le laueleele mo le va o tausaga e sefulu ma le lua sa amata ona popole le tupu o Lamana, ne’i tutupu malolosi a’e lo’u nuu i le laueleele, ma lē mafai ai ona latou faatoilalo i latou ma fai ai i latou ma pologa.

12 O lenei o i latou o ni tagata sa paie ma aifo i tupua; o lea sa latou mananao ai e fai i matou ma pologa, ina ia mafai ai ona latou ola faaloloto ai i galuega a o matou lima; ioe, ina ia mafai ai ona latou aai fiafia i lafu o o matou fanua.

13 O lea sa oo ai ina amata e le tupu o Lamana ona faaoso ona tagata ia latou finau ma o’u tagata; o lea na amata ai ona i ai o taua ma finauga i le laueleele.

14 Ona, i le sefulu tolu o tausaga o la’u nofoaiga i le nuu o Nifae, e mamao i le itu i saute o le nuu o Seloma, a’o faainu ma fafaga e o’u tagata a latou lafu manu, ma galueaiina o latou fanua, na osofaia i latou e se autau toatele a sa Lamanā ma amata ona fasioti i latou, ma ave a latou lafu, ma sana o a latou faatoaga.

15 Ioe, ma sa oo ina latou sosola, i latou uma ia sa lei maua, seia oo mai i le aai o Nifae, ma latou tagi mai ai ia te a’u mo se puipuiga.

16 Ma sa oo ina ’ou faa’auupegaina i latou i aufana, ma ufanafana, i pelu, ma simetea, ma uatogi, ma ma’ata, ma ituaiga eseese uma o ’auupega sa mafai ona matou faia, ma o a’u ma lo’u nuu sa matou o atu e tau faasaga ia sa Lamanā.

17 Ioe, o le malosi o le Alii sa matou o atu ai e tau faasaga ia sa Lamanā; ona o a’u ma lo’u nuu sa matou aioi malosi atu i le Alii ina ia laveai e ia i matou mai lima o o matou fili; ona sa fagua i matou i le manatuaina o le laveaiina o o matou tamā.

18 Ma sa afaafofoga mai le Atua ia matou tagi ma sa tali mai ia matou tatalo; ma sa matou o atu i lona malosi; ioe, sa matou o atu e faasaga ia sa Lamanā, ma sa matou fasiotia i le aso e tasi ma le po e tasi le tolu afe ma le fa sefulu ma le tolu; sa matou fasiotia i latou seia oo ina matou tutuliesea i latou mai lo matou laueleele.

19 Ma o a’u, i o’u lava lima, sa ou fesoasoani e tanumia o latou tagata oti. Ae faauta, sa ia te i matou le faanoanoa tele ma le tagiauē, i le lua selau fitu sefulu ma le iva o o matou uso sa fasiotia.