1 Ndien idahaemi Abinadi ɔdɔhɔ mmɔ ete: Ami nyom yak anwaŋa mbufo ete ke Abasi ke idem esie ɔyɔsuhɔre edi ke otu nditɔ owo, ndien ke ayafak ikɔt esie.

2 Ndien ke ntak emi enye oduŋde ke obukidem eyekot enye Eyen Abasi, ndien ke ntak akayakde obukidem ɔnɔ uduak Ete, emi edide Ete ye Eyen—

3 Ete, ke ntak emi ekeyomode enye ke odudu Abasi; ye Eyen, ke ntak obukidem; ke ntem ekabare edi Ete ye Eyen—

4 Ndien mmɔ edi Abasi kiet, iŋ, ata Nsinsi Ete eke enyɔŋ ye eke isɔŋ.

5 Ndien ke ntem obukidem akabare odu ke idak Spirit, mme Eyen ke idak Ete, emi edide Abasi kiet, ɔyɔ idomo, ndien iyakke idem inɔ idomo, edi ayak idem esie ɔnɔ esak, enyuŋ emia, enyuŋ ebin esio, ndien ikɔt esie esin enye.

6 Ndien ke kpukpru emi amabe, ke ini ama akanam ikpɔ utibe ŋkpɔ ke otu nditɔ owo, eyeda enye usuŋ, iŋ, kpa nte Isaiah eketiŋde, nte erɔŋ mitatke inua ke iso andifat, ntre ke enye mitatke inua esie.

7 Iŋ, kpa ntre ke edida enye usuŋ, ewot ke cross, enyuŋ ewot, obukidem akabare odu ke idak mkpa, uduak Eyen esine ke idak uduak Ete.

8 Ndien ke ntem Abasi esibe mme uruk mkpa, ke ema akakan mkpa; ɔnɔ Eyen odudu ndikpe-ubɔk nnɔ nditɔ owo—

9 Ke ama ɔkɔdɔk oduk heaven, enyene esit mbɔm; ɔyɔhɔ ye mbɔm abaŋa nditɔ owo; ada ke ufɔt mmɔ ye nnen nnen ikpe; ke amakesibe mme uruk mkpa, adade ukwaŋ-ŋkpɔ ye mme ndudue mmɔ ɔnɔ idem esie, ke ama akafak mmɔ, onyuŋ ɔnɔ se nnen nnen ikpe oyomde.

10 Ndien idahaemi ami ndɔhɔ mbufo, anie edibuk emana esie? Sese, ami ndɔhɔ mbufo, nte ke ini enamde ukpɔŋ esie edi uwa ɔnɔ idiɔk ŋkpɔ enye oyokut ubon esie. Ndien idahaemi mbufo edɔhɔ nso? Ndien anie edidi ubon esie?

11 Sese ami ndɔhɔ mbufo, nte ke owo ekededi emi okopde mme ikɔ mme prophet, iŋ, kpukpru mme ndisana prophet emi etiŋde nte prophet ebaŋa edidi Jehovah—ami ndɔhɔ mbufo, nte ke kpukpru mbon emi ekpaŋde utɔŋ enɔ mme ikɔ mmɔ, enyuŋ ebuɔtde idem ete ke Jehovah ayafak ikɔt esie, enyuŋ esede usen oro ebaŋa erifen ke mme idiɔk ŋkpɔ mmɔ, ami ndɔhɔ mbufo, nte mmɔ emi edi ubon esie, mme mmɔ edi mme adia akpa obio ubɔŋ Abasi.

12 Koro mmɔ emi edi mbon emi enye obiomde mme idiɔk ŋkpɔ mmɔ; mmɔ emi edi mbon emi enye akakpade ɔnɔ, ndifak mmɔ nsio ke mme ndudue mmɔ. Ndien idahaemi, ndi mmɔ idihe ubon esie?

13 Iŋ, ndien ndi idihe mme prophet, owo kiet kiet emi ɔkubɔde inua esie nditiŋ nte prophet, emi miduɔhɔ iduk ke ndudue, ami ndɔhɔ kpukpru mme ndisana prophet tɔŋɔ ke eritɔŋɔ ererimbot? Ami ndɔhɔ mbufo nte ke mmɔ edi ubon esie.

14 Ndien mmɔ emi edi mmɔ emi ekwɔrɔde emem, emi edade nti mbuk eti edi, emi ekwɔrɔde erinyaŋa; enyuŋ edɔhɔde Zion ete: Abasi Fo ada ukara!

