1 Thiab nim no kuv, Maulaunais, sau ob peb lo lus ntawm kuv txiv Maumoos tej lus, uas nws tau hais txog kev ntseeg, kev cia siab, thiab kev siab hlub; nws hais rau cov neeg raws li tus txheej txheem no, thaum nws qhia lawv nyob hauv lub tsev teev ntuj uas lawv tau ua rau qhov chaw teev tiam.

2 Thiab nim no kuv, Maumoos, hais rau nej, kuv cov kwv tij uas kuv hlub; thiab twb yog los ntawm txoj kev tshav ntuj ntawm Vajtswv uas yog Leej Txiv, thiab peb tus Tswv Yexus Khetos, thiab nws lub siab xav uas dawb huv, vim yog lub txiaj ntsim ntawm nws txoj kev hu kuv, es kuv thiaj li muaj lub sij hawm no los hais lus rau nej.

3 Yog li ntawd, kuv yuav hais rau nej cov uas yog mej zeej ntawm lub koom txoos, cov uas nyob kaj siab lug coj raws li Khetos, thiab cov uas twb muaj kev cia siab txaus nej thiaj li muaj peev xwm nkag tau mus rau hauv tus Tswv qhov chaw so, txij lub sij hawm no mus lawm yav tom ntej kom txog thaum nej yuav tau so nrog nws nyob saum ntuj ceeb tsheej.

4 Thiab nim no kuv cov kwv tij, kuv txiav txim li no rau nej twb vim yog nej taug kev thaj yeeb nrog noob neej.

5 Vim kuv nco qab txog Vajtswv txoj lus uas hais tias los ntawm tej yam lawv ua nej yuav paub lawv; vim yog tias lawv ua zoo, ces lawv yeej zoo thiab.

6 Vim saib seb, Vajtswv tau hais tias ib tug neeg uas yog neeg phem yeej ua tsis tau tej uas zoo; yog tias nws muab khoom txi rau Vajtswv, los sis thov Vajtswv, tsuas yog tias nws yuav mob siab ua tej ntawd tiag tiag xwb tsis li ces yuav tsis muaj nuj nqis dab tsi rau nws.

7 Vim saib seb, twb tsis muab suav rau nws tias yog kev ncaj ncees.

8 Vim saib seb, yog ib tug neeg uas yog neeg phem muab khoom txi pub rau Vajtswv, nws twb tsis txaus siab hlo muab; yog li ntawd twb muab suav rau nws tib yam li tias nws tau khaws khoom txi ntawd tseg; yog li ntawd Vajtswv suav hais tias nws phem.

9 Thiab kuj suav hais tias ib tug neeg yog neeg phem tib yam li ntawd, yog nws yuav thov Vajtswv thiab tsis mob siab thov tiag tiag; muaj tseeb tiag, thiab twb tsis muaj nuj nqis dab tsi rau nws, vim Vajtswv twb tsis txais cov uas zoo li ntawd.

10 Yog li ntawd, ib tug neeg uas yog neeg phem yeej ua tsis tau tej uas zoo; thiab nws yeej tsis muab khoom txi uas zoo.

11 Vim saib seb, ib lub qhov dej txhawv uas iab yeej txhawv tsis tau cov dej zoo; thiab ib lub qhov dej txhawv uas zoo yeej txhawv tsis tau cov dej iab; yog li ntawd, ib tug neeg uas yog tus dab phem ib tug tub qhe yeej nrog Khetos mus tsis tau; thiab yog tias nws coj raws li Khetos nws ua tsis tau tus dab phem ib tug tub qhe.

12 Yog li ntawd, txhua yam uas zoo yog los ntawm Vajtswv los; thiab tej uas phem yog los ntawm tus dab phem los; vim tus dab phem yog Vajtswv ib tug yeeb ncuab, thiab tawm tsam nws tsis tu ncua, thiab caw thiab ntxias kom ua txhaum, thiab kom ua tej uas phem tsis tu ncua.

13 Tiam sis saib seb, tej uas los ntawm Vajtswv caw thiab yaum kom ua zoo tsis tu ncua; yog li ntawd, txhua yam uas caw thiab yaum kom ua zoo, thiab hlub Vajtswv, thiab ua hauj lwm rau nws, yog tej kev tshoov siab uas los ntawm Vajtswv.

14 Yog li ntawd, ceev faj, kuv cov kwv tij uas kuv hlub, kom nej tsis txhob txiav txim tias tej uas phem yog los ntawm Vajtswv, los sis txiav txim tias tej uas zoo thiab los ntawm Vajtswv yog los ntawm tus dab phem.

