1 Thiab nim no Anpinadais tau hais rau lawv tias: Kuv xav kom nej to taub tias Vajtswv tus kheej yuav nqis los nrog neeg nyob, thiab yuav los txhiv nws cov neeg.

2 Thiab vim nws nyob ua neej ntawm cev nqaij daim tawv nws yuav raug hu ua Vajtswv Leej Tub, thiab vim tau ywj lub cev nqaij daim tawv ua raws li Leej Txiv lub siab nyiam, thiaj yog Leej Txiv thiab Leej Tub—

3 Yog Leej Txiv, vim nws tau xeeb los ntawm Vajtswv lub hwj chim, thiab yog Leej Tub, vim ntawm cev nqaij daim tawv; yog li ntawd thiaj peem tsheej los mus ua Leej Txiv thiab Leej Tub—

4 Thiab nkawd yog tib tug Vajtswv, muaj tseeb tiag, yog kiag tus Leej Txiv uas Muaj Txoj Sia Nyob Mus Ib Txhis saum ntuj ceeb tsheej thiab hauv ntiaj teb no.

5 Thiab li no cev nqaij daim tawv tau raug ywj rau tus Ntsuj Plig, los sis muab Leej Tub rau Leej Txiv, uas yog tib tug Vajtswv, yuav tiv txoj kev haub ntxias, thiab yuav tsis kam qaug mus rau txoj kev haub ntxias, tiam sis cia nws tus kheej raug thuam, thiab nplawm, thiab ntiab tawm, thiab nws cov neeg tsis yuav.

6 Thiab tom qab ib puas yam tsav no, tom qab ua ntau yam txuj ci tseem ceeb loj nyob hauv tib neeg, nws yuav raug coj, muaj tseeb tiag, twb yuav zoo ib yam li Yaxayas tau hais tias, coj ib yam li ib tug yaj ruam los rau tus neeg laws tawv yaj, ces nws thiaj tsis qhib nws lub qhov ncauj li.

7 Muaj tseeb tiag, nws twb yuav tau raug coj mus ntsia saum ntoo khaub lig, thiab raug tua, cev nqaij daim tawv rais los mus ywj rau txoj kev tuag, Leej Tub lub siab nyiam raug nqos mus rau ntawm Leej Txiv lub siab nyiam.

8 Thiab li no Vajtswv tu txoj kev tuag tej hlua, tau kov yeej txoj kev tuag; muab hlo lub hwj chim rau Leej Tub ua kev pab rau noob neej—

9 Tau nce mus rau saum ntuj ceeb tsheej, muaj ntsoov siab mos siab muag puv npo; muaj ntsoov kev hlub tshua rau noob neej puv npo; sawv nrees nruab nrab ntawm lawv thiab txoj kev txim lij; tau tu txoj kev tuag tej hlua, tau ris lawv tej kev tsis ncaj ncees thiab lawv tej kev txog txhaum rau saum nws, tau txhiv lawv dim, thiab tau ua raws li txoj kev txim lij tej kev xav tau.

10 Thiab nim no kuv hais rau nej, leej twg yuav tshaj tawm nws tiam neeg? Saib seb, kuv hais rau nej, tias thaum nws tus kheej tau raug txi rau txoj kev txog txhaum nws yuav pom nws tej noob. Thiab nim no nej yuav hais li cas? Thiab leej twg yuav yog nws tej noob?

11 Saib seb kuv hais rau nej, tias tag nrho cov uas tau hnov cov yaj saub tej lus, muaj tseeb tiag, tag nrho cov yaj saub dawb huv uas tau qhia tej uas yuav muaj los yav tom ntej txog tus Tswv txoj kev nqis los—Kuv hais rau nej, tias tag nrho cov uas tau hnov lawv tej lus, thiab tau ntseeg tias tus Tswv yuav txhiv nws cov neeg dim, thiab tau tos ntsoov rau hnub uas yuav zam lawv tej kev txog txhaum ntawd, kuv hais rau nej tias, cov no yog nws cov xeeb leej xeeb ntxwv, los sis lawv yog cov uas yuav tau Vajtswv lub nceeg vaj los ua lawv tug.

12 Vim cov no yog lawv cov uas nws tau ris lawv tej kev txog txhaum; lawv cov no yog cov uas nws tau tuag rau, tau txhiv lawv dim ntawm lawv tej kev txog txhaum. Thiab nim no, lawv tsis yog nws tej noob los?

13 Muaj tseeb tiag, thiab puas yog tej yaj saub, txhua txhia tus uas tau qhib nws lub qhov ncauj qhia tej uas yuav muaj los yav tom ntej, uas tsis tau poob mus rau hauv txoj kev txog txhaum, kuv hais tag nrho cov yaj saub dawb huv txij puag thaum lub ntiaj teb chiv? Kuv hais rau nej tias lawv yog nws tej noob.

14 Thiab cov no yog lawv cov uas tau tsim kev thaj yeeb, cov uas tau coj tej moo zoo ntawm qhov zoo, cov uas tau tsim txoj kev cawm seeg; thiab tau hais rau Xi-oos tias: Koj tus Vajtswv kav!

15 Thiab Au lawv tej ko taw zoo nkauj npaum li cas nyob saum tej roob!

16 Thiab ntxiv, tej ko taw zoo nkauj npaum li cas nyob saum tej roob rau ntawm lawv cov uas tseem tab tom tsim txoj kev thaj yeeb!

17 Thiab ntxiv, zoo nkauj npaum li cas nyob saum tej roob rau tej ko taw ntawm lawv cov uas yuav tsim kev thaj yeeb nyob yav tom ntej, muaj tseeb tiag, txij lub caij no mus thiab mus ib txhis li!

