1 Thiab nim no tau muaj tias tej kev tsim txom uas tau ua rau lub koom txoos los ntawm cov tsis ntseeg tau rais los huaj vam loj heev ua rau cov ntseeg pib yws yws, thiab yws rau lawv cov thawj coj txog tej xwm txheej; thiab lawv tau yws rau Amas. Thiab Amas tau piav tej teeb meem rau lawv tus vaj ntxwv, Mauxiyas. Thiab Mauxiyas tau sab laj nrog nws cov pov thawj.

2 Thiab tau muaj tias vaj ntxwv Mauxiyas tau xa ib co lus tshaj mus thoob plaws rau thaj av ib puag ncig tias yuav tsum tsis txhob muaj ib tug tsis ntseeg tsim txom ib tug twg uas zwm rau hauv Vajtswv lub koom txoos.

3 Thiab tau muaj ib lo lus txib nruj thoob plaws tag nrho cov koom txoos tias yuav tsum tsis txhob muaj tej kev tsim txom nyob hauv lawv, es yuav tsum muaj kev xwm yeem rau txhua tus neeg;

4 Tias lawv yuav tsum tsis txhob cia txoj kev khav theeb los sis kev muab hlob los thab lawv txoj kev thaj yeeb; tias txhua tus neeg yuav tsum saib nws tej kwv tij zej zog ib yam li nws tus kheej, siv lawv tus kheej tej tes ua hauj lwm los yug lawv.

5 Muaj tseeb tiag, thiab tag nrho lawv tej pov thawj thiab tej xib hwb yuav tsum siv lawv tus kheej tej tes ua hauj lwm los yug lawv, nyob tag nrho hauv txhua lub caij tsuas yog thaum muaj mob, los sis thaum xav tau kev pab heev xwb; thiab thaum ua tej yam no, lawv tau muaj Vajtswv txoj kev zoo.

6 Thiab tau pib muaj kev thaj yeeb ntau nyob hauv thaj av; thiab cov neeg tau pib muaj coob heev, thiab tau pib khiav ri niab mus deb rau saum lub ntiaj teb daim av, muaj tseeb tiag, mus rau sab ped thiab sab nrad, rau sab hnub tuaj thiab sab hnub poob, tau ua tej nroog loj thiab tej zos nyob thoob plaws tag nrho txhua ceg ntawm thaj av.

7 Thiab tus Tswv tau los xyuas lawv thiab tau ua kom lawv huaj vam, thiab lawv tau rais los mus ua ib haiv neeg coob thiab nplua nuj.

8 Nim no Mauxiyas cov tub yog ib co ntawm cov tsis ntseeg; thiab Amas ib tug tub los kuj nrog lawv, nws hu ua Amas, raws li nws txiv; txawm li ntawd los, nws tau rais los ua ib tug neeg phem thiab pe dab pe mlom heev. Thiab nws yog ib tug neeg muaj lus ntau, thiab tau hais tej lus dag ntxias ntau rau cov neeg; yog li ntawd nws tau coj cov neeg coob leej mus ua raws li nws tej kev tsis ncaj ncees.

9 Thiab nws tau rais los ua ib qho uas khaum kev heev rau txoj kev huaj vam ntawm Vajtswv lub koom txoos; nyiag coj tej neeg tej siab tej ntsws mus; tau ua muaj kev sib cav cov nyom nyob hauv cov neeg; tau muab sij hawm rau Vajtswv tus yeeb ncuab siv nws lub hwj chim rau saum lawv.

