1 Kuv txiv Maumoos ib tsab ntawv, uas tau sau rau kuv, Maulaunais; thiab nws tau raug sau rau kuv tom qab tsis ntev uas kuv raug hu los rau txoj kev qhuab qhia txoj moo zoo. Thiab qhov no yog tej uas nws tau sau rau kuv, hais tias:

2 Kuv tus tub Maulaunais, uas kuv hlub, kuv zoo siab heev uas koj tus Tswv Yexus Khetos tau txaus siab rau koj, thiab tau hu koj los rau hauv nws txoj kev qhuab qhia txoj moo zoo, thiab rau hauv nws txoj hauj lwm dawb huv.

3 Kuv nco ntsoov txog koj nyob hauv kuv tej kev thov Vajtswv, tau thov Vajtswv Leej Txiv tsis tu ncua los ntawm nws tus Me Nyuam Dawbuv lub npe, Yexus, kom nws, dhau hauv nws txoj kev zoo thiab txoj kev hlub tshua tsis muaj qhov kawg, yuav tsom kwm koj dhau hauv txoj kev tiv ntawm txoj kev ntseeg hauv nws lub npe kom mus txog thaum kawg.

4 Thiab nim no, kuv tus me tub es, kuv hais rau koj txog tej uas ua rau kuv nyuaj siab heev; vim nws ua rau kuv nyuaj siab tias yuav muaj tej kev sib cav sib ceg sawv nyob hauv nej.

5 Vim, yog kuv tau kawm qhov tseeb, tau muaj tej kev sib cav sib ceg nyob hauv nej ntsig txog txoj kev cai raus dej ntawm nej tej me nyuam yaus.

6 Thiab nim no, kuv tus me tub, kuv xav kom koj yuav rau siab ntso ua hauj lwm, kom yuav tshem tau qhov kev tsis yog loj no tawm ntawm nej mus; vim, yog rau qhov no ntag kuv thiaj li tau sau tsab ntawv no.

7 Vim tsis ntev tom qab uas kuv tau kawm tej yam no ntsig txog nej kuv tau thov tus Tswv txog qhov teeb meem ntawd. Thiab tus Tswv txoj lus tau los rau kuv los ntawm tus Vaj Ntsuj Plig Dawb Huv lub hwj chim, hais tias:

8 Cia li mloog Khetos tej lus, nej tus Txhiv Dim, nej tus Tswv thiab nej tus Vajtswv. Saib seb, kuv tau los rau hauv lub ntiaj teb tsis yog los hu cov neeg ncaj ncees tiam sis los hu cov neeg txhaum kom hloov siab lees txim; tej neeg tsis muaj mob yeej tsis xav tau kws tshuaj, tsuas yog lawv cov uas muaj mob xwb; yog li ntawd, tej me nyuam yaus yeej tsis muaj mob, vim lawv tsis tau txawj ua txhaum; yog li ntawd txoj kev foom ntawm Adas raug tshem tawm ntawm lawv nyob hauv kuv, kom nws tsis muaj hwj chim kav lawv; thiab txoj kev cai txiav tau raug tsum nyob hauv kuv.

9 Thiab tus Vaj Ntsuj Plig Dawb Huv tau ua Vajtswv txoj lus rau kuv paub raws li no; yog li ntawd, kuv tus me tub uas kuv hlub es, kuv paub tias nws yog ib txoj kev thuam heev rau Vajtswv, tias nej yuav muab tej me nyuam yaus ua kev cai raus dej.

10 Saib seb kuv hais rau koj tias koj yuav tsum qhia tej yam no—txoj kev hloov siab lees txim thiab txoj kev ua kev cai raus dej rau cov uas lav ris tau thiab txawj ua txhaum; muaj tseeb tiag, qhia tej niam txiv kom lawv yuav tsum hloov siab lees txim thiab ua kev cai raus dej, thiab txo lawv tej hwj chim tib yam li tej me nyuam yaus, thiab lawv sawv daws yuav dim nrog lawv tej me nyuam yaus.

