1 Thiab nim no thaum vaj ntxwv tau hnov tej lus no, nws tau hais rau nws cov pov thawj tias: Coj tus neeg no mus, thiab muab nws tua; vim muaj tus xwm txheej tus dab tsi uas peb yuav ua nrog nws, vim nws yog ib tus neeg vwm.

2 Thiab lawv tau txav zog mus thiab npaj txhom nws; tiam sis nws tau tiv thaiv lawv, thiab tau hais rau lawv tias:

3 Tsis txhob tuav kuv, vim Vajtswv yuav rau txim rau nej yog nej tso nej tej tes rau saum kuv, vim kuv tsis tau muab txoj xov xwm uas tus Tswv tau xa kuv tuaj qhia; thiab kuv twb tsis tau qhia nej tej uas nej nug kom kuv qhia; yog li ntawd, Vajtswv yuav tsis cia kuv raug puas tsuaj nyob rau lub sij hawm no.

4 Tiam sis kuv yuav tsum ua kom tej lus txib uas Vajtswv tau txib kuv lawm kom tiav; thiab vim kuv tau qhia nej qhov tseeb nej thiaj npau taws rau kuv. Thiab ntxiv, vim kuv tau hais Vajtswv txoj lus nej thiaj tau txiav txim rau kuv tias kuv yog neeg vwm.

5 Nim no tau muaj tias tom qab uas Anpinadais tau hais tej lus no tas lawm vaj ntxwv Nau-as cov neeg thiaj tsis muaj cuab kav cev lawv tej tes rau nws, vim tus Tswv tus Ntsuj Plig tau nyob saum nws; thiab nws lub ntsej muag ci ntsa iab heev kawg nkaus li, twb ib yam li Mauxes thaum uas nyob saum lub roob Xinais, lub sij hawm thaum tab tom nrog tus Tswv sib tham.

6 Thiab nws tau hais lus nrog lub hwj chim thiab txoj cai los ntawm Vajtswv; thiab nws tau hais nws tej lus ntxiv, hais tias:

7 Nej pom tias nej tsis muaj hwj chim tua kuv, yog li ntawd kuv yuav hais kom kuv cov xov xwm tas. Muaj tseeb tiag, thiab kuv paub tias nws hlais nej mus rau puag hauv nruab siab vim kuv qhia nej qhov tseeb txog nej tej kev tsis ncaj ncees.

8 Muaj tseeb tiag, thiab kuv tej lus ua rau nej xav tsis thoob thiab ntshai, thiab ua rau nej npau taws.

9 Tiam sis kuv qhia kom kuv tej xov xwm tas; thiab tom qab ntawd nws tsis ua li cas txawm kuv yuav mus qhov twg los xij, yog nws muaj tau tias kuv tseem raug dim.

10 Tiam sis kuv qhia nej npaum li no, yam uas nej ua rau kuv, tom qab no, yuav yog ib yam cim thiab ib tug xyw ntawm tej uas yuav muaj los.

11 Thiab nim no kuv nyeem rau nej Vajtswv tej lus txib uas seem tshuav, vim kuv paub tias lawv tsis tau raug muab sau rau hauv nej tej siab; kuv paub tias nej tau kawm thiab tau qhia txoj kev tsis ncaj ncees feem ntau ntawm nej lub neej.

12 Thiab nim no, nej nco tias kuv tau hais rau nej tias: Nej yuav tsum tsis txhob puab mlom rau nej, los sis ib yam dab tsi uas zoo li tej uas nyob saum ntuj, los sis tej uas nyob puag hauv nruab tiv txwv, los sis tej uas nyob hauv dej uas nyob hauv lub ntiaj teb sab hauv.

13 Thiab ntxiv: Nej yuav tsum tsis txhob pe lawv, los sis tsis txhob tu lawv; vim kuv tus Tswv nej tus Vajtswv yog ib tug Vajtswv uas khib heev, los xyuas tej kev tsis ncaj ncees ntawm tej yawg koob rau saum tej me nyuam, mus rau tiam peb thiab tiam plaub neeg ntawm lawv cov uas ntxub kuv;

14 Thiab qhia ntsis txoj kev hlub tshua rau lawv txhiab txhiab tus uas hlub kuv thiab coj kuv tej lus txib.

15 Nej yuav tsum tsis txhob muab tus Tswv nej tus Vajtswv lub npe coj mus xyav ua si khuav; vim tus Tswv yuav tsis suav rau tus uas coj nws lub npe mus hais ua dog ua dig tias tsis muaj txim.

16 Nco ntsoov hnub caiv, ceev nws kom dawb huv.

17 Nej yuav ua hauj lwm rau hnub, thiab ua tag nrho nej tej hauj lwm;

18 Tiam sis hnub xya, hnub caiv ntawm tus Tswv nej tus Vajtswv, nej yuav tsum tsis txhob ua ib yam hauj lwm dab tsi, nej, los sis nej tej tub, los sis nej tej ntxhais, nej tej tub qhe, los sis nej tej ntxhais qhev, los sis nej tej tsiaj txhu, los sis tej qhua uas nyob sab hauv nej tej vaj tse;

19 Vim tus Tswv tau tsim lub ntuj thiab lub ntiaj teb no, thiab dej hiav txwv, thiab tag nrho tej uas nyob hauv nyob rau hauv rau hnub; yog li ntawd tus Tswv tau foom koob hmoov rau hnub caiv, thiab ua kom nws dawb huv.