10 Thiab nim no tau muaj tias thaum nws tseem tab tom mus ncig rhuav Vajtswv lub koom txoos, vim nws tau mus ncig ntsiag to nrog Mauxiyas cov tub nrhiav ua kom lub koom txoos puas tsuaj, thiab mus coj tus Tswv cov neeg kom mus yuam kev, mus tsis raws li Vajtswv tej lus txib, los sis vaj ntxwv tej—

11 Thiab ib yam li uas kuv tau hais rau nej lawm, thaum lawv tseem tab tom mus ncig tawm tsam Vajtswv, saib seb, tus Tswv tus tim tswv tau tshwm sim los rau lawv; thiab nws tau nqis los zoo li nyob hauv ib tau huab; thiab nws tau hais lus zoo li ib lub suab xob quaj, uas tau ua rau ntiaj teb co qeeg nkaws rau ntawm qhov uas lawv sawv;

12 Thiab lawv tau ceeb xav tsis tag li, ua rau lawv qaug rau hauv av, thiab tsis to taub tej lus uas nws tau hais rau lawv.

13 Txawm li ntawd los nws tau hu lawv dua hais tias: Amas, cia li sawv thiab sawv los, vim yog vim li cas koj thiaj li tsim txom Vajtswv lub koom txoos? Vim tus Tswv tau hais tias: Lub no yog kuv lub koom txoos, thiab kuv yuav txhim tsa nws; thiab yuav tsis muaj yam dab tsi rhuav tshem nws tau, tsuas yog ntshai kuv cov neeg tej kev txog txhaum xwb.

14 Thiab tus tim tswv, rov qab hais dua tias: Saib seb, tus Tswv tau hnov nws cov neeg tej lus thov, thiab kuj hnov tej lus thov ntawm nws tus tub qhe, Amas, tus uas yog koj txiv; vim nws tau thov nrog tej kev ntseeg ntau heev txog koj xwv kom koj yuav raug coj los mus paub qhov tseeb; yog li ntawd, vim lub ntsiab no kuv thiaj tau los ua kom koj paub txog Vajtswv lub hwj chim thiab txoj cai, xwv kom nws tej tub qhe tej lus thov yuav raug teb raws li lawv tej kev ntseeg.

15 Thiab nim no saib seb, koj puas yuav muaj peev xwm tsis ntseeg Vajtswv lub hwj chim? Vim saib seb, tsis yog kuv lub suab ua rau av tshee qeeg nkaws los? Thiab koj puas muaj peev xwm tsis pom kuv nyob ntawm koj xub ntiag? Thiab kuv twb yog raug Vajtswv xa los.

16 Nim no kuv hais rau koj tias: Cia li mus, thiab nco ntsoov koj tej yawg koob tej kev ua poob cev qhev nyob hauv thaj av Helas, thiab nyob hauv thaj av Nifais; thiab nco ntsoov saib tej uas nws tau ua rau lawv lawm loj npaum li cas; vim lawv twb raug ua poob cev qhev, thiab nws tau tso lawv dim. Thiab nim no kuv hais rau koj, Amas, cia li mus, thiab tsis txhob nrhiav ua kom lub koom txoos puas tsuaj ntxiv lawm, xwv kom lawv tej lus thov yuav raug teb, thiab li no txawm tias koj yuav ua kom koj tus kheej raug ntiab tawm.

17 Thiab nim no tau muaj tias tej lus no yog cov lus kawg uas tus tim tswv tau hais rau Amas, thiab nws tau ncaim mus lawm.

18 Thiab nim no Amas thiab cov uas tau nrog nws rov qab tau vau rau hauv av dua, vim lawv txoj kev xav tsis tag ntau heev li; vim lawv tau pom tus Tswv ib tug tim tswv ntawm lawv qhov muag kiag; thiab nws lub suab nrov cuag suab xob quaj, uas tau ua lub ntiaj teb co qeeg nkaws; thiab lawv paub lawm tias tsis yog dab tsi li tsuas yog Vajtswv lub hwj chim xwb thiaj ua tau lub ntiaj teb co qeeg nkaws thiab ua nws tshee qeeg nkaws zoo li nws twb yuav tawg faib ua ob peb daig.