11 Thiab lawv tej me nyuam yaus tsis tas yuav hloov siab lees txim, los sis tsis tas ua kev cai raus dej. Saib seb, txoj kev cai raus dej yog ua rau txoj kev hloov siab lees txim kom muaj tau puv npo li tej lus txib rau txoj kev zam txim ntawm tej kev txhaum.

12 Tiam sis tej me nyuam yaus muaj txoj sia nyob hauv Khetos, twb txij li thaum chiv keeb ntawm lub ntiaj teb los; yog tsis muaj li ntawd, Vajtswv yeej yog Vajtswv tsis tas, thiab kuj yog tus Vajtswv uas txawj hloov, thiab yog tus uas saib neeg ntsej muag ua; vim muaj pes tsawg leej me nyuam yaus uas tau tuag lawm es tsis tau ua kev cai raus dej!

13 Yog li ntawd, yog tej me nyuam yaus tsis muaj peev xwm raug cawm dim taus yog tsis tau ua kev cai raus dej, es lawv yuav tsum tau mus rau hauv ntuj txiag teb tsaus uas tsis muaj qhov kawg.

14 Saib seb kuv hais rau nej, tias tus uas xav tias tej me nyuam yaus yuav tsum ua kev cai raus dej tab tom nyob hauv tus kwj tob tob ntawm txoj kev iab ntsim thiab nyob hauv tej kev raug txim ntawm txoj kev tsis ncaj; vim nws tsis tau muaj txoj kev ntseeg los sis txoj kev cia siab, los sis tsis muaj txoj kev siab hlub; yog li ntawd, nws yuav raug txiav tawm thaum tseem sij xav li no, nws yeej yuav tsum tau nqis mus rau hauv ntuj txiag teb tsaus.

15 Vim nws yog ib qho kev phem heev uas xav tias Vajtswv cawm ib tug me nyuam vim yog txoj kev ua kev cai raus dej, thiab lwm tus yuav tsum piam sij vim nws tsis tau ua txoj kev cai raus dej.

16 Kev txom nyem yuav raug rau lawv cov uas yuav hloov tus Tswv tej kev mus raws li no, vim lawv yuav piam sij tsuas yog lawv yuav hloov siab lees txim xwb. Saib seb, kuv hais yam tsis ntshai, tau muaj cai los ntawm Vajtswv; thiab kuv tsis ntshai yam uas neeg muaj peev xwm ua tau; vim txoj kev hlub tiag tiag yeej ntiab tau tag nrho tej kev txhawj ntshai tawm.

17 Thiab kuv puv npo nrog txoj kev siab hlub, uas yog txoj kev hlub uas kav ib txhis; yog li ntawd, tag nrho tej me nyuam yaus zoo tib yam rau kuv; yog li ntawd, kuv hlub tej me nyuam yaus nrog txoj kev hlub tiag tiag; thiab lawv sawv daws zoo ib yam thiab yog cov uas tau txais txoj kev cawm seeg.

18 Vim kuv paub tias Vajtswv tsis yog ib tug Vajtswv uas tsis zoo tas, los sis tsis yog ib tug uas txawj hloov; tiam sis nws yog tus uas tsis txawj hloov mus ib txhiab ib txhis li.

19 Tej me nyuam yaus tsis txawj hloov siab lees txim; yog li ntawd, nws yog ib qho kev phem heev uas tsis kam lees tej kev hlub tshua dawb paug ntawm Vajtswv los rau lawv, vim lawv sawv daws muaj sia nyob hauv nws vim yog nws txoj kev hlub tshua.

20 Thiab nws tus uas hais tias tej me nyuam yaus yuav tsum ua kev cai raus dej twb tsis lees txais tej kev hlub tshua ntawm Khetos, thiab muab txoj kev theej txhoj ntawm nws thiab lub hwj chim ntawm nws txoj kev txhiv dim suav tsis muaj nqi.