20 Nej yuav tsum hwm nej niam thiab nej txiv, xwv kom nej thiaj yuav muaj sia ua neej nyob ntev hauv lub teb chaws uas tus Tswv nej tus Vajtswv muab pub rau nej.

21 Nej yuav tsum tsis txhob tua neeg.

22 Nej yuav tsum tsis txhob deev luag poj luag txiv. Nej yuav tsum tsis txhob ua tub sab tub nyiag.

23 Nej yuav tsum tsis txhob ua tim khawv tsis tseeb nkaug nej tej neeg zej zog.

24 Nej yuav tsum tsis txhob ntshaw nej tej neeg zej zog tej vaj tej tsev, nej yuav tsum tsis txhob ntshaw nej tej neeg zej zog tej poj tej sev, los sis nws tej tub qhev, los sis nws tej ntxhais qhev, los sis nws tej nyuj, los sis nws tej zag, los sis ib yam dab tsi uas yog nej tej neeg zej zog li.

25 Thiab tau muaj tias tom qab uas Anpinadais tau hais cov lus no tag lawm ces nws tau hais rau lawv tias: Nej puas tau qhia rau cov neeg no tias lawv yuav tsum mob siab ua tag nrho tej yam no huv tib si thiaj li yuav coj tau tej lus txib no?

26 Kuv hais rau nej tias, Tsis tau qhia; vim yog nej tau qhia, ces tus Tswv yuav tsis tau kom kuv tuaj thiab qhia tej kev phem uas yuav muaj los yav tom ntej txog cov neeg no.

27 Thiab nim no nej tau hais tias txoj kev cawm seeg los ntawm Mauxes txoj kev cai los. Kuv hais rau nej tias tsim nyog nej yuav coj Mauxes txoj kev cai tib yam; tiam sis kuv hais rau nej, tias yuav muaj ib lub caij los uas tsis tsim nyog coj Mauxes txoj kev cai ntxiv li lawm.

28 Thiab tsis tas li ntawd, kuv hais rau nej tias, txoj kev cawm seeg tsis yog yuav los ntawm txoj kev cai xwb; thiab yog hais tias nws tsis yog txoj kev theej txhoj, uas Vajtswv tus kheej yuav ua rau nws cov neeg tej kev txog txhaum thiab kev tsis ncaj ncees, ces lawv yuav zam tsis dhau txoj kev piam sij, txawm tias muaj Mauxes txoj kev cai.

29 Thiab nim no kuv hais rau nej tias nws tsim nyog yuav tsum muaj ib txoj kev cai muab rau cov neeg Ixayees, muaj tseeb tiag, twb yog ib txoj kev cai uas nruj heev; vim lawv tau yog ib cov neeg tawv ncauj, ua kev tsis ncaj ncees nrawm, thiab nco txog tus Tswv lawv tus Vajtswv qeeb;

30 Yog li ntawd thiaj tau muaj ib txoj kev cai muab rau lawv, muaj tseeb tiag, yog ib txoj kev cai ntawm tej kev ua thiab ntawm tej kab ke, yog ib txoj kev cai uas lawv tau raug coj nruj ib hnub dhau ib hnub, pab kom lawv nco txog Vajtswv thiab lawv tej dej num rau nws.

31 Tiam sis saib seb, kuv hais rau nej tias, tag nrho tej yam no yog tej cim ntawm tej uas yuav muaj los.

32 Thiab nim no, lawv puas to taub txoj kev cai? Kuv hais rau nej tias, Tsis to taub, tsis yog lawv tag nrho to taub txoj kev cai; thiab qhov no yog vim lawv tej siab ntsws pheej tawv qhwb qhawv; vim lawv tsis to taub tias tsis muaj ib tug neeg twg uas yuav dim tau tsuas yog dhau los ntawm Vajtswv txoj kev txhiv dim xwb.

33 Vim saib seb, Mauxes tsis tau qhia tej uas yuav muaj los yav tom ntej rau lawv txog txoj kev nqis los ntawm tus Mexiyas, thiab tias Vajtswv yuav txhiv nws cov neeg no los? Muaj tseeb tiag, thiab tag nrho tej yaj saub uas tau qhia tej uas yuav muaj los yav tom ntej txij li thaum lub ntiaj teb tau pib muaj—lawv tsis tau hais ntau los sis tsawg txog tej yam no los?

34 Lawv tsis tau hais tias Vajtswv tus kheej yuav nqis los nrog noob neej nyob, thiab los yug ua tib neeg, thiab tawm mus nrog lub hwj chim loj nyob rau saum lub ntiaj teb no los?

35 Muaj tseeb tiag, thiab lawv tsis tau hais tias nws yuav rhawv kom tau txoj kev sawv hauv qhov tuag rov qab los ntawm cov neeg tuag lawm, thiab tias nws, tus kheej, yuav tsum raug kev nyuaj siab thiab kev txom nyem no los?