15 Vim saib seb, kuv cov kwv tij, Vajtswv yeej cia rau nej txiav txim, xwv kom nej yuav paub qhov zoo thiab qhov phem; thiab txoj kev txiav txim yeej pom tseeb, npaum li qhov txawv ntawm nruab hnub thiab hmo ntuj, xwv kom nej yuav paub zoo tag nrho.

16 Vim saib seb, twb muab Khetos tus Ntsuj Plig rau txhua tus neeg, xwv kom nws yuav paub qhov zoo thiab qhov phem; yog li ntawd, kuv qhia txoj kev txiav txim rau nej; hais tias txhua yam uas caw kom ua zoo, thiab yaum kom ntseeg Khetos, yog xa tawm los ntawm Khetos lub hwj chim thiab lub txiaj ntsim; yog li ntawd nej yuav paub zoo tag nrho tias tej no yog los ntawm Vajtswv los.

17 Tiam sis txhua yam uas yaum tib neeg kom ua phem, thiab txhob ntseeg Khetos, thiab xyeej nws, thiab txhob ua hauj lwm rau Vajtswv, ces nej yuav paub zoo tag nrho tias tej no yog los ntawm tus dab phem los; vim tus dab phem yeej ua hauj lwm raws li tus txheej txheem no, nws yeej tsis yaum ib tug neeg los ua zoo li, tsis yaum tiag, tsis yaum ib tug li; nws cov tim tswv los tib yam; cov uas ywj lawv tus kheej rau nws los tib yam.

18 Thiab nim no, kuv cov kwv tij, vim nej twb paub txoj kev kaj uas nej yuav siv los txiav txim, txoj kev kaj uas yog Khetos txoj kev kaj, ua zoo saib kom nej tsis txhob txiav txim yuam kev; vim tias los ntawm tib txoj kev txiav txim uas nej txiav txim ntawd tus Tswv yuav txiav txim rau nej.

19 Yog li ntawd, kuv thov nej, cov kwv tij, kom nej rau siab ntso tshawb xyuas nyob hauv Khetos txoj kev kaj kom nej yuav paub qhov zoo thiab qhov phem; thiab yog tias nej yuav ua txhua yam uas zoo, thiab tsis txhob thuam tej ntawd, nej yeej yuav los ua Khetos ib tug me nyuam tiag.

20 Thiab nim no, kuv cov kwv tij, yuav ua li cas nej thiaj yuav ua tau txhua yam uas zoo?

21 Thiab nim no kuv yuav hais txog txoj kev ntseeg ntawd, qhov uas kuv tau hais tias kuv yuav hais; thiab kuv yuav qhia nej txoj kev uas nej yuav ua tau txhua yam uas zoo.

22 Vim saib seb, Vajtswv yeej paub txhua yam, vim nws kav ib txhiab kav ib txhis, saib seb, nws xa cov tim tswv los txhawb pab noob neej, los ua tshwm sim txog Khetos txoj kev los; thiab los ntawm Khetos yuav muaj tau txhua yam zoo los.

23 Thiab Vajtswv kuj tau tshaj tawm rau cov yaj saub, los ntawm nws lub qhov ncauj kiag, hais tias Khetos yuav los.

24 Thiab saib seb, twb muaj ntau txoj kev uas nws tau ua ntau yam tshwm sim los rau noob neej, uas yeej zoo; thiab txhua yam uas zoo yog los ntawm Khetos los; tsis li ntawd ces tib neeg yeej poob lawm, thiab yuav tsis muaj ib qho zoo los rau lawv.

25 Yog li ntawd, los ntawm cov tim tswv txoj kev txhawb pab, thiab los ntawm txhua lo lus uas tawm ntawm Vajtswv lub qhov ncauj los, tib neeg pib muab siab rau ntseeg Khetos; thiab li no los ntawm kev ntseeg, lawv thiaj ua tau txhua yam uas zoo; thiab yog li ntawd mus txog thaum Khetos los.

26 Thiab tom qab nws los tib neeg kuj yuav txais kev cawm seej los ntawm kev ntseeg nws lub npe; thiab los ntawm kev ntseeg, lawv hloov los ua Vajtswv cov tub. Thiab tseeb npaum li Khetos muaj sia nyob nws hais tej lus no rau peb cov yawg koob, hais tias: Qhov uas nej yuav thov Leej Txiv los ntawm kuv lub npe, uas yog qhov zoo, nrog kev ntseeg cia siab ntsoov tias nej yuav tau txais, saib seb, Vajtswv yuav ua qhov ntawd rau nej.

