1 Thiab tau muaj tias cov Neeg Lamas tus vaj ntxwv pom zoo rau Amuloos; yog li ntawd, cov Neeg Lamas tus vaj ntxwv cia rau nws thiab nws cov kwv tij xaiv tsa cov xib hwb rau nws cov neeg, muaj tseeb tiag, twb yog rau cov neeg uas nyob hauv thaj av Seloos, thiab hauv thaj av Sailos, thiab hauv thaj av Amuloos.

2 Vim cov Neeg Lamas tau tag nrho tej thaj av no los ua lawv tug; yog li ntawd, cov Neeg Lamas tus vaj ntxwv xaiv tsa vaj ntxwv los kav tag nrho tej thav av no huv tib si.

3 Thiab nim no cov Neeg Lamas tus vaj ntxwv lub npe hu ua Lamas, uas yog hu raws li nws txiv lub npe; thiab yog li ntawd thiaj muab nws hu ua vaj ntxwv Lamas. Thiab nws ua vaj ntxwv kav ib co neeg coob.

4 Thiab nws xaiv tsa xib hwb los ntawm Amuloos cov kwv tij nyob rau txhua thaj av uas nws cov neeg nyob; thiab yog li no thiaj li pib muab Nifais yam lus coj los qhia nyob thoob plaws hauv cov Neeg Lamas.

5 Thiab lawv yog ib co neeg uas ib leeg ua phooj ywg rau ib leeg; txawm li ntawd los lawv twb tsis paub Vajtswv; thiab Amuloos cov kwv tij twb tsis qhia ib yam dab tsi rau lawv txog tus Tswv lawv tus Vajtswv, thiab tsis qhia Mauxes txoj kev cai; thiab lawv twb tsis qhia Anpinadais tej lus rau lawv thiab;

6 Tiam sis Amuloos cov kwv tij qhia kom lawv khaws lawv phau ceev xwm txheej, thiab kom lawv ib leeg sau ntawv rau ib leeg.

7 Thiab yog li ntawd cov Neeg Lamas pib nplua nuj tuaj, thiab ib leeg pib ua luam rau ib leeg thiab vam meej heev, thiab pib ua ib co neeg txawj ntxias thiab txawj ntse, hais txog kev txawj ntse ntawm neeg ntiaj teb, muaj tseeb tiag, ib co neeg txawj dag ntxias heev, nyiam ua txhua yam kev phem thiab kev tua txeeb tej khoom, tsuas yog tseg kiag hauv lawv cov kwv tij xwb.

8 Thiab nim no tau muaj tias Amuloos pib siv hwj chim khoo Amas thiab nws cov kwv tij, thiab pib tsim txom Amas, thiab ua kom nws cov me nyuam tsim txom Amas thiab nws cov kwv tij cov me nyuam.

9 Vim Amuloos paub Amas, paub tias nws yog vaj ntxwv Nau-as ib tug pov thawj, thiab paub tias Amas yog tus uas ntseeg Anpinadais tej lus thiab raug ntiab tawm ntawm vaj ntxwv Nau-as xub ntiag, thiab yog li ntawd nws npau taws rau Amas; txawm tias nws yuav tsum ywj rau vaj ntxwv Lamas tswj hwm los, nws tseem siv txoj cai kav Amas cov neeg, thiab muab hauj lwm rau lawv ua, thiab tso neeg saib hauj lwm zov lawv.

10 Thiab tau muaj tias lawv tej kev txom nyem hnyav heev li uas lawv tau pib sib sib zog thov Vajtswv.

11 Thiab Amuloos txib kom lawv tsum lawv tej kev thov; thiab nws tso neeg zov nyas zov lawv, kom tus uas lawv pom thov Vajtswv ces tus ntawd yuav raug muab tua.

12 Thiab Amas thiab nws cov neeg thiaj tsis tsa lawv lub suab rau tus Tswv lawv tus Vajtswv, tiam sis lawv tau thov nws kawg siab kawg ntsws; thiab tus Tswv lawv tus Vajtswv twb paub txog tej kev xav ntawm lawv lub siab.

13 Thiab tau muaj tias tus Tswv lub suab tau los rau lawv thaum lawv raug txom nyem, hais tias: Cia li tsa nej lub taub hau thiab cia li zoo siab, vim kuv paub txog kev khi lus uas nej tau khi rau kuv; thiab kuv yuav khi lus nrog kuv cov neeg thiab coj lawv dim ntawm kev ua qhev.

