1 Ut kik’ulman naq chirix xnumik wiib’ chihab’ naq kichal laj Abinadi sa’ xyanqeb’ chi jaljo ru li rilob’aal, jo’kan naq ink’a’ ke’xnaw ru, ut ki’ok chi aatinak jo’ profeet sa’ xyanqeb’, ut kixye: Jo’ka’in kinixtaqla li Qaawa’, kixye—At Abinadi, ayu ut aatinan jo’ profeet chiru lin tenamit a’in, xb’aan naq ke’xkawob’resi li raam chirix li waatin; moko ke’xjal ta xk’a’uxleb’ chirix lix maa’us aj b’aanuhomeb’; jo’kan ut, ^atinwula’aniheb’ sa’ injosq’il, relik chi yaal, sa’ xnimal injosq’il tinwula’aniheb’ sa’eb’ lix maa’usilal ut lix tz’eqb’eetalileb’.

2 Relik chi yaal, rahilal chiwanq sa’ xb’een li tasal tenamit a’in! Ut li Qaawa’ kixye we: Ye’ laa wuq’ ut aatinan jo’ profeet, ut chaye: Jo’ka’in naxye li Qaawa’, taak’ulmanq naq li tasal tenamit a’in, sa’ xk’ab’a’ lix maa’usilaleb’, te’k’ame’q chi ^amoosil, ut te’sak’e’q sa’ ^bxk’atqeb’ li re; relik chi yaal, ut te’alinasiiq xb’aaneb’ li winq, ut te’kamsiiq, ut eb’ li so’sol rub’el choxa, ut eb’ li tz’i’, relik chi yaal, ut eb’ li k’iche’ xul, te’xk’uxi xtib’eleb’.

3 Ut taak’ulmanq naq lix ^ayu’am li rey aj Noe k’eeb’ilaq xtz’aq jo’ jun li aq’ej sa’ jun tiqwal ^bk’atleb’aal; xb’aan naq a’an tixnaw naq laa’in li Qaawa’.

4 Ut taak’ulmanq naq laa’in tinsak’ lin tenamit a’in rik’inatq li rahil ch’a’ajkilal; relik chi yaal, rik’in we’ej ut rik’in ^ayajel; ut tink’eheb’ chi ^bayaynak chiru chixjunil li kutan.

5 Relik chi yaal, ut tink’e naq te’wanq li ^aiiq bak’b’il chirixeb’; ut te’tiikisiiq chi uub’ej chanchan jun li memil b’uur.

6 Ut taak’ulmanq naq laa’in tintaqla li saqb’ach sa’ xyanqeb’, ut a’an tixsak’eb’; ut te’sak’e’q ajwi’ rik’in li ^aiq’ nachal sa’ releb’ saq’e; ut eb’ li ^bkok’ xul te’tub’laaq ajwi’ sa’ xch’och’eb’, ut te’xk’ux li riyajeb’ nak’uxman.

7 Ut te’sak’e’q rik’in jun li nimla yajel—ut chixjunil a’in tinb’aanu sa’ xk’ab’a’ lix ^amaa’usilaleb’ ut xtz’eqb’eetalileb’.

8 Ut taak’ulmanq naq wi ink’a’ neke’xjal xk’a’uxl laa’in ^ateb’insach chaq chi junajwa chiru lix b’een li ruchich’och’; a’ut te’xkanab’ chirixeb’ jun li ^btz’iib’anb’il esil, ut tinkol rix a’an choq’ re jalaneb’ chik li tenamit li te’eechaninq re li ch’och’; relik chi yaal, a’in ajwi’ tinb’aanu re naq taaruuq tink’utb’esi lix tz’eqb’eetalil li tenamit a’in chiru jalaneb’ chik chi tenamit. Ut k’iila k’a’aq re ru kixch’olob’ laj Abinadi jo’ profeet re xjitb’al li tenamit a’in.

9 Ut kik’ulman naq ke’josq’o’ rik’in; ut ke’xchap ut ke’xk’am chi b’ak’b’o chiru li rey, ut ke’xye re li rey: K’e reetal, xqak’am chaq jun li winq chawu li xyeechi’i jo’ profeet rahilal chirix laa tenamit, ut naxye naq li Dios tixsacheb’.

