1 Idahaemi ebiet kiet ama odu ke Shemlon emi nditɔ iban mme Lamanite ekesobode idem mmɔ ndikwɔ, nyuŋ nnek unek, nyuŋ nnam esit enem idem mmɔ.

2 Ndien edikem ete ke usen kiet ekpri ibat mmɔ ema esobo ndikwɔ nyuŋ nnek unek.

3 Ndien idahaemi mme oku edidem Noah, ke but akanamde mmɔ ndiyɔŋ nka obio Nephi, iŋ, ndien ŋko efehe ndik ete mme owo eyewot mmɔ, ke ntak oro mmɔ inyɔŋke ibine iban mmɔ ye nditɔ mmɔ.

4 Ndien ke ema ekebigi ke wilderness, ndien ke ema ekekut nditɔ iban mme Lamanite, mmɔ ema ena ebet enyuŋ eyep mmɔ;

5 Ndien ke ini ekedide ata ekpri ibat mmɔ ekesobo ndinek unek, mmɔ ewɔrɔ ke mme ebiet udibe mmɔ enyuŋ emum mmɔ enyuŋ etaŋ mmɔ eduk ke wilderness; iŋ, nditɔ iban mme Lamanite edip ye inaŋ ke mmɔ eketaŋ eduk wilderness.

6 Ndien edikem ete ke ini mme Lamanite edikutde ete ke nditɔ iban mmɔ esop, mmɔ eyaresit ye mbon Limhi, koro mmɔ ekekere ke ekedi mbon Limhi.

7 Ke ntak oro mmɔ edɔŋ mbon ekɔŋ mmɔ; iŋ, kpa edidem ke idem esie aka ke iso ikɔt esie; ndien mmɔ edɔk eka ke isɔŋ Nephi ndisobo mbon Limhi.

8 Ndien idahaemi Limhi ama odoro ke tower okut mmɔ, kpa ofuri mbeŋidem ekɔŋ mmɔ ke enye okokut; ke ntak oro enye ataŋ ikɔt esie obok kiet, enyuŋ edibe ebet mmɔ ke mme iŋwaŋ ye mme akai.

9 Ndien edikem ete ke ini mme Lamanite edɔkde edi, ete mbon Limhi etɔŋɔ ndiŋwana ye mmɔ ke mme ebiet emi mmɔ ekedibede, enyuŋ etɔŋɔ ndiwot mmɔ.

10 Ndien edikem ete ekɔŋ ama ɔsɔŋ ata eti eti, koro mmɔ ekeŋwana nte mme lion eŋwana ye mmum nta mmɔ.

11 Ndien edikem ete mbon Limhi etɔŋɔ ndibin mme Lamanite ke iso mmɔ; edi mmɔ ikiwakke ke mbahere iba nte mme Lamanite. Edi mmɔ ema eŋwana enɔ uwem mmɔ, ŋko enɔ iban mmɔ, ŋko enɔ nditɔ mmɔ; ke ntak oro mmɔ esin idem mmɔ ndien nte mme dragon ke mmɔ ekeŋwana.

12 Ndien edikem ete mmɔ ekut edidem mme Lamanite ke otu ibat mme okpo-owo mmɔ; edi enye ikikpaha, ke ema ekenɔ enye unan enyuŋ ekpɔŋ ke isɔŋ, ata usɔp usɔp ke itɔk ikɔt esie ekedi.

13 Ndien mmɔ emum enye enyuŋ ebɔp mme unan esie, enyuŋ eda enye eka ke iso Limhi, enyuŋ edɔhɔ ete: Sese, se edidem mme Lamanite mi; ke enye akadade unan ama ɔduɔ ke otu mme okpo-owo mmɔ, ndien mmɔ ekpɔŋ enye; ndien sese, nnyin imida enye idi ke iso fo; ndien idahaemi yak nnyin iwot enye.

14 Edi Limhi ɔdɔhɔ mmɔ ete: Mbufo idiwotke enye, edi eda enye edi mi man ami nkut enye. Ndien mmɔ eda enye edi. Ndien Limhi ɔdɔhɔ enye ete: Nso ntak ke afo enyene ndidɔk ndi ekɔŋ ye ikɔt mi? Sese, ikɔt mi ibiatke eŋwɔŋɔ emi ami nkanamde ye afo; ke ntak oro, ntak emi afo abiatde eŋwɔŋɔ emi afo akanamde ye ikɔt mi?