27 Yog li ntawd, kuv cov kwv tij uas kuv hlub, tej txuj ci tseem ceeb puas tau tsum vim Khetos tau nce mus rau saum ntuj ceeb tsheej, thiab tau mus zaum ntawm Vajtswv sab tes xis, mus aws ntawm Leej Txiv nws tej cai muaj kev hlub tshua uas nws muaj rau noob neej?

28 Vim nws tau ua kom muaj raws li txhua qhov ntsiab lus ntawm txoj kev cai, thiab nws aws tag nrho cov uas ntseeg nws; thiab cov uas ntseeg nws yuav muab siab npuab txhua yam uas zoo; yog li ntawd nws hais daws noob neej zaj; thiab nws nyob saum ntuj ceeb tsheej mus ib txhis li.

29 Thiab vim yog nws tau ua li no, kuv cov kwv tij uas kuv hlub es, tej txuj ci tseem ceeb puas tau tsum? Saib seb kuv hais rau nej tias, Tsis tau; thiab cov tim tswv los kuj tsis tau tsum los txhawb pab noob neej.

30 Vim saib seb, lawv twb ywj rau nws, kom mus txhawb pab raws li nws txoj lus txib, ua lawv tus kheej tshwm sim rau cov uas muaj kev ntseeg khov thiab muaj lub siab ruaj ua txhua yam zoo li Vajtswv.

31 Thiab lub luag hauj lwm ntawm lawv txoj kev qhuab qhia yog hu kom tib neeg hloov siab lees txim, thiab ua kom muaj raws li thiab ua txoj hauj lwm ntawm Leej Txiv tej kev khi lus, uas nws tau khi rau noob neej, los npaj txoj kev nyob hauv noob neej, los ntawm txoj kev tshaj tawm Khetos txoj lus rau cov neeg uas tus Tswv tau xaiv tseg, kom lawv ua tim khawv txog nws.

32 Thiab vim ua li no, tus Tswv uas yog Vajtswv thiaj npaj tau txoj kev kom cov neeg uas seem tshuav yuav ntseeg Khetos, xwv kom tus Vaj Ntsuj Plig Dawb Huv yuav muaj chaw nyob hauv lawv lub siab, raws li Vajtswv lub hwj chim; thiab raws li tus txheej txheem no Leej Txiv ua kom muaj tej kev khi lus uas nws tau khi rau noob neej.

33 Thiab Khetos tau hais tias: Yog nej yuav muaj kev ntseeg kuv nej yuav muaj hwj chim ua tau txhua yam uas kuv xav tias tsim nyog ua.

34 Thiab nws tau hais tias: Cia li hloov siab lees txim, nej txhua tus uas nyob thoob plaws lub ntiaj teb, thiab los cuag kuv, thiab ua kev cai raus dej los ntawm kuv lub npe, thiab muaj kev ntseeg kuv, xwv kom nej yuav txais kev cawm dim.

35 Thiab nim no, kuv cov kwv tij uas kuv hlub es, yog tias tej uas kuv tau hais rau nej no muaj tseeb, thiab Vajtswv yuav ua rau nej paub, los ntawm lub hwj chim thiab lub yeeb koob loj nyob hauv hnub kawg, hais tias tej no muaj tseeb, thiab yog hais tias tej no muaj tseeb lub caij ntawm tej txuj ci tseem ceeb puas tau tsum?

36 Los sis cov tim tswv puas tau tsum tshwm sim los rau noob neej? Los sis nws puas tau tuav tseg tus Vaj Ntsuj Plig Dawb Huv lub hwj chim tsis pub rau lawv? Los sis nws puas yuav ua li ntawd, thaum sij hawm tseem muaj, los sis thaum lub ntiaj teb tseem nyob, los sis tseem tshuav ib tug neeg nyob rau haud uas tsis tau dim?

37 Saib seb kuv hais rau nej tias, Tsis yog li ntawd; vim twb yog los ntawm kev ntseeg es thiaj ua tau tej txuj ci tseem ceeb; thiab twb yog los ntawm kev ntseeg es cov tim tswv thiaj li tshwm sim thiab los txhawb pab tib neeg; yog li ntawd, yog tej no tau tsum lawm tiag ces kev txom nyem yuav raug noob neej, vim muaj li no vim yog txoj kev tsis ntseeg, thiab txhua yam twb tsis muaj qab hau.

