1 Ndien edikem ete mbon ekɔŋ edidem enyɔŋ edi, ke ema ekeyom ikɔt Jehovah ke ikpikpu.

2 Ndien idahaemi, mbon ekɔŋ edidem ekedi ekpri, ke ema ekenam mmɔ ekpri, ndien ubahare ɔtɔŋɔ ndidu ke otu mme owo ekesuhɔre.

3 Ndien ubak emi ekekpride ɔtɔŋɔ ndifime ikɔ-ndikhe ye edidem, ndien akwa eneni ɔtɔŋɔ ndidu ke otu mmɔ.

4 Ndien idahaemi owo kiet ama odu ke otu mmɔ emi enyiŋ esie ekedide Gideon, ndien sia enye ekedide ɔkpɔsɔŋ owo ye asua edidem, ke ntak oro enye osio ofut esie, ndien otomo ke iyaresit esie ete ke enye oyowot edidem.

5 Ndien edikem ete ke enye aŋwana ye edidem; ndien ke ini edidem okutde ete ke enye ɔmmɔŋ akan enye, enye osio itɔk onyuŋ efehe onyuŋ ɔdɔk tower emi ekekperede temple.

6 Ndien Gideon efehe ebine enye ndien ke ini okoyomde ndidɔk tower man owot edidem, ndien edidem emenere enyin esie ese akanare ɔnɔ isɔŋ Shemlon, ndien sese, mbon ekɔŋ mme Lamanite ema edu ke esit adaŋa obio.

7 Ndien idahaemi edidem ofiori ke ndutuhɔ ukpɔŋ esie, ete: Gideon, kuwot mi, koro mme Lamanite esime nnyin, ndien mmɔ eyesobo nnyin; iŋ, mmɔ eyesobo ikɔt mi.

8 Ndien idahaemi edidem ikitimke ikere ibaŋa ikɔt esie nte enye ekekerede abaŋa uwem esie mmɔŋ; edi, Gideon ama ɔsuhɔ uwem esie.

9 Ndien edidem ɔnɔ ikɔt esie uyo ete mmɔ efehe ekpɔŋ iso mme Lamanite, ndien enye ke idem esie ama aka ke iso mmɔ, ndien mmɔ ema efehe ekeduk wilderness, ye iban mmɔ ye nditɔ mmɔ.

10 Ndien edikem ete mme Lamanite efehe etiene mmɔ, enyuŋ esime mmɔ, enyuŋ etɔŋɔ ndiwot mmɔ.

11 Ndien edikem ete edidem ɔnɔ mmɔ uyo ete yak kpukpru irenowo ekpɔŋ iban mmɔ ye nditɔ mmɔ, enyuŋ efehe ke iso mme Lamanite.

12 Idahaemi ediwak ema edu emi midikpɔŋke mmɔ, edi emek ndisuhɔ nyuŋ mkpa ye mmɔ. Ndien mbon eken ekpɔŋ iban mmɔ ye nditɔ mmɔ enyuŋ efehe.

13 Ndien edikem ete mbon emi ekesuhɔde ye iban mmɔ ye nditɔ mmɔ enam ete ndiye nditɔ iban mmɔ eda enyuŋ ekpe mme Lamanite ubɔk ete yak mmɔ ekuwot mmɔ.

14 Ndien edikem ete mme Lamanite enyene mbɔm ebaŋa mmɔ, koro mmɔ ema ema uyai iban mmɔ.

15 Ke ntak oro mme Lamanite ema esuhɔ uwem mmɔ, enyuŋ emum mmɔ nte mbon nkpɔkɔbi enyuŋ etaŋ mmɔ enyɔŋ eka isɔŋ Nephi, enyuŋ eyak ete mmɔ enyene isɔŋ oro, ye eŋwɔŋɔ ete ke mmɔ eyesana edidem Noah eyak esin ke ubɔk mme Lamanite, enyuŋ esana inyene mmɔ eyak, kpa kiet ke mbahare iba eke kpukpru se mmɔ enyenede, kiet ke mbahare iba gold mmɔ, ye sidibe mmɔ, ye kpukpru ŋkpɔ uto mmɔ, ndien ntem ke ana mmɔ ekpe etomo enɔ edidem mme Lamanite ke isua ke isua.

