1 Pea naʻe hoko ʻo pehē naʻe fakaʻau ʻo ʻofeina ʻa ʻAmulone ʻi he ʻao ʻo e tuʻi ʻo e kau Leimaná; ko ia, naʻe tuku kiate ia mo hono kāingá ʻe he tuʻi ʻo e kau Leimaná ke fokotuʻu ʻa kinautolu ko e kau faiako ki hono kakaí, ʻio, ki he kakai naʻe ʻi he fonua ko Semeloní, pea ʻi he fonua ko Sailomé, pea ʻi he fonua ko ʻAmuloné.

2 He kuo maʻu ʻe he kau Leimaná ʻa e ngaahi fonuá ni kotoa pē; ko ia, kuo fakanofo ʻe he tuʻi ʻo e kau Leimaná ha ngaahi tuʻi ki he ngaahi fonua kotoa pē ko ʻení.

3 Pea ko ʻeni ko e hingoa ʻo e tuʻi ʻo e kau Leimaná ko Leimana, he naʻe fakahuafa ia ki he huafa ʻo ʻene tamaí; pea ko ia naʻe ui ia ko e tuʻi ko Leimaná. Pea ko e tuʻi ia ki ha kakai tokolahi.

4 Pea naʻá ne fakanofo ha kau faiako mei he kāinga ʻo ʻAmuloné ʻi he fonua kotoa pē naʻe maʻu ʻe hono kakaí; pea ko ia naʻe kamata ke akoʻi ʻa e lea ʻa Nīfaí ʻi he kakai kotoa pē ʻo e kau Leimaná.

5 Pea ko ha kakai nofo feʻofoʻofani ʻa kinautolu; ka naʻe ʻikai te nau ʻiloʻi ʻa e ʻOtuá; pea naʻe ʻikai foki akoʻi ʻa kinautolu ʻe he kāinga ʻo ʻAmuloné ʻi ha meʻa ʻe taha ʻoku kau ki he ʻEiki ko honau ʻOtuá, pe ko e fono ʻa Mōsesé; pea naʻe ʻikai foki te nau akoʻi kiate kinautolu ʻa e ngaahi lea ʻa ʻApinetaí;

6 Ka naʻa nau akoʻi ʻa kinautolu ke nau tauhi hanau lekooti, pea ke nau fetohiʻaki ʻiate kinautolu.

7 Pea ko ia naʻe kamata ke tupulekina ʻa e ngaahi koloa ʻa e kau Leimaná, pea naʻa nau kamata ke fefakatauʻaki ʻiate kinautolu, ʻo nau fakaʻau ke mālohi, ʻo kamata ke hoko ko ha kakai olopoto mo ʻiloʻilo, ʻi he poto ʻo e māmaní, ʻio, ko ha kakai olopoto ʻaupito, ʻo nau manako ʻi he ngaahi faʻahinga kotoa pē ʻo e fai angahalá mo e kaihaʻá, tuku kehe pē ʻi honau kāingá.

8 Pea ko ʻeni naʻe hoko ʻo pehē naʻe kamata ke pule ^afakamālohi ʻe ʻAmulone kia ʻAlamā mo hono kāingá, ʻo ne kamata ke fakatangaʻi ia, mo pule ke hanga ʻe heʻene fānaú ʻo fakatangaʻi ʻa ʻenau fānaú.

9 He naʻe ʻiloʻi ʻe ʻAmulone ʻa ʻAlamā, ko e ^ataha ia ʻo e kau taulaʻeiki ʻa e tuʻí, pea ko ia ia naʻe tui ki he ngaahi lea ʻa ʻApinetaí pea naʻe tuli ia ki tuʻa mei he ʻao ʻo e tuʻí, pea ko ia naʻá ne ʻita lahi ai kiate ia; he naʻá ne fakaongoongo ki he tuʻi ko Leimaná, ka neongo ia naʻá ne puleʻi fakamālohi ʻa kinautolu, ʻo hilifaki ha ngaahi ^bngāue kiate kinautolu, mo fokotuʻu ha kau pule ngāue ke angi ʻa kinautolu.

10 Pea naʻe hoko ʻo pehē naʻe lahi fau ʻa ʻenau faingataʻaʻiá ko ia naʻa nau kamata ai ke tangi lahi ki he ʻOtuá.

11 Pea naʻe fekau ʻe ʻAmulone kiate kinautolu ke tuku ʻenau tangí; ʻo ne fokotuʻu ha kau leʻo ke leʻohi ʻa kinautolu, pea ko ia kotoa pē ʻe ʻiloʻi ʻokú ne ui ki he ʻOtuá ke tāmateʻi ia.

12 Pea ko ʻAlamā mo hono kakaí naʻe ʻikai te nau lotu ʻi he leʻo-lahi ki he ʻEiki ko honau ʻOtuá, ka naʻa nau ^afakahā hake honau lotó kiate ia; pea naʻá ne ʻafioʻi ʻa e ngaahi fakakaukau ʻa honau lotó.

13 Pea naʻe hoko ʻo pehē naʻe ongo mai ʻa e leʻo ʻo e ʻEikí kiate kinautolu ʻi heʻenau ngaahi faingataʻaʻiá, ʻo folofola: Hanga hake homou ʻulú pea fiemālie, he ʻoku ou ʻiloʻi ʻa e fuakava kuo mou fai kiate aú; pea te u fuakava mo hoku kakaí pea fakahaofi ʻa kinautolu mei he nofo pōpulá.

