Ana Boki Motiaea

1 Ao ngkai ai akea te itabaraara iaon ^aaban Taraemera, i buakoia aomata ni kabane ake a mena i aan ana kairiri te uea ae Beniamina, ao e a maeka te uea ae Beniamina i nanon te rau ni karokoa tokin maiuna.

2 Ao e koro bukina bwa iai natina mwaane aika teniman; ao e araniia bwa Motiaea, ao Erorim, ao Ereman. Ao e tuatua bwa a na ^areireinaki aron aia ^btaetae ana bakatibu, bwa aonga n riki bwa mwaane aika a wanawana; ao bwa aonga n atai nanon taian taeka ni burabeti ake a tia n taekinaki mai nanon wiia aia bakatibu, ake anganaki mai iroun te Uea.

3 Ao e reireiniia naba taekan taian rongorongo ake a koreaki iaon bwaatua aika buraati, ni kangai: Natiu, I tangiria bwa kam na uringnga bwa ngke arona bwa akea ^abwaatua aikai, aika kanoaia taian rongorongo ma taian tua aikai, ao ti na tia n rinanon te ^baki ataibwai, i nanon boong aikai, n aki atai taekan ana bwai te Atua aika a raba.

4 Bwa e na bon aki kona tamara ae Riaai n uring bwaai aikai ni kabane, n reireiniia iai natina, ngke arona bwa akea te ibuobuoki man taian bwaatua aikai; bwa e a konaa ni wareki koroboki aikai ngkai e a tia n reireinaki aron aia ^ataetae I-Aikubita, ao e reireiniia natina kanoaia, ao a konaa n reireiniia natiia taekaia, ao ni karaoan aio ao a kakoroi bukin ana tua te Atua, are a karaoaki ni karokoa boong aikai.

5 I kangai nakoimi, natiu, ngke akea bwaai aikai, ake a tia ni ^akaawakinaki ma ni kateimatoaki ni bain te Atua, bwa ti aonga ni kona iai ni ^bwareki ao n oota n ana ^cbwai aika raba, ao ni iai iroura ana tua n taainako ake ti kona ni wareki, ao a na bon tia ara bakatibu ni bua i nanon roon te kerikaaki n aia aki onimaki, ao ti na riki n aiaroia tarira, aika Reimwanaite, ake a aki atai kanoan bwaai aikai, ao ake a aki kakoauai bwaai ake a tia n reireinaki, ibukin aia ^dkatei aia bakatibu, aika a aki eti.

6 O natiu, I tangiria bwa kam na uringnga bwa a koaua bwaai aika a taekinaki aikai, ao a ^akoaua naba rongorongo aikai. Ao taraia, ana bwaatua naba Nibwaai, aika kanoana aia rongorongo ma aia taeka ara bakatibu man te tai are a kitana iai Ierutarem ni karokoa ngkai, a bon koaua; ao ti atai koauaia ngkai ti noori ni matara.

7 Ao ngkai, natiu, I tangiria bwa kam na uringnga ni kakaonimaki ni ^aukoukori, bwa kam aonga ni kakabwaiaki iai; ao I tangiria bwa kam na ^bkaawakin ana tua te Atua, bwa kam aonga ni ^ckakabwaiaki iaon te aba n aron are e a tia ni ^dberita te Uea nakoia ara bakatibu.

8 Ao a mwaiti riki bwaai ake e reireiniia natina mwaane te Uea ae Beniamina, aika a aki koreaki i nanon te boki aio.

9 Ao e koro bukina bwa ngke e a bane ana taeka n reirei te Uea ae Beniamina nakoia natina mwaane, ao e a roko irouna te kara, ao e nooria bwa e na aki maan i mwaain ae na iranako kawain te aonaba ni kabane; mangaia ae e baireia bwa e tamaroa ae e na anga ueana nakon natina te mwaane temanna.

10 Mangaia ae e tua bwa e na kairaki Motiaea nakoina; ao aikai taeka ake e taekin nakoina, ni kangai: Natiu, I tangiria bwa ko na katanoata ni kabuta te aba aio nakoia aomata ni kabane aikai, aika ^akaain Taraemera, ma ana botanaomata Motiaea aika a maeka n te aba aio, bwa a na bane ni botaki; bwa n ningabong ao N na katanoata nakoia au botanaomata n oin bwanaau bwa ngkoe te uea ao te ^btia tautaeka iaon te botanaomata aio, are e a tia n anganiira te Uea ae Atuara.

11 Ao i rarikin anne, N na katokaa ^aaraia te botanaomata aio, are a na kona ni kinaaki iai mai buakoia aomata nako ake e a tia ni kairiia nako te Uea ae te Atua man te aba ae Ierutarem; ao I karaoa aio ngkai a tia ni botumwaaka ni kaawakin ana tua te Uea.

12 Ao N na anganiia te ara are e na aki manga kamaunaki, ma ti rinanon riaon te ^atua.

13 Eng, ao N na reita riki au taeka nakoim, bwa ngkana a bwaka n riaoan te ^atua ana aomata te Uea aika moan te tangiraki, ao n riki bwa te botanaomata ae buakaka ma ni wenenibure, ao e na kaaki taekaia te Uea, ao a na ^bmamara n ai aroia tariia; ao e na aki manga ^ckataniia ni mwaakana ae akea kabotauana ae moan te korakora, n aron are e a tia ni karaoia nakoia ara bakatibu ni kataniia.

14 Bwa I taekinna nakoim, bwa ngke e aki arora baina ni kataniia ara bakatibu ao a na tia ni bwaka nako nanon baia Reimwanaite, ao ni mate i aan aia kairiribai.

15 Ao e koro bukina bwa e a tia te uea ae Beniamina n taekin bwaai aikai ni kabane nakon natina, ao e a anganna te mwioko ibukin tauan mwiin nako bwain ueana.

16 I rarikin anne, e anganna naba te onimakinaki ibukin taian rongorongo ake a koreaki iaon ^abwaatua aika buraati; ma ana bwaatua naba Nibwaai; ao ana ^bkabaang Raban, ao te ^cbooro ke te bwai ni kairi, are e kairiia ara bakatibu i nanon te rereua, are e karaoaki iroun te Uea bwa aonga ni kairaki iai, ao aomata ni kabane n aron botumwaakaia ma kakaonimakia nakoina.

17 Mangaia ae ngkana a aki kakaonimaki ao a na aki waaki ke ni kabwaia i nanon mwanangaia, ma a na ^abutuaki ni kaokaki, ao a na taonaki n aki kukurein nanon te Atua; mangaia ae a na taonaki n te rongo ma karawawata nako, bwa aonga ni kauringaki iai oin mwiokoaia.

18 Ao ngkai, e koro bukina bwa e nako Motiaea ni karaoa are e a tia n tua tamana bwa e na karaoia, ao e katanoata nakoia aomata ni kabane ake a maeka iaon aban Taraemera bwa a na bane ni botaki, n nako nakon te tembora bwa a na ongo ana taeka tamana ake e na taekin nakoia.