19 Thiab nim no Amas txoj kev xav tsis tag ntau heev li ces ua rau nws cia li rais los mus ruam hais tsis tau lus, ces nws qhib tsis tau nws lub qhov ncauj; muaj tseeb tiag, thiab nws tau rais los mus qaug zog, kawg tias nws txav tsis tau nws tej tes; yog li ntawd nws tau raug cov ua nrog nws tuaj muab nqa, thiab ev nws yam qaug qev, mus txog thaum nws raug muab tso rau ntawm nws txiv xub ntiag.

20 Thiab lawv tau qhia rau nws txiv tag nrho txhua yam uas tau tshwm sim los rau lawv lawm; thiab nws txiv tau zoo siab, vim nws paub lawm tias nws yog Vajtswv lub hwj chim.

21 Thiab nws tau kom ib pab neeg coob coob yuav tsum tuaj sib sau ua ke xwv kom lawv yuav ua tim khawv yam uas tus Tswv tau ua rau nws tus tub, thiab kuj rau cov uas nrog nws.

22 Thiab nws tau kom cov pov thawj yuav tsum sib sau tuaj ua ke; thiab lawv pib yoo mov, thiab thov tus Tswv lawv tus Vajtswv xwv kom nws yuav qhib Amas lub qhov ncauj, xwv kom nws yuav hais tau lus, thiab xwv kom nws tej caj npab tej ceg yuav txais tau lawv tej zog—xwv kom cov neeg tej qhov muag yuav raug qhib kom pom kev thiab paub txog Vajtswv txoj kev zoo thiab lub yeeb koob.

23 Thiab tau muaj tias tom qab uas lawv tau yoo mov thiab tau thov Vajtswv tau ncua li ob hnub ob hmos lawm, Amas tej caj npab tej ceg tau txais lawv tej zog, thiab nws tau sawv ntsug thiab tau pib hais lus rau lawv, qhia lawv kom cia li zoo siab:

24 Vim, nws tau hais tias, kuv tau hloov siab lees txim ntawm kuv tej kev txog txhaum, thiab tau raug tus Tswv txhiv dim; saib seb kuv tau yug los ntawm tus Ntsuj Plig.

25 Thiab tus Tswv tau hais rau kuv hais tias: Tsis txhob xav tsis tag tias tib neeg sawv daws, muaj tseeb tiag, tej txiv neej thiab tej poj niam, tag nrho txhua haiv neeg, txhua xeem neeg, txhua yam lus thiab cov neeg sawv daws, yuav tsum yug dua tshiab; muaj tseeb tiag, yug los ntawm Vajtswv, pauv tawm ntawm lawv tej kev ntiaj teb thiab ntawm txoj kev poob, los rau ib qho chaw ntawm txoj kev ncaj ncees, raug Vajtswv txhiv dim, ciaj los mus ua nws tej tub thiab tej ntxhais;

26 Thiab li ntawd lawv rais los mus ua neeg tshiab; thiab tsuas yog lawv ua li no xwb, yog tsis li ces lawv tsis muaj ntiag tug nyob mus rau Vajtswv lub nceeg vaj.

27 Kuv hais rau nej tias, tsuas yog li no xwb, tsis li ces lawv yuav tsum raug ntiab khiav tawm; thiab kuv paub li no, vim kuv twb tau zoo li raug ntiab tawm.

28 Txawm li ntawd los, tom qab tau ntsib kev txom nyem ntau, hloov siab lees txim yuav luag tuag, nyob hauv txoj kev zam txim tus Tswv tau pom zoo rub kuv tawm ntawm ib txoj kev kub hnyiab uas nyob mus ib txhis, thiab kuv tau yug los ntawm Vajtswv.