14 Pea te u fakamaʻamaʻa foki ʻa e ngaahi kavenga kuo hilifaki ki homou ngaahi umá, ke ʻoua naʻa mou ongoʻi ia ʻi homou tuʻá, lolotonga hoʻomou ʻi he nofo pōpulá; pea te u fai ʻeni koeʻuhi ke mou tuʻu ko e kau ^afakamoʻoni kiate au ʻamui, pea ke mou ʻiloʻi fakapapau ko au ko e ʻEiki ko e ʻOtuá, ʻoku ou tāpuakiʻi hoku kakaí ʻi honau ngaahi ^bfaingataʻaʻiá.

15 Pea ko ʻeni naʻe hoko ʻo pehē naʻe fakamaʻamaʻa ʻa e ngaahi kavenga ʻa ia naʻe hilifaki kia ʻAlamā mo hono kāingá; ʻio, naʻe ^afakamālohi ʻa kinautolu ʻe he ʻEikí koeʻuhi ke nau lava ʻo fua faingofua ʻa ʻenau ngaahi ^bkavengá, pea nau fakaongoongo ʻi he fiefia mo e ^cfaʻa kātaki ki he finangalo kotoa pē ʻo e ʻEikí.

16 Pea naʻe hoko ʻo pehē naʻe lahi fau ʻa ʻenau tuí mo ʻenau faʻa kātakí ko ia naʻe toe ongo mai ai kiate kinautolu ʻa e leʻo ʻo e ʻEikí, ʻo folofola: Mou fiefia, he ʻi he ʻapongipongí te u fakahaofi ʻa kimoutolu mei he nofo pōpulá.

17 Pea naʻe folofola ia kia ʻAlamā: Ke ke muʻomuʻa koe ʻi he kakaí ni, pea te u ʻalu mo koe ʻo fakahaofi ʻa e kakaí ni mei he ^anofo pōpulá.

18 Ko ʻeni naʻe hoko ʻo pehē naʻe tānaki fakataha ʻe ʻAlamā mo hono kakaí ʻi he poʻulí ʻa ʻenau ngaahi takanga monumanu īkí, pea mo ʻenau kēlení foki; ʻio, naʻe feʻunga mo e poó hono kotoa ʻa ʻenau tānaki fakataha ʻa ʻenau ngaahi takanga monumanu īkí.

19 Pea ʻi he pongipongi haké naʻe pule ʻe he ʻEikí ke hoko ʻa e ^amohe maʻu ki he kau Leimaná, ʻio, pea naʻe mohe maʻu ʻa ʻenau kau pule ngāué kotoa pē.

20 Pea naʻe ʻalu atu ʻa ʻAlamā mo hono kakaí ki he feituʻu maomaonganoá; pea kuo nau fononga ʻi he ʻahó kotoa, pea nau fokotuʻu honau ngaahi fale fehikitakí ʻi ha teleʻa, pea naʻa nau ui ʻa e teleʻá ko ʻAlamā, koeʻuhí he naʻá ne taki ʻenau fononga ʻi he feituʻu maomaonganoá.

21 ʻIo, naʻa nau ʻoatu ʻa e ^afakafetaʻi lahi ʻi he teleʻa ko ʻAlamaá ki he ʻOtuá koeʻuhi ko ʻene ʻaloʻofa kiate kinautolú, mo fakamaʻamaʻa ʻenau ngaahi kavengá, peá ne fakahaofi ʻa kinautolu mei he nofo pōpulá; he naʻa nau nofo pōpula, pea naʻe ʻikai faʻa fakahaofi ʻa kinautolu ʻe ha taha tuku kehe ʻa e ʻEiki ko honau ʻOtuá pē.

22 Pea naʻa nau ʻoatu ʻa e fakafetaʻi ki he ʻOtuá, ʻio, ʻe honau kau tangata kotoa pē mo honau kau fefine kotoa pē pea mo ʻenau fānau kotoa pē ʻa ia naʻe lava ʻo leá naʻa nau hiki hake honau leʻó ʻi he fakafetaʻi ki honau ʻOtuá.

23 Pea ko ʻeni naʻe folofola ʻa e ʻEikí kia ʻAlamā: Ke ke fakavavevave peá ke ʻalu koe mo e kakaí ni mei he fonuá ni, he kuo ʻā hake ʻa e kau Leimaná pea ʻoku nau tuli ʻa kimoutolu; ko ia ke ke ʻalu mei he fonuá ni, pea te u taʻofi ʻa e kau Leimaná ʻi he teleʻá ni ke ʻoua te nau laka atu ʻi hono tuli ʻo e kakai ní.

24 Pea naʻe hoko ʻo pehē naʻa nau ʻalu atu mei he teleʻá, ʻo nau fai ʻenau fonongá ki he feituʻu maomaonganoá.

25 Pea kuo nau ʻi he feituʻu maomaonganoá ʻi he ʻaho ʻe hongofulu mā ua, pea naʻa nau aʻu ki he fonua ko Seilahemalá; pea naʻe tali ʻa kinautolu foki ʻe he tuʻi ko Mōsaiá ʻi he fiefia.