21 Kev txom nyem yuav raug rau cov ntawd, vim lawv yuav muaj xwm txheej ntawm txoj kev tuag, ntawm ntuj txiag teb tsaus, thiab ntawm txoj kev tsim txom uas tsis muaj qhov kawg. Kuv hais tej no yam tsis ntshai; Vajtswv tau txib kuv. Cia li mloog lawv thiab ua raws li, los sis tej ntawd yuav sawv tawm tsam nej nyob ntawm lub rooj txiav txim ntawm Khetos.

22 Vim saib seb tag nrho tej me nyuam yaus muaj txoj sia nyob hauv Khetos, thiab txoj kev cai tsis raug rau lawv sawv daws. Vim lub hwj chim ntawm txoj kev txhiv dim los rau saum lawv sawv daws uas tsis muaj txoj kev cai; yog li ntawd, tus uas tsis raug txim, los sis tus uas tsis nyob hauv qab txoj kev raug txim, hloov siab lees txim tsis tau; thiab txoj kev raus dej rau cov li ntawd tsis muaj nuj nqis dab tsi—

23 Tiam sis nws yog txoj kev thuam rau Vajtswv, tau tsis lees yuav tej kev hlub tshua ntawm Khetos, thiab lub hwj chim ntawm nws tus Ntsuj Plig Dawb Huv, thiab tau cia siab rau tej hauj lwm uas tuag lawm.

24 Saib seb, kuv tus me tub, qhov no yuav tsum tsis txhob ua; vim txoj kev hloov siab lees txim yog rau lawv cov uas nyob hauv qab txoj kev raug txim thiab hauv qab ntawm txoj kev foom ntawm ib txoj kev cai uas tau ua txhaum.

25 Thiab thawj thawj cov txiv ntawm txoj kev hloov siab lees txim yog txoj kev cai raus dej; thiab txoj kev cai raus dej los tau ntawm txoj kev ntseeg los rau txoj kev ua tej lus txib kom puv npo; thiab txoj kev ua tej lus txib kom puv npo coj tau txoj kev zam tej kev txog txhaum los;

26 Thiab txoj kev zam tej kev txog txhaum coj tau txoj kev txo hwj chim, thiab siab mos siab muag los; thiab vim yog txoj kev txo hwj chim thiab siab mos siab muag txoj kev saib xyuas ntawm tus Vaj Ntsuj Plig Dawb Huv thiaj los tau, uas yog tus Nplij kom muaj txoj kev cia siab thiab txoj kev hlub tiag tiag, uas yog txoj kev hlub uas tiv tau los ntawm txoj kev rau siab ntso thov, mus txog thaum qhov kawg yuav los, thaum uas tag nrho cov ntseeg yuav tau nrog Vajtswv nyob.

27 Saib seb, kuv tus me tub, kuv yuav sau ntawv rau koj dua yog kuv tsis tawm mus tawm tsam cov Neeg Lamas tsis ntev no. Saib seb, txoj kev khav ntawm haiv neeg no, los sis cov neeg ntawm cov Neeg Nifais, tau qhia tseeb txog lawv txoj kev puas tsuaj tsuas yog lawv yuav hloov siab lees txim xwb.

28 Thov Vajtswv rau lawv, kuv tus me tub, kom txoj kev hloov siab lees txim yuav los tau rau lawv. Tiam sis saib seb, kuv ntshai nyob tsam tus Ntsuj Plig yuav tseg tsis nrog lawv nyob lawm; thiab nyob rau feem av ntawm no lawv kuj tau nrhiav txo tag nrho tej hwj chim thiab cai uas los ntawm Vajtswv los; thiab lawv tab tom tsis lees yuav tus Vaj Ntsuj Plig Dawb Huv.

29 Thiab tom qab uas tau tsis lees yuav ib txoj kev paub zoo heev, kuv tus me tub, lawv yuav tsum piam sij tsis ntev no, kom muaj puv npo li tej kev qhia tej uas yuav muaj los yav tom ntej uas tau raug hais los ntawm tej yaj saub, thiab tib yam li tej lus ntawm peb tus Cawm Seeg kiag.

30 Nyob zoo nawj, kuv tus me tub, mus txog thaum uas kuv yuav sau ntawv rau koj, los sis tau rov ntsib koj dua. Amees.