38 Vim raws li Khetos tej lus, cawm tsis tau ib tug neeg dim, tsuas yog tias lawv yuav ntseeg nws lub npe xwb; yog li ntawd, yog tias tej no tau tsum lawm, ces kev ntseeg los kuj tau tsum lawm thiab; thiab tib neeg ua neej nyob phem kawg nkaus, vim lawv nyob xws li twb tsis tau muaj txoj kev txhiv dim.

39 Tiam sis saib seb, kuv cov kwv tij uas kuv hlub es, kuv xav tias nej yeej zoo tshaj tej no, vim kuv xav tias nej yeej muaj kev ntseeg Khetos vim yog nej lub siab mos siab muag; vim tias yog nej tsis muaj kev ntseeg nws ces twb tsis tsim nyog suav nej nrog cov neeg ntawm nws lub koom txoos.

40 Thiab ntxiv, kuv cov kwv tij uas kuv hlub es, kuv yuav hais rau nej ntsig txog kev cia siab. Yuav ua li cas nej thiaj muaj tau kev ntseeg, tsuas yog tias nej yuav tsum muaj kev cia siab xwb?

41 Thiab nej yuav cia siab rau yam dab tsi? Saib seb kuv hais rau nej tias nej yuav tsum muaj kev cia siab los ntawm Khetos txoj kev theej txhoj thiab lub hwj chim ntawm nws txoj kev sawv rov los, cia siab tias yuav muab nej tsa sawv rau txoj sia nyob mus ib txhis thiab muaj li no los twb vim yog nej txoj kev ntseeg nws raws li txoj kev cog lus.

42 Yog li ntawd, yog tias ib tug neeg muaj kev ntseeg nws yuav tsum muaj kev cia siab; vim tias yog tsis muaj kev ntseeg ces yeej muaj tsis tau kev cia siab.

43 Thiab ntxiv, saib seb kuv hais rau nej tias nws twb muaj tsis tau kev ntseeg thiab kev cia siab, tsuas yog tias nws yuav ua siab mos siab muag thiab txo siab txo ntsws xwb.

44 Yog tsis li ntawd, nws txoj kev ntseeg thiab txoj kev cia siab twb tsis muaj qab hau, vim twb tsis muaj ib tug uas Vajtswv pom zoo, tsuas yog cov uas muaj siab mos siab muag thiab txo siab txo ntsws xwb; thiab yog tias ib tug neeg muaj siab mos siab muag thiab txo siab txo ntsws, thiab lees los ntawm tus Vaj Ntsuj Plig Dawb Huv lub hwj chim tias Yexus yog tus Khetos, nws yuav tsum muaj kev siab hlub; vim tias yog nws tsis muaj kev siab hlub ces nws tsis muaj nuj nqis dab tsi; yog li ntawd nws yuav tsum muaj kev siab hlub.

45 Thiab kev siab hlub tiv taus ntev, thiab siab zoo, thiab tsis xav tau luag tug, thiab tsis khav txiv, tsis xav rau nws tus kheej xwb, tsis chim sai, tsis xav phem, thiab tsis nyiam kev ua phem tiam sis nyiam qhov tseeb, tiv txhua yam, ntseeg txhua yam, cia siab rau txhua yam, nyiaj txhua yam.

46 Yog li ntawd, kuv cov kwv tij uas kuv hlub es, yog nej tsis muaj kev siab hlub, ces nej twb tsis muaj nuj nqis dab tsi, vim kev siab hlub yeej tsis ploj ib zaug li. Yog li ntawd, cia li muab siab npuab txoj kev siab hlub, uas yog qhov zoo tshaj plaws txhua yam, vim txhua yam yeej yuav ploj—

47 Tiam sis kev siab hlub twb yog Khetos txoj kev hlub uas dawb paug, thiab yuav nyob mus ib txhis; thiab tus uas Vajtswv pom hais tias muaj txoj kev siab hlub ntawd thaum txog hnub kawg, tus ntawd yuav tau zoo.

48 Yog li ntawd, kuv cov kwv tij uas kuv hlub es, cia li thov Leej Txiv kawg siab kawg ntsws, xwv kom nej yuav muaj txoj kev hlub no puv npo, uas nws tau muab rau tag nrho cov uas coj raws li nws Leej Tub, Yexus Khetos, tiag tiag; xwv kom nej yuav hloov los ua Vajtswv cov tub; xwv kom thaum nws yuav tshwm los peb yuav zoo li nws, vim peb yuav pom nws tseeb tias nws zoo li cas tiag; xwv kom peb yuav muaj txoj kev cia siab li no; xwv kom Vajtswv yuav ua rau peb hloov ua neeg huv ib yam li nws twb huv. Amees.