iVolanikalou
Mosaia 12


Wase 12

Sa biu ki na valeniveivesu ko Apinatai ena vuku ni nona a parofisaitaka na nodra vakarusai na tamata kei na nona mate ko Noa na Tui—Era cavuta na ivolanikalou ko ira na bete vakailasu ka cakava me rairai ni vaka me ra muria tiko na lawa i Mosese—Sa tekivu vakatavuvulitaka vei ira ko Apinatai na iVakaro E Tini. Rauta na 148 B.K.

1 Ka sa yaco ni sa oti e rua na yabaki, sa vakalecaleca yani ena kedra maliwa ko Apinatai, ka ra sa sega kina ni kilai koya, a sa parofisai vei ira, ka kaya: Sa vakaroti au vakaoqo na Turaga, ka kaya—I Apinatai, mo la’ki parofisai vei ira na noqu tamata oqo, ni ra sa vakaukauwataka na lomadra ka sega ni via rogoca na noqu vosa, era sa sega talega ni veivutunitaka na nodra caka ca; o koya, au na asikovi ira kina ena noqu cudru, io, ena noqu cudru waqawaqa au na sikovi ira kina ena vuku ni nodra caka ca kei na itovo vakasisila.

2 Io, ena ca vei ira na itabatamata oqo! Ka sa kaya vei au na Turaga: Mo dodoka yani na ligamu ka parofisai ka kaya: Sa kaya vakaoqo na Turaga, ena qai yaco ni ena vuku ni nodra caka cala na itabatamata oqo, era na avakabobulataki kina ka sabici na bbaludra; io, era na vakasaurarataki mai vei ira na tamata, ka yaviti, era na kania na lewedra ko ira na vulituri, kei na koli, kei na manumanu kila.

3 Ka na qai yaco ni na vaka na isulu ena alovo bukawaqa katakata na bbula nei Noa na tui; ni na qai kila ko koya ni sai au na Turaga.

4 Ka na qai yaco ni’u na yaviti ira na noqu tamata oqo ena veivakararawataki ca, io, ena dausiga kei na amate dauveitauvi; ia au na vakayacora mera na btagiyaso ena siga taucoko.

5 Io, au na vakavuna me vesu e dakudra na aicolacola bibi; ka ra na vakasaurarataki me vaka na asa sa galu.

6 Ka na qai yaco ni’u na tala yani na uca cevata me yaviti ira; ena yaviti ira talega na acagi ni tokalau; ka ra na vakacaca ena nodra vanua na bmanumanu lalai ka kania talega na nodra sila.

7 Ka ra na yaviti ena mate dauveitauvi lelevu—ka’u na kitaka na veika kece oqo ena vuku ni nodra acaka cala kei na itovo vakasisila.

8 Ka na qai yaco ni kevaka era na sega ni veivutuni, au na avakarusai ira sara vakadua mai na delai vuravura; ia era na biuta tu mai e dua na bitukutuku, ka’u na maroroya me yaga vei ira na veimatanitu era na taukena na vanua oqo; io au na kitaka na veika oqo meu vakatakila kina na nodra itovo vakasisila na tamata oqo ki na veimatanitu tale e so. Ka a parofisaitaka tale ko Apinatai e vuqa na ka ca me baleti ira na tamata oqo.

9 Ka sa yaco ni ra sa cudruvi koya; ka ra sa tauri koya ka vesuki koya, ka kauti koya vua na tui ka kaya: Raica, keimami sa kauta mai vei kemuni na tamata oqo ni sa parofisaitaka na ca vei ira na nomuni tamata, ka kaya ni na vakarusai ira na Kalou.

10 Ia sa parofisaitaka talega na ca me baleta na nomuni bula, ka kaya ni na vaka wale ga na isulu ena loma ni lovo ni bukawaqa na nomuni bula.

11 Ka sa kaya talega ko koya ni na vaka na tolo ni kau, ia na tolo ni kau madu e loma ni were na nomuni bula; ka ra na cici baleta na manumanu kila ka buturaki sobu.

12 Ia sa kaya talega ni ko ni sa vaka na se ni soni sa madu, kevaka sa liwa mai na cagi, ena cagina yani e dela ni vanua. E kaya vakalecaleca toka, ni oqori na vosa ni Turaga. Sa kaya ni na yaco vakaidina vei kemuni na veika oqo kevaka ko ni sega ni veivutuni, ia, oqo ena vuku ni nomuni ivalavala ca.

13 Ia oqo, oi kemuni na tui, na cala levu cava ko ni sa vakayacora, se na ivalavala ca levu cava soti era sa kitaka na nomuni tamata ka me cudruvi keda kina na Kalou, se mai lewai keda kina na tamata oqo?

14 Ia oqo, oi kemuni na tui, raica, keimami sa tawacala, koi kemuni talega na tui ko ni sa sega ni caka cala; ka sa sega kina ni dina na vosa ni tamata oqo me baleti kemuni, ka tawayaga na nona parofisai.

15 Ia raica, eda sa kaukauwa, eda na sega ni vakabobulataki, se mera na kauti keda vakavesu na noda meca; io ko ni sa tiko sautu ena vanua oqo ka ko ni na sautu tiko ga.