14 Thiab kuv kuj yuav ua rau tej nra uas nyob saum nej xub pwg kom sib, xwv kom nej tsis nco tias muaj tej nra ntawd nyob saum nej nraub qaum, tsis hais thaum nej tseem ua qhev los yog; thiab kuv yuav ua li no xwv kom nej yuav ua tim khawv txog kuv txij li no mus, thiab xwv kom nej yuav paub tseeb tias kuv, tus Tswv uas yog Vajtswv, yeej los saib xyuas kuv cov neeg thaum lawv muaj kev txom nyem.

15 Thiab nim no tau muaj tias tus Tswv tau ua rau tej nra uas cov Neeg Lamas tso rau Amas thiab nws cov kwv tij kom sib; muaj tseeb tiag, tus Tswv tau txhawb lawv lub dag lub zog es lawv thiaj ris tau lawv tej nra hnyav yam yooj yim, thiab lawv thiaj zoo siab hlo thiab ua siab ntev ywj rau tus Tswv lub siab nyiam tag nrho.

16 Thiab tau muaj tias lawv txoj kev ua siab ntev thiab lawv txoj kev ntseeg yeej loj kawg nkaus tus Tswv lub suab thiaj rov qab los rau lawv dua, hais tias: Cia li zoo siab hlo, vim tag kis kuv yuav coj nej dim tawm ntawm kev ua qhev.

17 Thiab nws hais rau Amas tias: Koj cia li coj cov neeg no, thiab kuv mam nrog koj mus thiab coj cov neeg no dim tawm ntawm kev ua qhev.

18 Nim no tau muaj tias thaum tsaus ntuj Amas thiab nws cov neeg sau lawv tej tsiaj los ua ke, thiab lawv tej qoob loos thiab; muaj tseeb tiag, twb yog lawv siv tag nrho ib hmos sau lawv tej tsiaj los ua ke.

19 Thiab thaum sawv ntxov tus Tswv ua kom cov Neeg Lamas ua dab ntub ntsiag zog, muaj tseeb tiag, thiab tag nrho lawv cov neeg saib hauj lwm tsaug zog looj lom.

20 Thiab Amas thiab nws cov neeg tau khiav mus rau hauv hav zoov; thiab thaum lawv mus tau ib hnub lawm lawv rub lawv tej tsev pheeb suab ntaub nyob hauv ib lub kwj ha, thiab lawv muab lub kwj ha ntawd hu ua Amas, vim nws yog tus coj lawv kev nyob hauv hav zoov.

21 Muaj tseeb tiag, thiab nyob hauv lub kwj ha Amas, lawv ua tsaug rau Vajtswv kawg siab kawg ntsws vim nws hlub tshua lawv, thiab ua rau lawv tej nra sib, thiab tau coj lawv dim ntawm kev ua qhev, vim lawv twb ua qhev, thiab twb tsis muaj leej twg muaj peev xwm tso lawv dim tsuas yog tus Tswv lawv tus Vajtswv xwb.

22 Thiab lawv ua tsaug rau Vajtswv, muaj tseeb tiag, tag nrho lawv cov txiv neej thiab tag nrho lawv cov poj niam thiab tag nrho lawv cov me nyuam uas txawj hais lus tsa lawv lub suab qhuas lawv tus Vajtswv.

23 Thiab nim no tus Tswv hais rau Amas tias: Koj maj nrawm nroos thiab coj koj thiab cov neeg no tawm ntawm thaj av no mus, vim cov Neeg Lamas twb tsim lawm thiab tab tom caum koj qab; yog li ntawd koj cia li tawm ntawm thaj av no mus, thiab kuv yuav cheem cov Neeg Lamas nyob hauv lub kwj ha no xwv kom lawv tuaj caum tsis tau cov neeg no ntxiv.

24 Thiab tau muaj tias lawv tau khiav tawm ntawm lub kwj ha ntawd mus, thiab mus rau hauv hav zoov.

25 Thiab tom qab lawv mus rau hauv hav zoov tau kaum ob hnub lawv mus txog rau hauv thaj av Xalahelas; thiab vaj ntxwv Mauxiyas kuj tos txais lawv nrog kev xyiv fab.