10 Ut jo’kan ajwi’ jo’ profeet naxyeechi’i rahilal chirix laa yu’am, ut naxye naq laa yu’am taawanq chanchan junaq aq’ej sa’ jun k’atleb’aal re xam.

11 Ut jo’kan wi’chik, a’an naxye naq laa’at tatwanq chanchan junaq xtoonal pim, chanchan jun xtoonal li chaqi pim sa’ ch’och’, li nayeq’iik xb’aaneb’ li xul ut natene’ rub’el oqej.

12 Ut jo’kan wi’chik, naxye naq tatwanq chanchan ratz’um li k’ix, ut naq xq’ano’ chi tz’aqal, wi na’apun li iq’, natiikisiik chiru lix b’een li ch’och’. Ut naxpak’ rib’ naq a’ li Qaawa’ li xyehok re. Ut naxye naq taachalq chixjunil a’in sa’ aab’een wi ink’a’ nakajal aak’a’uxl, ut a’in xb’aan laa maa’usilal.

13 Ut anajwan, at rey, k’a’ru chi nimla maa’usilal xab’aanu, malaj k’a’ru chi ninqi maak xe’xb’aanu laa tenamit, re toojite’q xb’aan li Dios, malaj taaraqe’q aatin chiqix xb’aan li winq a’in?

14 Ut anajwan, at rey, k’e reetal, laa’o maak’a’ qamaak, ut laa’at, at rey, moko xatmaakob’ ta; jo’kan naq li winq a’in xtik’ti’ik chawix, ut x’aatinak jo’ profeet chi maak’a’ xyaalal.

15 Ut k’e reetal, kawo laa’o, moko too’ok ta chi moosil, chi moko took’ame’q chi preexil xb’aaneb’ li xik’ neke’ilok qe; relik chi yaal, ut laa’at xat-usa sa’ li ch’och’, ut toj tat-usaaq ajwi’.

16 K’e reetal, wahi’ li winq, naqaq’axtesi sa’ laa wuq’; naru taab’aanu re jo’ chanru nakak’oxla naq us.

17 Ut kik’ulman naq li rey aj Noe kixtaqla chi tz’ape’k laj Abinadi sa’ tz’alam; ut kixtaqla naq ^aeb’ laj tij chiru, te’xch’utub’ rib’ re taawanq sa’ ch’utam rik’ineb’, chirix k’a’ru tento raj tixb’aanu rik’in.

18 Ut kik’ulman naq eb’ a’an ke’xye re li rey: K’am chaq, re tooruuq chixpatz’b’al li na’leb’ chiru; ut li rey kixtaqla naq taak’ame’q chaq chiruheb’.

19 Ut ke’ok chixpatz’b’al li na’leb’ re, re naq te’xchap sa’ aatin, re naq chi jo’kan taawanq k’a’ru te’xjit wi’; a’b’anan a’an kixchaq’b’eheb’ chi kaw xch’ool, ut kixxaqab’ rib’ chiru chixjunil lix patz’omeb’, relik chi yaal, sachsookeb’ xch’ool chirix; xb’aan naq a’an kixxaqab’ rib’ chiruheb’ sa’ chixjunil lix patz’omeb’, ut ^akixsacheb’ xna’leb’ sa’ chixjunil li raatineb’.

20 Ut kik’ulman naq jun reheb’ kixye re: K’a’ru naraj naxye li aatin li tz’iib’anb’il, ut li k’utb’il xb’aaneb’ chaq li qayuwa’, li naxye:

21 ^aK’a’jo’ xch’ina-usal chaq chiruheb’ li tzuul li roq a’an li nak’amok re li chaab’il esilal; li napuktesin resil li tuqtuukilal; li naxk’am chaq li chaab’il esilal chirix li chaab’il; li napuktesin resil li kolb’a-ib’; li nayehok re Sion: Laa Dios na’awa’b’ejin;

22 Eb’ laa k’aak’alenel tenamit te’xtaqsi lix yaab’ kuxej; chi junajinb’il xyaab’eb’ xkux te’b’ichanq; xb’aan naq te’ril rik’in ruheb’ naq li Qaawa’ tixk’am chaq wi’chik Sion;

23 Chinumtaq xsahil eech’ool, chexb’ichanq sa’ komonil ex sachenaqil na’ajej re Jerusalen; xb’aan naq li Qaawa’ kixk’ojob’ xch’ool lix tenamit, a’an kixtoj rix Jerusalen;

24 Li Qaawa’ xt’usub’ lix santil ^atel sa’ rilob’aaleb’ chixjunil li tenamit, ut chixjunileb’ lix maril li ruchich’och’ te’ril lix kolb’a-ib’ li qaDios?