15 Ndien idahaemi edidem ɔdɔhɔ ete: Ami mabiat eŋwɔŋɔ oro ke ntak emi ikɔt fo eketaŋde nditɔ iban ikɔt mi enyɔŋ; ke ntak oro, ke iyaresit mi ami mma nnam ikɔt mi edɔk edi ekɔŋ ye ikɔt fo.

16 Ndien idahaemi Limhi ikikopke ŋkpɔ ndomo kiet ibaŋa ŋkpɔ emi; ke ntak oro enye ɔdɔhɔ ete: Ami nyoyom ke otu ikɔt mi ndien owo ekededi emi anamde ŋkpɔ emi ayakpa. Ke ntak oro enye anam ete eyom ke otu ikɔt esie.

17 Ndien ke ini Gideon okokopde mme ŋkpɔ emi, ke enye edide etubom ekɔŋ edidem, enye aka onyuŋ ɔdɔhɔ edidem ete: Ami mbeŋe fi nte etre, kunyuŋ uduŋɔde mbon emi, kunyuŋ udori mmɔ ŋkpɔ emi.

18 Koro ndi afo utihi mme oku ete fo, emi mbon emi ekeyomde ndiwot? Ndien ndi mmɔ iduhe ke wilderness? Ndi idihe mmɔ edi mbon emi eyipde nditɔ iban mme Lamanite?

19 Ndien idahaemi, sese, nyuŋ dɔhɔ edidem mme ŋkpɔ emi, man enye ɔdɔhɔ ikɔt esie man mmɔ emem esit ebaŋa nnyin; koro sese mmɔ kedu ke mbeŋe idem ndidi ekɔŋ ye nnyin; ndien sese ŋko nnyin iwakke.

20 Ndien sese, mmɔ edi ye uwak udim ekɔŋ mmɔ; ndien ibɔhɔke edidem anam esit emem mmɔ abaŋa nnyin nnyin iyikpa.

21 Ndien ndi mme ikɔ Abinadi isuhu, emi enye eketiŋde nte prophet abaŋa nnyin—ndien kpukpru emi ke ntak emi nnyin mikpaŋke utɔŋ inɔ mme ikɔ Jehovah, inyuŋ ikabare ikpɔŋ mme ukwaŋ-ŋkpɔ nnyin?

22 Ndien idahaemi yak nnyin inam esit emem edidem, ndien nnyin inam eŋwɔŋɔ emi nnyin inamde ye enye; koro ɔfɔn ete nnyin idu ke ufin akan ete nnyin inana uwem nnyin; ke ntak oro, yak nnyin itre ndiduɔk ediwak iyip.

23 Ndien idahaemi Limhi ama ɔdɔhɔ edidem kpukpru ŋkpɔ abaŋade ete esie, ye mme oku emi ekefehede eduk wilderness, ndien odori nditaŋ nditɔ iban mmɔ ŋwɔrɔ ke mmɔ.

24 Ndien edikem ete esit emem edidem abaŋa ikɔt esie; ndien enye ɔdɔhɔ mmɔ ete: Yak nnyin ika ikisobo ye ikɔt mi, owo okukama ŋkpɔ ekɔŋ; ndien ami nyotomo nnɔ mbufo ye eŋwɔŋɔ nte ke ikɔt mi idiwotke ikɔt fo.

25 Ndien edikem ete mmɔ etiene edidem, enyuŋ eka ikamake ŋkpɔ ekɔŋ ndisobo ye mme Lamanite. Ndien edikem ete mmɔ ema esobo ye mme Lamanite; ndien edidem mme Lamanite osuk ibuot esie ke isɔŋ ke iso mmɔ, onyuŋ ekpe ubɔk abaŋa ikɔt Limhi.

26 Ndien ke ini mme Lamanite ekutde ikɔt Limhi, ete ke mmɔ ikamake ŋkpɔ ekɔŋ, mmɔ enyene mbɔm ebaŋa mmɔ enyuŋ emem esit ebaŋa mmɔ, enyuŋ enyɔŋ ke emem ye edidem mmɔ eka isɔŋ mmɔ.