Ch’ol 5
Eb’ laj santil paab’anel neke’ok choq’ ralal ut xrab’in li Kristo rik’in li paab’aal—Chirix a’an, a’ lix k’ab’a’ li Kristo li neke’b’oqe’ wi’—Li rey aj Benjamin na’elajin chiruheb’ naq junelik xaqxooqeb’, chi ink’a’ te’eek’anq sa’ li chaab’il k’anjel. Wan na 124 chihab’ ma nayo’la li Kristo.
1 Ut anajwan, kik’ulman naq chirix naq li rey aj Benjamin kiraatinaheb’ lix tenamit chi jo’kan, kixtaqla sa’ xyanqeb’, ut kiraj xnawb’al rik’in lix tenamit ma neke’xpaab’ li aatin li kixye chaq reheb’.
2 Ut chixjunileb’ ke’xjap re chi junajeb’ xyaab’ xk’ux, chixyeeb’al: Yaal, naqapaab’ chixjunil li aatin li xaye qe; ut jo’kan ajwi’, naqanaw chirix lix tz’aqalil re ru ut lix yaalalil, xb’aan lix Musiq’ li Qaawa’ Q’axal Nim Xwankil, li xk’anjela jun li nimla ajalok qe, malaj re li qach’ool, jo’kan naq maak’a’ chik li qajom re xb’aanunkil li bmaa’usilal; re b’an xb’aanunkil rajlal li chaab’ilal.
3 Ut laa’o ajwi’ qajunes, sa’ xk’ab’a’ lix chaab’ilal li Dios li maak’a’ roso’jik, ut lix k’utb’esihom lix Musiq’, nim ru li qilom chirix li k’a’ru taachalq; ut wi ta taa’ajmanq ru, tooruuq raj chi aatinak jo’ profeet chirix chixjunil li k’a’aq re ru.
4 Ut a’an li paab’aal li wanjenaq qik’in chirix li k’a’aq re ru kixye qe li qarey li xk’amok qe chixnawb’al li xnimal ru na’leb’ a’in, li nasaho’ wi’ qach’ool rik’in a’ sahil ch’oolejil a’in li q’axal nim.
5 Ut wan qach’ool chi ok sa’ jun li asumwank rik’in li qaDios re xb’aanunkil li naraj a’an, ut re ab’ink chiru lix taqlahom sa’ chixjunil li k’a’aq re ru tooxtaqla wi’, chiru chixjunil li rela’ li qakutan, re naq ink’a’ taqak’am sa’ qab’een jun li brahilal li maajo’q’e na’oso’, jo’ chanru yeeb’il xb’aan li canjel, re naq ink’a’ too’uk’aq chire li sek’ re lix josq’il li Dios.
6 Ut anajwan, a’ineb’ li aatin kiraj li rey aj Benjamin rik’ineb’, ut chi jo’kan kixye reheb’: Xeye li aatin li kiwaj; ut li sumwank li kek’uub’ a’an jun li sumwank tiik.
7 Ut anajwan, sa’ xk’ab’a’ li sumwank li kek’uub’, laa’ex aralal xk’ajol li Kristo taayehe’q eere, li ralal, ut lix rab’in; xb’aan naq k’ehomaq reetal, sa’ li kutan a’in bxexrala sa’ musiq’ejil, xb’aan naq nekeye naq jalb’il lee cch’ool xb’aan xpaab’ankil lix k’ab’a’; jo’kan naq dyo’lajenaqex rik’in a’an, ut okenaqex choq’ eralal ut xrab’in.
8 Ut rub’el li jolomej a’in aach’ab’anb’ilex, ut bmaajun chik jolomej wan naru tex’ach’ab’aaq wi’. Maajun chik ck’ab’a’ej k’eeb’il nachal wi’ li kolb’a-ib’; jo’kan ut, nawaj raj naq dchek’ul sa’ eeb’een lix k’ab’a’ li Kristo, chejunilex li xex’ok sa’ li sumwank rik’in li Dios naq tex’ab’inq chiru toj sa’ roso’jik lee yu’am.
9 Ut taak’ulmanq naq ani nab’aanunk re a’in taatawe’q sa’ xnim uq’ li Dios, xb’aan naq tixnaw li k’ab’a’ej li b’oqb’il wi’; xb’aan naq taab’oqe’q rik’in lix k’ab’a’ li Kristo.
10 Ut anajwan taak’ulmanq, naq ani ink’a’ tixk’ul sa’ xb’een lix k’ab’a’ li Kristo, tento taab’oqe’q rik’in ajalan chik k’ab’a’ej; jo’kan naq naxtaw rib’ sa’ bxtz’e uq’ li Dios.
11 Ut tinwaj raj naq chijultiko’q ajwi’ eere, naq a’in li ak’ab’a’ej li kinye naq tink’e eere li maajo’q’e taasachmanq reetalil, ka’ajwi’ xb’aan q’etok aatin; jo’kan ut, ilomaq eerib’ re naq ink’a’ texq’etoq aatin, re naq ink’a’ taasachmanq reetalil li k’ab’a’ej sa’ lee ch’ool.
12 Ninye eere, tinwaj raj naq chijultiko’q eere naq junelik achek’uula chi tz’iib’anb’il li k’ab’a’ej sa’ lee ch’ool, re naq moko tawb’ilaqex ta sa’ xtz’e uq’ li Dios, re b’an teerab’i ut teenaw ru lix yaab’ kuxej li texb’oqe’q wi’, ut jo’kan ajwi’ li k’ab’a’ej li texxb’oq wi’.
13 Xb’aan naq chan ta wi’ ru naq junaq winq atixnaw ru laj eechal k’anjel li moko xk’anjelak ta wi’ chiru, ut li moko nawb’il ta ru xb’aan, ut li najt wan rik’in lix k’oxlahom ut li rajom lix ch’ool?
14 Ut jo’kan wi’chik, ma naxchap tab’i’ junaq winq lix b’uur li rech kab’al, ut naxkanab’ chi wank rik’in? Ink’a’ b’an, moko tixkanab’ ta chi tzekank sa’ xyanqeb’ lix ketomq; taaralinasi b’an, ut taarisi chaq. Ninye eere, naq jo’kan ajwi’ taa’uxq sa’ eeyanq laa’ex wi ink’a’ nekenaw li k’ab’a’ej li b’oqb’ilex wi’.
15 Jo’kan ut, tinwaj raj naq junelik xaqxooqex ut ink’a’ chex’eek’anq, junelik chinumtaq eerik’in li chaab’il k’anjel, re naq li Kristo, li Qaawa’ Dios Q’axal Nim Xwankil, atexxtz’ap choq’ reechanihom, re naq k’amb’ilaqex sa’ choxa, re naq taawanq eekolb’al li junelik nakana, ut eeyu’am chi junelik, sa’ xk’ab’a’ lix chaab’ilal xna’leb’, ut lix wankilal, ut lix tiikal ru xna’leb’, ut li ruxtaan a’an li bkiyo’ob’tesink re chixjunil li k’a’aq re ru, sa’ choxa ut sa’ ch’och’, li wan choq’ Dios sa’ xb’een chixjunil. Amen.