25 Ut anajwan laj Abinadi kixye reheb’: Ma laa’ex ^aaj tij, ut nekepak’ xtzolb’al li tenamit a’in, ut xtawb’al ru li musiq’ej re profeetil ch’olob’ank, a’ut nekeraj xnawb’al wik’in k’a’ru naraj naxye li k’a’aq re ru a’in?

26 Ninye eere, rahilal chichalq sa’ eeb’een xb’aan xpo’b’al ru lix b’e li Qaawa’! Xb’aan naq wi neketaw ru li k’a’aq re ru a’in ink’a’ xek’ut; jo’kan naq xepo’ ru lix b’e li Qaawa’.

27 Ink’a’ xek’e eech’ool ^achixtawb’al xyaalal; jo’kan naq moko wanjenaq ta eena’leb’. Jo’kan ut, k’a’ru nekek’ut chiru li tenamit a’in?

28 Ut eb’ a’an ke’xye: Naqak’ut lix chaq’rab’ laj Moises.

29 Ut jo’kan wi’chik a’an kixye reheb’: Wi nekek’ut lix ^achaq’rab’ laj Moises k’a’ put naq ink’a’ nekepaab’ laa’ex? K’a’ut naq nekek’e eech’ool chirix li b’ihomal? K’a’ut naq nekeb’aanu li ^bko’b’eetak yumb’eetak ut nekesachle eemetz’ew rik’ineb’ li ixq aj yumb’eet, relik chi yaal, ut nekek’eheb’ li tenamit a’in chixb’aanunkil li maak, toj reetal x’aje’ naq li Qaawa’ kinixtaqla chixch’olob’ankil profeetil aatin sa’ xb’een li tenamit a’in, relik chi yaal, jun li nimla ra sa’ xb’een li tenamit a’in?

30 Ma ink’a’ nekenaw naq ninye li yaal? Relik chi yaal, nekenaw naq ninye li yaal; ut tento raj texsiksotq chiru li Dios.

31 Ut taak’ulmanq naq xb’aaneb’ lee maa’usilal texsak’e’q, xb’aan naq xeye naq nekek’ut lix chaq’rab’ laj Moises. K’a’ru ut nekenaw chirix lix chaq’rab’ laj Moises? ^aMa nachal li kolb’a-ib’ xb’aan lix chaq’rab’ laj Moises? K’a’ru nekeye laa’ex?

32 Ut ke’chaq’ok ut ke’xye naq li kolb’a-ib’ xb’aan lix chaq’rab’ laj Moises nachal.

33 A’b’an anajwan laj Abinadi kixye reheb’: Ninnaw naq wi nekepaab’ lix taqlahom li Dios texkole’q; relik chi yaal, wi nekepaab’eb’ li taqlahom kixq’axtesi li Qaawa’ re laj Moises sa’ li tzuul ^aSinai, li neke’xye:

34 ^aLaa’in li Qaawa’ laa Dios, li ^bx’isink chaq aawe sa’ li ch’och’ Egipto, sa’ rochochil li moosil.

35 ^aMaajun chik Dios taawanq aawik’in chiwu laa’in.

36 Maayiib’ choq’ aawe junaq yiib’anb’il jalam-uuch, chi moko xjalam-uuch k’a’ruhaq wan sa’ choxa taqe’q, chi moko li k’a’aq re ru wan sa’ li ch’och’ taq’a.

37 Anajwan laj Abinadi kixye reheb’, Ma xeb’aanu chixjunil a’in? Ninye eere, ink’a’, moko xeb’aanu ta. Ut ma ^axetzoleb’ li tenamit a’in re te’xb’aanu chixjunil li k’a’aq re ru a’in? Ninye eere, ink’a’, moko xeb’aanu ta.