29 Kuv tus ntsuj plig tau raug txhiv dim los ntawm txoj kev iab thiab tej kev raug khi ntawm txoj kev tsis ncaj ncees. Kuv tau nyob hauv lub qhov uas tsaus ntuj tshaj plaws li; tiam sis nim no kuv pom Vajtswv txoj kev kaj uas zoo kawg nkaus. Kuv tus ntsuj plig tau raug tsim txom nrog txoj kev tsim txom uas nyob mus ib txhis; tiam sis kuv raug pab rub dim, thiab kuv tus ntsuj plig tsis muaj mob ib zaug ntxiv li lawm.

30 Kuv tau tsis kam lees kuv tus Txhiv Dim, thiab tau xyeeb tej uas peb tej yawg koob tau hais lawm; tiam sis nim no lawv yuav pom ua ntej tias nws yuav los, thiab nws yuav nco ntsoov txhua tus neeg uas nws tau tsim lawm, nws tus kheej yuav ua kom neeg sawv daws paub nws.

31 Muaj tseeb tiag, txhua lub hauv caug yuav tsum tau txhos, txhua tus nplaig yuav tau lees rau nws. Muaj tseeb tiag, twb yuav yog thaum hnub kawg, thaum txhua tus neeg yuav sawv los txiav txim ntawm nws, ces lawv yuav lees tias nws yog Vajtswv; ces lawv, cov uas ua neej nyob hauv ntiaj teb no uas tsis yuav Vajtswv, yuav lees tias txoj kev txiav txim ntawm txoj kev rau txim uas nyob mus ib txhis yeej ncaj rau saum lawv; thiab lawv yuav qeeg, thiab tshee hnyo, thiab caws rau hauv qab ntawm nws lub qhov muag uas nrhiav pom tag ib puas yam tsav.

32 Thiab nim no tau muaj tias Amas tau pib mus qhia cov neeg txij li lub sij hawm no mus, thiab cov uas tau nrog Amas thaum lub sij hawm tus tim tswv tau tshwm sim los rau lawv, tau mus ncig thoob plaws rau txhua thaj av, tshaj tawm rau cov neeg tag nrho txog tej xwm uas lawv tau hnov thiab tau pom, thiab qhuab qhia Vajtswv txoj lus hauv ntau txoj kev txom nyem, raug tsim txom heev los ntawm cov uas tsis ntseeg, raug lawv ntau tus ntaus.

33 Tiam sis txawm tias tag nrho tej no los, lawv tseem tau faib ntau yam kev nplij siab rau cov ntseeg, ua kom lawv tej kev ntseeg ruaj khov kho, thiab ntuas kom lawv ua siab ntev nyiaj thiab ua tiag tiv coj Vajtswv tej lus txib.

34 Thiab plaub tug ntawm lawv yog Mauxiyas cov tub; thiab lawv cov npe yog Amoos, thiab Aloos, thiab Oonaws, thiab Heenais; cov no yog cov npe ntawm Mauxiyas cov tub.

35 Thiab lawv tau mus ncig thoob plaws rau tag nrho hauv thaj av Xalahelas, thiab rau tag nrho cov neeg uas vaj ntxwv Mauxiyas kav, rau siab ntso npaj kho tag nrho tej uas lawv tau ua rhuav piam rau cov ntseeg lawm, lees txim tag nrho lawv tej kev txog txhaum, thiab tshaj tawm tag nrho tej uas lawv tau pom, thiab piav tej kev qhia tej uas yuav muaj los yav tom ntej thiab tej vajlugkub rau tag nrho cov uas xav hnov lawv.

36 Thiab xws li no lawv tau yog ib co cuab yeej nyob hauv tus Tswv tes uas coj ntau leej los paub txog qhov tseeb, muaj tseeb tiag, los paub txog lawv tus Txhiv Dim.

37 Thiab lawv tau koob hmoov kawg! Vim lawv tau tshaj tawm kev thaj yeeb; lawv tau tshaj tawm txoj moo zoo ntawm qhov zoo; thiab lawv kuj tau tshaj rau cov neeg tias tus Tswv yog tus kav.