18 Thiab saib seb, kuv hais rau nej tias, tsis tag li no xwb. Vim Au tej ko taw zoo nkauj cuag cas nyob saum tej roob rau nws tus uas coj tej moo zoo los, uas yog tus tsim txoj kev thaj yeeb, muaj tseeb tiag, twb yog tus Tswv, tus uas tau txhiv nws cov neeg dim; muaj tseeb tiag, nws tus uas tau pub txoj kev cawm seeg rau nws cov neeg;

19 Vim yog tias tsis yog los ntawm txoj kev txhiv dim uas nws tau ua rau nws cov neeg, uas tau raug npaj txij li puag thaum tsim lub ntiaj teb los ces, kuv hais rau nej tias, yog tsis yog li no ces, tib neeg sawv daws tus yuav tsum raug piam sij.

20 Tiam sis saib seb, txoj kev tuag tej hlua yuav raug tu, thiab Leej Tub yuav kav, thiab muaj hwj chim rau saum cov tuag; yog li ntawd, nws ua kom muaj txoj kev sawv hauv qhov tuag rov qab los ntawm cov tuag.

21 Thiab muaj ib txoj kev sawv hauv qhov tuag rov qab los, twb yog thawj thawj txoj kev uas sawv hauv qhov tuag rov qab los; muaj tseeb tiag, twb yog ib txoj kev sawv hauv qhov tuag rov qab los ntawm cov uas tau nyob tas lawm, thiab cov tseem nyob ziag no, thiab cov uas tseem yuav nyob, kom mus txog thaum Khetos txoj kev sawv hauv qhov tuag rov qab los—vim li no nws yuav raug hu li ntawd.

22 Thiab nim no, txoj kev sawv hauv qhov tuag rov qab los ntawm tag nrho cov yaj saub, thiab tag nrho cov uas tau ntseeg lawv tej lus, los sis tag nrho cov uas tau coj Vajtswv tej lus txib, yuav sawv los ntawm thawj zaug kev sawv hauv qhov tuag rov qab los; yog li ntawd, lawv yog thawj txog kev sawv hauv qhov tuag rov qab los.

23 Lawv raug sawv los nrog Vajtswv tus uas tau txhiv lawv dim nyob; yog li ntawd lawv muaj txoj sia nyob mus ib txhis dhau los ntawm Khetos, tus uas tau tu txoj kev tuag tej hlua.

24 Thiab cov no yog cov uas tau muaj feem nyob hauv txoj kev sawv hauv thawj qhov tuag rov qab los; thiab cov no yog lawv cov uas tau tuag ua ntej Khetos los, nyob hauv lawv tej kev tawv ncauj, tsis tau muaj txoj kev cawm seeg tshaj tawm rau lawv. Thiab xws li no tus Tswv coj txoj kev txum tim rov qab los ntawm cov no; thiab lawv muaj feem nyob rau hauv thawj txoj kev sawv hauv qhov tuag rov qab los, los sis muaj txoj sia nyob mus ib txhis, tau raug txhiv dim los ntawm tus Tswv.

25 Thiab tej me nyuam yaus kuj tau txoj sia nyob mus ib txhis thiab.

26 Tiam sis saib seb, thiab cia li ntshai, thiab cia li tshee hnyo rau Vajtswv, vim tsim nyog nej yuav tsum tshee hnyo; vim tus Tswv yuav tsis txhiv ib tug twg uas ntxeev siab tawm tsam nws thiab tuag nyob hauv lawv tej kev txhaum; muaj tseeb tiag, twb tag nrho cov uas tau piam sij nyob hauv lawv tej kev txhaum txij li thaum lub ntiaj teb chiv los, cov uas tau ntxeev siab hlo tawm tsam Vajtswv, cov uas tau paub Vajtswv tej lus txib, thiab tsis coj lawv; cov no yog lawv cov uas yuav tsis muaj feem nyob hauv thawj txoj kev sawv hauv qhov tuag rov qab los.

27 Yog li ntawd puas tsim nyog nej cia li tshee hnyo? Vim txoj kev cawm seeg yuav tsis los rau ib tug twg uas zoo li ntawd; vim tus Tswv tsis tau txhiv ib tug twg uas zoo li ntawd; muaj tseeb tiag, thiab tus Tswv txhiv tsis tau tus uas zoo li ntawd; vim nws tsis muaj cuab kav tsis lees nws tus kheej; vim nws tsis muaj cuab kav tsis lees txais txoj kev txim lij thaum nws muaj nws txoj cai.

28 Thiab nim no kuv hais rau nej tias lub sij hawm yuav los xwv kom tus Tswv txoj kev cawm seeg yuav raug tshaj tawm rau txhua haiv neeg, txhua xeem neeg, txhua yam lus, thiab tej neeg.

29 Muaj tseeb tiag, tus Tswv es, koj tej neeg zov xyuas yuav tsa lawv tej suab; lawv yuav hu nkauj nrog tej suab ua ke; vim lawv yuav pom qhov muag rau qhov muag thaum tus Tswv yuav coj Xi-oos rov qab los;

30 Cia li tawg plho los rau hauv txoj kev xyiv fab; cia li hu nkauj ua ke, nej tej chaw uas tsis muaj nuj nqis ntawm Yeluxalees; vim tus Tswv tau nplij nws cov neeg, nws tau txhiv Yeluxalees.

31 Tus Tswv tau thws nws txhais npab dawb huv rau ntawm txhua haiv neeg lub qhov muag, thiab tag nrho hauv qab ntuj kawg yuav pom peb tus Vajtswv txoj kev cawm dim.