16 Raica, keimami sa solia ki na ligamuni na tamata oqo; mo ni qai vakayacora vua na ka ko ni sa lewa.

17 Ka sa yaco ni sa lewa ko Noa na tui me biu ki na vale ni veivesu ko Apinatai; sa qai vakaroti ira na abete me ra mai bosea vata na ka me cakava vua.

18 Ka sa yaco mera sa kaya vua na tui: Me kau mai, me keimami mai vakatarogi koya; a sa vakarota na tui me kau mai e matadra.

19 Era sa qai tekivu vakataroga, me rawa ni ra vakacalai koya, ka beitaka kina; ia era sa kurabui ni a sauma vakadoudou na nodra taro; a sa asauma kece na nodra taro ka vakalasuya na nodra vosa kecega.

20 Ka sa yaco ni sa kaya vua e dua vei ira: A cava na ibalebale ni vosa sa volai tu, ka ra dau vakavuvulitaka na neimami qase ka vaka:

21 Sa avakaevei na kena lagilagi ena ulunivanua na yava ikoya sa kauta mai na itukutuku vinaka; sa vakarogoya mai na veisaututaki; sa kauta mai na itukutuku vinaka ni ka vinaka; ka vakarogoya mai na veivakabulai; ka sa tukuna ki Saioni, Sa veiliutaki na noda Kalou;

22 Ko ira na nomu vakatawa era na tabalaka na domodra, ka lagasere vata na domodra, ni ra na raica ena matana votu ni sa vakalesui Saioni mai na Turaga;

23 Dou ia vata mai na marau; dou lagasere vata mai na vanua lala tu e Jerusalemi ni sa vakacegui ira na nona tamata na Turaga, ka sa vakabulai Jerusalemi;

24 Sa vakaraitaka mai na Turaga na aligana tabu e matadra na veimatanitu kecega, ka ra na raica na veivakabulai ni noda Kalou, mai na iyalayala kece kei vuravura?

25 Ia oqo sa qai kaya vei ira ko Apinatai: Oi kemudou li na abete; dou sa vakalecalecava na vakavulici ira na tamata oqo mera kila na yalo ni parofisai; ka dou sa taroga vei au na ibalebale ni vosa oqo?

26 Au sa kaya vei kemudou, Ena ca vei kemudou ni dou sa vakatanitaka na sala ni Turaga! Kevaka dou sa kila tiko na ibalebale ni vosa oqo, ia dou a sega ga ni vakavuvulitaka; o koya oqo, dou sa vakatanitaka kina na sala ni Turaga.

27 Dou sa sega ni vakasaqara sara kina mo dou akila; o koya dou sa sega kina ni yalomatua. Ia a cava dou sa vakavulica tiko vei ira na tamata oqo?

28 Era sa kaya: Keimami vakavuvulitaka na lawa i Mosese.

29 Ia sa kaya tale vei ira ko koya: Kevaka dou sa vakavuvulitaka na alawa i Mosese, a cava dou sa sega kina ni muria? A cava dou sa domona kina na iyau? A cava dou sa ia kina na bveibutakoci ka vakamaumautaka na nomudou kaukauwa vei ira na yalewa dautagane, io, ka vakavuna me ra ivalavala ca na tamata oqo; oqo sa talai au mai kina na Turaga me’u mai parofisaitaka ni na yaco na ca vei ira na tamata oqo; io na ca levu sara?

30 Dou sa sega beka ni kila ni’u sa tukuna tiko na ka dina? Io, dou sa kila ni’u sa tukuna na ka dina; ka sa dodonu kina mo dou rere ena mata ni Kalou.

31 Ia ena qai yaco mo dou na yaviti ena vuku ni nomudou ivalavala ca, ni dou sa kaya dou sa vakatavuvulitaka na lawa i Mosese. Ia a cava dou sa bau kila me baleta na lawa i Mosese? aSa yaco li na veivakabulai ena lawa i Mosese? A cava dou kaya?

32 Era sa sauma ka kaya ni sa yaco na veivakabulai ena lawa i Mosese.

33 Ia oqo a sa kaya vei ira ko Apinatai: Au kila kevaka dou sa muria na ivakaro ni Kalou dou na bula; io, kevaka dou sa muria na ivakaro ka solia na Turaga vei Mosese mai na ulunivanua ko aSaineai, ka vaka:

34 aKoi au na Turaga na nomu Kalou, ko koya ka bkauti iko tani mai na vanua ko Ijipita, mai na vale ni veivakabobulataki.

35 Me kakua vei iko na Kalou atani, koi au duadua ga.

36 Mo kakua ni cakava vei iko e dua na matakau ceuceu, se dua na ivakatakarakara ni ka mai lomalagi e cake, se dua na ka ena vuravura e ra.

37 Sa qai kaya vei ira ko Apinatai, Dou sa muria tiko li na ka kece oqo? Au sa kaya vei kemudou, E segai, dou sa sega ni muria. Dou sa avakavulici ira tiko li na tamata me ra muria na ka kece oqo? Au sa kaya vei kemudou, E segai, dou sa sega ni kitaka vakakina.