15 Ndien O mme ikpat mmɔ ekeye didie ke enyɔŋ ikpɔ obot!

16 Ndien nko, ikpat mbon emi esuk ekade iso ekwɔrɔ emem eye didie ke enyɔŋ ikpɔ obot!

17 Ndien nko, ikpat mmɔ emi edikwɔrɔde emem ke ini emi ama ebe eye didie ke enyɔŋ ikpɔ obot, iŋ, tɔŋɔ ke idahaemi ka iso ye ke nsinsi!

18 Ndien sese, ami ndɔhɔ mbufo, ke emi idige kpukpru. Koro O ikpat owo nti mbuk eye didie ke enyɔŋ ikpɔ obot, emi edide asiak emem, iŋ, kpa Jehovah, emi afakde ikɔt esie; iŋ, enye emi ɔnɔde ikɔt esie erinyaŋa;

19 Koro mikpidihe ke ntak erifak emi enye akanamde ɔnɔ ikɔt esie, emi ekenimde tɔŋɔ ke eritɔŋɔ ererimbot, ami ndɔhɔ mbufo, mikpidihe ke ntak emi, kpukpru ubon owo ke akpanikɔ ekpetak.

20 Edi sese, eyesibe mme uruk mkpa, ndien Eyen ada ukara, onyuŋ enyene odudu akan mkpa; ke ntak oro, enye anam eriset ke mkpa etibe.

21 Ndien eriset ke mkpa edi, kpa akpa eriset ke mkpa; iŋ, kpa eriset ke mkpa mbon emi ekedude, ye emi edude, ye emi edidude, tutu eriset ke mkpa eke Christ—koro ntre ke edikot enye.

22 Ndien idahaemi, eriset ke mkpa mme prophet, ye kpukpru mbon emi ebuɔtde idem ke mme ikɔ mmɔ, mme kpukpru mbon emi enimde ibet Abasi, eyedi ke akpa eriset ke mkpa; ke ntak oro, mmɔ edi akpa eriset ke mkpa.

23 Enam mmɔ eset man eduŋ ye Abasi emi afakde mmɔ; ke ntem mmɔ enyene nsinsi uwem eto Christ, emi esibede mme uruk mkpa.

24 Ndien mmɔ edi mmɔ emi enyenede udeme ke akpa eriset; ndien mmɔ emi edi mmɔ emi ekekpade mbemiso Christ edi, ke unana ifiɔk mmɔ, emi owo mikikwɔrɔke erinyaŋa inɔ mmɔ. Ndien ke ntem Jehovah anam mfiak nnim ke itie ɔnɔ mmɔ; ndien mmɔ enyene ubak ke akpa eriset, mme enyene nsinsi uwem, ke ntak emi Jehovah akafakde mmɔ.

25 Ndien mkpri nditɔ ŋko enyene nsinsi uwem.

26 Edi sese, ndien efehe ndik, enyuŋ enyek idem ke iso Abasi, koro ana nte mbufo enyek idem; koro Jehovah ifakke baba ndomo kiet emi ɔsɔŋde ibuot ye enye onyuŋ akpade ke mme idiɔk ŋkpɔ mmɔ; iŋ, kpa kpukpru mmɔ emi ekpade ke mme idiɔk ŋkpɔ mmɔ tɔŋɔde ke eritɔŋɔ ererimbot, emi ekoide ekoi esɔŋ ibuot ye Abasi, emi ema ekefiɔk ibet Abasi, edi inimke mmɔ; mmɔ emi edi mmɔ emi minyeneke udeme ke akpa eriset ke mkpa.

27 Ke ntak oro ndi ikpinaha nte mbufo enyek idem? Koro erinyaŋa inyeneke utɔ emi; koro Jehovah ifakke utɔ emi; iŋ, ŋko Jehovah ikanke ifak utɔ emi; koro enye ikanke ikaŋ idem esie; koro enye ikanke ikaŋ nnen nnen ikpe ke ini enye enyenede unen esie.

28 Ndien idahaemi ami ndɔhɔ mbufo nte ke ini eyedi emi edikwɔrɔde erinyaŋa Jehovah inɔ kpukpru idut, iman, usem, ye mme owo.

29 Iŋ, Jehovah, mbon ukpeme fo eyemenere uyo mmɔ; ye uyo kiet eyekwɔ; koro mmɔ eyekut enyin ye enyin, ke ini Jehovah edifiakde inim Zion.

30 Ebumere ke idaresit, ekwɔ ye uyo kiet, mbufo mme ŋwure ebiet Jerusalem; koro Jehovah ɔdɔŋde ikɔt esie esit, enye afak Jerusalem.

31 Jehovah ama ayarare edisana ubɔk esie ke enyin ofuri idut; ndien ofuri utit ererimbot eyekut erinyaŋa Abasi nnyin.