16 Ndien idahaemi eyen erenowo edidem kiet ama odu ke otu mbon emi ekemumde nte mbon nkpɔkɔbi, emi enyiŋ esie ekedide Limhi.

17 Ndien idahaemi Limhi ama enyene udɔŋ ete owo okuwot ete esie; edi, Limhi ikinanake ifiɔk ibaŋa mme ukwaŋ-ŋkpɔ ete esie, enye ke idem esie ekedide edinen owo.

18 Ndien edikem ete Gideon ɔdɔŋ mme owo ete eka wilderness ke ndibe, ekeyom edidem ye mbon ekedude ye enye. Ndien edikem ete mmɔ ema esobo ye mme mbon oro ke wilderness, kpukpru ibɔhɔke edidem ye mme oku esie.

19 Idahaemi mmɔ ema etomo ke esit mmɔ ete ke mmɔ eyeyɔŋ eka isɔŋ Nephi, ndien edieke ekewotde iban mmɔ ye nditɔ mmɔ, ŋko ye mbon ekesuhɔde ye mmɔ, ete ke mmɔ eyesio usiene, ndien nko ekpa ye mmɔ.

20 Ndien edidem ɔnɔ mmɔ uyo ete mmɔ ekunyɔŋ; ndien mmɔ ema eyaresit ye edidem, enyuŋ enam ete enye okut ndutuhɔ, kpa ye mkpa ke ikaŋ.

21 Ndien mmɔ ema ebeŋe idem ndimum mme oku ŋko nyuŋ nwot mmɔ, ndien mmɔ efehe ke iso mmɔ.

22 Ndien edikem ete mmɔ ebeŋe idem ndinyɔŋ nka isɔŋ Nephi, ndien mmɔ esobo mbon ekɔŋ Gideon. Ndien mbon ekɔŋ Gideon edɔhɔ mmɔ kpukpru se ikitibede inɔ iban mmɔ ye nditɔ mmɔ; ndien ke mme Lamanite ema eyak ete mmɔ enyene isɔŋ Nephi ke ndikpe etomo nnɔ mme Lamanite ke kiet ke mbahare iba ke kpukpru se mmɔ enyenede.

23 Ndien mbon oro edɔhɔ mbon ekɔŋ Gideon ete ke mmɔ ema ewot edidem, ndien ke mme oku esie ema efehe ekpɔŋ mmɔ eduk esit-esit wilderness.

24 Ndien edikem ete ke ini mmɔ ema ekekure edinam emi, ete mmɔ enyɔŋ eka isɔŋ Nephi, ke idaresit, ke ntak emi owo mikiwotke iban mmɔ ye nditɔ mmɔ; ndien mmɔ edɔhɔ Gideon se mmɔ ekenamde edidem.

25 Ndien edikem ete ke edidem mme Lamanite anam eŋwɔŋɔ ye mmɔ, ete ikɔt esie ekuwot mmɔ.

26 Ndien ŋko Limhi, emi edide eyen edidem, emi ekeyakde ukara enɔ enye, anam eŋwɔŋɔ ye edidem mme Lamanite ete ana ikɔt esie ekpe utomo enɔ enye, kpa kiet ke mbahare iba eke kpukpru se mmɔ enyenede.

27 Ndien edikem ete Limhi ɔtɔŋɔ ndisiak ukara ye ndisiak emem ke otu ikɔt esie.

28 Ndien edidem mme Lamanite enim mbon ukpeme akanare isɔŋ, man enye enim mbon Limhi ke isɔŋ, man mmɔ ekuwɔrɔ uka wilderness; ndien enye akama mbon ukpeme esie oto ke utomo emi enye ɔbɔde oto mme Nephite.

29 Ndien idahaemi edidem Limhi ama aka iso enyene emem ke ukara esie ke ufaŋ isua iba, ke ntak emi mme Lamanite mikifinake mmɔ mme iyom ndiwot mmɔ.