1 Ma o lenei sa faia e le tupu o Mosaea ia faapotopoto faatasi le nuu.

2 O lenei sa lē toatele na’uā fanau a Nifae, pe sa toatele na’uā i latou o ē na tupuga mai ia Nifae, e pei o ^atagata sa i ai o Sara’emila, o lē na tupuga mai ia ^eMoleka, ma i latou o ē na o mai faatasi ma ia i le vao.

3 Ma sa lē toatele na’uā tagata o Nifae ma tagata o Sara’emila e pei o tagata sa Lamanā sa i ai; ioe, sa lē tusa ma le afa o sa Lamanā lo latou toatele.

4 Ma o lenei sa faapotopoto faatasi tagata uma o Nifae, ma tagata uma foi o Sara’emila, ma sa latou faapotopoto faatasi i ni vaega se lua.

5 Ma sa oo ina faitau atu e Mosaea, ma ia faia ia faitau atu i lona nuu, talafaamaumau o Senifa; ioe, sa faitau atu e ia talafaamaumau o le nuu o Senifa, mai le taimi na latou tuua ai le laueleele o Sara’emila seia oo ina latou toe foi mai.

6 Ma sa faitau atu foi e ia le tala o Alema ma ona uso, ma o latou puapuaga uma, mai le taimi na latou tuua ai le laueleele o Sara’emila seia oo i le taimi na latou toe foi mai ai.

7 Ma o lenei, ina ua uma ona faitau atu e Mosaea talafaamaumau, sa to’ia ona tagata o ē sa nonofo pea i le laueleele i le ofo ma le meia.

8 Ona sa latou lē iloa se mea e mafaufau i ai; ona ina ua latou vaai atu ia i latou o e na lavea’iina ^amai le pologa sa faatumulia i latou i le olioli tele lava.

9 O lenei foi, ina ua latou mafaufau ifo i o latou uso o ē ua fasiotia e sa Lamanā sa faatutumulia i latou i le faanoanoa, ma oo ina maligi o latou loimata e tele i le faanoanoa.

10 O lenei foi, ina ua latou mafaufau ifo i le vave o le agalelei o le Atua, ma lona mana i le lavea’iina o Alema ma ona uso mai lima o sa Lamanā ma le pologa, sa latou si’itia o latou leo ma momoli atu le faafetai i le Atua.

11 O lenei foi, ina ua latou mafaufau ifo ia sa Lamanā, o ē o o latou uso, e uiga i lo latou tulaga agasala ma le eleelea, sa faatumulia i latou i le ^atigā ma le mafatia mo le manuia o o latou ^eagaga.

12 Ma sa oo ina o i latou o ē o fanau a Amulona ma ona uso, o ē na latou ave afafine o sa Lamanā e fai ma a latou avā, sa lē fiafia i amioga a o latou tamā, ma sa latou lē mananao ia toe ta’ua i latou i igoa o o latou tamā; o lea na latou ave ai i o latou lava luga le igoa o Nifae, ina ia mafai ona ta’ua i latou o fanau a Nifae ma faitauina i latou i totonu o e ua ta’ua o sa Nifaē.

13 Ma o lenei sa ^afaitauina tagata uma o Sara’emila faatasi ma sa Nifaē, ma sa faia lenei mea ona sa lē faaee atua le malo i luga o se tasi ae na’o i latou o ē na tupuga mai ia Nifae.

14 Ma o lenei sa oo ina ua uma ona faai’u e Mosaea ona tautala atu ma faitau atu i le nuu, sa manao o ia ia tautala atu foi Alema i le nuu.

15 Ma sa tautala atu Alema ia te i latou, a’o latou potopoto faatasi i ni vaega toatele, ma sa alu atu o ia mai le tasi vaega i le isi, ma tala’i atu i tagata le salamo ma le faatuatua i le Alii.

16 Ma sa apoapoa’i atu o ia i tagata o Limae ma ona uso, i latou uma ia na lavea’iina mai le pologa, ina ia latou manatua o le Alii lava na lavea’iina i latou.

17 Ma sa oo ina ua uma ona a’oa’o atu e Alema le nuu i mea e tele, ma faai’u e ia ona tautala atu ia te i latou, sa oo ina manao le tupu o Limae ia papatiso o ia; ma sa mananao foi lona nuu uma ia papatisoina i latou.

18 O lea na alu atu ai Alema i totonu o le vai ma ^apapatiso i latou; ioe, sa papatiso e ia i latou i le ala na papatiso ai e ia ona uso i ^evai o Mamona; ioe, ma o le toatele o ē na papatiso e ia na auai i le ekalesia a le Atua; ma sa latou faia lenei mea ona o lo latou talitonu i upu a Alema.

19 Ma sa oo ina tuu atu e le tupu o Mosaea ia Alema ia faatutu e ia ni aulotu i le laueleele atoa o Sara’emila; ma tuu atu ia te ia le ^amana e faauu ai faitaulaga ma a’oa’o i luga o aulotu taitasi.

20 O lenei sa faia lenei mea ona o le toatele na’uā o tagata sa lē mafai ona pulea i latou uma e se a’oa’o e toatasi; pe mafai foi e i latou uma ona lagona le afioga a le Atua i se faapotopotoga e tasi;

21 O lea na latou faapotopoto faatasi ai i latou lava i ni vaega eseese, ua ta’ua o aulotu; sa tofu aulotu taitasi ma o latou faitaulaga ma o latou a’oa’o, ma sa taitasi le faitaulaga ma tala’i atu le afioga e pei ona tuuina mai ia te ia e le fofoga o Alema.

22 Ma o lea, e ui ina sa tele aulotu sa i ai ae o i latou uma o le ^aekalesia e tasi; ioe, o le ekalesia lava a le Atua; ona sa leai se mea sa tala’ia i aulotu uma vaganā ai le salamo ma le faatuatua i le Atua.

23 Ma o lenei e fitu aulotu sa i ai i le laueleele o Sara’emila. Ma sa oo ina po o ai lava sa mananao latou te ave i o latou luga le ^asuafa o Keriso, po o le Atua, sa latou auai i aulotu a le Atua.

24 Ma sa ta’ua i latou o le ^anuu o le Atua. Ma sa liligi ifo e le Alii lona Agaga i luga o i latou, ma sa faamanuiaina i latou, ma uluuluola i le laueleele.